إرهاصات سين سينيه عن زيارتة للأراضي المصرية في إجازته الصيفية الأخرانية

[se_ Elsyed]

بأعتبر أجازتي الصيفية هذه المرة مختلفة تماماً عن أي أجازة سابقة أخرى طوال فترة غربتي وترحالي .....

لإني أعتقد إن مصر إبتدت تحصد وبشدة محصول 25 سنة فساد و25 سنة ديكتاتورية ... وبالتالي الشعب المصري اللي سكت طوال تلك الفترة .. فاق على هول المصايب اللي بتحصل له وأولها الإرتفاع الفاحش في أسعار كل شيء في مصر الأن... وما حدش يقول لي ما هو إرتفاع الأسعار ده في العالم كله دلوقت...

أي نعم هو في العالم كله لكن الدول المحترمة واللي واقفه على رجليها ما بتتأثرش مثلنا كده ... ويكفي إننا بقى لنا عشرات السنين بنعاني من مشكلة الخبز .. وعلى رأي واحد صاحبي في أواخر الأربعينات بيقولي : تخيل إني من ساعة ما وعيت على الدنيا وإحنا في مصيبة طوابير العيش دي

يبقى بالله عليكو مش احسن نوفر الفلوس ونقفل كليات الزراعة والإقتصاد ونقفل المدارس اللي بتخرج دبلومات زراعة والكلام ده وأهو نعيش على الإستيراد أو نعيش بالبركة زي بعضه ؟

نتكلم بشكل خاص شويه وعايز الشباب الصغير يستأذن بابا وماما قبل ما يقرا الموضوع ده عشان ما يرجع ينتحر ويلزق السبب في سين سين ويكشف راسه ويقول : منك لله يا بعيد سودت الدنيا في وشنا اكثر ما هي سودا ...

فما حدث معي لم اكن أتوقعه ولا أصدقه حتى من واحد مجنون لو كان حكى لي عليه ...

فتخيلوا شخص يضع شقى عُمره – وش أبو كمال نور الشريف في فيلم العار لما حط شقى عمره في صفايح السمنة ودفسهم في الملاحات - في العديد من سنوات الغربة في قطعة أرض عشان يبنيها فيلا بمشاركة أحد أقربائه وبعدين ييجي الحديد والأسمنت والحركات تولع يقوم يعجز عن إستكمال البناء فيبيعوا الأرض بالمباني اللي عليها بمكسب معقول جداً ويبتدي يدور على شقة من أول السطر ... فيلاقي إن نفس الشقق اللي دور عليها في أول سنة 2006 ( يعني بنتكلم في أول إمبارح مش من 10 سنين مثلاً عشان نقول ده كان تاريخ وماضي وراح !!!!!!!!!!! ) فيلاقي الأسعار دي إنضربت في 3 و4 ...

على سبيل المثال ... كنت معجب جداً وذكرت قبل ذلك بمنطقة سكنية جديدة ناشئة في مدينة نصر وتقع خلف مدارس المنهل في شارع مصطفى النحاس باشا بطل معاهدة 36 ... وتوقعت إنها هاتبقى زي النزهة الجديدة كده من حيث خصوصيتها وهدوئها وتخطيطها السليم والمساحات الخُضرا اللي فيها ...واكاد ادعي إني حافظ المباني هناك مبنى مبنى وعارف أسعارها ويمكن اصحابها كمان ... وكان المتر في أوائل 2006 بيتباع ما بين 1000 إلى 1200 ج بالكتير قوي ... وإذ بي أُفاجأ إن نفس الشقة هي هي اللي كانت في 2006 وكان ثمنها 200 ألف ومساحتها 200 او 220 متر وكان أصحاب العقارات بيدللوا عليها ويبيعوها بالتقسيط مع حصة في الجراج ويبقى عايز يشيلك من على الأرض شيل ويقول لك : اللي يحب ربنا ... ييجي يسكن عندنا ..... نفس الشقة بأقول مش واحده تانية دلوقت بتتباع على الأقل بـ 650 ألف وكاش ويبقى صاحب العمارة قرفان منك كمان وهو بيكلمك ولو فاصلت معاه في السعر او نطقت بكملة زندقة مثل التقسيط على سنتين أو خد جزء ويبقى لك جزء ..... يبقى ده أخر قرار هاتاخده في حياتك ...

وكنت ناوي السنة دي أغير إستراتيجية الحرب العقارية التي أتبعها وبدل ما أدور في العماير الجديدة اللي أصحابها إنكووا بنار الحديد المحمي بتاع عز-مبارك .... قلت اجرب الشقق اللي ساكنة بالفعل وأصحابها عايزين يبيعوها وهم كُثر بصراحة من حجم الإعلانات الضخم كل يوم ، فلما يكون واحد عنده شقة شاريها من سنتين تلاتة بميتين باكو وياخد له فيها 400 دلوقت .. أهو نعمة ورضا ويبوس إيده شعر ودقن ...

وبالتالي كنت بالعب بجريدة الوسيط دي لعب وبأفليها من الجلدة للجلدة ولا أكتفي بذلك بل بادخل على موقعهم الإلكتروني كمان وأنقي الحاجات اللي عجباني وتناسبني وأكلم الناس لدرجة حسيت إني كنت شغال في سنترال من كُتر ما اتكلمت في الموبيل ...

وكمان عديت على كل السماسرة في المناطق اللي حددت هدفي فيها وهي " مدينة نصر ... النزهة .... مصر الجديدة " وكلمتهم وسيبت لهم معلوماتي وطلباتي

واحد يسألني ويقول لي .. طب مانت كنت مُعجب بالعبور وبتقول فيها شعر جاهلي من المعلقات ؟

أقول له أيوه ومازلت ... بس لأني حافظ العبور ومش محتاج لا سماسرة ولا حد يدلني على سككها فقلت أخليها للاخر أحلي بها عشان لما أشوف المُر .. يبقى للحلو معنى وطعم أخر ( إيه الحِكم دي يابو الأسيان يا خبرة ؟ lol )

وقد كان يا سادة ... فقعدت شهر كامل أقسم بالله شوفت فيه عجب العُجاب .. وطرقت فيه باب كل شقة عايزة تتباع فيكي يا مدينة نصر او يا نُزهة أو يا مصر الجديدة تناسب ميزانيتي اللي كنت فاكر إني أبو عرام وهانزل أشتري بتحويشة عُمري دي شقة عالنيل أربع مطارح وعفشة ميه ... وكمان شوية عفش من درب البرابرة وخصوصاً الصالون الأوبيسون اللي كان نفسي أشوف شكله بس ويبقى لي حمام خاص بقى بدل الحمامات بتاعت الشقق المشتركة وأرتاح في بيت الراحة ... وكمان كنت مخطط بإن بالفلوس اللي باقية هاجيب عربية ستة سلندر وسكستين فالف ..

في الأخير طلع نقبي على شونه والفلوس يادوب كانت تجيب شقة أوضتين وصالة هناك والله أعلم فيها عفشة ميه ولا هايبقى الحمام عند البواب تحت ونتقل على الراجل ونزعجة كل شويه ... بالمناسبة هو ده معنى التضخم الإقتصادي ... يبقى معاك فلوس كتيييييييييييييييير لكنها ما تجيبلكش حاجه نتيجة إرتفاع الأسعار الزائد عن الحد

بالمختصر المفيد طلع القديم زي الجديد وكل الناس فاقسه العملية وكإنهم دارسين إقتصاد وعلوم سياسية وعارفين يعني إيه معنى " تكلفة الفرصة البديلة " ولو أنا معايا شقة قديمة وفي جانبي أخرى مشابهه لها تحت الأنشاء بتتباع بمية ألف – والعياذ بالله طبعاً – يبقى من السفاهة إني أبيعها بخمسين مثلاً ولو كنت كسبان حتى في السعر ده 100 % ...

***** إضحك مع سين سين ... امثلة عملية بالأسعار الحالية عشان تشوف الدنيا جرى فيها إيه .****

زوج أختي ساكن في شقة 180 م بعباس العقاد وتحديداً مقابل حي السفارات وكان واخد الشقة دي سنة 2004 بمبلغ 200 ألف 110 كاش و90 تقسيط على سنتين ... وصاحب العمارة مسقع شقة في الدور الأخير لحد دلوقت فقلت لزوج أختي اتصل به كده وشوفه عايز فيها كام ... فيرد عليه ويقول له : 750 ألف باكو وعلى الترابيزة يا معلم ... الشقة نص تشطيب يعني على المحارة فقط ..... لا تعليق

في أحدى جولاتي المكوكية بمدينة نصر ... وتحديداً في أحد الشوارع المتفرعة من ش حسنين هيكل ورا مطعم جاد كده .... لقيت حتة دين عمارة تحت الإنشاء قربت تتشطب وطالعة الدور على شقتين فقط 260 و 225 متر ولقيت يافطة كبيررررررررررررررررررررة متعلقة بتفاصيل الرخصة والشكل النهائي للعمارة وكمان الأسعار لكن عشان كنت أنا اللي سايق فما قرأتش اللي مكتوب .. وإذ بي أجد زوج أختي جنبي في العربية بيصرخ ويقول لي : ألحق يا سين سين ... ده المتر في العمارة دي بـ 2000 ج ( هما اللي كاتبين كده بخط إيدهم ) .... والكُفتة بالمتر زي زمان ... وصاحب العمارة مجنون وألحق يا جدع قبل ما يعقل ..

طلعنا أتفرجنا ... حاجه ووووووووهم بصراحة .... ريسيبشن – يعني أوضة مسافرين وأوضة جلوس وأوضة سُفرة -كبيرررررررررررررررررررررررر ..... وغرفة معيشة عشان الأكل والفرجة على قناة الجزيرة .. و3 غرف نوم محترمين ومطبخ مفتخر قد الاوضة وحمامين عموميين وواحد تاني في الأوضة الماستر وتراس بحري هواه يرد الروح ويشرح القلب العليل... وحاجه مافيهاش غلطة بصراحة

قلت في عقل نفسي : بايضه لك في القفص يا س س ... 520 ألف مش كتير أهو تحط تحويشة عمرك كلها على قرشين تستلفهم من عم عادل ابو زيد قد 200 ألف وترجعهم له بالتقسيط على 10 سنين ... على 100 ألف يبعتها لك أخوك وحبيبك من أيام الجيزة موديست من جدة وفوقيهم بوسه ... على 100 كمان من اخوه حبيبي الإكسلنس على 100 تاني من هنا وهناك ... أهو الحاله تمشي وتبقى خبطت خبطة العُمر ...

لكن إذ بموظف الشركة العقارية اللي بيفرجني يدلق عليه جردل ميه ساقعة أشبه ما يكون في ليلة من ليالي الشتار القارص ويقول لي : على فكرة الأسعار دي كانت من سنة ... دلوقت حضرتك اللي فاضل في العمارة كلها شقتين .. وسعر المتر دلوقت 4800ج ... لوووووووووووووووووولي ... زغرطت طبعاً من فرختي ... 60 % دلوقت ... والـ 40 الباقية على سنة .... .. يعني بأتكلم في مليون وربع في شقة نص تشطيب ...أتكسفت أكلم عم عادل وأقول له دبر لي إنت المليون وأنا هاتصرف في الربع لإني عارف إن رمضان على الأبواب وبالتأكيد الراجل محتاج قرشين يشتري بهم ياميش رمضان ومن بعدديه كحك العيد وكده يعني واللي ما يبصش من الغربال يبقى أعمى بصراحة

بالمناسبة الشقتين لسه موجودين للي عايز أديله العنوان بالتفصيل ...

مثال أخر ...

في أول 2006 كنت بأكشف على عين الولا عمر في مستشفى المغربي اللي في أول عباس العقاد جنب ماكدونالد .. ولقيت عمارة بتتبنى جنب بنك فيصل قلت أخد فكره وأشترى بكره وأهو اللي ما يشتري يتنيل

لقيت الشقة 220 م تحفه بصراحة ومعموله بمزاج وتبص على عباس العقاد مباشرة بس بعيد عن دوشة العربيات ... والراجل صاحب العمارة دماغه عاليه فراح إتفق مع بنك فيصل يدوله فلوس الشقة اللي تتباع والمشتري يقسط للبنك ... وكان سعرها الإجمالي 440 ألف ج النص عند التعاقد والبنك بيقسط الباقي تقريباً بفائدة 8 % سنوياً ... حاجة زي الفل ...

وساعتها أستكترت المبلغ وقلت يـــــــــــــــــــــــــــــــــــــــاه 440 ألف ... إيه الإفترا ده ...

أقسم بالله الصيف اللي بعده اللي هو 2007 روحت المغربي برضوا وقلت لازم أزور سيدي الطشطوي اللي ساكن في العمارة أم 440 ألف دي وأشوف حصل إيه .. لقيت العمارة سكنت بأكملها ... وهناك ناس ساكنه بتعمل سبوبه على السريع وبتبيع اللي إشتريته من سنة وأقل سعر للشقة كاش وتوتو على كبوتو مليون جنيه ده عشان خاطر سعادتك يعني بنتكلم على مكسب 115 % تقريباً في أقل من سنة .!!!!!!!!!!!

يعني لو الواحد بيتاجر في الهيروين مش هايعمل المكسب ده بما فيها من مخاطر الكبسات وتفليس الشمامين وأساساً البضاعة اللي موجودة في السوق ما بقتش تعمل دماغ زي زمان وكلها بدرة تلك وعضم مطحون وحاجه تقرف ..

تخيلوا إني خوفت أقرب من نفس العمارة السنة دي مع إني روحت هناك ييجي تلتلاف مره أحسن يكون السكان مكهربينها عشان ما حدش يقرب ويسأل على الأسعار السنة دي ؟!!!!

بإختصار .. متر الشقة المعفنة في مدينة نصر وضواحيها دلوقت بيبدأ من 3000 ج وإنت طالع ...

قبل ما أختم .. كنت عايز أقول إن من بين العشروميت شقة اللي شوفتهم وأنا لسه معيشكوا معايا في مدينة نصر وماخرجناش منها ... ومع إني عارف إن العملية عرض واطلب وما بين الشاري والبايع .. يفتح الله ... ما غظنيش غير واحدة ست صاحبة شقة كلمتها لما لقيت إعلان عن شقة 120 متر في أول عباس العقاد خلف بنك الاسكان والتعمير في حسنين هيكل برضوا بس في الأول قلت أتنازل عن طموحاتي وأخد الشقة اللي تعتبر صغيرة جداً بالنسبة لي واهو كله بثوابة وعلى قد لحافك دلدل رجليك ويا سيدي لو رجلك طلعت بره اللحاف إبقى البس شراب ... الست دي كنت عايز اروح اضربها بصراحة أو اضرب جوزها عشان أهل النجع ما ياكلوش وشي ويجولوا : س س ضرب حُرمه يا ولاد ..

تخيلوا طالبه في الشقة سعر نوهائي : 630 ألف جنيه مصري ...... لا تعليق وهابعت لكو العنوان للي يحب يضربها لما يعرف السعر ويتغاظ مثلي .

بالمناسبة أنا هاكتب مذكراتي عن اجازتي الأخيرة في 12 حلقة ... وكل حلقة هانزلها في شهر رمضان قبل مدفع الفطار ... ربنا يدينا ويديكو طولة العُمر ... اللي فوق ده على فكرة الجزء الأولاني ....

مجموعة أسئلة يُزاح الستار عن إجابتها العام القادم

هل كانت هناك علاقة بين س س ونور بتاعت المسلسل التُركي وماذا فعلت حرم س س المصون عندما أكتشفت تلك العلاقة ؟

وما هي تأثيرات العولمة والإنفتاح الإنبعاجي الذي حدث لـ س س نتيجة تطبيق المرور الجديد ؟

تُرى هل رضخ س س لمتغيرات السوق المفتوحة من الناحيتين ؟

وهل أستقر س س على مطرح يتاويه في نهاية رحلته ام مازال يُقيم في مساكن الزلزال ؟

هذا ما سنعرفه في رمضان القادم 2009 بإذن الله

[عصام]

وابقى اعمل لنا حلقة وحياة ولادك عن الحلقة اللى اتحلقت لى wst::

حمد لله على السلامة يا كبير :wub:

[se_ Elsyed]

وابقى اعمل لنا حلقة وحياة ولادك عن الحلقة اللى اتحلقت لى wst::

حمد لله على السلامة يا كبير :wub:

آه

كده هاننسيح لبعض !!

بقى أنا اللي حلقت لك ....وإنت أساساً جبتها لي عالزيرو ؟

مين كان ضيف عند مين يا معلم ؟

ولا تلاقيك لما عرفت إني مزنوق في ربع أرنب قلت أما أنفد بجلدي بدل ما س س يرمي الهلب عليه ؟

ماشي يا عصعص .... ما كانش العشم يابن عمي تزبلني الزبلة السودا دي ...

على العموم لينا بيت نتعاتب فيه ... قابلني في بيت الرعب .. قصدي بيت المشرفين عشان نقطع بعضينا هناك ...

[محمد عبدالعزيز]

وإنت إيه بس اللى وداك عند الناس الوحشين دول اللى خلوك عملت فى نفسك كده.

خيرها فى غيرها والسنة الجاية إن شاء الله ابقى قضى الأجازة فى شلايب وحلاتين يمكن تلاقى الأسعار أقل من كده شوية.

[Virus]

أخي العزيز س س

ربما أول مرة أكلمك شخصياً ولكن اسمحلي أقدم التحيات والإعجابات بأسلوب كتابتك الرائع

طبعاً أكيد سمعت الكلام ده كتير..لكن صدقني بدون مجاملة انت ممكن جداً يكون ليك كتابات ساخرة منشورة لأن كتابتك متقلش عن يوسف معاطي مثلاً

نرجع لموضوع الحلقة..أنا سعيد إن في حد (ومش أي حد كمان) دماغه ونونت زي من سوق العقارات في مصر السنة دي لأن اللي حاصل فعلاً يفوق قدرة العقل الطبيعي على الإستيعاب!!!!! :wub: wst:: smk: :D

وأخوك شاف نفس المرار مع اختلاف نوع ومكان العقار المستهدف ..لكن دي حالة عامة وواصلة لحد الأقاليم كمان!!

وسبحان الله ..انت بعت الفيلا عشان تشتري شقة في مدينة نصر وأنا كنت بدور لبيعة لشقتي عشان أشتري أرض في مكان تاني

ونصيحة أخوية من أحد سكان مدينة نصر ل 8 سنين..مدينة نصر بقت لا تطاق فعلاً..زحام وخنقة ومشاكل في الركن وسرقة عربيات وسرقة بالإكراه (في أرقى المناطق) وبنات منحرفة وهبوط حاد في المستوى الجتماعي للسكان (أيضا في المناطق الراقية اسماً الأولى والسادسة والتالتة) مش السادس والعاشر والتامن مع كامل احترامي لكل سكانهم

صدقني مكنتش طايق أقعد في شقتي اللي الناس كانت بتحسدني عليها زمان

المهم..أنا شايف إن لو معاك ربع أرنب تحطه مقدم لشقة 200 متر (تصفى على 175 مثلا..حلوين برضو) في النرجس وتكمل الباقي على سنتين ولا حاجة

ولنا الله يا مصريين ياللي مش عارفين بعد غربتنا دي نجيب مجرد بيت ملك..أبسط طموحات الانسان الطبيعي..

[se_ Elsyed]

يا أخواننا إصبروا على رزقكم وما تحرقوا ليش أم المسلسل ....

كلها رمضان الجاي وتعرفوا كل التفاصيل .. لكن ممكن اديلكوا حته صغيرة كده وأقول لكم إني إشتريت شقة والحمد لله وبدون مبالغة قبل ما أجي بيومين بالظبط .. يعني قعدت 38 يوم ادور واتنطط وفي الأخر إشتريت في اليوم الثامن والثلاثون ..

شكراً لكل المشاركين في المسلسل .... وشكراً للزميل محمد عبد العزيز ... والشكر موصول للزميل فيروس ربنا يبعد عنه الآنتي فيروسات ويستر طريقه

[iloveegypt]

انا بعد ما قرات موضوعك بادعو الان لابوى

ليه ابوى مدير بالتربية والتعليم بس برضه شغال فى التجارة ابن سوق يعنى

اول محوشت قرشين من حوالى سنتين قالى ابنى شقة الان لان الفلوس اللى معاك تبنى الان فقط جيت اطلع رخصة قالى بلاش تضييع وقت ابنى حالا لان الحديد والاسمنت هيغلى ومش هتعرف تبنى اوضة بعدين

وفعلا ولله الحمد بنيت بدون رخصة وشطبت وبعدين ماشى بقالى سنتين بخلص موضوع المخالفة

بس علشان تعرف بنيت بطن حديد عز 3000 جنيىه

والاسمنت 320

فشكرا والدى

ولتذهب حكومة عز للجحيم

والان انا قاعد فى السعودية كل اللل حوشته مايجبش طنين حديد

[Alrefaey]

الله يكون فى عون الشباب

انا يوم عن يوم بكتشف انى كنت محق لما قررت الهجرة

خلاص الواحد فقد الامل منهم لله اللى سلبونا من ابسط حقوقنا وهى الحصول على مسكن ملائم

[عبقرينو]

اخونا حبيب الكل سين سين

انا كنت منتظر اخبار زيارتك الاخيرة لأرض المحروسة وفي موضوع كان بواسطة الاخ VIRUS عن الاسعار الفلكية لموسم العقارات الصيفي 2008في مصر وقلت ننتظر عودتك بالسلامة ونعرف اخر الاخبار

وانا قاعد مستني علي باب المنتدي من ساعتها لكن مش شايف ان رمضان 2009 دة بعيد شوية .

[أحمد سيف]

أخويا الكبير سي السيد

انتا شكلك راجل دارس اقتصاد زي حالاتي وأكيد عارف إن الأسعار دي أسعار وهمية، نتيجة أزمه مصطنعة ولا تعكس بشكل واقعى موازين العرض والطلب في الأوضاع الطبيعية

يعني بلغة الاقتصاد احنا كل ده بنلعب في الـ Short run demand-supply equilbrium

ساعات بيسموا اللي بيحصل ده فقاعة نتيجة مضاربات عشوائية وتفائل زايد عن الحد

يعني بالبلدي كده ناس بتزود على بعضها من غير منطق وآخر واحد يشتري هوا اللي هايشيل الليلة

الوضع ده مش ممكن يستمر فترة طويلة، وأوعدك إنه بعد سنتين ثلاثة يا إما الأسعار تنزل أو الجنيه ينزل، وساعتها فلوسك اللي بالعملة الصعبة هاتجيبلك حاجه أحسن

اللي بيشتري دلوقتي عامل زي اللي بيدخل البورصة وهيا في أعلى نقطه أو قرب أعلى نقطه

الدورة الاقتصادية دي موجودة في كل مكان وحصلت مليون مره قبل كدا، بس الناس ذاكرتها ضعيفة، وأقرب مثال هي الأزمة العقارية في أمريكا والناس اللى خسرت نص قيمة عقاراتها بين يوم وليلة

صدقني السوق محتاج هزه واحدة أو حتى إشاعة مغرضة وهاتلاقي الناس اللي اشترت علشان تتاجر أو تسقع بتبيع بسعر التراب وعايزه تطلع من السوق بأي طريقة، والمستثمر الذكي هو اللي يدخل في الوقت ده.

[حسام يوسف]

وحشتنا يا س س :sad:

ومنتظرين الباقى

تم تعديل 21 أغسطس 2008 بواسطة حسام يوسف

[سكر]

انا نفسى اعرف بس اجابة لسوال واحد

فى اكثر البلاد فسادا واكثر البلاد ظلما يوجد قانون واحد وهو قانون العرض الطلب

ينفذ بكل ثقلة

لما يكون فى شقة بمليون ومليون وربع والكلام الكبير دة انا مش معترض علية كل واحد ملكة وهو حر فى

لكن الى بيشترى دة بيتشرى ازاى

جاب فلوس منين

انا مش بتكلم على واحد ولا اتنين

الناس بتشترى بشراهة فى كل مكان وكل حتى الفلوس دة جات منين

محنا اهو فى الغربة وطالع عينا ومش عارفين نعمل حاجة بالرغم ان المرتبات الحمد الله كويسة

امال الناس فى مصر بتجيب الفلوس دة كلها منين

عايز ارف عشان ابطل غربة وارف

واروح اجيب فلوس من المكان الى المصريين بيجيبوا منه فلوس دلوقتى

[عبقرينو]

استاذنا سين سين

ياريت موسيقي المقدمة للمسلسل تكون نابعة من الموضوع زي مسلسل الأرض كدة يعني وقبلهم كام اعلان من بتوع نورت مصر وتنزل بقي بالتترات

:sad:

[عبقرينو]

واروح اجيب فلوس من المكان الى المصريين بيجيبوا منه فلوس دلوقتى

الأستاذ ataamer

انت فاكر الحكاية سهلة وعاوز تعرف عنوان المغارة بتاعة علي بابا كدة بالساهل ؟ لازم طبعا يكون ليك حد في التشكيل بتاع عصابة ال 40 الف حرامي وبعدين الناس في الدنيا نوعين يابيسرقوا يا بيتسرقوا واظن ان احنا من النوع التاني امال الاولانيين دول هايسرقوا من مين ودولم ودولهم ودوكهم هايملوا المغارة بفلوس مين ؟

تحياتي واحترامي

[هشام عباس]

معلش يا س س عاوز بس اعرف حاجه

هو ليه انت بعت الفيلا ودورت على شقه في زحام القاهره القاتل؟

واكيد الشقه مساحتها اقل من الفيلا!!!!!!!!!!!!!!

طيب ليه تسيب الوسع بره وجوه وتروح للزنقه برجليك؟

[Virus]

لإني أعتقد إن مصر إبتدت تحصد وبشدة محصول 25 سنة فساد و25 سنة ديكتاتورية ... وبالتالي الشعب المصري اللي سكت طوال تلك الفترة .. فاق على هول المصايب اللي بتحصل له وأولها الإرتفاع الفاحش في أسعار كل شيء في مصر الأن... وما حدش يقول لي ما هو إرتفاع الأسعار ده في العالم كله دلوقت...

معلش اسمحلي أعلق تاني لأني دي حتة مهمة جداً وتقييم سليم جداً

اللي حاصل دلوقت مش طفرة ومش نتيجة إن الدنيا غليت والبترول ولع وخلافه...اللي حاصل هو زي ماانت بتقول بالظبط...حصاد

[Modest]

ياما قلت لك تفك كيسَك و تشتري قصر في المريوطية في أول يومين و بعدها تقضي بقية الأجازة في بورتو مارينا لكن انت اللي غاوي فقر .. أفففففففف

كمّل يا سيدي إرهاصاتك .. كلنا أذانون صاغية :wub:

أخوك المُخلص موديست

من أمام كرتونة المنجة العويسي :P

[se_ Elsyed]

هاحاول أرد على التساؤلات

ساعات بيسموا اللي بيحصل ده فقاعة نتيجة مضاربات عشوائية وتفائل زايد عن الحد

كنا ممكن نقول فقاعة لو كانت اسعار الأراضي ومواد البناء معقولة ...

يعني مثلاً لو متر المُسلح بيكلفك 1000 ج وإنت بتبيعه بخمسة زي ما بيحصل دلوقت .. كنا ممكن نقول فقاعة وهاتنتهي ..

لكن لما تكون أسعار الأراضي إنت كراجل مستثمر عقاري بتقف عليك عاليه جداً .. وكمان أحمد عز عامل قلبان في البلد والبُنا بيكلفك عالي جداً ... يبقى هل تتوقع حد عاقل من دول يبيع بسعر أقل من التكلفة ؟

وكمان خلي بالك نسبة كبيرة من المشترين ليسوا مضاربين بل هم أُناس تبحث عن سكن ...

لذلك كل ما يتمناه البشر إن الأسعار تستقر فقط ...

طيب ليه تسيب الوسع بره وجوه وتروح للزنقه برجليك؟

فقري بقى بعيد عنك

ما هو ما بيرميش الإنسان على المُر إلا اللي امر منه يا هشام .... أيوه كان عندي أرض فيلا وبدأت خطوات جادة في البناء أنا ونسيبي وكنت فرحان جداً بيها وابلُنا بالذات اشبه بالزرع اللي الفلاح بيفرح لما يلاقيه بينمو قدامه أما عينه ... وكنت اتمنى إني أبني حتى ولو دور أسكن فيه ويبقى عندي جنينه أقعد أغرقها كل يوم بالخرطوم وتلاقيني كل يوم شايل القفص اللي بيجنوا فيه الفاكهة زي عمنا سليمان نجيب في فيلم غزل البنات ..... طب تصدق بالله ؟ ... عندنا سلسلة محلات مشهورة في السعودية إسمها " ساكو " ودي بتلاقي فيها كل ما تحلم به من عِدد وأدوات وحركات .. فتلاقيني كل شوية أروح اقف قدام الفاترينة وأبص لخراطيم الجناين والبزابيز اللي بيسقوا بها الزرع وكمان ماكينة حلاقة الحشائش وأقعد أقول بيني وبين نفسي : يا ترى هاييجي عليك اليوم اللي تمسك فيه بزبوز في إيد والإيد التانية مقص وتحلق للأشجار يا س س ؟

فتنازلت عن حلمي طواعيةً بعد هذا الغلاء .. ويكفي أن تعلم يا إتش إن المهندس الإستشاري الذي كان يُشرف على العمل بالموقع حسب لي تكلفة السقف فقط ( خراسانات ومصنوعية ) بالمناسبة هو كان بيشرف فقط ويستلم الشغل من المقاول اللي انا جايبه وأنا اللي بأشتري المواد الخام وبأحاسب المقاول ... حسبها لي أيام ما كان الحديد بـ 3100 والأسمنت كان بـ 280 ... طلعت التكلفة 80 ألف بالتمام والكمال .... طب حضرتك احسب بقى لما بقى الحديد بـ 8000 والأسمنت بـ 500.... يبقى بنتكلم فيما لا يقل عن 250 ألف .............. سقف حُبنا بس ... لا قولنا طوب المحبة ولا محارة الغرام ولا سباكة الحنية ولا جنينة ولا سور ولا حمام السباحة وإن شالله عني ما استحميت ولا بلبلطت في بحيرة البجع ...

طيب أنا شايف دلوقت واحد بيرفع إيده وبيقولي : لما أنت مش قد الصياعة ... طنت بتصيع وتحلم بالبزابيز والحشائش ليه وإنت أخرك إسكان الشباب ؟

أقول له : غلطة وندمان عليها يا سيدي ... إشمعنى هاني شاكر بيغلط وتسامحوه ؟

ودي كانت نصيحتي لكل الشباب المُقبل على البناء وكانت من شاب تائب إلى الله وصاحب خبرة في تجربة الإدمان قصدي البناء ولو تفتكر انا قلت بالحرف الواحد : لو معاك شوال مليان فلوس .. يبقى إتوكل على الله وإبني ... لو ما مكعش وهاتقول هاكون نفسي وكل مبلغ هاحوشه هاحطه في البنا .. يبقى إدخل المصحة وإتعالج يابني وتوب إلى الله توبة نصوح .

كمّل يا سيدي إرهاصاتك .. كلنا أذانون صاغية

أخوك المُخلص موديست

من أمام كرتونة المنجة العويسي

أكمل إيه بقى

يعني تحنسني في التليفون وفي المنتدى وتدمر مشاعيري وتدوس على نقطة ضعفي وتقولي كمل ...

روح يا شيخ .... يارب يا موديست لو ما شلتليش مانجايتين وبعثت هم لي بالدي إتش إل.... يارب المصري البورسعيدي يعمل فيكو نص اللي عمله في الأهلي وبيتنا دمعتنا على خدنا وساعتها قمت ضربت العيال ونكدت عليهم وكانت ليلة سودا ....

خد من قلبي وسُر ....

[مهيب]

حبيبى س س ..

الحقيقة انه بالرغم من سوء و تردى الوضع .. الا أنه مثير للدهشة .. فعلا اسلوبك هو افضل اسلوب للتعامل مع المهزلة اللى بنشوفها و نعيشها .. طب تعرف

أنا بالفعل شقتى فى المنطقة التاسعة اللى خلف المنهل .. لما أخدتها من حوالى سنتين و نصف و بدع دفع المقدم .. و طبعا الباقى قسط على سنتين و نصف .. لاحظت ان المساحة اللى فى العقد مش مطابقة لمساحة الشقة الفعلية و ان الفرق كبير .. الراجل صاحب العمارة كان خودعة ذكية .. كان بيبيع بسعر متر أقل من أى واحد تانى فى نفس المنطقة علشان يرغبك .. و بعد الاتفاق تكتشف ان البورشور المساحة فيه مش مظبوطة قوى .. مع نسبة تهدير كبيرة .. فتلاقى سعر المتر زى باقى سعر المتر فى المنطقة .. لكنه كسب سمعة (أقل سعر متر)

المهم جبت واخد مهندس علشان يعاين .. و لما عاين و طابق المساحة على السعر .. قاللى بص انت مش مضحوك عليك فى الشقة و لا واخدها لقطة .. هو ده سعرها و دى حركة عاملها الراجل علشان يبيع بسرعة .

المهم ماطولش عليك .. قلت أعمل حركة غضب كده مع الراجل .. اتصلت بيه و قلتله أنا مش عاوز الشقة .. ادينى مقدمى و خد شقتك .. الراجل بقى رفض و قاللى لأ .. لو مش عاوزها شفلها بيعة .. كان ساذج جدا ياعينى ...

لأن بعد الموضوع ده ب 6 شهور حصل اقبال شديد على المنطقة اللى مكانتش معروفة ... و اللى بنى و باع بدأ يعض على أصابع الندم يا حينى .. بسبب ارتفاع الاسعار الجنونى ..

المهم الراجل بعد فترة لاقيته بيتصل بيا .. و درا بيننا هذا الحوار :

- يا باشمهندس انت مش كنت عاوز ترجع شقتك .. أنا موافق .

- لأ أنا رجعت فى كلامى .. و خلاص رضيت بالأمر الواقع .

- لكن كده مش صح .. أدام الشقة مش عاجباك يبقى مش هتستريح فيها .. دى نصيحتى .

- بالعكس أنا ارتحت للشقة نفسيا .. و حاسس ان دمها خفيف .

- طب أقوللك على اتفاق .. أنا مستعد أرجعلك اللى انت دفعته و عليه حبة كده تعويض علشان المدة الزمنية و آخد الشقة أنا و أمرى لله . أصل المسألة مسألة ضمير .

- مممم .. لا يا عم .. أنا خلاص رضيت باللى ربنا قسمهولى .. و بعدين انت برضه مالكش ذنب .. أنا اللى كان مفروض أقيس من الأول .. يالله حصل خير .

طبعا كان واضح الغيظ الشديد عليه .. المشكلة ان بعد سنة واحدة انضربت أسعار المنطقة فى 2 ثم بعد فترة انضربت تانى فى 3 و لازالت فى ازدياد مرعب .. يحسسك بجد ان الناس اتجننت فى مصر .. و اسعار الشقق بقت شيء غاية فى الهبل .. خاصة المناطق التى تعانى من الاقبال .

نصيحتى ليك .. الحق و خد فى أى مكان .. علشان تربط (تحويشة العمر) بمفردات السوق ..

الفاضل Iloveegypt قال :

اول محوشت قرشين من حوالى سنتين قالى ابنى شقة الان لان الفلوس اللى معاك تبنى الان فقط جيت اطلع رخصة قالى بلاش تضييع وقت ابنى حالا لان الحديد والاسمنت هيغلى ومش هتعرف تبنى اوضة بعدين

فعلا نظرة والدك كانت ثاقبة و حكيمة .. وبالطبع لك كل الحق انك تشكره و تبوس ايديه كمان .. لأن نصائح زى دى والله بتندفع فيها فلوس .. و ياريت لو تسأله عن تصوره عن الفترة الجاية .. و هل يمكن التنبؤ بيه و لا لأ و قوللنا .

مهيب

[سكر]

والله انا حاسس انى لا حصلت عنب الشام ولا بلح اليمن

يعنى لا اشتريت لما كانت الاسعار رخيصة ولا اقدر اشترى حاليا على الاسعار الفلكية دة

ففكرت افتح مستشفى خاصة للعلاج من هسهس الاسعار والدخول فيها هيكون بشرط اصابة المجنون بتسريب فى الجيوب البنطلونية والحسابات البنكية نتيجة تضخم الاسعار السكنيه

طيب لو الدولار شم نفسة حبة وبقى 6 جنية هيصل اية فى مصر