شقه فى حى السفارات

[khaledwagdi]

السلام عليكم

عندى استفسار ياريت تساعدونى فيه . من 3 سنين اشتريت شقه فى حى السفارات فى مشروع اسمه صن رايز . انا بقالى 3 سنين منزلتش مصر بس كنت بدفع الفلوس عن طريق البنك الأهلى شريكهم فى المشروع واستلمت العقود وكل حاجه . انا سؤالى الأول حد سمع عن المشروع ده وياترى اتشطب زى مابقولوا . وياترى سعر متر الشقه هناك كام دلوقت نص تشطيب . وشكرا ليكم

[khaledwagdi]

السلام عليكم

ايه ياجماعه طنشتونى ليه . عشان جديد يعنى . ياريت لو أى حد عنده فكره عن الموضوع ده يرد عليا . وجزاكم الله خير.

[se_ Elsyed]

أنا أعرف حي السفارات كويس ... بس بصراحة ما أعرفش المشروع ده او يمكن اكون شفت العماير اللي فيه لكن ما أعرفش أساميها

عامةً يا ريس المتر في السفارات لا يقل عن 4000 ج ..

ويُستحسن تخلي حد من معارفك يروح يشوف الشقة بنفسة ...

[khaledwagdi]

باشا جزاك الله كل خير على ردك . على العموم المشروع قدام بيبسى على طول اسمه صن رايز مول

(ويُستحسن تخلي حد من معارفك يروح يشوف الشقة بنفسة ...)

ياريت كان فى معارف . أمال انا بنزلش مصر ليه . وشكرا ليك مره تانيه

[se_ Elsyed]

قدام بيبسي ... يبقى عرفته ...

إطمئن .. حي السفارات من أرقى احياء مدينة نصر ... وأغلاها في سعر الشقق ...

بس لازم يا خالد لو لك اعمال في مصر يكون لك حد ثقة يراعيها أحسن بُعدك عن مصر ممكن يسول لنفوس مريضة كتيرة إنهم ياكلوا حقك هم يا جمل وغنت قاعد بره مش داري ... حتى لو كانت شقة ... يعني مثلاً محامي ثقة تعمل له توكيل إدارة فقط ( لا يدخل فيه البيع والشراء ) بحيث في مشكلة مع الكهربا مع صاحب العمارة مع الشركة اللي بانيه العمارة يبقى هو ينوب عنك في التعامل معهم ... كذلك لو حبيت تأجرها إيجار جديد لمدة معينة ( لا تزيد عن 3 سنوات عشان ما تبقاش إحتلال ) ل فالمبلغ مش هايقل عن 2000 ج شهرياً وبيكون هناك مبلغ تأميني وشروط جزائية بحيث المستاجر لو خرب فيها اي حاجه تقدر تطلع عينه والإيجار الجديد بتتاجر فيه الشقة على البلاط مالكش دعوى إنت بالعفش والحركات ... اما التأجير المفروش فبيبقى فيه المهلبية كلها ... وبشوية عفش ثمنهم لا يزيد عن 50 ألف جنيه شاملاً ثمن التكييفات ... فممكن تأجرها مدة طويلة - بيسموها قايمة نايمة لإن التأجير المتقطع بالرغم من غنه مرتفع ودخله عالي إلا إنه مزعج وعايز متابعة يومية - ممكن تأجرها مدة طويلة بمبلغ سنوي لا يقل عن 60 ألف جنيه سنوياً وزباينها كتييييييييييييييييير جداً وبيبقى هايبوس إيدك إنك تأجرها له سنة كاملة وممكن تهبش منه مبلغ كبير مقدماً عشان تبقى في الأمان ...

أي خدمة يا ريس ..

[president]

الأخ خالد ياترى المشروع ده اخباره ايه . وياترى عندك فكره عن الأسعار دلوقتى كام فى المول . انا بصراحه معروض عليا شقه فى المول ده بس صاحبها ماسك فى 3500 نص تشطيب مش عارف السعر ده مناسب ولا أوفر لأن السعر فى السفارت دلوقتى تقريبا فى حدود 3000 بس هو من وجهة نظره ان الشقق فى المول لها ميزه اكتر . وياترى الخدمات فيه اكتملت . وياريت ممكن تبعتلى ارقام الشركه .

معلش تقلت عليك . شكرا ليك

[abuAdham]

السلام عليكم أ / خالد انا ساكن في السفارات وقريب جدا من شركة البيبسي واسمع عن المشروع لكن معرفش البرج بالتحديد لكن الحي هناك حاجة تانية من ارقي الاحياء في مدينة نصر ومستواة متميز وشوارعة نظيفة جدا ومن سنتين ركبوا اعمدة انارة وزرعوا بعض الاشجار وانا ساكن هناك من عشر سنوات لكن باشتغل في محافظة قنا وعندي اجازة بعد عشر ايام ارسل لي كل البيانات علي الخاص رقم العمارة والشارع واسم حضرتك ورقم الشقة والدور وسيب الباقي عليا هجيب لك كل حاجة عنها كأنك موجود متقلقش خالص وهجيب لك ارقام تليفونات حارس العمارة والامن واي مسئول هناك عشان تتابع بنفسك لكن اطمئن المنطقة هناك متميزة ولو قدامك شقة هناك لا تتردد بكرة المتر هيوصل 7 و 8 آلاف ج وعامةً انا هسئل بالتحديد سعر المتر كام حسب موقع ودور ومساحة شقتك ولا تنسي البيانات بالتفصيل وشكرا

[الأقصرى]

السلام عليكم

انا ساكن فى شارع احباب الرسول الموازى لشارع السيده خديجه بحى السفارات

المنطقه معروض فيها كثير ولكن ما فيش شراء ولو معاك كاش ممكن تلاقى شقق بسعر اقل 3000 جم للمتر بسهوله

مثلا العماره اللى ساكن بها صاحب العماره كان ماسك فى 650 الف لشقه 180 متر من ثلاثه شهور , باع شقه من اسبوع على 615 الف

رائييى من راى المهندس اشرف الانتظار حتى فصل الشتاء لان فى نزول قادم فى الشقق الفاخره وتاكد المعروض كتيير ومش حيخلص بالذات فى الشقق ا التى قيمتها اعلى من 3000 الف , يعنى ما تستعجلش افضل لان الاسعار حتى الأن غير منطقيه- منطقة حى السفارات منطقه راقيه بس لو مش مشترك فى الجراج حتتعذب كل ما تفكر تركن عربيه

وفقكم الله

[الأقصرى]

عفوا للخطاء فى صفر زيادة

قصدى فى الشقق التى قيمتها اكثر من 300 الف جم

[president]

السلام عليكم أ / خالد انا ساكن في السفارات وقريب جدا من شركة البيبسي واسمع عن المشروع لكن معرفش البرج بالتحديد لكن الحي هناك حاجة تانية من ارقي الاحياء في مدينة نصر ومستواة متميز وشوارعة نظيفة جدا ومن سنتين ركبوا اعمدة انارة وزرعوا بعض الاشجار وانا ساكن هناك من عشر سنوات لكن باشتغل في محافظة قنا وعندي اجازة بعد عشر ايام ارسل لي كل البيانات علي الخاص رقم العمارة والشارع واسم حضرتك ورقم الشقة والدور وسيب الباقي عليا هجيب لك كل حاجة عنها كأنك موجود متقلقش خالص وهجيب لك ارقام تليفونات حارس العمارة والامن واي مسئول هناك عشان تتابع بنفسك لكن اطمئن المنطقة هناك متميزة ولو قدامك شقة هناك لا تتردد بكرة المتر هيوصل 7 و 8 آلاف ج وعامةً انا هسئل بالتحديد سعر المتر كام حسب موقع ودور ومساحة شقتك ولا تنسي البيانات بالتفصيل وشكرا

الأستاذ خالد فاتح الموضوع تقريبا من سنه . انا حبيت بس الفت نظرك ياابو أدهم لأنى تخيلت انك فهمت ان السؤال لسه حديث. على العموم انا كان نفسى اعرف اى معلومه عن المكان واسعاره من اصحابه بس كلها شهر وهانزل بنفسى واشوف .

شكرا ليك ياابو ادهم على تطوعك للمساعده

تم تعديل 25 يونيو 2009 بواسطة president