عن فلم زواج بقرار جمهورى

[wa7d]

شاهدت اليوم فلم " زواج بقرار جمهورى " وموضوع الفلم أن أحد أفراد الشعب قد أرسل دعوة للسيد رئيس الجمهورية حسنى مبارك لحضور حفل عقد قرانه . وقد ظهر حسنى مبارك بشخصه فى الفلم . ومعنى ذلك أنه قد عرف ما جاء فى الفلم تفصيلا . الفلم يتحدث عن المسئولين الذين لا يعملون إلا إذا كانت فيه توجيهات من رئيس الجمهورية ، والبلدية لا تنظف وتسفلت وتدهن إلا الأماكن التى متوقع أن يحضر إليها رئيس الجمهورية ، وأن كل السئولين الكبار منافقين ولصوص . وكنت أنا شخصيا أظن أن حسنى مبارك لا يعلم . ولكن إذا كان يعلم فقد وفر على الشعب نصف المجهود .

عموما إذا كان هذا الفلم للتنفيس فقد نجح معى . أرجو من شاهد الفلم أن يصف ماذا شعر ؟ الفلم نفسه طبعا تافه !

[freefreer]

فيلم طلع فيه رئيس الجمهورية .. تقول عليه فيلم تافه !!!!

على العموم .. سبق له الظهور فى فيلم "وداع فى الفجر" (شادية - كمال الشناوى) .. فيكم حد شافه ؟

الفيلم عرض ايام ان كان نائب رئيس الجمهورية .. و لكنه لم يعرض فى مصر بعد تولية الرئاسة .. الا فى بعض الفضائيات

[Cleo]

فيلم طلع فيه رئيس الجمهورية .. تقول عليه فيلم تافه !!!!

على العموم .. سبق له الظهور فى فيلم "وداع فى الفجر" (شادية - كمال الشناوى) .. فيكم حد شافه ؟

الفيلم عرض ايام ان كان نائب رئيس الجمهورية .. و لكنه لم يعرض فى مصر بعد تولية الرئاسة .. الا فى بعض الفضائيات

أفتكر برضه إنه طلع فى فيلم من أفلام حرب أكتوبر أيام ما كان قائد قوات جوية و هو بيشرح خطة الهجوم للظباط بتوعه...

يعنى الراجل طول عمره غاوى "سينما"...

"وش واحد مش شايف المخبر اللى واقف وراه"

[Farida]

و الله انا كنت فاكره نفسى لوحدى اللى شفته فى فيلم شاديه و بالأماره الفيلم ده اللى فيه اغنيه دور عليه تلقاه ... و كان طالع بيدرس لكمال الشناوى فى الكليه الجويه ... اما بخصوص فيلم جواز بقرار جمهورى انا شايفاه فيلم حلو خفيف بس فيه معانى كتير كويسه و من الجمل الجميله لما هانى رمزى اتكومت عنده الطلبات و بيتسأل هو معقول الرئيس حا يقرا ده كله أخوه قاله طبعا لأ لإن اللى حواليه هم اللى حايقوموا بالشغلانه دى فرد عليه و قاله لو اللى حواليه بيشتغلوا ما كناش شفنا الطلبات دى كلها !!!!

[Spider]

وقد ظهر حسنى مبارك بشخصه فى الفلم . !

طب مش ممكن يكون شبيهه؟!

"وش على دماغه شوية نجوم بتلف ذى اللى فى توم وجيرى"

[crossfield]

كان فى فيلم تليفزيونىفى أوائل التسعينيات - على ما أعتقد - كان اسمه "الوزير جاى" كان بيحكى نفس المهازل اللى بتحصل فى أى جهة حكومية لما يشموا خبر ان في مسئول كبير هيزورهم و ازاى بيبقى ليهم عيون و ودان فى كل حتة عشان لما حد يعمل عليهم زيارة مفاجأة متبقاش مفاجأة و لا حاجة ؛و هاتك يا كتابة فى قصائد مديح للوزير و هاتك يا بياض و تجديد للمؤسسة . أكتر موقف ضحكنى فى الفيلم لما وحيد سيف"رئيس المؤسسة" وسعت منه شوية فأجر شوية ناس على انهم مواطنين و حفظهم كلمتين مدح فى المؤسسة و الموظفين اللى فيها و كل مواطن قاعد فى ايده كوباية عصير و لما واحد من الموظفين مفهمش حاجة المواطن كان بيفهمهاله راح المواطن ده مديله بالقلم قدام الوزير و وحيد سيف يدافع عن المواطن ده و يقول"سيبه يا افندم ؛احنا شعارنا ان المواطن دايماً على حق" :D

[wa7d]

طب مش ممكن يكون شبيهه؟! 

فى بعض المناظر إللى ظهر فيها بظهره كان شبيه ، لكن فيه كام منظر هوه هوه ... أنا حتوه عنه .

وطلع فى أفلام أمريكية بس واخد إسم آخر - روبرت دينارو - ( وش واحد بيهزر )

المهم إنه لازم يكون قد قرأ الفلم وأيضا قد شاهده . علشان لما يعمل زى إللى قبله ماعمل ويقول ماكنتش عارف ، نقوله الفلم أهه ( وش واحد متشلفت )

[مصرى]

قصدك وحيد سيف طبعا !!

[هشام عبد الوهاب]

الرئيس لم يظهر فى الفيلم بمعنى انه كان موجود فى وقت التصوير وانما هى صورة داخل صورة وهى من الخدع السينمائية والعاملون بالفيلم طلع عينهم لحد ما اخدوا تصريح بادماج صورة الرئيس داخل الفيلم .

فيلم وداع فى الفجر لم يكن مبارك نائبا للرئيس بل كان فى القوات الجوية .

[crossfield]

الرئيس لم يظهر فى الفيلم بمعنى انه كان موجود فى وقت التصوير وانما هى صورة داخل صورة وهى من الخدع السينمائية والعاملون بالفيلم طلع عينهم لحد ما اخدوا تصريح بادماج صورة الرئيس داخل الفيلم

سؤال يهود بقى:

بياخد فلوس على كده و الا لأ؟؟؟؟؟؟ :D

[kokowawa1979]

spider  كتب :

طب مش ممكن يكون شبيهه؟!

ليه هو صدام حسين

[Lancelot]

حسب معلوماتي - قرأتها في مجلة تقريبا - ... اللي ظهر في الفيلم كان شبيه للرئيس ... و ليس صورة موضوعة بالكومبيوتر كما تصور بعض الناس .....

[se_ Elsyed]

كروساية كتبت

سؤال يهود بقى:

بياخد فلوس على كده و الا لأ؟؟؟؟؟؟

يا كرواسون يا بينتي الريس مش محتاج ، لأن إحنا واحد واللى فى جيبنا فى جيبه

وش واحد منفوخ ( 0 1 0 )

[هشام عبد الوهاب]

اللي ظهر في الفيلم كان شبيه للرئيس ... و ليس صورة موضوعة بالكومبيوتر كما تصور بعض الناس .....

الاتنين صح يالانس ..هناك شبيه ظهر بظهره فقط اما لقطات الوجه فهى موضوعه بالكمبيوتر .والفكره فى التنفيذ اخذت من فيلم لتوم هانكس يسلم فيه على كيندى .

[Lancelot]

والفكره فى التنفيذ اخذت من فيلم لتوم هانكس يسلم فيه على كيندى .

مظبوط ... في فيلم "Forrest Gamp" .... و موجودة أيضا في فيلم "In the line of fire" لكلينت إيستوود مع كينيدي أيضا ....