إقتراح للمنسقين

[se_ Elsyed]

عندي إقتراح للمنسقين بجعل موضوع " تعالوا نعرف بعض اكتر " stickey بحيث أن الواحد يعرف هو بيكلم مين على الأقل ذكر .. أنثى .. ومش مهم بالتأكيد المعلومات الشخصية ، لأني ملاحظ أن الواحد ساعات بيعجن فى الكلام ويكلم أخت من الأخوات وهو فاكر أنها رجل مثلاُ ... - وبيني وبينكم أنا عملت كده مع كروس فيلد فى الأول - وبرضوا موضوع بلد الأقامة مهم لأنه ممكن يكون واحد ساكن جنبي ومشترك معايا فى نفس المنتدى وانا ما أعرفش طبعاً !! فليه ما نعمقش علاقة الأخوة اللى بيننا ونبقى أصدقاء بالفعل لو توافرت هذه الرغبة عند الطرفين .

( وش واحد خبيث ... أنا عارف أن ممكن نلاقى ناس تخاف وتقولك لأ يا عم فرضنا حصل حاجة كده ولا كده يبقى مكاني معروف وييجوا زوار الليل يقفشوني ..... ) ولكن أقوله بثقه يا صديقي العمر واحد والرب واحد وأن تموت من اجل هدف نبيل ومشروع وواضح خير من أن تموت فطيس .... وتحيا مصر حلوه مستقلة

[Cleo]

لأني ملاحظ أن الواحد ساعات بيعجن فى الكلام ويكلم أخت من الأخوات وهو فاكر أنها رجل مثلاُ

ممممم.......

شكلك كدة يا سى السيد قصدك على حد تانى غير كروسفيلد.....

"وش واحد بارانويد"

[Spider]

( وش واحد خبيث ... أنا عارف أن ممكن نلاقى ناس تخاف وتقولك لأ يا عم فرضنا حصل حاجة كده ولا كده يبقى مكاني معروف وييجوا زوار الليل يقفشوني ..... ) ولكن أقوله بثقه يا صديقي العمر واحد والرب واحد وأن تموت من اجل هدف نبيل ومشروع وواضح خير من أن تموت فطيس .... وتحيا مصر حلوه مستقلة

"وش سايق عربية على طريق مصر أسكندرية الصحراوى"

بعتنا بكام يا أستاذ سى السيد؟؟؟

بعت أعضاء المنتدى بكاااام؟؟؟

"وش بيصرخ ومستنى الأجابة"

"عربية ميكروباس معدية على طريق مصر أسكندرية الصحراوى على الطريق المعاكس عملت فلاش زغلل عين الوش اللى فات فأختلت عجلة القيادة منه وأنقلبت به العربية وأنفجرت ثم تفحمت، وخرج الوش من كل هذه المعمعة يبكى بشدة وبحسرة لأن أصبع قدمه اليمنى الصغير دوحس من جراء الحادثة المروعة"

"وش يبكى بحرقة على المصير الأسود للوش السابق"

[se_ Elsyed]

بعتنا بكام يا أستاذ سى السيد؟؟؟

بعت أعضاء المنتدى بكاااام؟؟؟

بصراحة يا عنكب ياخويا العيال كبروا ومصاريفهم زادوا ، وأنا بأدور على أى سبوبة تزود دخلي ، وطبعاً لقيت إن التقرب للحكومة هو أسرع طريق للغنى الفاحش .... وأنا بأقولها عالية مدوية أنا راجل الحكومة.

أما أنت يا كليو فماتخافيش ... كل المعلومات اللى هاتقوليها عن شخصيتك هاتبقي فى أيد أمينة ونزيهة وشريفة .

يا اخوانا ياللي بترقبوا هناك ... شايفيني .. أنا كده ماشي تمام ؟

[Lancelot]

أتفق مع إقتراح الأستاذ سي السيد ..... علي الأقل يكون بدل وضع باب للأعضاء الجدد ....

شكرا .... و في إنتظار الإستجابة ....