دعوة للمناقشة ربنا يجعل عندكم الفائدة

[roka]

أنا الحقيقى مش من المغتربين لكن زوجى أصبح من المغتربين من أسبوع سافر للأمارات وبالتحديد أبو ظبى ودى اول مرة ليه يسافر ولينا أنى نفترق طبعا احنا اكتشفنا أنى عدم خبراتنا بالسفر وقعنا فى مطبات كتير

أولها المرتب طلع قليل جدا بالنسبة لخبرته هو محاسب وخبرته خمس سنين وبيشتغل بالعديد من البرامج المحاسبية وليه أيضا فى البرمجة وتانى شئ انهم مضوا معه عقد وحتى كان فى مصر بمدة ولمدة ثلاث سنوات وطبعا عرفنا أنه كده ميقدرش يسبيهم

الأهم واللى عايزة أعرف رأيكم فيه وده اللى أنا وهو معرفناش نحسبه صح ياترى فعلا الغربة تستاهل بعدنا عنه وبعده عننا وعن أبنته أنا لدى بنوتة عندها ثلاث سنوات ياترى فلوس الدنيا كلها ممكن تعوضها بعدها عن بابها معتقدش

هو ده اللى فعلا غلطنة فى حسبانه فالوضع دلوقتى هل ياترى أنا أستطيع أذهب للعيش معه أنا أيضا محاسبة لكن ليس لدى أى خبرة هل فى أمكانية للشغل ويا ترى علشان نعيش هناك نحتاج كام هو أنا وهو مش مصرفين ولا بتوع خروج وهو مش مدخن الحمد الله

ولا هو يخلص ديونه وينزل وبلاش بهدلة وأرجع أقول طب مش ممكن يلاقى فرصة أحسن هناك ولا هو خلاص أتفقل عليه معهم

يا ريت أهل الخبرة السابقين يفيدونى ربنا العالم بحالى وحاله

وأدعو لنا أن نجتمع قربيا

وحقيقى نصحية لكل واحد بيفكر يسافر أوعى تسيب أهلك وناسك هنا أوعى تفتكر أنى الفلوس ممكن تعوض لأ أنت أهم

[الباشمهندس ياسر]

وأدعو لنا أن نجتمع قربيا

وحقيقى نصحية لكل واحد بيفكر يسافر أوعى تسيب أهلك وناسك هنا أوعى تفتكر أنى الفلوس ممكن تعوض لأ أنت أهم

السلام عليكم

ربنا يجمعكم عن قريب ان شاء الله وكان نفسى اخدم بس انا مش فى الامارات

اما عن النصيحة فانا عايز اقولك حاجة واحدة

لولا السفر و انى سايب اهلى لكنت هعرف اظبط الشقة ولا اشترى عربية و لا اخطب اصلا ولا حاجة خالص

ربنا يكرمنا من عنده و الناس كلها

[Mohamed Zahran]

قاعده عامه من خبرتي في الخليج ان اللي بيدخل بمرتب صغير بيفضل يعاني انا انصح بالعوده وانتظار فرصه اخري. اسوأ حاجه الغربه بدون مقابل

[dongol]

الأخت روكا الأسعار في أبوظبي زادت قوي في السنتين اللي فاتوا و علشان تعيشي هنا انتي و جوزك و بنتك لازم يكون دخلكم مش أقل من عشر الاف درهم شهريا هتصرفوا منهم حوالي 7 الاف درهم علي السكن و المواصلات و الاكل ده لو سكنتم في مكان بعيد عن ابوظبي زي الشهامة او بني ياس اما بقي لو حبيتم تسكنوا في ابوظبي لازم يكون الدخل مش اقل من 15 الف

و نصيحتي ليكم ان جوزك يسافر لوحده لمده سنتين تلاتة يحوش فيهم مبلغ معقول و بعد كده يرجع مصر يعيش معاكم و هو ده اللي انا عاملة شخصيا قاعد لوحدي هنا في ابوظبي من غير عيلتي علشان المصاريف تقل شوية و بفكر في الرجوع في اقرب فرصة

اما بالنسبة للراتب الصغير اللي ابتدي بيه فهنا معظم الشركات بتدي زياده سنوية علي الراتب هي مش بتكون كبيرة بس برضه بتساعد و تغيير الكفالة هنا يكاد يكون مستحيل بالا بموافقة الكفيل القديم و طبعا عمر ما الكفيل بيوافق انك تروحي تشتغلي عند حد غيره

ارجو اني اكون افدتك و انا تحت امرك في اي استفسار

[HDarwish]

الأهم واللى عايزة أعرف رأيكم فيه وده اللى أنا وهو معرفناش نحسبه صح ياترى فعلا الغربة تستاهل بعدنا عنه وبعده عننا وعن أبنته أنا لدى بنوتة عندها ثلاث سنوات ياترى فلوس الدنيا كلها ممكن تعوضها بعدها عن بابها معتقدش

طبعا ما تستاهلش .. كفاية يقوم الصبح على ضحكتها وينام وهو بيحكيلها حكايات قبل النوم لحد ما تنام ..

لكن هنعمل إيه غصب عننا وعلشان حاجات تعيش لازم حاجات كثير تموت .. إيه ده أنا شكلي دخلت في الأغنية

عالعموم قلبي معاكم وتمنايتي ليكم زي ما ودعتم تلاقوه إنشاء الله

[roka]

متشكرة جدا جدا لكل واحد رد عليا

الباشمهندس ياسر

أنا عارفة طبعا انى الغربة بتحقق حاجات كتير صعب أوى تحققها هنا لكن أنت قولتها ;) أخطب يعنى لسه على البر مش زينا ما بينا عيش زملح وعشرة وربنا يوفقك ويعوضك بخطيبتك عن سنين الغربة

Mohamed Zahran

بس انا سمعت انى لما بيشوفوا انى الواحد مجتهد بيزودوه هو الكلام ده مش بيحصل أصلى أنا زوجى حقيقى بشهادة الجميع شاطر وموهوب

الأخ dongol

أولا على فكرة ده أسم جوزى برضه فى النت ;) ثانيا حضرتك قولت سبعة ألاف مصاريف وقدك انى التلاتة الباقيين يتشالوا للظروف ولا لهيم بنود أخرى وليه كل الفرق ده مابين سكن بعيد وأبو ظبى نفسها مع العم أنا عندى أستعداد اعيش فى غرفة مش شقة او أستديو صغير وربنا يوفقنى وألاقى شغل

الأخ HDarwish

فعلا كلام الأغنية جه فى الجون بس هو ده اللى بفكر فيه أنا وبنتى فعلا الفلوس هتعوضنا مش عارفة أعتقد لأ والله اعلم

[Mohamed Zahran]

طبعا زيادة المرتب ممكنه لكنها دايما بتبقي بنسبه من الراتب الاصلي وعلي ما قلبهم يحن ويزودوا بتلاقي زيادة الايجار كلت الزياده عشان كده لازم الواحد يدخل الخليج من الاول مستريح التعجل في قبول اول عرض دايما يعقبه الندم

[Mohamed Zahran]

المشكله التانيه ان الكفيل عارف ان مكفوله غير قادر علي الاستقاله حتي لو جاله ضعف المرتب لان نقل الكفاله في الخليج من رابع المستحيلات.

كمان الموظف جديد بعد شهر تلاقي رجليه غرزت في البلد بعد ما دفع ايجار سنه في سكنه وجاب عفش و سياره وخلافه دي غير انه استقال من وظيفته في مصر يعني حيفكر الف مره قبل ما يستقيل وكل ده الكفيل باشا عارفه لذلك هو مش مضطر يزود المرتب لانه عارف ان مكفوله محاصر من جميع الجهات وربنا يرحمنا

[yasora73]

قاعده عامه من خبرتي في الخليج ان اللي بيدخل بمرتب صغير بيفضل يعاني انا انصح بالعوده وانتظار فرصه اخري. اسوأ حاجه الغربه بدون مقابل

يا أخي ان مش معاك ابدا عارف ليه

عشان اصلا مفيش فرصة تانية

احسبها كدة مثلا الفرصة هناك احسن من هنا الف مرة

اثبت نفسك واطلب مرتب اكبر بس المهم تكون تستاهلة

[Mohamed Zahran]

عزيزي yasora73 انت ليه قررت ان مفيش فرصه تانيه؟ الرزق في الخليج كتير واكبر غلطه ان واحد يقبل اي عرض والسلام لانه اولا بيضيع سنين من عمره ببلاش ثانيا بيأكد ان المصريين بيقبلوا اي حاجه مع ان اي حد لو ايقن ان رزقه في السما حيستني لحد ما يجيله عرض مناسب ليه

[عبقرينو]

الاخت roka

دعواتي ان يجمعكم اللة علي خير واكيد هو كمان تعبان في غربتة ياريت تساعدية وتحاولي تهوني علية الغربة لغاية ما ربنا يكرمة بحاجة افضل

[roka]

أخ محمد أنا معاك طبعا أنى رزق من الله وعلشان كده أحنا مقبلناش إلا بعد صلاة الأستخارة وحاجات كتير كانت بتقول انها المصلحة لكن برضه فى كلامك كتير حاجات الواحد يستفيد منها وهو جوزى ده طريقة تفكيره حاليا وهو أنه يكون مش مطضر بمعنى انه لسه امامه ست شهور الأختبار وهو فى الفترة دى ممكن يسبيهم وبالتالى أى مشاريع وإرءات هنا من شقة وعربية وغيره مؤجلة

وأعتقد أنى الفترة دى كفيلة بأنه هو يعرفه شغله وأحنا نعرف ناس كويسة ولا لأ ولو مش كده يبقعلى رأيك الفرص كتير

ومتشكرة أوى على أهتمامكم جميعا

[dongol]

عزيزتي روكا

أنا كان قصدي ان المصاريف الشهريه لن تقل عن سبع الاف درهم شهري و قد تزيد الي عشر الاف ده طبعا علي حسب الطريقة اللي انتم عايشين بيها