اسباب تفكيري بالهجرة الي كندا

[Digital]

امتي الفكرة دي جات في عقلي؟

انا مش فاكر بالظبط امتي لكن اللي فاكره كويس انها بدات تسطع مع تملك حب البرمجة قلبي المسكين، و اللي بسببها بعاني لحد دلوقتي

احنا عشان نعرفبالظبط عاوزين نهاجر ليه لازم نسال نفسنا سؤال؟

ايه الوحش اللي هنا (اي مكان انت حاليا عايش فيه)

و ايه الحلو هناك (كنكا طبعا)

المشكلة ان تعلقي بالبرمجة بدا بعد دخولي الكلية، لاني قبل ما ادخل الكلية مكنتش عارف انا عاوز ايه؟

و بعد البرمجة بدات اكتشف بالظبط انا عايش فين و ايه حجم مشاركة بلدي في الموضوع المعقد ده (تكنولوجيا المعلومات) و اللي اكتشفت بعد كده انه لا معقد و لا حاجة و بيدخل مليارات لدولة زي الهند رغم ان اللي اشتغل معاهم في المجال ده يعرف مستواهم كويس الا من رحم ربي

المهم الموضوع ابتدي معايا هواية، -كل ما امشي في شارع الشيخ زايد بعد التوين تاورز بشوية بلاقي اعلان كبير مكتوب عليه اجعل من هوايتك عملك، كل ما اقراه بيبقي هاين عليا اعيط و اقعد اقول ياريتني مكنتش معاهم يا ريتني مكنتش معاهم-

المهم بدات الاول اقري شوية كتب عبيطة كده في الويندوز و الانترنت، و بعدين لقيتني بقيت استاذ لاني كنت فعلا شغوف، قولت طب نخش علي اللي بعده، و كان واحد صاحبي في معهد في المنصورة جابلي كتب في السي بلس بلس قريت مفهمتش حرففففففففففففففف

المهم عرفت ان البرمجة دي لا هي ويندوز و لا انترنت، ده الليلة دي كلها اصلا معمولة بناء علي لغات البرمجة دي و بما اني كنت لسه ورور، قولت ادور علي واحد جامد، ملقتش.. بجد ملقتش خاااااااااالص

قلت ياواد عليك و علي الانترنت، قعدت الف و ادور في المنتديات (الكلام ده 2002) و عرفت ان فيه لغة برمجة عبيطة كده اسمها فيجوال بيزك (VISUAL BASIC) ممكن امشي معاها من غير دراسة بالكتب، رحت معرض الكتاب اول يناير (اللي كانت كل فلوسي اساسا ضايعة عليه) و جبت كرتونة كتب و رجعت البيت و علي راي محمد هنيدي (انا سمعت كل حاجةاني افهم كلمة )

شوية بشوية ابتديت افهم حاجة

RULE NUMBER ONE: NEVER READ AN ARABIC BOOK CONCERNING INFORMATION TECHNOLOGY

و قد كان، رميت الكرتونةفي ال RECYCLE BIN و رحت جبت كتاب واحد all english all the time

اول ما قريت شوية في الكتاب لقيته سلس اوي و منظم اوي اوي و جميل جدا في الاسلوب، قلت في نفسي يابوي الاجانب دول واعرين جوي

برضه لقيت اكودا و اقواس و معادلات و سيمي كولون و بلاااااااااااااااوي بس فهمت شوية المرة دي :closedeyes:

و عملت برنامج صغير عبارة عن اله حاسبة (عملته علي الورق لان حتي هذا الحين مكنش عندي كمبورورر)

رحت لواحد كان كلية اداب و عنده سابير كان يقال انه بيعرف في البرمجة (زي مثلا لما متلاقيش دكتور تروح لحلاق صحة من بتوع الخمسينات دول :blush2: )

و قلتله بص بقي عشان تبقي عارف الكتاب ده فيه حاجات مش قادر افهمها، قاللي سيبهولي شهرين اقراه و بعد كده اشرحهولك، قلتله والله ما جصرت

عدي شهرين و تلاته و خمسة و عشرة و خمستاشر رحت قلتله هات الكتاب يا سيدنا ووالله ما جصرت برضه

و قلت لنفسي هيا كميا

فتحت الكتاب و قعدت 4 تيام خلصت 4 او 5 فصول

و الموضوع احلو، قلت لبابا لو مرجعتش من الامارات السنة دي معاك كمبيوتر لا انا احمد و لا انت تعرفني

قاللي هات تقدير و انااجبهولك، جبنا يا سيدي تقدير في كلية التجارة، وجابللي الكمبيوتر اللي كان مفكرني حقلبه ميديا سنتر و مكانش مقتنع ابدا انه بيشكل مستقبل مبرمج خطير بالقرار ده

و في يوم و احنا في سنة البكالريوس لقيت واحد عمال يوزع ورق، واحد صاحبي خد ورقة و جه ناحيتي حطها في ايدي و قاللي اعتقد واحد زيك حيهتم بالموضوع ده، المهم ده كان اعلان عن افتتاح دور كبيرة لتدريس اكتر من لغة برمجة اغلبهم كان بيسك و دوت نت و شوية داتابيس متواضعين

رحت و سجلت و كان معايا واحد صاحبي

مش عارف ليه كنت انا اكتر واحد مستمتع بالمحاضرة

وكنت دايما بتمني انها متخلصش، و رغم ان كان معانا حاجات تحل من علي حبل المشنقة، مكنتش ببقي داري بيهم خالص و بحس ان انا في عالم تاني، اول ما الاقي الكود بيتكتب ادامي بدخل في مرحلة الا احساس الا بالكود ده.

بدا العدد ينقص كل ما ندخل في الغميق و بدا ينقص اوي لما ابتدينا نعمل مشاريع و كنت بحب جدا اعمل مشاريع، المهم كنت حاسس ان انا الواد اللي فيهم يمكن عشان كنت اعرف شوية قبل كده بس بدات المحاضرات دي تحط ايدي علي حاجات مهمة جدا، طريق الاحتراف .......... ثواني يا عم فين كندا من كل ده؟؟؟؟

ااااااااااااه الحكاوي خدتني

كندا او كما يسميها اصحابي كنكا، اترسمت في خيالي اول ما لقيت كتاب مكتوب عليه يباع في امريكا و كندا بكذا و بقية الدول طيب؟؟؟؟

اشمعني دول يعني ايه الكوسة دي؟

و ابتديت افهم ان الكوسة لصاحبها ما هما اصحاب الليلة دي يبقي عادي بقي يعملوا اللي هما عاوزينه

المهم عشان بس نفهم اكملكم

اتخرجت من الكورس ده و طلعت الاول لما عملولنا امتحان و كنت ايمها اتخرجت بقالي 6 شهور، الشركة عرضت عليا اشتغل instructor وافقت بسرعة الضوء، و اشتغلتلي بتاع سنة، بابا قالي يا حبيبي ذاكرت و لعبت و اشتغلت كفاية عليك كده رفاهية و تعالي بقي الخليج

و اه من الخليج

ثم اه من الخليج

ثم الف اه و اه من الخليج

المهم رحت بقي و انا كلي امل عم المبرمج الجامد رايح الامارات يكسر الدنيا، اروح الاقي الهنود واكلين البلد اكل و محليين بالعرب (اللي من الجنسيات الغير خليجية طبعا) و المساكين مضطرين يعيشوا مع النوعية دي من البشر لان ايه اللي جبرك علي الهندي؟

اشتغلت في شركة في الفجيرة شهر و نص و كانت بتاعة مواطن المدير العام مصري و مدير البحوث و التطوير باكستاني عاش في امريكا و كندا و رجع من كندا علي دبي و من دبي علي الفجيرة لان مراته كانت شغالة دكتورة هنا و هوا اساسا كان فري لانسر يعني مكانتش فارقة معاه

المهم الراتب كان حقير بالنسبة لمبرمج بس انا قلت انا قاعد مع ابويا اكل شارب قايم نايم و الحياة لونها بمبي، و مكنتش متصور الناس اللي لوحدها عايشة ازاي wst::

و رغم كده كنت صابر و قلت اتعلم من الراجل الباكستاني ده حاجة (خبرة 16 سنة)، كلمني كتير اوي عن كندا و عن المكان اللي مكان النيزك الرهيب ده و الحفرة اللي قطرها بالكيلومترات و السور اللي حاطينها حواليا و انه من كتر اتساعها معملوش سور حوالين المكان كله، ووراني الموقع بتاع الهجرة و شجعني عليه و قاللي حتتبسط هناك اوي، قلتله يا عم انت حتشتغلني امال ايه اللي جابك، قاللي شوية كلام فارغ مقتنعتش بيه بس اللي عرفته في الاخر ان هما كلهم جايين الخليج عشان المونيييييييييييييييي

(المصاري يعني)

المهم في يوم كان بيفتح الايميل بتاعه لقيته نط من مكانه زي ما يكون لدعه عقرب قلتله ايه يا عم مالك فيه ايه، قاللي انا لازم اروح كندا في اسرع وقت ممكن، ليه يا عم الكتكوت. قاللي رايح احلف اليمين، رايح ياخد الجنسية ابن اللذينة

قلتله طب لا حقولك ارجعلي بكيس جوافة و لا كيس تلج كل اللي عاوزه منك انك تجيبلي صور لكندا دي علي قد ما تقدر، قاللي no problem, i'll do it قلتله كتر الله من امثالك

رجع فعلا بعد اسبوع يتعدوا علي صوابع الايدين و الرجلين، و لقيته جايبلي صورتين

قلتله انا قلتلك هاتلي صور راجعلي بصورتين يا واطي

بس كانوا صورتين بجد صورتين

من ضمنهم البرج الكبير ده مش عارف بيسموه ايه و صورة تانية السما فيها لونها احمر متعرفش صبح ده و لا ليل و لا مغرب و لا ايه بالظبط، قلت لنفسي يا واد ما تروح انت ايه اللي عاجبك هنا في الصحرا دي؟

المهم مكملتش شهر و نص لان الشركة مدتنيش راتبي و لما زهقت قالولي تعالي نوريك سكة المطار لو مش عاجبك، قلتلهم لا شكرا انا عارفها و اقنعت بابا اني انزل ادرس Oracle Programming وبعد مناقشة مريرة و تدخل الاهل و كبار العيلة اقتنع و رماني في اول طيارة علي كايرو

رغم اني مقعدتش برة اكتر من 3 شهور و كانوا في الشتا (يعني لوز) لا شفت حر و لا حاجة بس اول ما حطيت رجلي علي السلم في مطار القاهرة قعدت اشم الهوا جامد اوي زي ما يكون واحد غرقان و بيعوض النفس اللي راح منه و كنت حعيط من الفرحة، المهم بدات ادور علي مكان من الاخر اخد منه Oracle Programming لقيت نيوهورايزون في الدقي، و بصراحة كان ممتاز و بدانا الدراسة الجميل كمان، انا كنت حاسس بظروف الوالد و كنت في نفس الوقت عارف ان quality knowledge = a looooot of money لكن مهما كان مصر هيا امي، علي حظي كان نازل منحة من الاتحاد الاوروبي لاي مصرر عاوز يدرس في ال IT استفدت من المنحة دي و بدل ما ادفع 10500 جنيه دفعت 5250 بس

و طبعا الامتحانات بتاعة ال OCP (الشهادة الكبيرة ) اتكلفتلها بتاع 2100 جنيه، خلصت و شديت الرحال علي بلاد البترول كلاكيت تاني مرة.

المهم انه في الكورس ده كانت زميلتي سيدة فاضلة جدا و قمة في الزوق و الاحترام و تعاملها فيه رقي كده، قلت ده مش سلو بلدنا

و زال الاستغراب لما عرفت انها اتيه من بلاد الثلج من كندا، و ان جوزها واولادها كمان كنديين و كلهم عايشين هناك، و لما سالتها ايه اللي جابك مصر تدرسي ده التكنولوبيا كلها هناك قالتلي اه ما هي الحصة ب 800 دولار، قفلت بقي و قلت لنفسي خلاص بقي متتكلمش تاني بقية اليوم

المهم بعد ما الراجل الباكستاني اثر فيا و كنت نسيت شوية الموضوع رجعت هيا صحته فيا تاني بعد ما قعدت تحكيلي عن الناس دي قالتلي جملة لن انساها هناك اسلام بلا مسلمين و هنا مسلمين بلا اسلام.

المهم وعدتني انها تساعدني و انا قلتلها عمري ما حنسالك الجميل ده و حتي الان فيه ما بينا ود و كلنا اللي كنا في الكورس ده حتي الان ما بينا ود و اخوة كبيرة جدا و كلهم اخواتي و بعتز فيهم و علي راي الحكيم اللي قال (الكنز في الرحلة، في الناس اللي عرفتهم) كلهم و الحمد لله شغالين في مراكز محترمة دلوقتي و انا من ضمنهم .... الحمد لله

طب يا عم وجعت دماغنا ايه اللي خلاك عاوز تروح كندا دلوقتي اكتر من اي وقت مضي

بجد .........

في اسوأ كوابيسي

و في اكثر افلام الرعب رعبا

ما شفت ايام زي الللي عشتها هنا

و لا كنت احلم ان حشوفها

و الاخ اللي كان بيقول لباباه دي يحياة بلاستيكية في السعودية

تعالي شوف الحياة الكربونية اللي هنا :wub:

انا مش عاوز فلوس، انا عاوز اكمل ماجستير و دكتوراة

و لا عاوز قصر، انا عاوز شقة صغيرة اعيش فيها سعيد

و لا عاوز نانسي عجرم، انا عاوز اتجوز واحدة بنت حلال و بنحب بعض

و لا عاوز اروح المول املي عربيتين لاند كروزر بكلام فارغ

انا عاوز احس بادميتي و انسانيتي

عاوز لما اكون شغال ب 10 و شركة تقولي 20 اقدر اعمل ده بكل حرية

مش اروح اتحايل علي الكفيل و في الاخر يقولي لا

انا عارف ان كندا مفيهاش فلوس و الكلام ده قالوه الناس اللي حكيتلكم عنهم و اللي عاشو هناك

بس برضه قالولي ان هناك فيه حياة

وفيه ناس

القسوة و الظلم و اللاانسانية يخلوك تفكر جامد اوي في الهجرة

مش بس الظروف المادية

الناس اللي في الخليج اكتر شجاعة انهم يهاجروا لسببين

اولا انهم سافروا و عاشوا في مجتمعات مختلفة عشان كده عندهم تجربة التكيف و عندهم شيء من الثقة انهم ممكن يتعايشوا

ثانيا: السبب اللي قولته قبل كدا، القسوة المفرطة بتخليك عاوز تهرب، لان مهما كان عمرك ضاع و بيضيع و حيضيع في الخليج، رحماك ربي

و اسباب تانية كتييييييييير

صدعت دماغكم؟

صحيح

نكمل بعدين موضوع الاسباب ده

سلام

[Alrefaey]

تسجيل تشجيع واعجاب

[medopharm]

اهلا بيك أخ digital

منتظرين التكمله ياباشا

متاااااااااااااااااااااااااااااااااااابعين

[orangrie]

موضوع جميل .. بجد

بيلخص تجربة شباب كتير طموحين و حالمين بالحياة الأفضل ..

اللى عمرنا ما هنعيشها فى الدول العربية اللى مليانة سلبية و لامبالاه و فساد و إنهيار ..

يارب يحقق حلمك و حلمى و أحلامنا كلنا بالحياه فى كندا ..

[hosiny]

كلنا نفس الاحساس ده يا باشا....وربنا ييسرلك امورك و تكون زميل لينا ان شاء الله هناك.....

[moheltohamy]

والله كلام جميل يا ديجيتال بيه...

بيفكرني بواحد بيكتب حدوتة برضه ، ومش مركّز فيها!

ومغلّب الحسيني معاه ، عمال يزؤ فيه كل شوية عشان ينجز فيها :lol:

كمل يا راجل ، واشجينا :lol:

[Ebn Sina]

الله ينور يا عم احمد

والله كانك بتتكلم بصوتى....اصل انا عايش فى الخليج ومجرب العيشة الهباب واللانسانية اللى بيحس بيها كل الاجانب اللى عايشين فى الخليج ...ربنا يتوب علينا

انا عن نفسى قربت ربنا يتوب عليا وجالى جواب الانترفيو للعمة كندا وان شاء الله انجح فيها-ادعوا لى يا جماعة- وبعدها بكام شهر نخلص الكشف الطبى ونشد الرحال على الغالية كندا

كمل يا عم احمد ......كمل حكاويك ..انت شكلك حكاء زى صاحبنا اللى بقى ينفض ...الظاهر انه بيتقل علينا اكمننا بنستناه علطول ...طبعا عارفينه :lol:

تسجيل متابعة .....

ابن سينا

[النجم الثاقب]

صدعت دماغكم؟

صحيح

لو الصداع كله بالطريقة دى ... يبقى هلا و الله و مرحبتين بالصداع :lol:

منور يا ديجيتال ياخويا :lol:

[Virus]

أيوه ان بتاع البلاستيك...حاضر يافندم

والله قصة لطيفة جداً..تحياتي لإصرارك اللي بيفتقده كتير من شبابنا دلوقت..أقصد التكملة في كارير البرمجة وتخطي الصعوبات الأولية

بس أنا لافت نظري حاجة مهمة قوي...نفسي نقعد نحللها على رواقة في مرة...

" كيف يمكن أن يحدث هذا التناقض الصارخ بين شعور المصريين بحياتهم في الخليج"..

بعضنا سعيد جداً بحياته في الخليج ويفضله عن مصر وأحياناً كندا (بعد ما ياخد الياسبور طبعاً)

وبعضنا يلعن اليوم الذي هبط فيه من الطائرة في بلاد البترول!!

عموما تحياتي ليك وربنا يوفقك وحاول تشوف شغل في الحكومة وأؤكدلك إن الحياة هتختلف

[محمد عيسى]

مغتربين فى الخليج ....مهاجرين فى كندا

http://www.egyptiantalks.org/invb/index.php?showtopic=61466

[حسام يوسف]

تحياتى الخالصة اخى ديجيتال لموضوعك الجميل

[Digital]

* الرفاعي باشا شكرا علي تشجيعك

* ميدو فارم (يا باشا تحت امرك)

* اورانجري يا رب انا و انت

*حسيني باشا ان شاء الله نكون كلنا هناك

* التهامي باشا الدوك اللي مدوخ براريم الشرق و الغرب هنا في موضوعي المتواضع، علي فكرة انا قريت موضوعك من طقطق لسلاموا عليكم، بس علي ما سمعت من ناس تانية حاسس انك متفائل شوية في وصف كندا، بس علي اي حال هيا احسن من الخليج، زي ما قلنا محدش في كندا بيموت من الجوع، لكن انا شفت كتير في الخليج بيناموا في الجوامع و بياكلوا من الزبالة، الحمد لله علي الستر، يا باشا من موقعي هذا و في الساعة الخامسة و النصف تماما بتوقت اوضتي اسجل اعجابي بموضوعك و اقولك GO on Doc

* ابن سينا حبيبي كلنا ايدينا في النار و يمكن معظم اللي هنا او معظم اللي عازوين يروحوا كندا عايشين في الخليج، و دايقين اللي انا و غيري دايقه، بس في واحد قال كلمة حلوة اوي you should always have plan B واد DBA هندي قالهالي، متبنيش حياتك كلها علي امل عشان لو الامل ده اتهد حياتك متتهدش، يعني لو واحد كل حلمه يتجوز المزة اللي معاه في الكلية و جالها واحد من الخليج دفع و شال (والله العظيم ده اللي بيحصل دلوقتي، واحد صاحبي بيقولي لما راح يخطب واحدة ابوها قاله تعالي قابلني علي القهوة !!!!، و اول ما كلمه مسالوش انت مين و ابن مين و بتشتغل ايه/ ساله بس حتدفع كام )

المهم لو واحد جه اتجوزها تعمل انت ايه بقي ؟ متتجوزش تاني، مش ربنا خلق 4 مليار مزة تانية شيل منهم مليار في سن الضياع ادي 3 مليار و شيل منهم كمان مليار متجوزين ادي 2 مليار و شيل منهم مليار اخلاقهم مش و لابد (الحقيقة الرقم ده اكبر بكتير) ادي مليار باقي منهم 999 مليون مش حيعبرونا ادي مليون باقي (هيص بقي يا سيدي و اختار من المليون)

* النجم الثاقب اولا احب اسجل اعجابي باسمك، ثانيا الصداع قاااااااااااااااااااااااااااادم حضر البنادول

*فيروس باشا، بص انا شخصيا اعرف ناس من النوعية اللي بتحب الخليج و دول حاجة من اتنين، يا اما عاش في ظروف منيلة بنيلة في مصر فمهما كان الخليج هوا احسنله من مصر، يا اما جه من زمان و مظبط اموره، او يمكن ليه هنا حبايب و علي اي حال دول بيبقوا في وجهة نظري التي تقبل الخطا و الصواب مش طموحين اوي او رضيوا بظروفهم الحالية (اللهم اعطنا الرضا يا رب)

* تحياتي لاستاذ محمد عيسي و حسام باشا يوسف

التكلمة قريب جدا و يا ريت نتناقش ليه احنا عاوزين نهاجر عشان لازم نعرف ال User requirements قبل ما نبدا ال planning والا يبقي planning based on illusions و الذي سوف يؤدي الي catastrophe

نلتقي بعد الفاصل

[alaashabana]

بص انا شخصيا اعرف ناس من النوعية اللي بتحب الخليج و دول حاجة من اتنين، يا اما عاش في ظروف منيلة بنيلة في مصر فمهما كان الخليج هوا احسنله من مصر، يا اما جه من زمان و مظبط اموره، او يمكن ليه هنا حبايب و علي اي حال دول بيبقوا في وجهة نظري التي تقبل الخطا و الصواب مش طموحين اوي او رضيوا بظروفهم الحالية (اللهم اعطنا الرضا يا رب)

ديجيتال .. اولا بجد برحب بيك اوى وبساندك فى الموضوع الجميل دة..

يمكن انت ثالث واحد بعد الدكتور العظيم تهامى وطبعا الشامى باشا احس ان موضوعك يشد ويقى مستنى التكملة بفارغ الصبر ..

عارف يمكن اللى انت بتقولة دة كلنا عارفينة وحاسينة كمان بس مش عندنا المقدرة فى السرد والحكاوى ..

يمكن فعلا كل كلمة انت بتقولها صح ومظبوطة .. وفعلا كتير اوى اوى اوى من اللى عايشين فى الخليج بيبقوا عاوزين يهاجرو رغم ان معظمنا مكنش فى تفكيرة الهجرة لما كنا فى مصر .. بس لما شوفنا الخليج اللى كنا فاكرين طوق نجاة لينا طلع للاسف انيل وانيل .

بس الحمد لله على كل شئ واكيد دة كلة مكتوب عند ربنا وخططوات احنا ماشين عليها ..

انا بشجعك وبساندك بكل كيانى انك تكمل موضوضعك الشيق وياريت متغبش علينا كتير زى تهامى بية ..

وكفاية كمان انة منورنا هنا فى موضوعك دة يعتبر شرف ليك وللمنتدى بجد ان المخرج والسيناريت العظيم يجى فى التوبيك بتاعك..

تحية لكل الناس الجميلة بجد اللى خلونى احس قد اية هما اخواتى وانى بستنى كلام كل واحد فيهم بفارغ الصبر .. وقد اية كلامهم البسيط كان لية تأثير على حياتنا واحساسنا بالامل فى الخطوات اللى جاية ..

ويارب اخوانا اللى بجد نفخر بيهم " الشامى ، ايهاب سالم " مشوفهم عن قريب فى المنتدى بتاعنا ونستفاد منهم اكتر واكتر ..

ويارب تهامى يكمل موضوعة لاسلوبة الشيق " مع حفظ الالقاب "

السلام عليكم

[hosiny]

لله الله علي المانجمنت اللي بيبان في كلامك يا ديجيتال.....كان في ناس كتير من اوراكل معانا في الدراسة دي

[النجم الثاقب]

* النجم الثاقب اولا احب اسجل اعجابي باسمك، ثانيا الصداع قاااااااااااااااااااااااااااادم حضر البنادول

يا باشا لو الإسم عاجبك اتفضله .. راسلنى على الخاص و مش هنختلف .. ميرسى على ذوقك .. و البنادول جاهز .

و يا ريت نتناقش ليه احنا عاوزين نهاجر

انا مش فى الليلة دى يا عم ديجيتال .. بس بتابع لعل و عسى أغير رأيى .. تقبل تقديرى

[Digital]

و رجعت مرة تانية بعد غياب طويل، لكن والله مكانش بايدي انا كنت مطحون طحنة سودا خصوصا شغل ال IT مفيهوش مواعيد و ....

وحشتوني، بجد وحشتوني جدا و الاوقات اللي مكنتش قادر فيها اكتب كنت بقرا كل الكلام و المواضيع و اهمهم طبعا دوك البراريم التهامي باشا و حكاياته عن كندا.

يمكن انا كنت قبل كدا عاوز اكمل موضوع الاسباب بس قبل ما اكمل موضوع الاسباب عاوز اتكلم في نقطة صغنطوطة مهمة اوي اوي اوي

انا لاحظت الناس من كام يوم بدؤا يقولوا للدكتور تهامي مش معقول كندا جنة كده و جميلة اوي كده و كل حاجة حلوة اوي فيها و ناس تانية تقولك لا يا عم كندا وحشة و فيها و بيها و عليها و ناس تقولك مصر باظت و ناس تقولك الخليج معادش ينفع

المفروض انا اقف في الوسط و ابص للناس دي كلها و اصرخ في وشهم و اقول كلكم كدابيييييييييييييييييييييييييييييييييييين

و لا المفروض اقف و اسال نفسي و اقول يا تري معقولة كلهم صادقين؟

اه و حياة سيدك اللبلوبي كلهم صادقين ؟

طب ازاي ؟

بص ... سعادتك عاوز الناس تقولك راي يتفصل علي مقاسك يعني عاوز واحد اسمه شبه اسمك متجوز واحدة شبه مراتك (او احلي يبقي احسن)، و بيشتغل نفس شغلتك و نفس شهادتك و نفس خبرتك و يكون بيحب نفس اكلتك و بيحس نفس احساسك و عربيته نفس عربيتك و شقته نفس شقتك و مستوي معيشته نفس مستوي معيشتك و عياله هما الخالق الناطق عيالك و اهله زي اهلك و يستحسن تكونوا قضيتوا نفس الجيش و دخلتوا نفس المدرسة و عندكم نفس العقد النفسية و لا اقولك يستحسن يكون اخوك لا تامك لا يا راجل خليه الاستنساخ بتاعك (دوللي حضرتك)

و بعدين نبعته كندا يروح يشوف الدنيا عاملة ازاي هناك و يديك كل يوم تقرير يومي عن المعيشة و الاكل و الشرب و المواصلات و الطقس و المزز و التلج و الحرية و العنصرية و الطعمية و الملوخية ؟

هيا بجد العقلية دي لسه عايشة جوانا ؟؟؟؟؟

و ده اللي مخلي اي مشروع يفشل في مصر علي فكرة

واحد فتح سايبر نت و جاب فلوس

تلاقي جاره الترزي قلب سايبر و بتاع الطعمية قلب سايبر و الحلوان قلب سايبر و عربية الفول قلبت سايبر متنقل!!!

المشروع طبعا بيخسر و الكل بيخسر و فلوس الناس تضيع و ينهار الاقتصاد بسبب ثقافة التقليد او الانسياق

الناس قالت الدكتور تهامي بيبالغ لانه شايف كندا دايما حلوة و مش شايف فيها حاجة وحشة، سوري هوا انت نفس شخصيته؟

بتفكر زيه؟

و لا ظروفك ظروفه؟

هوا اصلا عاش هناك كتير؟

هوا قالك بكل صراحة انا عيشت هناك كام شهر بس الكام شهر عجبوني

انا فيه ناس تانية اعرفهم معرفة شخصية و هم اصدقاء ليا عايشين في كندا بيقولوا ان احنا بنعيط لما يكون وقت الفطار و مش بنسمع صوت الادان

وفيه ناس تانية بتقول ان كندا بحالها علي بعضها كده و لا تسوي حاجة بالنسبة لاستراليا و تلاقي السكاكين طلعت و المطاوي اتفتحت و هاتك يا ضرب

يا سيدي الفاضل كل واحد ليه ظروفه

انا مثلا لما حسبتها لقيت ان استراليا افضل لي من كندا

و ان فرصتي اكبر بكتير هناك

يمكن بسبب طبيعة شغلي او بسبب سرعة الاجراءات و اني في امس الحاجة ان اهج من مصر و الخليج و الشرق الازفت كله

او يمكن بسبب ان الطقس هناك اجمل و احلي

او يمكن ان المرتبات هناك احلي و العيشة اجمل

او يمكن اون انا غلطان و كندا احلي

يبقي اقعد افكر

مش اتخانق

من الاصلح جميل جدا

بس لمن هوا الاجمل

تعالوا بقي نجمعها

من الاصلح لمن؟

ليا طبعا ، انا بظروفي و متغيراتي

و حياة طبيخ امي لتفكروا تاني

و تقولولي

يا اما انا مجنون يا اما الفطار كان تقيل

انا حتي الان (شخصيا) لا ازال افاضل بين كندا و استراليا و لم اصل لقرار

انا سني علي فكرة 25 سنة يعني ممكن استني شوية حتي لما اخد خبرة اكتر في الشغل

لكنني عندما اقيس اقيس بعقل و منطقية

مش مهلبية

لان انا مش د التهامي و لا د الشامي و لا اصدقائي و اخوتي اللي في كندا

انا احمد ....

ان ان ان تششششششششششششش :rolleyes:

نكمل موضوع الاسباب بعديييييييييييييييين

و اسف علي التاخير

كلمة للدكتور قناوي

يا دكتور قناوي قيس علي نفسك انت احد الاسباب الرئيسية اللي خلتني اكتب الموضوع ده بجد

و لو كنت مكانك كنت هاجرت

السلام عليكم

[hosiny]

يااااااااااااه

يا سلام عليك يا احمد يا ديجيتال

مع انك تعتبر صغير في السن بس شوية كلام في الجون....فعلا هيا دي طبيعة الناس....ومش بس كده حتي لو لقيت واحد ليه نفس ظروفك و راح و قعد و حكاله....ممكن كمان ميصدقوش و لو صدقة بردو ممكن ميقتنعش لانه عايز يمسك كل حاجه...فلوس الخليج مع نضافة و مميزات كندا والجنسية....وروح و جو مصر العائلي

ومفيش حد بياخد كل حاجة....لازم تضحي بحاجتين او اكتر عشان توصل للي انت اخترته عشان تعيشه....وحتي لو فعلا هيا كانت احسن اختيار هتقول دي عيشه زفت لانك مبصتش للي في ايدك...بصيت بس للي انت خسرته....

ايييييييييييييييييييييييييه.....طبيعة دماغ و نفسية البوني ادم.....بس مين اللي يفهمها غير اللي خالقها

[mohamed omar]

ربك لما يريد..

[qenawy]

كلمة للدكتور قناوي

يا دكتور قناوي قيس علي نفسك انت احد الاسباب الرئيسية اللي خلتني اكتب الموضوع ده بجد

و لو كنت مكانك كنت هاجرت

السلام عليكم

اشكرك اخي الفاضل ديجيتال

طبعا اقيس في النهاية علي نفسي واحوالي ولكن ما خاب من استشار

تعرف

انا ما فيش حد حاسس بي

كل من احدثهم في الواقع يندهش ويستغرب ويقول لك معقول هتضحي بكل ده عشان ايه

الموضوع هو الاحساس بقيمتي كانسان لا اجده في مصر رغم الديكر المبهر قيمة وسيمة ووظيفة ميري

لكن صدقني اهيف امين شرطة ممكن يختزل كل قيمتك بكلمة واحدة اسمعا (يالا) و شكرا جزيلا

[mohamed omar]

كلمة للدكتور قناوي

يا دكتور قناوي قيس علي نفسك انت احد الاسباب الرئيسية اللي خلتني اكتب الموضوع ده بجد

و لو كنت مكانك كنت هاجرت

السلام عليكم

اشكرك اخي الفاضل ديجيتال

طبعا اقيس في النهاية علي نفسي واحوالي ولكن ما خاب من استشار

تعرف

انا ما فيش حد حاسس بي

كل من احدثهم في الواقع يندهش ويستغرب ويقول لك معقول هتضحي بكل ده عشان ايه

الموضوع هو الاحساس بقيمتي كانسان لا اجده في مصر رغم الديكر المبهر قيمة وسيمة ووظيفة ميري

لكن صدقني اهيف امين شرطة ممكن يختزل كل قيمتك بكلمة واحدة اسمعا (يالا) و شكرا جزيلا

عندك حق..ربنا يوفقك و نتقابل علي خير في كندا الجميلة..