******((((تعتقدو ان السفر بالبساطه دي؟)))*******

[saramoslims]

السلام عليكم

اولا جزاكم الله كل خير عن القسم دا لاني فعلا استفدت منه جداا خلال يومين فقط

وبصوره اوضح فانا خريجه بكالريوس علوم وتربيه شعبه رياضيات 2007بحته وتطبيقيه بتقدير عام جيد

اشتغلت سنه واحده في التدريس في مصر مع اجانب لتدريس الرياضيات للمرحله الابتدائيه رغم ان تخصصي هو الاعدادي والثانوي

وانا بدور على النت لقيت موقع عارض طلب مدرسات وانا عاده مش بصدق المواقع دي بس دايما ببعت السي في كاحتماليه المصداقيه

وبعت المعلومات عني وبعدها بتلت ايام اتصل بيا مندوب

وقال اني مرشحه لمقابله واشترطت توافر الاوراق الاصليه والباسبور واكد علي ان لو الاوراق الاصليه والباسبور مش متوافره هتعتبر المقابله لاغيه ولازم التاكد من موافقه ولي الامر واكد عليها ورغم كدا ظنيت انه ممكن يكون فيه نسبه نصب في الكلام دا او انه شغل سماسره

ونزلت القاهره وعملت المقابله مع شخص اظنه علي خير وكان صاحب معرفه بكل انواع المناهج والعلوم وامتحني في المنهج الرياضي وشاف الباسبور وورق التخرج والبطاقه واتاكد منها وبعد كم من الاسئله ال بتخص دراستي وبردو ارائي في السفر والشغل والحياه ككل وتاأكيده على موافقه والدي او ولي امري

قال اني اتقبلت للتدريس للمرحله الابتدائيه بغض النظر عن تخصصي في التدريس للاعدادي او الثانوي لاني لسه صغيره ومعنديش خبره كافيه لتدريس المرحله الاعداديه اوالثانويه وفعلا كلامه صح لاني لسه خريجه جديده

وقال ان العقد سنتين تبع احد المدارس الخاصه وهتوفر لي السكن تبع سكن خاص بالمدرسات وان السكن به امن ومشرفات والاجازات مدفوعه والمرتب 300 دينار والتذكره ذهاب وعوده علي المدرسه وكذلك التأمين الصحي

فاانا حقيقه في حيره ؟ هل بسهوله كدا سهل ان مدرسه مكملتش ال22 سنه تتوافر لها فرصه سفر وبمرتب انا شايفه من خلال قرايتي لصفحات المنتدي نوعا ما مناسب لمدرسه حديثه التخرج ولا الموضوع فيه نصب

عموما انا هتأكد بعد ما امضي على العقد ويتحدد مكان المدرسه من السفاره الكويتيه بمصر لكن حابه اطمن من دلوقت

وبردو احب افهم ايه وجه الاستفاده ال هو استفادها مني من الناحيه الماديه لاني مدفعتش ولا مليم ...

وسؤال اخير لو فعلا دا مكنش نصب فانا لي اخ دكتور بيطري هل سهل انه يسافر للعمل في الكويت ولو في شركات الادويه ولا بيبقي صعب لمجاله؟

وربنا يكرم الجميع ويجعله في ميزان حسناتكم واسفه علي اسئلتي الكتيره

تم تعديل 30 أغسطس 2008 بواسطة saramoslims

[Hazemmagdi]

أظن عادي جدا هنا في الكويت وتحديدا بالنسبة للمدرسات على حسب ما اسمع انهم بياخدوا خريجين جدد بس اللي تقديرهم جيد فالبنسبة للنقطة ديه عادي والله اعلم

ولو عايزة تطمني اكتر ممكن تبعتي اسم المدرسة وتابعي معانا ايه الخطوات اللي بتعميليها أو اللي هما بيطلوبوها وهيبان إذا كان انتي ماشية في الطريق الصح ولا لأ لأنها المفروض انها خطوات معروفة لأي حد طالع الكويت

وفي طريقة تانية تقدري تبعي وتسألي بعد أي خطوات عملية من ناحيتهم موقع اسمه مصريون في الكويت لأنك بتسألي السفارة المصرية هنا نفسها والسفارة طبعا عندها علم بكل حاجة وتقدر تفيدك أكثر من أي حد

وبالنسبة للمرتب ده يعتبر ممتاز خصوصا لو هتقعدي في سكن

وليه هو يستفيد من الناحية الماديه طالما هما محتاجين ناس وبيحتاجوا كتيير خصوصا في الصيف لأن في مدرسات كتير بتنزل نهائي

بس عموما لازم تكوني حذرة لأنه ممكن يطلب منك متأخر فلوس ويفاجئك فلازم تكون الأمور واضحة جدا من الأول وخصوصا وانتي بتمضى على أي أوراق

ولازم تكوني على ثقة وانتي بتتعاملي معاه من إن هو محتاجك بإمكانياتك اللي موجودة فيكي عشان ميستغلش أي حاجة خصوصا إن الطلوع للخليج مطلوب جدا والناس بتدفع فلوس عشان تطلع وزي ما قولتلك ان المرتب ده يعتبر ممتاز لو مفيش سكن ولا تأمين صحي

وبصراحة معنديش علم بالنسبة لأخوكي ومجاله هنا في الكويت

وفي الآخر ممكن برضو أي حد عنده خبرة أكتر مني يفيدك اكتر في الموضوع

[saramoslims]

جزاك الله خيرا علي ردك

وعموما كل الخطوات ال انا عملتها هي اني امتحنت وعملت مقابله وطلب مني انى ارسل صور الباسبور الورقه الاولي والتانيه وصوره من شهاده التخرج وصوره شخصيه علي ايميل له بلغني ان سفرى هيكون قبل العيد ومحددش لسه اسم المدرسه

وشكرا جدا علي ردك

تم تعديل 25 أغسطس 2008 بواسطة saramoslims

[الباشمهندس ياسر]

السلام عليكم

هو ينفع انك تسافرى لوحدك من اساسه يعنى

و لا انت قصدك انك هتاخدى اخوكى معاكى

اما بالنسبة لسفرك فبعد متخلصى كل الاوراق و تطمنى من السفارة و الذى منه

لازم تبقى معاكى فلوس كفايهقد تمن تذكرة طيران و شوية كمان عليهم

لانه محدش ضامن الظروف

[saramoslims]

السلام عليكم

هو ينفع انك تسافرى لوحدك من اساسه يعنى

و لا انت قصدك انك هتاخدى اخوكى معاكى

اما بالنسبة لسفرك فبعد متخلصى كل الاوراق و تطمنى من السفارة و الذى منه

لازم تبقى معاكى فلوس كفايهقد تمن تذكرة طيران و شوية كمان عليهم

لانه محدش ضامن الظروف

شكرا علي ردك

بس أنا هسافر بإذن الله لوحدي

وكنت بسأل هل لو ربنا قدر وأنا سافرت هل هقدر أدور و أجيب عقد عمل لأخويا وهو دكتور بيطري وهل سهل انه يشتغل في شركات الأدويه?ولا تخصصه مش مطلوب

وشكرا مره تانيه