إرهاصات سين سينيه عن زيارتة للأراضي المصرية في إجازته الصيفية الأخرانية

[عبقرينو]

الاستاذ طفشان

تحليل سيادتك للمشكلة اكثر من رائع

تحياتي واحترامي

;)

[عبقرينو]

الاستاذ ataamer

تحياتي لسيادتك

ولتوقيعك

لكن الناس اللي زي حالاتي وزي سيادتك واللي نفسهم في سكن للسكن مش للتجارة ومالحقوش لما كانت الاسعار رخيصة ومش قادرين علي الاسعار الغالية دولم ودولهم ودوكهم يعملوا اية ؟

;)

[Virus]

لا يوجد شئ بالعالم يفرض عليك ان تكون جزء من الخطأ أو اللامنطق

فإذا أصبحت جزءاً من اللامنطق بصرف النظر عن الاسباب فتلك مصيبة ..

أما ان تروج للخطأ واللامنطق .. فالمصيبة أعظم

عصام بيه..

انت جيت على الجرح ونشنت...قلبت علي المواجع..

بعد 3 سنوات من المقاومة المستميتة كي لا أكون جزءاً من هذا العبث...ضعفت..استسلمت..

وصحيح أن أحداً لم يفرض علي ذلك ..ولكن خبرني بالله عليك..

هل من المنطق نخسر 15% أو أكثر من مدخراتي نتيجة هبوط قيمة العملات الخليجية فضلا عن انكماش المدخرات أصلا نتيجة التضخم الرهيب في الخليج؟

هل نحن مضطرين للمخاطرة بمدخراتنا في مشاريع لا نستطيع حتى متابعتها أو الخوض في بحور البورصات المتقلبة؟

هل أقف مكتوف اليدين وأنا أرى زملائي في العمل المواطنين يشترون عشرات العقارات في مصر للاستثمار؟

أشك أن هناك من يستطيع -بعد كل هذا- أن يغلب المصلحة العامة على مصلحته..والنتيجة أننا كلنا مشاركون-شئنا أم أبينا- في هذا العبث .(أو على الأقل هذا ما أقنعت به نفسي لأستريح)

[سكر]

بس يا عبقرينو يعملى ذى مقولت قبل كدة

هافتح مستشفى خاصة للعلاج من هسهس الاسعار والدخول فيها هيكون بشرط اصابة المجنون

بتسريب فى الجيوب البنطلونية والحسابات البنكية نتيجة تضخم الاسعار السكنيه

ومرحبا بيك اول زبون والحق قبل اسعار الكشف ما تغلى

[عبقرينو]

ومرحبا بيك اول زبون والحق قبل اسعار الكشف ما تغلى

وحياتك يادكتورانا عاوزجناح بالمستشفي فل اوبشن بحمام السباحة والجنينة والهساهيس

[عبقرينو]

انا شفت الخبر دة في جريدة المصري اليوم

القضاء يدين ٢٠ شركة أسمنت بتهمة «الإحتكار».. ويغرّمها ٢٠٠ مليون جنيه

كتب ناجي عبدالعزيز وأحمد شلبي ويسري الهواري ٢٦/٨/٢٠٠٨</IMG>رشيد محمد رشيدأدانت محكمة جنح مدينة نصر ٢٠ من مسؤولي وأصحاب شركات الأسمنت، بتهمة الاتفاق علي رفع الأسعار، وتقسيم السوق فيما بينهم، وعاقبتهم بإلزامهم بسداد ٢٠٠ مليون جنيه غرامة، بواقع ١٠ ملايين لكل منهم، صدر الحكم برئاسة المستشار هشام حمدي وبحضور خالد رستم، رئيس النيابة.

قالت المحكمة في حيثيات حكمها إنها اطمأنت إلي أقوال الشهود والمختصين، وأوضحت أن التقارير والإحصاءات، التي قدمها جهاز حماية المنافسة ومنع الممارسات الاحتكارية، أثبتت صحة الاتهامات الموجهة إلي الشركات، التي قسمت السوق فيما بينها، حتي بدا وكأنها شركة واحدة.

وتابعت أن رؤساء القطاعات التجارية والتسويق بتلك الشركات كانوا يعقدون اجتماعات للاتفاق علي رفع الأسعار وتقسيم الحصص السوقية بما يخالف القوانين التي تكفل المنافسة الحرة في السوق.

ووصف المهندس رشيد محمد رشيد، وزير التجارة والصناعة، حكم إدانة وتغريم شركات الأسمنت بأنه «تصحيح لمسار هذه الشركات»، ويوفر مناخاً ملائماً للاستثمار الجاد، وقال إنه الحكم الأول من نوعه في تاريخ القضاء المصري، ويؤكد الحيدة والقدرة الفنية والمصداقية التي يتمتع بها جهاز حماية المنافسة رغم حداثة عهده.

وقال عدد من مسؤولي شركات الأسمنت إنهم يعتزمون الاستئناف ضد الأحكام الصادرة ضدهم، وأوضح محاموهم أن الحكم به عوار كبير، وأن أوراق القضية خالية من أي دليل ملموس يثبت الاتهامات التي أدينت بها الشركات.

في سياق آخر، كشف مصدر رسمي بجهاز حماية المنافسة ومنع الممارسات الاحتكارية أن التحقيقات التي أجراها الجهاز علي مدار عامين، بشأن ملف احتكار الحديد، ستعلن نتائجها الشهر المقبل.

وأوضح المصدر - الذي طلب عدم نشر اسمه - أن تقريراً نهائياً أعد للعرض علي مجلس إدارة الجهاز خلال اجتماعه المقبل، تمهيداً لرفعه إلي وزير التجارة لاتخاذ قرار بشأنه.

واعتبر أن حكم إدانة وتغريم شركات الأسمنت سيكون رادعاً لبقية الشركات العاملة في السوق.

[عبقرينو]

ودة خبر كمان من جريدة المصريون

انخفاض أسعار الحديد عالميًا وارتفاعها في مصر جريمة دولة

كتب أحمد عثمان (المصريون): : بتاريخ 16 - 8 - 2008

اعتبرت حركة "مواطنون ضد الغلاء"، الارتفاع "الهستيري" للأسعار بشكل عام والحديد بشكل خاص، "جريمة" تشارك فيها الحكومة ورجال الأعمال التابعين لها.

وأوضحت في بيان، أن معظم أسعار السلع والمنتجات انخفضت بالأسواق العالمية بمعدلات خرافية، وبخاصة أسعار الحديد التي شهدت انخفاضا تراوح ما بين 38 إلى 50%، إلا أن الأسعار في مصر لا تزال تواصل الارتفاع، مع الوضع في الاعتبار الدعم الذي تحصل عليه هذه الصناعة في الطاقة والعمالة الرخيصة مقارنة بدول العالم الأخرى.

وأكد محمود العسقلاني المتحدث باسم الحركة أن ما يحدث لا يمكن تسميته بالاقتصاد الحر، وإنما "يعد نهبا منظما تمارسه تشكيلات عصابية تسمى ظلما وعلى غير الحقيقة – شركات استثمارية تخصصت في نهب المصريين بدعاوى الاقتصاد الحر".

وأضاف أن سعر الحديد لا يجب أن يرتفع عن 3500 جنيها للطن وهو السعر العادل، وذلك طبقا لدراسة أعدها خبراء من أعضاء الحركة من بينهم الدكتور يحيى شاش أستاذ هندسة المواد والتكاليف بجامعة القاهرة.

واتهم العسقلاني، المهندس أحمد عز صاحب مجموعات شركات عز للحديد وأمين التنظيم بالحزب "الوطني" بإشعال حرائق الأسعار في سوق الحديد في مصر الذي يهيمن على 60% منه، واصفا، منتجي الحديد الآخرين بأنهم يتحركون "كعرائس الماريونيت بتعليمات من الإمبراطور عز".

وقال إن هؤلاء "يرفعون الأسعار بزيادة عن أسعاره ليكونوا غطاء لقفزاته الرهيبة التي ترتفع بالألف جنيه من وقت لآخر وخلال فترات زمنيه متقاربة – وسط حاله من التعطيش ينفذها عز مرة بالتوقف عن الإنتاج بمزاعم الصيانة، ومرة أخرى بتعطيش السوق من المقاسات اللازمة كحديد 6 لينيا – وهو ما يستفيد منه ما نستطيع أن نسميهم بمجموعة الكومبارس أصحاب المصانع الأخرى".

وأكد العسقلاني، أن باحثي الحركة بمعظم المحافظات قاموا بجولة على موزعي الحديد وزعموا بأنهم يقومون بشراء كميات من الحديد، غير أنهم كانوا يرفضون إصدار فواتير بأسعار البيع الحقيقية، التي تتراوح ما بين 8000 إلى 8500 جنيها للطن، وقد فشل الجميع في الحصول على هذه الفواتير.

وهو ما اعتبره "تأكيدا على أن هناك تلاعبا من الموزعين، وبخاصة موزعي عز الذين يتساندون على سلطة المهندس عز، والذي يتساند بدوره على شخصيات متنفذة في الدولة - لم تنف حتى الآن ما يردده الناس من تساند عز على نجل الرئيس جمال مبارك، وهو الأمر الذي يعرض مقام الرئاسة الرفيع للأقاويل"، على حد قوله.

وطالب العسقلاني، الرئيس حسني مبارك بضرورة التدخل لنفى هذه الاتهامات عن مؤسسة الرئاسة، ووضع حد للارتفاع غير المبرر لأسعار الحديد في أعقاب ما شهدته أسواق العالم من انخفاض طبيعي لأسعار الحديد، خاصة وأن الزيادات التي شهدتها الأسواق العالمية كانت نتيجة امتصاص الصين لمعظم الإنتاج لبناء المرافق الخاصة بالدورة الأولمبية.

فضلا عن انخفاض الاستهلاك خلال موسم الصيف في الدول شديدة الحرارة، وهو ما كان يجب أن ينعكس على مصر التي تنفرد بوضع غريب يختلف مع الطبيعة والمنطق الاقتصادي السائد في كل دول العالم، على حد قوله

[أحمد سيف]

يا جماعة أول حاجه أحب أبشركم بإن الشركة اللي أنا شغال فيها ناوية تعمل مصنع لإنتاج البيوت الجاهزة في مصر قريب جدا، بتكنولوجيا روسي لسه واصله طازه وبتكلفة تعادل 50% من التكلفة الحالية للبناء والبيت يتركب قدامك في شهر واحد وبتاخذ عليه ضمان 50 سنه. ومن غير حباية أسمنت واحده ومقاوم للحريق والعزل الحراري فيه أحسن من الافران يعني بره الحرارة تكون 50 وانتا قاعد جوه في الطراوة.

نرجع للتحليلات الاقتصادية اللي أنا سمعتها هنا، بعضها ممتاز ولا غبار عليه وبعضها أختلف معه:

- فقاعة السوق العقاري دي مش تهريج ولا هزار ... والدليل قدامكم في أمريكا.

- زيادة السكان مش كفاية لوحدها لخلق طلب، هناك فرق بين الحاجه والطلب. ودي من أساسيات علم الاقتصاد.

- العقار لا بياكل ولا بيشرب صحيح ... بس الجنيه بينزل بسبب التضخم، يعني لو عاندت ومارضيتش تبيع النهارده وبعت بعد سنه بنفس السعر تكون خسرت لإن الجنيه بعد سنه غير جنيه النهارده. ده طبعا غير الإهلاك والتقادم وتكلفة الفرصة البديلة (الاقتصاديين فاهمينّي)

- المفروض لما أسعار مواد البناء تزيد أسعار الأراضي تقل، لإنهم مكملين لبعض، وده برده من الأساسيات.

- أسعار الدولار لن تستمر في الهبوط الى مالانهاية، وأسعار صرف العملات الخليجية مقابل الدولار لن تبقى ثابته الى مالانهاية، انتا بتشتري الجنيه (أو الأصول المصرية المقومة بالجنيه) دلوقتي في أقوى حالاته أمام العملات الخليجية، وبكره تبيعه بالرخيص لإن اقتصاد مصر من سئ الى أسوأ.

- الطلب على السكن مش ثابت ولكن بيتأثر بالسعر (بالمصطلحات الإقتصادية "مرن")، ولابد من الوصول في النهاية لنقطة التوازن بين العرض والطلب، وأعتقد إننا تخطيناها بالفعل بسبب المضاربات.

- صحيح عمنا سي السيد اشترى الشقة علشان يسكن فيها ولكن الأغلبية دلوقتي بتشتري علشان الاستثمار، وكله بيحلم بالملايين، وآخر واحد هوا اللي هايشيل الليلة.

- أشك إن موضوع الرهن العقاري ده هايفرق كثير في الطلب على العقار لعدة أسباب: أسعار الفائدة المرتفعة، ضعف القوة الشرائية للأغلبية، البيروقراطية والتخلف بتاع البنوك المصرية من جانب وتردد البنوك العالمية بعد الخبطة الكبيرة أوي اللي أخذوها في أمريكا، أنا كنت قاعد مع المسئولين في بنك عقاري أوروبي منذ أيام وفتحنا معاهم موضوع تأسيس شركة تمويل عقاري في دولة خليجية وكانوا خايفين جدا من الموضوع (خلي بالك في الخليج مش في مصر).

يعني خليني احسبلكم القسط الشهري لشقة 150 متر بسعر المتر 3000 جنيه وبسعر فايدة 16% على 20 سنة

القسط بالصلاة على النبي 6260 جنيه شهريا، شوف كام واحد في مصر يقدر يدفع القسط ده، ولو بيطبقوا معايير البنوك في السعودية يبقى لازم يكون مرتبك عشرين ألف جنيه شهريا علشان تقدر تاخذ قرض عقاري بالشروط دي. ولو بتتكلم على فايدة 18% القسط هايبقى 6945 جنيه وهاتدفع في الشقة مليون وست ميت ألف وكسور.

- هناك تفاوت غير طبيعي بين القيمة الإيجارية للعقار والقيمة الفعلية له، يعني شقة بـ 600000 جنيه لازم لما تيجي تأجرها تجيبلك 6000 جنيه في الشهر (بدون فرش والكهرباء والمية والصيانة على الساكن) علشان يا دوب نسبة مكسبك تكون 8-9% سنويا بعد استبعاد الإهلاك والضرائب، وهي دي النسبة العالمية المقبولة، غير كده يبقى انتا شاري سهم "خشاش" زي ما السعوديين بيسموه.

في النهاية أنا شايف إن الشراء دلوقتي بغرض الاستثمار خسارة، ولكن إذا كنت محتاج الشقة فعلا وليس أمامك بديل آخر فتوكل على الله وربنا هايوفقك طالما هدفك تستر نفسك وعيالك.

[moon star]

السلام عليكم ورحمة الله

والله كلامكم معقول جدا وكلام الاخ انساف يعني لو اشتريت شقة اليوم مثلا ب 500000 بعد سنة هي 500000 او تزيد ممكن شوية مش حتقل بس القيمة الفعلية للجنية حتكون هي اللي قلت يعني تمنها في المجمل قل، منطقي فعلا وحنروح بعيد ليه الاراضي نزلت فعلا عن السنة اللي فاتت....

وانا الحقيقة واقعة في مشكلة كبيرة عندي ارض فاضلها مهلة سنة تقريبا تفتكرو ابنيها حتى ولو بدروم او بدرون مش عارفة :waf: واول عشان ماتتسحبش وبعدين افكرحين ميسره ابيعها ولا خليها على كده ولا ابيعا بخسارة وخلاص ارجوكم اللي عنده فكره يساعدني بيها وجزاكم الله كل خير

[محمد عيسى]

كل سنة و انت طيب يا استاذ سي السيد

[se_ Elsyed]

أنا في غاية الأسف للتأخير .. ومعليش إستحملوني ...

مش عايز الإرهاصات دي يتفهم منها إنها كلها عن العقارات لكن هاتكلم عن انطباعاتي الشخصية عن أشياء رأيتها وعايشتها ...

----------

نكمل

لما الدنيا إسودت وإغمقت في وشي في مدينة نصر .. قلت يا واد إخطف رجلك للنزهة الجديدة ... أي نعم ممكن تتعور هناك لكن أهو خد فكرة وإشتري بكرة ..

النزهة بقى ومن الأخر ... المنطقة اللي أمام الكلية الحربية وخلف ملاهي السندباد والمنطقة المحيطة به ... متر الشقة النضيف لا يقل عن 5 بواكي ....

والله العظيم على يدي روحت سنة 2005 كان اجدعها متر فيكي يا نزهة بـ 2500 ج وكان في قدامي بـ 2000 كمان وفي أرقى منطقة ... لكن المساحات كانت كبيرة فوق الـ 200 متر يعني كان وقتها محتاج لك نص أرنوب عشان تاخد حاجة نص تشطيب ...

طبعاً اليومين دول عشان تاخد شقة 200 متر وتصفي معاك 170 يبقى كده بنتكلم في أرنب مقفول ... وأنا ماليش تُقل عالأرانب وأخر علاقتي بها بتكون الملوخية اللي بالأنارب ..

المهم مره كنت في شارع جسر السويس وحودت أنا وزوجتي واخويا على مطعم نفطر فيه ... فبأسأل على المنطقة دي إسمها إيه قالوا لي " تقسيم عمر إبن الخطاب "ومجازاً بيلزقوها في النزهة مع إن النزهة بريئة منها لإن تقسيماتها اشبة ما تكون بالعشوائيات وشوفت شوارع فيها يادوب الواحد يعرف يعدي بعربيته منها ... المهم مشيت شوية قدام كده على نفس جسر السويس وكإني راجع ناحية قباء وسوق القنال وقبل ما أوصل لهم تلاقي على يمينك شركة ملبوسات مشهورة إسمها " قوطونيل " قدامها على طول مجموعة عماير بتتبني جديد .. دي بقى تعتبر المنطقة الخلفية للنزهة وهي عبارة عن 3 شوارع بالكتير ... وفيها عماير حلوه بصراحة وبتبقى على بعد امتار من النزهة وبتشترك معاهم في بعض الشوارع .... المتر هناك بيبدأ من 2800 إلى 3200 ... بس الغربية إن معظم الشقق هناك متباعة وتلاقي العمار 10 ادوار وفيها ييجي 50 شقة ولسه بتتشطب ومع ذلك كلها متباعه ..

قلت بلاها نُزهة ...

الكام حكاية اللي في كام سطر دول اخدوا من دمي 35 يوم لما رجلي ورمت وما بقتش نافع ...

في الأخير قررت العودة سالماً إلى العبور .. وبعون الله خلصت وأشتريت هناك شقة في يومين إتنين لإن المنطقة عارفها كويس ...

والعبور تنقسم لثلاث مستويات :

1- احياء الفيلات ودي أميزهم الحي السابع والسادس وفي ناس بتاخد أرض فيلا لكن تبنيها على شكل عمارة 3 أدوار وتقسم وتبيع ... ومن خلال جريدة الوسيط سواء الألكترونية أو الجريدة نفسها بتاعت يوم الجُمعة لقيت إعلانات عن شقق في الحي السادس والسابع .. بصراحة في منتهى الروعة ... وروحت إتفرجت .. والسعر بيبدأ من 1800 ج إلى 2200 ج ... مساحات محترمة وشركات كويسة اللي بتبني وتشطيب للعمارة ممتاز وجراج مخصص لك مع غن المنطقة براحححححححح وتركن في أي حته ومهما الناس سكنت وعمرت هناك مستحيل تتزحم وحاجه فُل لكن للأسف كان عيبها الوحيد بالنسبة لي إن كل هذه الفيلات جوه شويه في الحي وتبعُد عن الطريق الرئيسي حوالي ما لا يقل عن 3 كم ...

طب أنا دلوقت معايا عربية .. ماشي ما قولناش حاجه ... طب زوجتي . ربنا يسهل وأجيب لها عربية مسقبلاً في الخطة الخمسينية الجاية عشان مش كل شويه تعالى ودينا وتعالى جيبني ... طب التلات عيال اللي عندي دول .. لو واحد فيهم حب يخرج أو يروح يشتري أرواح أو كرمله من كارفور أو مانجا او تفاح من سوق العبور ؟ .. فيمشي تلاتة كيلو عشان يطلع على الطريق الرئيسي ياخد توك توك أو تكاس او ميكروباص ؟ كذلك اي حد جاي يزورني وما معهوش عربية ينزل عالطريق الرئيسي ويصفر لي أطلع أخده من عالطريق ولا يمشي المسافة دي كلها وهو شايل أقفاص الفاكهة وكده ؟

وعشان تتخيلوا منظر العبور بالذات الحي السابع والسادس والخامس والرباع ... هي بتبقى متفرعة عن الطريق وكل حي من دول له مدخل ومخرج والمنطقة لها خصوصية رائعة أشبة ما تكون بكمبوند بس مش مقفول ومحصور ما بين طريق العبور الرئيسي وجمعية عرابي ... وبيمتد ييجي 3 او 4 كم بعيد عن الطريق في العمق يعني ... فلإن بعضو مواقع تلك الأراضي مش مميزة فأصحابها بيعملوها مشروع إستثماري وبيبنوها عماير ويبيعوها .. لكن هي في الأخر فيلا بحديثة وبأشتراطات بناء الفلل ..... وكانت الفيلا المرحومة بتاعتي اللي في الحي السادس كنت واخدها عالطريق خبط رزع ولا يبعدني عن الطريق إلا ييجي 20 متر .. يالله أهي راحت لصاحب نصيبها وربنا يبارك له..

2- احياء المساكن القديمة ... ودي عبارة عن بلوكات يا إما بانيها الجهاز أو الاهالي .. ودي ماليش دعوة بها لإنها جوه حبتين في الحي الأول ومساحتها مش مناسبة وأشياء أخرى ..

3 احياء العماير الجديدة زي الحي التاسع مثلاً الملاصق لجامعة عين شمس ... وإبقوا إفتكروا كلامي بعد سنيتن بالكتير ... إن اللي اخد حاجه في الحي التاسع بالأسعار دي هايعدي ويقب على وش الدنيا لإن سعر متر الشقة دلوقت 2000 ج ولما حجر الأساس بتاع الجامعة يوضع ... يبقى إنساني وخد عنواني والكل هايتحول لتأجير شققة للطلبة وتبقى فرخه بتبيض ألماظ ... بس الحي لسه جديد وانا عايز أسكن ولسه ما فيهوش خدمات كتير فما أخدتش فيه ...

لكني إستقريت والحمد لله على حي إسمه الحي الأول فيلات .. وده عبارة عن أراضي كلها 800 متر وأصحابها بيقسموها عمارة وبيبنوا على 60 % والباقي جنينة .... والحمد لله المنطقة راقية جداً وتقسيمها كويس وقريبة من كل الخدمات ... والمتر هناك برضوا بيبدأ من 1800 إلى 2200 ج وهناك شركات بانيه بالعشر عماير جنب بعض وبيعاهم كلهم ... انا باتكلم عن نص التشطيب ... ويقع هذا الحي خلف عماير الإسكان المميز بتاعت الجهاز وهو إسكان عبارة عن 7 أو 8 عماير فخمة بناها الجهاز من زمان وفي عز رُخص الشقق كان بيبعها بربع مليون وزيادة بس بالتقسيط ييجي على 17 سنة وبتبقى متشطبة لوكس وبين كل عمارة وعمارة مساحة كبيرة حديقة وباركنج وحكاية بصراحة واللي لحق من زمان واخد نفذ بها ...

أتمنى أكون أفدتكم

ونكمل بعدين

[Virus]

ياسلام ..ألف ألف مبروك يا عمنا.. صدقني لو قلتلك كنت قلقان عليك من ساعة ما قلتلي مدينة نصر والحتت العشوائية دي :lol:

لكن دلوقت اطمنت عليك..طبعاً س س ميقعش إلا واقف wst::

أنا شايف إن ده اختيار ممتاز..سعر متر معقول وأهدى كتير من التجمع وأقرب وأعمر كتير من الشروق

وشكراً جزيلاً على المعلومات المفيدة جداُ وخلاصة جولتك العقارية..وفي انتظار الباقي

[iloveegypt]

استفسار بس صغنن س س

هى مدينة العبور تبعد كم كيلو عن وسط البلد

ومبروك عليك الشقة

[se_ Elsyed]

الله يبارك فيك يا فيروس

iloveegypt

بما ان الطريق الدائري على بعد 2 تلاتة كيلو فنقدر نقول ان بينها وبين وسط البلد حوالي 20 ك ومش محتاج تلغوص بقى في الزحمة ولا وسط البلد ولا الكلام ده

[عبقرينو]

الف مبروك علي الشقة

وان شاء اللة ربنا يكرمك وتجيب عربية تانية وتوك توك وقطر كمان

ونبقي ننزل محطة سين سين ناكل مانجة من الجنينة بتاعتك

تحياتي

[SajedSoft]

طيب يا س س

ما تشوفلى اجة حواليك 150 متر وليك الحلاوة bv:-

اصل انا كمان لسة راجع من مصر وجالى احباط

بس انا كنت بادور فى اكتوير

هى العبور ده بعد الشروق ولا فين

شكرا

[se_ Elsyed]

طيب يا س س

ما تشوفلى اجة حواليك 150 متر وليك الحلاوة bv:-

اصل انا كمان لسة راجع من مصر وجالى احباط

بس انا كنت بادور فى اكتوير

هى العبور ده بعد الشروق ولا فين

شكرا

أشوف لك فين يا عم أنا في السعودية دلوقت ؟

لكن لو روحت المناطق اللي قلت لك عليها ودورت بنفسك هاتلاقي كتير .. او تعمل زيي وتدخل على الوسيط وتشوف المناطق التي تستهدفها وتتصل بالبائعين ...

و150 متر موجود هناك وحاجات حلوه قوي قوي وفي بالتقسيط كمان ...

العبور قبل الشروق لو إنت مُتجه نحو الإسماعيلية ... قبلها تقريباً بـ 15 كم ..

بالمناسبة ماحدش يتخض من الكيلوهات دي لإن الطرق السريعة لو سالكه بتاخد المسافة دي في 10 دقايق بالعربية

أنا مثلاً من العبور بأخد الدايري لحد نهايته في 6 أكتوبر خصوصاً لما أكون رايح بالعيال دريم بارك .. بدون مبالغة في 30 أو 35 دقيقة ...

بس هو العيب الوحيد في العبور لو كنا نتحدث عن الإيجابيات والسلبيات إن في حوالي كيلو أو اتنين كيلو فيهم زحمه في أوقات معينة من اليوم وهي المنطقة المتفرع منها الطريق الدائري المتجه إلى 6 اكتوبر وطريق مصر الإسكندرية الصحراوي وفيها موقف أتوبيسات وميكروباصات بتودي العاشر من رمضان والشروق وإسمه " موقف العاشر " فالعربيات والاتوبيسات بتيجي في الحته دي وتتكربس عشان في ناس داخله يمين للدايري وفي ناس بتلف وعايزه تدخل الموقف وفي ناس ماشية في الطريق المتجه إلى جسر السويس على طول ... وكان مجلس الوزرا بيناقش عمل نفق هناك يقضي على تلك المشكلة تماماً بحيث المتجه يمين يبقى يخليه من فوق واللي متجه على طول يبقى ينزل النفق ... لكن الموضوع إتأجل لإن الحكومة بتنفض طبعاً وما يهمهاش احوال الشعب .. لكن أنا ناوي أدعبس على موقع مجلس الوزراء وأكتب لأحمد نظيف نفسه وناوي أكتب لبريد القراء في كل الصُحف عشان أُثير القضية دي ... أنا مش عارف هو جمال وعلاء مبارك وباقي الهوامير اللي واخدين في جمعية أحمد عرابي لما بيروحوا القصور المنيفة بتاعتهم بيبقوا طايرين ولا بيعدوا زيينا من الطريق ده ؟ ... لإن الطريق ده ليس له بديل إلا إنك تمشي في طريق العبور نفسه من داخل العبور وتفضل تلغوص شويه وبعدين تدخل مدينة السلام وتطلع على جسر السويس من ناحية مدينة قباء عشان تتفادى الزحمة دي ... لكن بصراحة أخويا قال لي عالطريق ده لكن لسه ما جربتوش لحد دلوقت ...

[SajedSoft]

هههههه

تصدق انت ابن حلال انا كمان فى الرياض

طيب ايه رايك استنى سنة ولما انزل اجيب

ولا اخلى اهلى يدروا من الان عشان الاسعار ما تزيدش

ولا استنى والاسعار تنزل

شكرا يا س س واهلا بك فى السعودية

[Modest]

دلوقتي بس عرفت و قدّرت انت ليه ما كنتش عايز تشوفني في الأجازة في مصر

كان الله في العون يا سونسون :happy:

سؤالي بقى:-

ايه هي الاجراءات اللي تشتري بيها شقة من المالك الأول؟

يعني تلبس اللي على الحبل و تروح تقول له أنا طالب القرب في شقة حضرتك و بعد ما تتفقوا على المهر تطلعوا تكتبوا الكتاب في الشهر العقاري و خلاص على كده يا معلم؟

و لا إيه الي بيحصل بالضبط في هكذا موقف؟ :lol:

[الباشمهندس ياسر]

الف مبروك يا س س

و ربنا يملهالك بركة