فين سى السيد يا ولاد ؟؟؟

[capitshino]

السلام عليكم

خلال الفترة الاخيرة حسيت بتغير المحاورات بدرجة جعلتنى وغيرى الكثيرون لا يهتمون بها كالماضى

كنت سابقا كل ساعة او اقل اشوف لو فى موضوع جديد او رد جديد باستمرار انما دلوقتى مش عارف فى ايه

تفتكرو ده بسبب غياب اعضاء هامة كا سى السيد

انت فين يا سي السيد

[HDarwish]

والله أعلم يا كابتشينو يا أخويا إظاهر إن الراجل لسه في الأجازه

سيبه يا عم يروق نفسه شويه

مش معقولة هيقعد يكتب للمحاورات من تحت الشمسية على بلاج العجمي

بجد عايزين نطمن عليك يارب يكون المانع خير

[se_ Elsyed]

لسه واصل النهاردة الصبح وبأفتح النت لقيت الموضوع ده .

الغريب إني لقيته في باب تاريخ مصر ... وكانني أصبحت رأساً برأس مع احمد عرابي ومصطفى كامل وابو أشرف ... يا سلامممم يا ولاد

شكراً للزميل العزيز إكسبريسيو .. سوري كاربتشينو ( أهي كلها من مشتقات القهوة والكافيين ما تزعلش يا سيدي )

حبيت أقول لكم : أنا جيت نورت البيت ... وقيدوا شموعي يوم سبوعي " ووحشتوني وحشتوني وحشتوني .... مع الإعتذار للفنانة فُله

[capitshino]

والله انت زى العسل يا سى السيد

وحشتنا ووحشتنى احتجاجاتى عليك

احتج بشدة

[HDarwish]

حمداً لله بالسلامه يا ابو السيد

والله المحاورات كانت من غيرك ... ولا أقولك بلاش

يارب تكون قضيت أجازه سعيده

ومستنين مغامراتك ولو اننا كان نفسنا تحكيهلنا أول بأول

[HDarwish]

بجد سبحان الله

لسه كنا بنتكلم عن سي السيد أنا وكابتشينو على الإيميلات الخاصة وافتكرنا سي السيد وقولنا الراجل ده كان عامل جو تاني في المحاورات واحنا بنتكلم كابتشينو قاللي هاعمل موضوع عنه ويادوب ما كملناش كلامنا وعمل الموضوع إلا ولقينا سي السيد هو اللي بيرد

ياريتنا كنا افتكرنا اثنين كيلو مانجه .. أه إلا من الحق أخبار المانجه إيه ياريس والله الواحد بدأ ينسى طعمها إيه

حمد لله بالسلامه

[ELSHAMY]

حمدا لله على سلامتك يا أبو عمر....نورت بيتك و مطرحك...كفارة يا راجل

كله تمام يا باشا ...شوية مشاكل صغيرة و ربنا قدرنا على حلها فى غيابك يا سيد الرجالة...

شوية من رجالتنا طفشوا على المغارة اللى فى الجبل....اللى كنا بنستخبى فيها أيام الهوجة...و بقوا من مطاريد الجبل...ربنا يستر عليهم بقى...

أدينا بنحاول نساعدهم يا معلم ...شوية أكل...سجاير....كيف....اللى ربنا بيقدرنا عليه بنبعتهولهم...الواحد ما بيحبش يتكلم على الخير اللى بيعمله...

....عايز تزورهم حتلاقيهم هنا :

http://www.almatareed.org

أنا ما قلتلكش حاجة ماشى...

[هشام عباس]

حمدالله على سلامتك يا س س والله وحشتنا كتير فينك وفين ايامك؟؟؟؟؟؟؟

الدنيا هنا اتغيرت اوي وبقت غير الأول كتير

وغيابك بجد اثر جامد جدا جدا في المحاورات وكمان غياب ناس كتير وظهور ناس تانيه خلى للمحاورات طعم وشكل مختلف

بس الحقيقه الدنيا هنا اتغيرت كتير وفعلا الواحد بعد ما كان بيفضل بالساعات قاعد يقرأهنا ويتابع محاورات ساخنه بقى قليلا لما بيلاقي حاجه تشده

حمدالله على سلامتك ونورت بيتك

[capitshino]

شوية من رجالتنا طفشوا على المغارة اللى فى الجبل....اللى كنا بنستخبى فيها أيام الهوجة...و بقوا من مطاريد الجبل...ربنا يستر عليهم بقى...

بينى وبينكم انا روحت المغارة يوم واحد فقط بس ما استحملتش مش عارف ليه . شكلى هنا برده قربت اجيب جاز لا مؤاغزة

[shahd]

حمدلله على السلامة يا سي السيد منوووور ويارب تكون قضيت اجازة سعيدة

[aimen]

حمد الله على السلامه يا حاج ..

[~Heba~]

حمدا لله على السلامة

و عود احمد

[الطيار المصرى]

ايه يا عم سين سين.........

انت سايبنا كده من غير قائد للرابطة الاهلاوية و نازل اجازة .............ده كلام برده؟؟؟

لكن والله نورت المنتدي برجوعك يا كبير....

و حمد الله علي السلامة.........

تحياتي

الطيار المصري

[عبقرينو]

حمد للة علي رجوعك بالسلامة ياريت تقولنا علي اخبار زيارتك بالتفصيل

[se_ Elsyed]

شكراً لكل أبنائي على هذا الترحيب الحار .. واوعدكم بسرعة الرجوع ( أحترس السيارة ترجع إلى الخلف )

لكن بُعدي عن المحاورات هذه المُدة خلاني أتوصل إلى نظرية هاسجلها بإسمي قريب وهي إن الواحد لما بيبعد شويه عن الملاعب نفسه بتتسد وبيبقى محتاج فترة يلين فيها عشان يرجع زي الأول ...

وبصراحة عندي حاجات كتيرة قوي هاكتب عنها بإذن الله لإن الأجازة دي تقريباً لم أصادف مثلها من قبل وبجد شوفت فيها اهوال وحركات يشيب لها ريش الكتكوت اللي لسه بيصوصو ..

ويكفي أنني تلقيت خبرة وفاة أخي وحبيبي وقدوتنا في المحاورات الأستاذ محمود ( الأفوكاتو ) رحمة الله عليه ... ولن تتخيلوا إن معظم الأفكار التي كانت تختمر في عقلي وخصوصاً عن النظافة والنظام في الشارع المصري واللي كنت بارتبها عشان لما أرجع المحاورات أكتب عنها .... كان طيف الأستاذ يترائى أمامي وكنت أتخيل نفسي وأنا أحادثه وهو يجتذب أطراف الحديث معي ويضعني في حزب النظافة اللي أسسه في الخيال وكان دائماً يشجعني عشان أكتب عن ملاحظاتي ... ولكن حدث ما حدث.... وإنا لله وإنا إليه راجعون ..

وما أرهقني في تلكمو الاجازة أيضاً هو إنني قمت ببيع الفيلا التي امتلكها في العبور عشان أحمد عز كان منضطهدني ( هو منطهدني ولا من طنطا ؟ ) وبالتالي حط السيخ المحمي أبو 8000 ج في صرصور ودني وعجزني وما قدرتش أكمل المشوار ... فقلت لنفسي خدها من قصيرها يا س س وخد لك شقة أوضة وصالة إن شالله من غير حمام .. وساعتها احمد عز مش هايعرف لك طريق جُره .. وبالتالي بدأت رحلة البحث عن شقة في خلال الأربعين يوم بتوع الاجازة دي - على فكرة اول مره في حياتي أخد اجازة بهذا الحجم والكم ... وكانت النتيجة إني ألفت كتاب خططته بحروف من دمي ودموعي وأبتساماتي وسميته " البهدلة والمشقة في البحث عن شقة " وهاعرض فصوله عليكو طبعاً عشان الاجيال اللي لسه عايشه تتعلم وتكتسب خبرة والدنيا تبقى سودا في وشها زي ما شوفتها كده

بالإضافة إلى كُتيب صغير بأقدمه هدية لأعضاء المحاورات سميته " ما بين العيش والطابور ... ومعاهم قانون المرور " وباحكي فيه عن مغامراتي مع ضريبة الرؤوس الجديدة المُسماه " قانون المرور "

بس سيبوني براحتي شويه كده أضرب لي كام زِر مانجه من اللي مالحقتش اكلهم في مصر وجبتهم معايا وألين الموتور ونبدأ الشغل على طول ... والله يكرمكم الضرب في الميت حرام فمش عايز نفر ينط لي في أم السبوبة دي ويقولي : كل مانجا يابا وإتهني وإحنا هنا بنكح تراب ...

فالعملية مش ناقصة أحسن أنا راجع وجايب جاز أساساً ومحتاج عمره موتور كاملة والمانجا هاتساعدني في مرحلة العلاج الطبيعي والنقاهة اللي بأمر بها ...فأادعوا لي ألحق أخلص الكمية دي بسرعة وهاتلاقوني راجع إنسان جديد سعيد فريد ...

[HDarwish]

se_ Elsyed مشاركة بتاريخ اليوم, 05:03

بس سيبوني براحتي شويه كده أضرب لي كام زِر مانجه من اللي مالحقتش اكلهم في مصر وجبتهم معايا وألين الموتور ونبدأ الشغل على طول ... والله يكرمكم الضرب في الميت حرام فمش عايز نفر ينط لي في أم السبوبة دي ويقولي : كل مانجا يابا وإتهني وإحنا هنا بنكح تراب ...

فالعملية مش ناقصة أحسن أنا راجع وجايب جاز أساساً ومحتاج عمره موتور كاملة والمانجا هاتساعدني في مرحلة العلاج الطبيعي والنقاهة اللي بأمر بها ...فأادعوا لي ألحق أخلص الكمية دي بسرعة وهاتلاقوني راجع إنسان جديد سعيد فريد ...

من الآخر .. عينيا فيها ..

[ELSHAMY]

عزيزى س س

اليك هذه الأمثال الخالدة:

كل مانجة يا با و اتهنى.........احنا كده كده حنستنى

ما أحلى التلحويس..........فى الهندى و العويس

بالهنا و الشفا

[iloveegypt]

وحشنا كتير حبيب قلبى سى السيد

بصراحة انا من الاخر اشتركت فى المحاورات بسبب مواضيعك الحلوة

وكنا بنستناها انا واصحابى علشان مواضيعك بصراحة مفيدة وتدعو للامل وكمان لذيذة

لازم ترجع بسرعة والا هننزل كالبراشوت وناكل منك المانجه

[حسام يوسف]

حمد الله ع السلامة يا س س

وحشتنا

وافتقدناك

يارب الاجازة تكون فرفشتك

تحياتى