تأشيرة زياره لحماتى

[MahmoudAbdelmoniem]

السلام عليكم ورحمة الله وبركاته

معلش يا جماعه لو حطول عليكم شويه بس انا محتار ومش عارف أعمل ايه؟

يا جماعه انا مهندس مصرلا مقيم فى الرياض ومراتى الحمد لله حامل فى الشهر الثامن ومتوقع انها تولد على يوم 16/09/2008

وانا كنت عايز اعمل زياره لحماتى عشان ترعاها بعد الولاده

وطبعا انا كنت عارف انهم حيقفلوا التأشيرات ابتداء من شهر رجب تقريبا وعشان كده رحت وزارة الخارجيه وعملت طلب يوم 18/06 والحمد لله التأشيره اتوافق عليها يوم 22/06 ولما حماتى سألت موظفين السفاره المصريه فى القاهره قالوا ان مدة صلاحية التأشيره فى السفاره شهرين وعلى الباسبور شهر يعنى كده ان شاء الله ضمنت انها تيجى فى رمضان وقبل يوم الولاده.

المهم.. يوم الأربعاء اللى فات (13/08) حماتى راحت عشان تاخد التأشيره قالولها ان صدرت تعليمات من وزارة الخارجيه انمدة صلاحيه التأشيره فى السفاره هى شهر واحد وقالولها ان الفيزا كده راحت بس ممكن اعمل تجديد من السعوديه

ورحت الخارحيه اسأل عن حاجه اسمها تجديد قالولى مفيش ولازم تعمل طلب جديد.

والنهادره رحت قدمت الطلب بس الموظف فى الشباك قالى ان التأشيرات مقفوله لغاية بعد الحج الا للزوجه أو الأولاد بس قولتله ان مراتى حامل وكنت جايب ورقه من المستشفى تثبت ده لقيته بيقولى ان معظم الناس بيعملوا كده يعنى من الآخر معظمهم كدابين وبيجيبوا ورق مضروب من المستشفيات بخصوص موضوع الحمل ده.

ولما رحت البيت ودخلت أدور برقم الطلب لقيت رسالة بتقول (نعتذر عن عدم تنفيذ الطلب) فهمت منها انهم موافقوش على الطلب.

والموقف دلوقتى ان مراتى حامل فى الثامن ومتقدرش تنزل مصر لأن فيه خطوره على الجنين وفى نفس الوقت مش قادر أعمل زياره لأمها ..مش عارف أعمل ايه وازاى أثبتلهم ان مراتى حامل فعلا مش كدب.

لو حد يعرف يقولى انا ممكن أعمل ايه يبقى كتر خيره لأنى بجد محتار جدا وده أول ولد لينا ولا انا ولا مراتى عندنا خبره فى مواضع الحمل والأطفال.

وآسف مره تانيه على الاطاله.. ويارب محدش فيكم يتعرض للموقف ده

[sayed metwally]

السلام عليكم ورحمه الله وبركاته

والله انا حصل معايا نفس اللى حصل معاك بالظبط

بس انا كنت عامل زيارة لوالدتى وحمايا وحماتى واتوافق عليها

بس للاسف راحوا السفارة السعودية فى مصر وقالولهم نفس الكلام

وروحت الخارجية هنا فى الرياض وقالولى نفس الكلام اللى قالهولك

ومش عارف اعمل ايه

فيه ناس قالولى روح الداخلية وناس قالولى روح مكتب الاستقدام

وانا ان شاء الله هعمل اللى عليا والباقى على ربنا ان شاء الله

وربنا يقدم مافيه الخير ليا وليك

[se_ Elsyed]

أنا شربت من نفس الكاس

وبعد ما عملت تأشيرة لوالدتي وحماتي عشان ييجوا يحجوا .. وفضلت حاطط في بطني بطيخة صيفي وراكن التأشيرة وأخرتها لأقصى وقت لإنها كانت صالحة لمدة شهرين في مصر ...

السفارة السعودية فقسوا العملية ولقوا عندهم كمية تأشيرات بالعبيط متوافق عليها ولم يتقدم أصحابها ليأخذوها أنتظاراً لرمضان ... راحوا أصدروا قرار في الخباثة بإن التأشيرة تبقى مدتها شهر من تاريخ إصدارها ... وبالتالي راحوا الإتنين ...

لكن هناك بُشرى سارة لكما إنتم الإثنين بالذات يا باشمهندس محمود إنت والباشمهندس سيد

وهو إنكم ممكن تتقدموا عن طريق وزارة الداخلية - قسم الإستقدام اللي في طريق الملك عبد العزيز

حيث إن الأطباء والمهندسين مسموح لهم بالتقدم للزيارة لعائلاتهم - بما فيهم حماتهم ومامتهم - في أي وقت - أما باقي المهن فدول ولاد البطة السودا ...

أهم حاجه تكون المهنة مكتوبة كده في الإقامة ... شدوا حيلكو قبل رمضان وقدموا ...

[النيل حبيبي]

حمداً علي السلامه ياريس

ان شاء الله تكون قضيت اجازة سعيدة

[MahmoudAbdelmoniem]

متشكر جدا يا سى السيد وان شاء الله رايح يوم السبت أقدم فى وزارة الداخليه وربنا يسهل ان شاء الله

ولو كده يبقى ليك الحلاوه يا ريس

[عصام أبوالفتح]

جمد قلبك يا هندسة

قدامك بكرة تروح للداخلية وياريت تصحى بدرى 5 او 6 صباحا عشان الرقم

المهم اسء احتمال حصل لى وانا باستقبل اول مولودة لى وكنت بطولى انا ومراتى برصو بدون خبرة

استعن بالله ولو مجتش حماتك انتظر اللحظة وطير على دار الشفا مراتى ارتاحت معاهم مرتين

المهم تتفق مع دكتورة مصرية وتكون عارفة معاد الولادة وجاهزة يومها مع هامش اسبوع فوق وتحت يعنى مش مسافرة

وتسأل على واحدة كمان احتياطى .. لو محتاج اجيبلك نمرة اللى اتعاملنا معاها .

ربنا يقوم مدامتك بالسلامة ويجيبلك مولوك بالف خير

[قاهرى]

من راى يا بشمهندس نزل مراتك عادى مفيش خطورة فى الشهر الثامن ولا حاجة

بس طبعا استشير الطبيب المتابع لحالت مراتك

وخليها جنب ممتها لانها فعلا هتكون محتجاها فى الوقت دة وانت مش هتعرف تتصرف لوحدك

ولا زوجتك هتعرف تتصرف خصوصا بعد الولادة دة غير ان مفيش حد عندوا خبرة زى منت قولت

ربنا معاكم

والف مليون مبروك على النونو الجميل وربنا يتمملكم الموضوع والولادة على خيررر

اخوك قاهرى