حفلة تخرج من الحضانة !!!

[ابو يوسف]

ما دمنا هنا اسرة واحدة نتشارك الهموم و الافراح ...

اردت ان اخبركم بأننى حضرت أول امس حفل تخرج ابنى من الحضانة (تمهيدى) !!

حيث تم تكريمه ضمن المتفوقين ... لانه اجتاز امتحان آخر العام الذى تضمن الحروف الابجدية (عربى و انجليزى ) و الارقام من 1 الى 10 و سور جزء عم حتى التين و الزيتون ... كما انه حصل على الدرجات النهائية فى مادة المراجيح - رغم ان الامتحان كان صعب جداً

تفتكروا .... يكمل دراسات عليا و الا كفاية عليه كدة و يدور على شغل ؟؟؟؟

[Elham]

مبروك انا من رأيى ان يكمل لحد اولى ابتدائى و بعد كده يشوف حياته بقى هو هايضيع وقته كله فى التعليم لا حرام

[Farah]

الفففففففففففففففففففففففففف مممممممممممممممممممبروك

ياابو يوسف وعقبال الجامعه

[omtmam]

بيتهيالى كفاية كده و تشوف له شغل خليه يعيش حياته بقى وعموما الف مبروك و عقبال الدكتوراه

[الطفشان]

و يا ترى الشهادة دي معتمدة هنا في امريكا لو عايز دراسات عليا؟

و الا لازم يعمل معادلة في المراجيح المتطورة هنا؟

[freefreer]

الف الف مبروك .. دى اجمل ايام .. استمتعوا بيها يا جماعة ..

[amir]

ابو يوسف ... الف مبروك

تعرف ان أنا حاسس بك و بفرحتك و بتفكرنى بالأيام الخوالى

نصحيتى لك خليه يدور على العروسه اللى ممكن تشاركه المراجيح فى الفتره الجايه ، و ليكن شعاره " العلم و المراجيح لا تقدر بالبدنجان "

الف مبروك وتمنياتى له بمستقبل باهر وربنا يخليك له .

[se_ Elsyed]

و يا ترى الشهادة دي معتمدة هنا في امريكا لو عايز دراسات عليا؟

و الا لازم يعمل معادلة في المراجيح المتطورة هنا؟

للمعلومية يتم إعتماد مثل هذه الشهادات من ملاهي " دريم بارك " تحت إشراف الدكتور / أحمد بهجت .

الف مبروك يا أبو يوسف .... وأعتقد أنك كده عملت اللى عليك ومابخلتش عليه فى التعليم ، خليه هو يحدد مصيره هل هايكمل ولا يطلع للحياه العملية .

[ابو يوسف]

الف الف شكر للجميع ...

انا عملت بنصيحتكم و سيبته يختار مستقبله بنفسه ... و ح يحضر دراسات عليا فى المراجيح و تأثيرها على سيكلوجية الطفل !!!

اما بخصوص الارتباط ... فابنى عارف سكته كويس ...

اول ما اتفتحت ستارة المسرح ... قعدت اشاور و اتنطط علشان يشوفنى و يعمل لى باى باى زى ما باقى العيال بتعمل لاهاليها ... و لما شافنى بص ليا باستعلاء - لانه هو فوق و انا تحت (وش اب حزين بيعط )

و ما شاورش ليا .... قلت مش مشكلة يمكن مرتبك (وش اب عبيط و على نياته )

و فجأة بص لحد وسط الجمهور و ضحك بفرحة و عمل باى باى بحماس للحد ده و بدأت المسرحية ..

طبعاً انا كنت ح اتجنن و اعرف من الحد ده ... (وش اب مصدوم و متغاظ )

و بعد ما روحنا ... خدته على جنب فى حوار اخوى !!! و قلت متصنعا الهدود و اللامبالاه :

- مين بقى يا حبيبى اللى عملته باى باى و انت على المسرح ؟

فرد بهدوء أكثر :

- دى مرام !!

- مرام مين يا روح قلبى (وش اب احمر من ارتفاع الضغط )

- صاحبتى !

- طيب ما عملتش باى لبابا حبيبك ليه (نفس الوش اللى فات بس مدخن من الغيظ )

- اصلها مش كانت جاية و جت !!!

(نفس الوش اللى فات اللى عنده ضغط و مدخن من الغيظ .. بس معمول له تنفس صناعى)