العوده الى مصر .. قرار صعب ..!!!

[مسالم]

السلام عليكم ....

ذهبت الى الوطن ككل عام لقضاء الاجازه السنويه بين الاهل والاقارب فقط .. ولا يوجد اصدقاء .. فقد فقدتهم جميعا عندما تركت الاسكندريه بعد الجامعه ومن ثم تركت مصر الى العمل في الغربه .. زمن طويل ..

المهم .. اثناء تمتعي بالاجازه مع الاهل .. فوجئت بزميل عمل سابق يبحث عني لكي يعرض علي وظيفه جيده بشركتهم .. ويسألني اذا كان الآوان قد آن لنزولي الى مصر والارتباط بعمل هناك قبل ان يمضي قطار العمر .. وتكون العوده مجبره .. وتكون الفرصه آنذاك هي ايجاد فرصه على احد كراسي قهوة المعاشات او غيرها..

الحقيقه ان فكرة الرجوع الى مصر نفسها هي التي شغلتني .. وضغطت على الالم الدفين .. امتى حنرجع ..؟؟ العمر بيجري .. وسنين الغربه طالت .. اين الاصدقاء .. اين مرافقة الاهل في السراء والضراء .. فين السهرات والذكريات .. فين المناقشات والحوارات الفعليه ...

فين وفين .. وفين ..

كعادة المصريين المغتربين .. دائماً يبحثون عن العوده .. ولكنهم لا يفعلون .. فكرت كثيراً في العرض المقدم لي .. وطبعا هناك فرق كبير بين هنا وهناك .. ولكني ارى ان العرض كبدايه لا بأس به ..

سؤالي لأهل الخبره من المقيمين في مصر من اصحاب الابناء الذين يتعلمون في المدارس الاجنبيه .. المتوسطه .. كم تتكلف الحياه الكريمه في مصر شهرياً .. يعني ممكن اصرف كام في الشهر على نفسي والعائله والسياره وخلافه .. في ظل حياه كريمه ..

هل من مجيب ؟؟؟ :closedeyes:

[Horus]

عزيزي مسلم

أنا بفكر زي حضرتك تمام .. إنو لازم أنزل مصر في أسرع وقت .. خصوصاً عندي أولاد داخلين على سن المراهقة .. و إنت عرف السن د محتاج تربية و توجيه .. المجتمع هنا مش هيديك فرصة تربيهم زي مانتا عايز ..

قعدت مع نفسي ...

طيب مصر .. الاوضاع هناك متسرش .. والعيشة غالية نار ..

لو نزلت .. القرشين إلي عملتهم غالباً حيروحو .. و هرجع عالحديدة ..

الحقيقة كنت محتار على ألاخر ..

انما صليت استخارة و قعدت مع نفسي ..

قلت ..

لو استمريت هنا كمان ٥ سنين هاكون زبطت نفسي مادياً

و لو نزلت مصر ٥ سنين .. هرجع عل حديدة ..

إلا لو حصلت معجزة و لقيت شغل كويس في مصر ..

بس كمان النتيجة الاكيدة ٩٩٪ لو استمريت هنا .. اني

هاكون خسرت أولادي ..

هيتحولو لكنديين .. و مش هعرف ارجاعهم تاني

عشان كدة أنا قررت اني نازل يعني نازل ...

اجابت سؤال حضرتك عن المصاريف في مصر

8٠٠٠٠ - ١٠٠٠٠ جنيه فالشهر ... غير المدارس

ربنا يوفقك

تم تعديل 17 أغسطس 2008 بواسطة Horus

[adrianocrespo]

يا جدعان ايه الارقام الرهيبه دي

10000 جنيه شهريا

ده في ناس بتاخد 300 وعايشه

و بالنسبه للدكتور حورس ................. ليه مينفعش تربي اولادك بره و هل اكيد حيطلعوا سيئين .......... ايه اللي حضرتك خايف منه بالضبط ................ هل هي الحريه الجنسيه مثلا؟

و شكرا

[sigma]

يا جدعان ايه الارقام الرهيبه دي

10000 جنيه شهريا

ده في ناس بتاخد 300 وعايشه

و بالنسبه للدكتور حورس ................. ليه مينفعش تربي اولادك بره و هل اكيد حيطلعوا سيئين .......... ايه اللي حضرتك خايف منه بالضبط ................ هل هي الحريه الجنسيه مثلا؟

و شكرا

مع إحترامى للرد ولكن من الطبيعى إنك بتجيب ولادك مصر بعد ماتعودوا على أساسيات معينه فى حياتهم أكيد 300 جم مش حتنفع ، والراجل أبو 300 جم ده ما يعرفش أصلا غير إللى بيشوفه من خلال حياته وهو ظبط نفسه على هذا الأساس

[iloveegypt]

الاخ الفاضل مسالم الاخ الفاضل حورس

اهم حاجة الاولاد اهم بكتير من الفلوس

بالنسبة للعيشه فى مصر بدون مدارس اجنبية ولاسرة تتكون نمن اربعة افراد اكل وشرب متوسط ممكن 1000-2000 حسب المكان

طبعا بدون السكن وفى ناس عايشة قى مصر اقل من كده بكتيير

انا زيكم فى الغربة بس اول ماولادى يخشوا مدارس هبلغ فرار الى حبيبتى مصر

وياريت محدش يقولك البلد غالية والظروف صعبة الكلام ده كل مبالغ فيه الاسعار فى مصر فعلا غليت بس مقارنة بالخليج مصر تزال ارخص بكتيير ولو الرجوع بفرصة عمل حتى لو اقل من الغربة اكيد مصر افضل علشان الاولادوالله انا كنت عايش فى مصر من سنتين زى الفل بس كنت محتاج شوية فلوس مش اكتر لكن العيشة فى مصر مش مخيفة زى ما انتم فاكرين بس ياريت لو معاك فلوس من الغربة حطه فى عقارت علشان قيمتها ما تروحش وبلاش تسثمر فى مجال الا اذا كان لك فيه خبرة واشفكم فى مصر قريبا ان شاء الله

بالمناسبة هيخش بعدى اخوة افاضل هيعقدوك من مصر وعيشتها وانت فى الاخر حر استخير ربنا ثم اتوكل على الله

[kokomen]

الأخوة الأفاضل

العودة الي مصر المحروسة هو قرار صعب جدا بسبب الظروف المعيشية المرتفعة جدا

والتي تخطت الغلاء في الخليج رغم تدني مستوى الأجور في مصر مقارنة بالخليج

عند إتخاذ القرار يجب أن تعمل حساباتك جيدا حتى لا تندم .... كما حدث معنا وتفاجأ

بمصاريف غير متوقعة وهذا عن واقع ملموس بالنسبة لي وخبرة حقيقة ... وأنا أستغرب

من الأخوة الذين حددوا 300 جنية للمعيشةهذا المبلغ لا يكفي أي موظف لبند المواصلات فقط

فما بالك بالمتطلبات الأخرى من المسكن والكهرباء والمياه ومصاريف المدارس والدروس الخصوصية

حتى ولو كانوا الأولاد في مدارس خاصة.. والمصيبة لو كانوا في مدارس عالمية مثل الأي جي أو السات الأمريكي

ثم تأتي متطلبات شراء الغذاء الذي تضاعف بشكل غير مسبوق كما تعلم .... نقطة أخرى لا تقارن نفسك بموظف في مصر

لسببين الأول لأن هذا الموظف لا يعتمد على دخل واحد فقط بل يجتهد ويعمل ليلا ونهارا ليسد حاجة اسرته أي له أكثر

من عمل ليستطيع ان يعيش بكرامة .... السبب الثاني أن الأسرة في مصر مبرمجة على مصاريف معينة تلائم ظروف الحياة

الصعبة وتأقلموا على ذلك بعكس الأسرة التي تعود من الغربة فهي متأقلمة على نمط عالي من المصاريف بالطبع ويلاحظ هذا

عندما تنزل إجازة وتجد نفسك تصرف بالآلاف خلال شهور الإجازة .... وطبعا سوف تختلف مصاريف الأسرة بإختلاف نمط

معيشتها وعدد أفرادها والمكان الذي سوف تعيش فيه سواء قرية أو مدينة ..... ومن واقع خبرة أستطيع أن أعطي لك تصوري

للمبلغ المتوقع إنفاقه شهريا في مصر بين 4000 جنيه الي 6000 جنية حتى لا تشعر بفرق كبير بين معيشتك في الخارج

ومعيشتك في مصر ..... أعانك الله على إتخاذ القرار .... لأنني إتخذت القرار ذات يوم ..... ثم أضطررت للعودة الي الغربة

مرة أخرى لأسباب متعددة منها إرتفاع متطلبات المعيشة في مصر المحروسة .. وللحديث بقية .!!!!!!

تم تعديل 17 أغسطس 2008 بواسطة kokomen

[الباشدكتور]

السلام عليكم

علشان تعيش في مصر بوضع متوسط انت محتاج من4000 ل 6000 بأسرة 5 افراد من غير سكن ومدارس

لكن علشان تجيب فلوس من مصر فلازم تحط في بالك شوية حاجات

البنوك في مصر بتدي فائدة 9 وشوية في المية ( بعد الرفع الاخير لاسعار الفائدة )

والبنوك الاسلامية ( المصرف المتحد و بنك الاستثمار المصري السعودي ) بيدوا تقريبا 8 % تزيد او تقل حسب الارباح

بلاش بنك فيصل الاسلامي عمره ما زاد عن 5 %

فلو حسبناها علي فائدة 8% فمعني كده انك علشان تجيب فائدة تغكي مصاريفك فلازم يكون معاك من 600 - 900 الف

لكن المشكلة الرهيبة اللي مصر الاولي فيها علي مستوي العالم و بتفوق كمان

ان التضخم في مصر السنة اللي فاتت كان 23 % بمعني ان الفلوس بتفقد 23% من قيمتها

للتسهيل لو كان معاك 100 الف قيمتهم بقت 78 الف

وعلشان كده فالخيار بتاع البنوك ده ما بقاش ينفع خالص في مصر

لانك بتحط الفلوس بتاخد 8 % و بتخسر 23% + 2.5% زكاة علي الفلوس المتشالة

وبكده فكتير اوي من المصريين بيتجهوا لشيل الفلوس علي شكل عقارات او اراضي

العقارات كويسة لانها بتحتفظ بقيمة الفلوس فتمنها بيزيد كل سنة

والميزة فيها انها كمان بتجيب فلوس بتأجيرها ايجار مؤقت

و علشان تاخد فكرة فالشقة اللي ب 300 الف بتجيب ايجار حوالي 1000 شهريا واللي ب 600 تجيب 2000 و هكذا

وعلشان كده علشان الايجار يكفي المصاريف لازم تجيب شقق بحوالي من مليون و200 الف الي مليون و 800 الف

اما الاراضي فعلي الرغم من انها ما بتجيبش فلوس ( محدش بيأجر ارض)

الا انها حلوة اوي علشان هي مش بس بتحتفظ بقيمة الفلوس لا دي كمان بتزودها بتحسن وضع الارض

يعني دخلت كردون مدينة تزيد 200 % دخلت حيز عمران تزيد 100 % المنطقة اتعمرت , خدت رخصة و هكذا

وفي الاخر لو تقبل نصيحة من اخوك الصغير ( سيدنا سليمان قبل النصيحة من هدهد)

لو انت في بلد غير عربي و اولادك كبروا يبقي لازم ترجع علشان هناك اقصي طموحك انهم ميغلطوش هنا اقل طموحك انهم يبقوا كويسين بس كويسين

الفلوس القليلة في ايد واحد طائع لربنا حلوة قوي لأن ربنا بيرزقه بالرضا

اما الفلوس الكتير في أيد واحد بعيد عن ربنا بتبقي قلتها احسن لأنه هيتسأل عنها مرتين ( وماله من أين اكتسبه و فيم انفقه)

و كمان بابا علطول يقول ان الاولاد هم احسن استثمار للراجل

اما لو في بلد عربي فخليك هناك احسن

لو هتيجي علشان الاصحاب والاحباب و القعدة الحلوة فهنا كل واحد يدوب يومه بيكفي شغله اللي يدوب بيكفي مصاريفه

يعني محدش فاضي ياخد نفس حتي و كلنا في الساقية و مغمضين عنينا

اتمني اكون قدرت افيدك واسف للتطويل

تم تعديل 17 أغسطس 2008 بواسطة الباشدكتور

[مسالم]

السلام عليكم ..

الاخوه الافاضل .. اشكركم جميعا على تفضلكم بالحوار من أجل قرار ..

ردودكم اضافت الي بعض المعلومات ولكن كما ذكرت سابقاً فالقرار .. صعب .. والصعوبه هنا ليست بمثابة اكون او لا اكون ... استنى او ارحل .. الصعوبه فيما وراء القرار .. في الماضي القريب .. منذ حوالى عشرة سنوات .. اتخذت نفس القرار .. كنت في حينها اعمل بالرياض وفي شركه جيده جداً .. وكانت مصر تعيش نهضة كمال الجنزوري وفجأه وجدت الدنيا بمبي .. والحياه شكلها جميل .. والمستويات ارتفعت .. قررت .. بعون الله تعالى سوف اترك العمل بالسعوديه وسوف التحق بركب الانجازات والتقدم المهني بأرض المحروسه .. توكلنا على الله .. وقد كان ولكن بدون ان يكون هناك عقد عمل او رجوع لوظيفه او خلافه .. لقد اخذت القرار قبل ان اجد فرصه عمل .. ولكن الله سلم ووجدت فرصه عمل بمرتب اعلى من مرتبي بالغربه آنذاك .. ولكن القدر كان يخبأ لنا شئ آخر .. فبعد حوالي 7 شهور طارت حكومة الجنزوري (الله يمسيه بكل خير) واطل علينا بشفتيه البهيه الدكتور عاطف عبيد .. ويا لها من نقله أتت على الاخضر واليابس .. اعقبها انحدار في العلم والعمل وانهار الاقتصاد .. واصبح الامس امل الغد ولكن دون جدوى .. في النهايه وفقني الله في العوده الى الغربه .. بعد سنتين فقط من قرار العوده ...

وضعي الحالي في الغربه في احسن حال ولله الحمد .. مادياً ومعنوياً ..

العرض المقدم لي في مصر .. ايضا عرض مغري ليس مقارنة بوضعي في الغربه ولكنه مقارنه بالوضع في مصر .. يعني يتجاوز حد الثمانيه مع المميزات الاخرى .. لكن امتى حكومة نظيف حتتغير .. الله اعلم .

المشكله عندي يا جماعه مش فلوس .. لأني على يقين بأن الرزق من عند الله .. المشكله اني مش عايز ابهدل نفسي انا والعيال .. من اجل حب الوطن .. ايضا لان العوده الى وطن الغربه سيكون اصعب هذه المره..

انا عملت صلاة استخاره مرتين .. النتيجه ان الامور متسهله في وظيفة الغربه وفي الوظيفه المعروضه عليّ ..

عملتلكوا صداع .. وموصلناش لنتيجه ... لكن المثل بيقول اللي تعرفه احسن من اللي متعرفوش :hi: ... انتم شايفين ايه ؟؟

[ahmadmosa]

يتجاوز حد الثمانية وكمان فيه ميزات اخرى؟

الاخ ( المحتار ) انا كنت فاكرك عايز بس تضمن الستر ب2000 او 3000 لكن واضح انك ( طماع) جدا لان الدخل الي بتتكلم عليه دة مش بس هيسترك دة بعون الله هيعيشك برفاهية الى حد ما .

انا بشتغل في الرياض برضه براتب 8000 ريال ومستعد انزل مصر فورا لو جالي نص الراتب دة هناك مع العلم انى متزوج ومخلف بس الحكاية عندى مش مادة وبس

تحياتى

[moheltohamy]

رأيي طبعاً ما ترجعش! طبعاً !!!!

لو حددت إنتا عاوز ترجع ليه مصر في نقاط ، وتحللهم... سدأني هتلاقي ولا نقطة متبقية!

ولو عاوز تفضل تحب مصر ... ما ترجعلهاش... تعالالها شهر شهرين ف السنة.

لكن بعد العيشة والنظام والاحترام بره ، لما ترجع تاني للمطحنة والساقية ، وتستنى أول الشهر (حتى بالـ 8 تلاف دول اللي يا دوب يمشّوك) ، هترجع تفتكر الحياة اللي سبتها بإيديك ، وتندم عليها!

واتفضل كلمتين فضفضت بيهم قبل كده ، مرة مع د. قناوي ، ومرة مع أبو آدم.

وما تفتكرش صحيح إنك لو راجع مصر ، إنك راجع للأزهر ، والحسين ، والسيدة نفيسة! البلد فيها بلاوي ، زيها زي أي بلد في الدنيا!

واللي عاوز يبوظ هيبوظ ولو في السعودية ، واللي عاوز يعيش محترم ، هيعيش محترم ، ولو عاش في أوروبّا.

وعليك التوجيه والنصح والإرشاد. وليس عليك التجسس على أبنائك ، أو تمشي وراهم مخبر عشان يتحرى عن سلوكهم ، وتطّمّن إنهم ماشيين صح!

ربّي صح ، واترك لهم الحبل على الغارب. وهذا رأيي الشخصي. لا أكثر ولا أقل.

تم تعديل 18 أغسطس 2008 بواسطة moheltohamy

[iloveegypt]

الاخ الفاضل مسالم

انا اسف على ردى الاول بالرجوع لمصر لانى لم اكن اعرف العرض المقدم لحضرتك 8000 جنيه(بالمناسبة يكفيك تعش مرتاح فى مصر بدون مدارس امريكية ممكن مدارس خاصة مصرية)

اعتقد انت لو رجعت هتندم فالافضل عدم الرجوع لمصر لماذا

لان فى الغربة المصريين قسمين

الاول يتمنى العودة لمصر بس لو وجد فرصة ولو نصف او ثلث اللى بيخده فى الغربة

والثانى احب العيشة فى الغربة ولا يستطيع العيشة فى مصر مطلقا الا زيارات

واظن حضرتك من النوع الثانى لذا لو رجعت الى مصر ستشعر بالضيق لظروف مصر واللى هى فعلا موجودة وانت كمان فى بلد مسلم يعنى الموضوع بسيط لذا لا انصحك بالعودة

[مسالم]

السلام عليكم ...

الاخ العزيز احمد موسى .. الموضوع مش موضوع طمع ولا حاجه ولا موضوع ماده وبس زي ما تفضلت .. والمبلغ الذي ذكرته انا لا يعد شئ بالنسبه لآخرين .. يعني موضوع الماده ده موضوع نسبي يختلف باختلاف الاسلوب اللي بتتعامل بيه مع هذه الماده ..

المشكله الحقيقيه اني مصري .. وبطبيعة الحال اني بحب بلدي زي كل واحد فيكم .. ومن طباع المصريين انهم شربوا من نيلها .. سواء عن طريق شبكة الصرف الصحي او عن طريق الاستخدام المباشر .. تمر السنين ولايزال الهاجس .. امتى حنرجع مصر .. مش عارف ليه .. الواحد عايش مستريح ومبسوط والمشاكل اللي هنا اقل من المشاكل في مصر بكتييييييير .. ولكن دايماً الالحاح في السؤال .. احنا حنرجع امتى .. .. وكما ذكر الاخ الفاضل moheltohamy من المظاهر والسلوكيات التي تغييرت في مصر ونعلمها جميعا والتي لا تدع لك فرصه حتى التفكير في المقارنه .. وان كنت اختلف معه في فكرة تربية الابناء .. فالحقيقه ان تربية الابناء اعتبره الان بمثابة الجهاد الاعظم .. انت تربي الابناء وتأتي لهم بالامثله وبالكتب وبالنصائح وبالارشادات وخلافه .. ثم يذهب الابناء الى المدرسه ليأتوا لك بالافكار الاخرى وبسلوكيات اخرى .. ثم يأتي الشيطان (قصدي التليفزيون) ويلقي هو الاخر بارشاداته وبنصائحه وكليباته وباسلوبه الفريد .. وهكذا تتحطم كل معاني التربيه النبيله التي قدمتها اليهم .. ثم تبدأ من جديد باسلوب آخر .. وتقابل باسلوب اشد ضراوه من الاخرين ..

لا يمكن ان تربي ابنك وتتركه فريسه للضغوطات الخارجيه وحده .. لابد ان تكون هناك دائماً وباسلوب جديد في كل مره .. الجيل الجديد زهق من كتر نصايحنا وعايز يستقل باسرع وقت ممكن .. ولو على حساب نفسه ..

من ضمن المشاكل الحقيقيه في الغربه هي الابناء.. لانهم بيكونوا اتعودوا على اسلوب حياه معين وعند تغييره سيكون هناك صدام كبير قد يغير من طبيعة الابن نفسه .. قد يتلائم مع الجديد وقد يرفضه ..

شكلي كده مش راجع كما قال iloveegypt..

تم تعديل 18 أغسطس 2008 بواسطة مسالم

[عبقرينو]

لا انصح بالعودة لمصر في الظروف الحالية مع تمنياتي بالتوفيق

[somebody]

***************

تم تعديل 18 أغسطس 2008 بواسطة somebody

[ahmadmosa]

ومين قال ان ابناءنا هيتربوا تربية اخلاقية افضل في السعودية؟

اعزائي واخواني

اقسم لكم بالله ان الطفل الذي ينشأ ويتربى في السعودية يواجه الكثير والكثير من المشكلات التى تفوق خطورتها خطورة التربية في افقر دول العالم

يعانى الطفل الذي نشأ في السعودية من انحرافات فكرية واخلاقية وحتى جنسية - الطفل المصري الى هيتربى في مصر سواء على الرفاهية او على المستوى العادى تجده اكثر وعيا وثقافة وعلما من نظيره الذي تربى على ( الكبسة والبلاى استيشن ) ومن وجهة نظري المتواضعة هي حكاية قابلية للانحراف تكون عند الطفل مهما كانت تربيته كويسة - قصدى ان المكان مش هوة الاساس لكنه مهم جدا لتنشأة الطفل النشاة الصحيحة وماتحرموش ولادكم من انهم يعيشوا ويتربوا ف مصر عشان ميعتبوش عليكم بعد الكبر زي منا بعتب على اهلي

[iloveegypt]

ومين قال ان ابناءنا هيتربوا تربية اخلاقية افضل في السعودية؟

اعزائي واخواني

اقسم لكم بالله ان الطفل الذي ينشأ ويتربى في السعودية يواجه الكثير والكثير من المشكلات التى تفوق خطورتها خطورة التربية في افقر دول العالم

يعانى الطفل الذي نشأ في السعودية من انحرافات فكرية واخلاقية وحتى جنسية - الطفل المصري الى هيتربى في مصر سواء على الرفاهية او على المستوى العادى تجده اكثر وعيا وثقافة وعلما من نظيره الذي تربى على ( الكبسة والبلاى استيشن ) ومن وجهة نظري المتواضعة هي حكاية قابلية للانحراف تكون عند الطفل مهما كانت تربيته كويسة - قصدى ان المكان مش هوة الاساس لكنه مهم جدا لتنشأة الطفل النشاة الصحيحة وماتحرموش ولادكم من انهم يعيشوا ويتربوا ف مصر عشان ميعتبوش عليكم بعد الكبر زي منا بعتب على اهلي

اخى اتفق معك تربية الاطفال فى مصر افضل مليون مرة من مصر

بس هى قلت ايمان الناس باليقين فى الرزق والخوف الزائد من مصر الغير مبرر والتعود على دخل معين وعدم التنازل عنه هو اللى بيخلى البعض بيقعد الى ماشاء الله فى الغربة

تم تعديل 22 أغسطس 2008 بواسطة iloveegypt

[Horus]

يا جدعان ايه الارقام الرهيبه دي

10000 جنيه شهريا

ده في ناس بتاخد 300 وعايشه

و بالنسبه للدكتور حورس ................. ليه مينفعش تربي اولادك بره و هل اكيد حيطلعوا سيئين .......... ايه اللي حضرتك خايف منه بالضبط ................ هل هي الحريه الجنسيه مثلا؟

و شكرا

الحرية الجنسية .. طبعا من أهم الحاجات إلي تخوف ..

إنا كمان يهمني أشوف أولادي شباب مصري

الاولاد لما يتربو كام سنة فالغربة .. حبة حبة تلقاهم إتحولو لخواجات .. من غير ما تحس

إيه رئيك لما تجي تقعد مع ابنك تكلم معه تلقيه مش فهمك .. و مش عوز أصلاً يفهم ..

تقول نكتة .. تحس إنو مش فهمها .. wst::

كم سنة كمان .. تكتشف انك سكن معك واحد خواجة .. نفسو يكمل ١٨ عشان يطلع من البيت ..

أهم حاجة .. القرأن ..

لما الولد يكون بيتكلم عربي بالعافية.. تقدر تقولي ازاي هيقرأ القرآن ..

و حتى لو سمع .. ازاي هيتذوق حلاوة القرآن .. مدام العربي مش اللغة الاولى ..

الاولاد كمان بتكون باردة .. و مش إجتماعية :sad:

أنا بتكلم عن تجارب ناس شفتهم بنفسي .. والكلام د يا جماعة بيحصل بنسبة ٩٥٪

تلحظ إلفرق أوي لم الاولاد ينزل مصر ٣ شهور إلصيف ..

بيرجع حاجة تانية خالص .. حاجة تفرح كدة .. عيال مخربشة بصحيح wst::

[مسالم]

عزيزي احمد موسى ..

اشكرك على ردك .. اتفق معك في أن لكل مجتمع مشاكله و كل مجتمع لديه ما يكفيه من السلوكيات والعادات السيئه التي آلت اليه الآن .. ياأخي الفاضل .. لقد انحدرنا انحدار شديد في سلوكياتنا وعاداتنا ( ومش عايز اقول في تطبيق تعاليم ديننا .. لأن ده موضوع اكبر بكتير).. ليس مصر وحدها بل المجتمع العربي بأسره من المحيط الى الخليج .. لقد فسد الحاكم والمحكوم معا" .. الحاكم بطغيانه والمحكوم بانصياعه .. وارجو ان تعطيني مثل لأي حاكم عربي يمكن ان نستبشر به خيرا" .. المشكله في الموضوع اللي انا طرحته ان ربنا اكرمني وانعم عليّ بفرصة العمل في مجتمع آخر غير المجتمع الذي نشأت به .. مثلك تماماً .. وعشت في هذا المجتمع فتره لا بأس بها من الزمن .. واصبحت لدي قناعات بهذا المجتمع .. وكأي انسان لديه بصيره فقد نشأت مقارنات بين هذا المجتمع والمجتمع الاصلي الذي نشأت به .. وكانت جميع المقارنات في صالح هذا المجتمع الذي اعيش به الان .. الا حاجه واحده .. اني مش قادر انتمي لهذا المجتمع .. بمعنى اني أحترمه واطبق والتزم بالقوانين التي انشأها واتعايش في سلام مع ابناء هذا الوطن واتفهم سلوكياتهم .. لكني غير قادر على الانخراط معهم..

على الجانب الآخر .. فأنا مصري المولد والمنشأ .. انتمي لمصريتي ولوطني ولعموم المصريين الذين يتواجدون في اي بلد .. لست انا فقط ولكن اهلي وابنائي.. مشكلة المصريين انهم ميعرفوش يذوبوا او ينخرطوا كلياً في اي مجتمع آخر غير مصر.. وعلشان كده برضه المصريين المغتربين في معاناه حقيقيه ..

ارجع للموضوع الاصل .. انا عايز اعيش عيشه كريمه انا واهلي .. يعني ببساطه .. عايز ابنائي يتعلموا كويس وعايزهم يبعدوا كل البعد عن السلوكيات المدمره مثل الادمان والانحراف والانحلال وخلافه .. أما السلوكيات التي يتداولها كثير من الشباب اليوم مثل التنفيض والتطنيش والتكبير وخلافه فلا بأس ولا مفر منها .. تفتكر ممكن اعمل ده دلوقتي في مصر في ظل الحكومه التي ترعى الفساد وابنائه .. تفتكر لو حد عرض عليك فرصه عمل بمرتب كويس في مصر .. بس مفيش شئ مؤكد لاستمرارية هذه الوظيفه اذا حدث اي تغيير في السلطة او الحكومه،، ولا يوجد شئ يؤكد ان ابنائك لن يتأثروا بكل مظاهر الفساد المعلن والمخفي.

اذاً الهدف هو تقليل المخاطر المحيطه بقدر الامكان .. وما دمنا هنا في مجتمع لا يتباهى بإظهار فساده ولا يحث عليه في كل قرار حكومي .. فهناك امل .. ومادمنا في مجتمع يوجد به ما يعين الفرد على التكفير عن ذنوبه ولو بعمره الى بيت الله الحرام كل عام .. ناهيك عن امكانية الحج .. هل تعتقد ان هذه الامكانات يمكن ان تستبدل بغيبيات أقل ما يقال عنها .. انها مظلمه ..

الدين .. الاستقرار .. الامان .. النظام .. القانون .. العائد المادي .. تأمين الابناء .. واشياء اخرى .. هل يمكن تحقيقها اليوم في مصر..!!

اشكر الباشدكتور على المعلومات القيمه والنصيحه الغاليه ..

تم تعديل 22 أغسطس 2008 بواسطة مسالم