نداء انساني الي se_elsyed

[karohat]

شووف يا سيدي

أنا داخل علي مشروع عربية فول

بس أخوك مالوش فيها

يعني لا أعرف الفول بيتدمس ازاي

ولا بيتجاب منين

ولا أجيب صنايعي منين

ولا أديله كام

ولا العربية منين

و معنديش حاجة اسمها اللي ماعرفوش ماشتغلش فيه

هاتعجن و أتعلم

بس انتا ساعدني :hi:

تم تعديل 17 أغسطس 2008 بواسطة karohat

[tarek hassan]

لا تنسى أخي الفاضل إن طبق الفول مع السلطة وقرن فلفل تحاسب عليهم باتنين جنيه ونص وأوعى تزود عن رغفين

[karohat]

تكافل ايه و خدمات اجتماعيه ايه هو أنا جاي أشحت!!!!!!!!!!!!!!!!!!!!!!!!!!!

[HDarwish]

ههههههههههههه

إيه يا عم كاروهات الداخلة الجامده دي

ده إنت حتى ما قولتش سلام عليكم

على طول كده داخل أسئلة وأول ما الإدارة حولت موضوعلك للتكافل الاجتماعي والخدمات أتنرفزت عليهم قوي ليه كده ... طيب إتمسكن لحد ما تتمكن ....

طيب كمان سؤال أخير محيرني قوي إشمعنا سي السيد بالذات اللي وجهتله السؤال وعلى أي أساس .. والله استغربت

تمنياتي لك بالتوفيق

[se_ Elsyed]

:ninja: شووف يا سيدي

أنا داخل علي مشروع عربية فول

بس أخوك مالوش فيها

يعني لا أعرف الفول بيتدمس ازاي

ولا بيتجاب منين

ولا أجيب صنايعي منين

ولا أديله كام

ولا العربية منين

و معنديش حاجة اسمها اللي ماعرفوش ماشتغلش فيه

هاتعجن و أتعلم

بس انتا ساعدني :sad:

يا عم أنا كنت في اجازة ولسه راجع إمبارح

أقطع نفسي يعني ؟ :lol:

طالما مالكش في المسائل ... يبقى إبعد أحسن

لازم تفرق بين شغلانه ما بتفهمش فيها وممكن الصنايعية يبهدلوك

وبين شغلانه أخرى ما بتفهمش فيها برضوا لكن مش محتاجه إنك تفهم فيها

فهمت حاجه ؟

طب إبقى فهمني لو فهمت

يعني على سبيل المثال .. لا اعتقد إن شغلانه السوبر ماركت أو البقالة محتاج فقاقه وخبرة ... وبالتالي ممكن تبدأ مشروع زي ده وتجيب ناس يساعدوك او إنت تشرف عليهم

لكن شغلانة الاكل والمطاعم وعربيات الفول ... إنسى وخد البنسة .. لإن الصنايعي لو حس إنك مش فاهم في البطيخ .. فهايحطك في رغيف مع شوية سلطة خضرا وطحينه وياكلك هم يا جمل ...

وإنت مش جاي إلا على اصعب حاجه وتتصدر وعايز تبدأ بها ؟

يعني عربةي الفول دي شغلانه مرهقة جداً ومحتاجة واحد معجون في الفول قبل كده ...

تخيل بقى نفسك وإنت عمال تزق العربية رايح جاي او تسوي الفول وتعمل السلطات والحركات في حته وتنقل الكلام ده كله لمكان العربية ... عيش يا معلم

لكن بالنسبة لحد فاهم في المهنة دي .. فهي شغلانه .. لوز لوز لوز لإن لا ضرايب يابا ولا ميه ولاكهراب مزبلة ولا زبالة مكهربة .... وربحك بيبقى صافي مصفي ..

الخلاصة يا كاروهات يابني ... إبعد أحسن لك ... وشوفلك مشروع تاني ...

قول لي في ودني معاك كام وممكن أقترح عليك مشروع تبدأه ورزقي ورزقك على الله

[muslim4ever]

تكافل ايه و خدمات اجتماعيه ايه هو أنا جاي أشحت!!!!!!!!!!!!!!!!!!!!!!!!!!!

:lol: :lol: :lol: :lol: :lol: :lol:

دمك خفيف يا كروهات

[karohat]

أنا للأمانة اتنرفزت :D

اشمعني سي السيد دي عشان في موضوع قديم هنا في المنتدي و أنا با google علي مشروع الفول دا وصلتله كان بيتكلم فيه عن انه كان عنده مطعم فول و طعمية و كده "ايوه با google علي عربية فول من الاحباط" -_-

بس كده

أي أفكار؟!

[~Heba~]

حاجة غريبة اوى

حضرتك عضو جديد

و جاى مباشرة كده فاتح موضوع فى باب تاريخ مصر لا و زعلت كمان لما نقلوه...و مبتردش فى غير الموضوع ده

كمان جاى مباشرة على الراس الكبيرة سين سين حبيب الملايين و بتتكلم كأنك بتعرفه من زمان

يا شيخ دا انا اخدت سنتين على بال ما عرفت امسك نفسى و استحضر الشجاعة و اوجه كلمتين فى مداخلة لـ سى السيد

عشان كده عقلى الباطن بيقولى ان الحكاية مش فول و لا طعمية و لامهلبية حتى الحكاية فيها ان

قول يا كروهات يا اخويا انت مين!!!!

تم تعديل 19 أغسطس 2008 بواسطة ~Heba~

[karohat]

تاريخ مصر؟! -_-

أنا عملته في باب موضوعات جادة

[karohat]

ايه العيب في اني مابارودش غير هنا -_-

[ssmaly]

الأخ كاروهات: بعد التحية لك ولك من فى المنتدى الجميل.هل انت جاد فيما تقول وتسأل؟

المعلومات اللى اعرفها أن كل واحد بيشتغل على عربية فول بيكون هو صاحبها وهو الصنيعى وهو المحاسب و الكاشير و مدير الفرع وكمان رئيس مجلس ادارة المدس وهو العضو المنتدب للطعمية .

أيه الموضوع بالضبط ؟هو فيه واحد ميل عليك وقال لك ان فيه مشروع بيكسب دهب. وحب انه لا موأخذة يقلب الزبون فى قرشين

[~Heba~]

تاريخ مصر؟!

أنا عملته في باب موضوعات جادة

:happy: :lol: wst::

معرفش انا

كان فيه موضوع عن سى السيد برضه موضوع فى باب تاريخ مصر و هو نقله

انا احوليت من كتر المواضيع

المهم يعنى بقى دا شكل موضوع يتحط فى باب موضوعات جادة

و جدية ايه اللى بتتكلم عنها شكلك و الله جاى تنكت و هو فاقس الحكاية عشان كده مظهرش يرد لغاية دلوقتى wst::

و بعدين انت جاى منشن عليه عشان مبتردش غير فى الموضوع ده و او ما جيت عملته هو دا كل اللى هامك فى محاورات المصريين!!!!

عروستييييييييي...عايزة مساعدة فى حل اللغز دا بقى

[HDarwish]

أخ كاروهات .. ولا تتنرفز .. ولا تتعصب ولا حاجة .. أنا ما قصدتش أي شيء من سؤالي اشمعنا سي السيد .. كل الموضوع حبيت أعرف بس إيه العلاقة بين سي السيد وعربية الفول .. وإنت فعلا وضحتها خلاص .. وهي ان الراجل كان عنده مطعم فول وطعمية .. وطبعا من باب اسألوا أهل الخبرة كان حتماً لازم تسأل سي السيد..

حاجه كمان .. آخر حاجه سمعتها عن مشاريع الفول والطعمية إن الناس اللي شغالة من زمان في المجال ده بدأت تقفل محلاتها وكان السبب إن الفول بئا سعر الكيلوا فيه ب ثمانية جنيه غير ارتفاع سعر الزيت كمان

تمنياتي بالتوفيق

[karohat]

هيا الناس فاهماني غلط ليه؟

أنا اتنرفزت من موضوع تكافل اجتماعي مش من سؤالك

الأخت اللي بتقول بانكت

ياريت حد يطلعلي موطن فكاهة في الموضوع بتاعي

:closedeyes: