استفتاء مثييير للشباب

[Proud Muslim]

الأخت الفاضلة غادة :

ولكن حضرتك بتقول ((و لكن موضوع أسري و صالونات هذا لا أستسيغه و أعتبره أي كلام . 

قد يكون عن طريق تزيكة أحد الاخوة لأخت متدينة .. او زميلة عمل أو ماشابه)) 

مالفرق بين التزكيه والصالونات؟؟

جزاك الله خيرا على التعقيب ..

و لكن ما عنيته ..

أن موضوع الصالونات تكون جلسة ستات و هذه تقول فلانة و هذه تقول علانة .. و قد تكون المسألة مسألة تمشية حال مش أكثر ..

و بصراحة من غير زعل .. أحب أن يزكي لي أحد الاخوة لفتاة من أخواته أو من أقاربه لأنه سيعطيني صورة واضحة الى حد كبير لأنه لا يريد أن يوهمني ..

أما بعض النساء .. فأحيانا تقول .. و الله بنت متدينة و عشرة على عشرة .. و الموضوع كله أي كلام و مبالغة ..حتى لو كانت أمي .. فهي تسعى لتزوجي لفتاة تعجبها هي و قد تحاول تحلية البضاعة .. عذرا في اللفظ يعني !!

محدش يزعل مني .. بس ده رأيي .

لكن المبدأ الأصلي هو عدم الدخول في أي علاقة قبل الزواج ..

الأخ alnadim

اخيرا براود مسلم سؤالك الفلوس اعمل بها ايه تديها للمنتدي يجبلنا سندوتشات فول وطعمية اما لو كانت فلوس كتير قوي فبرضه تديها للمنتدي علشان يجيب محامين للناس اللي مش عاجبهم اللي داير في البلد

:D :D :D

بس كده .. غالي و الطلب رخيص ..يبقى ندور على واحدة متريشة تحسن أوضاع الجميع . :D

[الطفشان]

انا معاك ان كثير من السيدات بيمشوا سوق بعض

و تلاقي مشاكل كثير و كل واحدة تسألها تشكر و تقول مديح فقط

لكن

اظن ان سواء صالونات او تزكية او غيره

العبء هنا على الطرفين المعنيين في الزواج (العريس و العروسة)

يعني مهما كان، المسئولية عليهم و ليس على اي شخص غيرهم سواء سعى في الزواج او استشير او او

لان انت اللي حتتجوز مش أي حد تاني

[Lancelot]

الاخ Lancelot 

((حضرتك بتقول بدام طالبة المساوه يبقى تصرف على البيت ))انا متفقه معاك ان كلامك صح بس مش تصرف كل مرتبهاا يعنى يكون احسن انها تصرف جزء من مرتبها فى البيت وفى نفس الوقت تدخر لها جزء لنفسها 

ده من راى واتمنى انى اكون وضحة لحضرتك وجهة نظرى

طبعا مش كل المرتب ... لكن قصدي إن إنفاقها علي البيت مايكونش تفضلا منها زي ما تكون بتعمل حاجة مش واجبها أصلا .... لأن لو ده مش واجبها يبقي مفيش داعي للعمل .....

شكرا للتوضيح ...

[بنت شعنونة]

مع انه للشباب بس

بس ماشي

نغلس برضه :D

-هل تفضلون الزواج التقليدى عن طريق الاسره.. أم الزواج عن طريق الحب والتعارف قبل الارتباط

مش فارقة.. المهم يكون في تفاهم..لآن الحب ها يروح... و الاسرة ها تروح.. مش ها يفضل غير الختيار...

2- هل تكون الافضليه للجمال ام المال ام الحسب ام التدين؟؟

للأخلاق و الشخصية مع بعض..

3- ماذا تفضلون ان تكون الزوجه عامله ام لا تعمل وتتغرغ لمنزلها؟؟

بما ان الاجابة بالمقلوب... ف انا عن نفسي عاوزا اقعد في البيت...

4-ماهو الافضل ان تكون الزوجه او الزوج فى نفس المستوى التعليم ام اقل؟؟

يا اما متساوي يا اما هوا احسن.. عشن عقدة الراجل الشرقي...

ماهو فارق السن المناسب بين الزوج والزوجه؟؟

مش فارقة برضه..المهم التفاهم زي ما قلت

العصمه فى يد الزوج هل من الممكن ان تتنازل عنها للزوجه؟؟

والله كان نفسي تبقى في ايدي.. بس ربنا يخليلنا الخلع "وش ميت ضحك"

لالا بجد... انا ما ارضهاش. انا مش ها اتجوز شوال بطاطا؟

الراجل لازم انا احس اني ضعيفة معاه مش العكس

وما حدش يفهم كلمة ضعيفة دي غلط والنبي...

7-ماهو اكثر شئ تفضله فى الزوجه قبل الزواج المال ام الثقافه ام السمعه؟؟

ولا اعرف

8-ماذا تفضل ان تتحمل انت الانفاق على الاسره بمفردك ام تساعدك الزوجه بجزء من دخلها ؟؟

وقتها الله يحلها الله

9- ماهى وجهة نظرك: أن تكون المرأة لها هواية تقوم بها أم ان الهواية ستشغلها عن الزوج وعدم الاهتمام بأسرتها؟؟

دي اسمها هواية؟؟

يعني وقت الفراغ

حلو برضه اهي تضييع وقت

"وش عرقان بعد الأمتحان"

[kokowawa1979]

هل تفضلون الزواج التقليدى عن طريق الاسره.. أم الزواج عن طريق الحب والتعارف قبل الارتباط

أفضل عن طريق الأسرة لإن اللي نعرفه أحسن من اللي منعرفوش وليس المقصود أن الزواج يكون من نفس العائلة ولكن يمكن أن يكون من المعارف ويفضل أن يكون الأب والأم راضين عن الزوجة أو الزوج حتى يبارك الله الزواج ولأن الغرض من الزواج هو زيادة أواصر القرابة بين المسلمين

2- هل تكون الافضليه للجمال ام المال ام الحسب ام التدين؟؟

فاظفر بذات الدين تربت يداك--- لأن الجمال مصيره إلى زوال

3- ماذا تفضلون ان تكون الزوجه عامله ام لا تعمل وتتفرغ لمنزلها؟؟

هذا على حسب الحالة المادية للزوج إن كانت كافية للإنفاق على الأسرة في حالة عدم خروج المرأة للعمل وسيكون نتيجة هذا تربية صالحة للأبناء بحكم تفرغ الأم لهذه المهمة الشاقة لأن تربية أبناء الجيل الحالي مهمة شاقة للغاية على كل أم

أما إن كانت الظروف المادية للزوج لاتسمح بذلك فيجب عمل الزوجة وأن تكون ماتنفقه على الأسرة عن طيب خاطر وليس إجباريا لهذا فالتفاهم هنا بين الزوجين على جانب كبير من الأهمية لأن الإثنين يعملان ويكدان من أجل الأبناء وبنظرة سريعة على حال شباب هذه الأيام سوف تجدون أن معظم الشباب الشمام والمسطول هو نتاج عدم تفرغ الأم لتربية الأبناء

-ماهو الافضل ان تكون الزوجه او الزوج فى نفس المستوى التعليم ام اقل؟؟

يفضل بالطبع أن يكونا في نفس المستوى التعليمي أو أن يكون أحدهما أعلى بدرجة بسيطة مع العلم بأنه لو رجعتم إلى الماضي ستجدون أنه كان هناك فارقا كبيرا بين بعض الأزواج وزجاتهم من الناحية التعليمية وكانت الأم تمكث بالمنزل ومع ذلك كان معظم أبنائها يتنصبون مناصب رفيعة واسألوا عواجيز المنتدى

ماهو فارق السن المناسب بين الزوج والزوجه؟؟

من 5 إلى 8 سنوات في المعقول و3 سنوات للزوجة أكتر من الزوج برضه بسيطة

العصمه فى يد الزوج هل من الممكن ان تتنازل عنها للزوجه؟؟

طبعا لابد وأن تكون في يد الزوج مش في إيد صباح واللا فيفي عبده

لالا بجد... انا ما ارضهاش. انا مش ها اتجوز شوال بطاطا؟ 

الراجل لازم انا احس اني ضعيفة معاه مش العكس 

وما حدش يفهم كلمة ضعيفة دي غلط والنبي...

أحلى تعليق اتكتب يادكتورة شعنن بجد ( وش فاتح بقه على اآخر من الضحك)

[غادة]

عزيزتى شعنونه

شكرا لتجاوبك معنا

انتى بتقولى ((مع انه للشباب بس

بس ماشي

نغلس برضه ))

ازى بقه ده انتى منوره

وعلى فكره الاستفتاء للبنات والشباب

وان شاء الله دورى جى فى الاجابه

واشكر كل من شارك معى واتمنى مشاركة بقية الاعضاء

اختكم غاده

[wa7d]

أنا لن أشارك فى الإستفتاء ( وش واحد عجوز ) لكن من واقع التجارب سوف أشارك بالنصيحة .

للشاب : إذا عاوز تتجوز دور على بنت المدير بتاعك ، أو بنت صاحب شركة كبيرة أو بنت رجل ذو سلطة . الناس دى حتسهل لك المشوار . إستثناء وحيد أن تجد فتاة الأحلام والحب الكبير ، غير كده كل البنات زى بعض . يبأه الأحسن تدور على المصالح - مش عيب . ويمكن واحد يقول أنا لازم أكون راجل البيت !!! ، أنا لا أتصور إن الزوجة تريد أن تكون هى الراجل حتى لو تقدر . المهم الزوج لا يكون كسول ومستهتر .

الفتاة : لابد أن تتزوج واحد غنى لأن الفلوس بتساعد كتير فى توفير السعادة - ولكن لابد أن يكون له عمل وليس عاطل ومتدين . كل حاجه بعد كده ممكن تتصلح .

بس المشكله إذا الشاب دور على واحده غنية ، والفتاة دورت على واحد غنى إمال الناس الغلابه حيتجوزوا إزاى ....... الحقيقه مش عارف (وش واحد صعبان عليه )

[alnadim]

محلوله يا استاذ واحد

الواد الغني يتجوز بنت الرئيس

والبنت الغنيه تتجوز وكيل عربيات رولز رويس

والغلابه يحبوا بعض فيبقي جواز الحب الكبير

وبكده الاغنياء يتصوروا انهم اذكياء لانهم فهموا اللعبه ويبقوا سعداء

والغلابه يتصوروا انهم بيملكوا ما هو اهم من الفلوس وهو الحب ويبقوا سعداء

والكل يوهم نفسه وتظل الدنيا سايره

مع خالص تحياتي

[غادة]

اخى واحد

معرفش انا عندى احساس انك بتهزر

مش ممكن حد يفكر بالطريقه دى

الدنيا كلها مصالح وكل واحد عايز مصلحته بس ان موضوع المصلحه يوصل للزواج ده حرام

الزواج اللى اتبنى على مصلحه نهايته هتكون معروفه

ليه الناس بتفكر بلفلوس كل حاجه فى حياتها الفلوس

الرسول صلى الله عليه وسلم قال فاظفر بذات الدين تربت يداك

وقال من جاءكم من ترضون دينه وامانته فزوجوه

فأين الدين والامانه هنا وهو رايح يتجوز الفلوس والمصلحه الشخصيه

والدين ماقلش اتجوز اللى عنده فلوس وبعدين كل حاجه بعد كده ممكن تتصلح .

وشوش مصدومه وحزينه على اللى حصل فى الدنيا

[wa7d]

الأخ alnadim يظهر أن ذلك مايحدث فعلا . ملاحظه جيده .

ألأخت غاده مالو جواز المصلحة طالما مفيش حب . وبما إنك ذكرت الرسول عليه الصلاة والسلام ، فأظنك تعلمى أنه تزوج السيده عائشه ، وكانت غنية . وبعدها تزوج لخدمة الدعوة . والله أعلم

ولا تزعلى ، إنت ممكن تتزوجى واحد على أده مادام عجبك دينيا وعلما .

[M.H.M]

الأخ alnadim يظهر أن ذلك مايحدث فعلا . ملاحظه جيده . 

ألأخت غاده مالو جواز المصلحة طالما مفيش حب . وبما إنك ذكرت الرسول عليه الصلاة والسلام ، فأظنك تعلمى أنه تزوج السيده عائشه ، وكانت غنية . وبعدها تزوج لخدمة الدعوة . والله أعلم 

ولا تزعلى ، إنت ممكن تتزوجى واحد على أده مادام عجبك دينيا وعلما .

ويعنى هو الرسول (صلى الله عليه وسلم ) تزوج للمصلحة ؟

متهيألى خانك التعبير يا أستاذ واحد

ثانيا أرجو عدم ضرب المثل بالرسول (صلى الله عليه وسلم ) فى شىء الا بعد التثبت

[DARWEEN]

أولا .. أهلا بيكي يا غاده في المنتدى ولو انها متأخرة شوية

بالنسبة للمداخلة أنا عاوز أعقب على نقطتين

1- بالنسبة لي فالراجل هو الملتزم إلتزام تام بكل أعباء البيت سواء كانت الزوجة تعمل أم لا وإن كنت أفضل عدم عملها وتفرعها لشئون البيت

2- بالنسبة للعصمة ... فمنح الزوجة العصمة يعني منحها حق تطليق نفسها وقتما تشاء ولا يسقط عن الزوج هذا الحق ... وفي رأيي الشخصي أن الزوجة التي ترغب في الأنفصال فلا يجب على الزوج أن يبقي عليها .. علاوة على أن قانون الخلع جعل الموضوع في منتهى البساطه

[crossfield]

و الله أنا باستغرب على الناس اللى بتتكلم على جواز المصلحة ده ؛هوه الواحد بيتجوز عشان يبنى أسرة صح و الا عشان يطلع و يتسند على حس المدام؟ في حديث شريف معناه(لأنى مش فاكرة نصه) ان ما من رجل يتزوج امرأة لمالها الا و أحوجه الله اليه-أى الى مالها. يعنى لو بتختار واحدة عشان فلوسها أو نفوذها و بس فده هيبقى سبب لذلك -من الذل-فيما بعد و ليس العكس كما يعتقد البعض.

[جـورج]

-هل تفضلون الزواج التقليدى عن طريق الاسره.. أم الزواج عن طريق الحب والتعارف قبل الارتباط

الزواج بعد معرفه افضل و مش شرط بعد قصة حب المهم انى اعرفها و اعرف اخلاقها و تصرفاتها

2- هل تكون الافضليه للجمال ام المال ام الحسب ام التدين؟؟

الافضليه للاخلاق و انسجام الشخصيات

3- ماذا تفضلون ان تكون الزوجه عامله ام لا تعمل وتتغرغ لمنزلها؟؟

الأفضل متعلمه و مثقفه

4-ماهو الافضل ان تكون الزوجه او الزوج فى نفس المستوى التعليم ام اقل؟؟

فى نفس المستوى

5ماهو فارق السن المناسب بين الزوج والزوجه؟؟

خمس سنوات و لا مانع ان تكون الزوجه اكبر سنه او اتنين

6-العصمه فى يد الزوج هل من الممكن ان تتنازل عنها للزوجه؟؟

السؤال ليس له اجابه عندى للأسف ، و ان كان القرار يجب ان يكون مشترك

7-ماهو اكثر شئ تفضله فى الزوجه قبل الزواج المال ام الثقافه ام السمعه؟؟

الاخلاق

8-ماذا تفضل ان تتحمل انت الانفاق على الاسره بمفردك ام تساعدك الزوجه بجزء من دخلها ؟؟

البيت مسئوليه مشتركه

9- ماهى وجهة نظرك: أن تكون المرأة لها هواية تقوم بها أم ان الهواية ستشغلها عن الزوج وعدم الاهتمام بأسرتها؟؟

و ما المانع ان تكون لها هوايتها

[wa7d]

ويعنى هو الرسول (صلى الله عليه وسلم ) تزوج للمصلحة ؟

متهيألى خانك التعبير يا أستاذ واحد 

أنا لم يخوننى التعبير ولا حاجه . المشكله إنك فاكر إن زواج المصلحة عيب . لكن عيب ليه ؟؟ !! - أنا قلت إذا إستثنينا حال أن يقع الشاب والفتاة فى الحب - أى أن تكون العملية مشروع لتكوين أسرة ، فمن الأفضل أن تكون الأسرة لها عناصر القوة . ومن قال لك أن القتاة التى من عائلة غنية أو ذو سلطة هى فتاة سيئة أو أقل من أى فتاة أخرى .

عموما هذا خارج موضوع المداخلة .

[crossfield]

بل خانك يا أخ واحد

فالسيدة خديجة هى التى طلبت الزواج من الرسول لما عرفته عنه من الأمانة و الصدق بعد أن كان يدير لها تجارتها.

[wa7d]

بل خانك يا أخ واحد 

فالسيدة خديجة هى التى طلبت الزواج من الرسول لما عرفته عنه من الأمانة و الصدق بعد أن كان يدير لها تجارتها.

O.K ....... حصل خير .