تحويشة العمر....هل ضاعت ؟؟!!

[ELSHAMY]

أخوانى...أخواتى

تحويشة العمر...جملة من كلمتين .... كل ما نسمعها خيالنا يسرح على القرشين اللى حوشناهم بعد تعب الحياة و العمل و البدلات....وفى الأخر مكافأة نهاية الخدمة...

لكن فيه بعض الناس بيختلف عندها هذا المعنى.....

بعضنا بيشعر ان تحويشة عمره هى أولاده اللى أحسن تربيتهم دينا و خلقا و علما....

البعض الأخر يشعر أن تحويشة عمره هى تلك المبادىء التى يحملها من شرف و كرامة و عزة نفس....

ايه رأيكم من باب التناصح أن يكتب كل واحد ماهى تحويشة عمره حتى الأن ؟

و ماهى تحويشة العمر التى يسعى لها ؟

أنا شخصيا عندى قناعة أن تحويشة العمر هى مجموعة الأعمال الصالحة التى يوفق فيها الله عبده بنية خالصة و يجدها فى انتظاره هناك....حيث لا ينفع مال و لا بنون الا من أتى الله بقلب سليم...

حبيت أعرف انطباعاتكم و نصايحكم لزيادة تحويشة العمر من الصالحات خصوصا و قد أظلنا الشهر الفضيل

تحياتى

[HDarwish]

بعد ما دخلت وطلعت .. قولت لأ شكلها بايخ قوي .. إني أمر على موضوع دكتور الشامي .. وامشي كده بدون اسجل حتى مرور

أنا كمان يا دكتور تحويشة العمر لسه بسعى ليها وهي إنشاء الله تكون عمل صالح ينفعني وينفع والديا في الآخرة إنشاء الله .. وأظن ما فيش أحسن من كده تحويشة

وفقنا الله وإياكم إلى ما فيه الخير إلينا وإلى المسلمين جميعا

[ELSHAMY]

بعد ما دخلت وطلعت .. قولت لأ شكلها بايخ قوي .. إني أمر على موضوع دكتور الشامي .. وامشي كده بدون اسجل حتى مرور

أنا كمان يا دكتور تحويشة العمر لسه بسعى ليها وهي إنشاء الله تكون عمل صالح ينفعني وينفع والديا في الآخرة إنشاء الله .. وأظن ما فيش أحسن من كده تحويشة

وفقنا الله وإياكم إلى ما فيه الخير إلينا وإلى المسلمين جميعا

جزاك الله خيرا أخى العزيز....

ربنا يزيد لك فى ميزان حسناتك...النية الصالحة تحول عاداتنا اليومية الى عبادات

تقبل الله منك

[مسلم]

إذا مات ابن آدم انقطع عمله إلا من ثلاث : صدقة جارية ، وعلم ينتفع به ، وولد صالح يدعو له

[عبقرينو]

دكتور الشامي

رحم اللة والدي كان كل تحويشة عمرة هي أولادة واحفادة من باب العمل الصالح الذي نسال اللة ان يتقبلة وان يجعلة في ميزان حسناتة

واعتقد ان شقا عمري كذلك ايضا

بارك اللة لنا في اولادنا واحفادنا وجعلهم من العمل الصالح الذي لاينقطع

امين

[makarawad]

إذا مات ابن آدم انقطع عمله إلا من ثلاث : صدقة جارية ، وعلم ينتفع به ، وولد صالح يدعو له

تحويشه العمر

على المستوى الادبى هيا الاعمال الصالحه وعلى المستوى الخيرى معروفه

وعلى المستوى العملى ممكن خبرات

يعنى ممكن ما اكنش حوشت فلوس لكن عندى خبره تعيشنى كويس ده تحويش

والارازاق بتاعت ربنا والغنى مش هدف للناس القنوعه ولكن الستر هو الهدف

وربنا ما يجعلناش من اصحاب السراء السريع ولا المفاجى لان عيوبه اكتر من ميزاته

وشكرا

[محمد عبدالعزيز]

تحويشة العمر فى رأيى ليس لها علاقة بالمال من قريب أو بعيد, لأن المحصلة النهائية والفائدة الحقيقية للإنسان من المال هى ما أكل وشرب ولبس وأنفق فى الخير. فكما نرى, الفائدة الحقيقية للمال ليست فى "التحويش" الذى هو الإدخار وإنما هى فى الإنفاق المعتدل فى الخير والمصلحة. والدليل عندى هو حديث رسول الله صلى الله عليه وسلم "ليس لك من مالك إلا ما أكلت فأفنيت أو لبست فأبلي" وزاد فى رواية أخرى "أو تصدقت فأمضيت".

تحويشة العمر هى ما أدخره وينفعنى فى الآخرة, تحويشة العمر هى العمل الصالح بكل معانيه وأنواعه.

الموضوع جميل جداً, أشكرك يا دكتور.

تم تعديل 25 أغسطس 2008 بواسطة محمد عبدالعزيز

[ELSHAMY]

اخوانى مسلم - عبقرينو -محمد عبد العزيز- makarawad

شكرا لمروركم الكريم....كلماتكم و أرائكم جميلة و معبرة

فى انتظار أراء بقية الحبايب لعل كل واحد يفيدنا برأى جديد

[galaxy]

تحويشه العمر بالنسبه ليا لسه مش حاسه اني عملتها للاسف.....هي كل اللي هقدر احوشه في حياتي وارتبه عشان اكون رصيد كبير ينفعني يوم لا ينفع الندم............بلاقي ناس كتير بتعمل الخير علي كبر بصراحه او مثلا الخير والعمل الصالح بيتعمل لها بعد ما تقابل وجه كريم............بس انا هحس بطعمه اكتر لما اعمله وانا حيه ارزق.............نفسي في حاجات كتير ولازم اكون لها رصيد كبير لانها غاليه........سلعه الله غاليه اوي اوي يا دكتور.......وانا عايزاها اوي بس بحس ان العمر ممكن ما يسعفنيش.....دايما احس كدا........بحس كمان ان الحياه بتغرني اوي اقوم ابطل تحويش وتكوين رصيد..........وارجع بعدها افوق تاني واحوش علي قد ما اقدر

ادعي في صلاتي اللهم لا تتوفني الا وانت راض عني وارزقني الفروس الاعلي دون سابقه عذاب ولا حساب........عشان انا طماعه اوي لان كرم ربنا ما لوش حدود ولو ما طمعتش في الكريم يبقي عشمي هيكون في مين.وارجع احط الرصيد ع الرصيد..........

الاولاد برضه يا دكتور رصيد صدقني ......مش بس عشان تفرح بيهم وتشوفهم قدامك دكاتره ومهندسين وبس...........لا.عشان يبقوا صدقتك الجاريه ويدعولك بعد عمر طويل.............انا اسفه لكلامي بس لو كل واحد ندر مثلا انه يجعل ولاده من حفظه القران الكريم......شوف هيقابل ربنا ازاي ووشه كله نور وعلي راسه تاج من نور...........ومش بس كدا.......دا هيكون مطمن عليهم في الايام اللي بنشوفها دي لما يسلحهم بدينهم............ولما يكون ابنك ان شاء الله ناجح في مجاله ايا كان اختياره يبقي دي كمان صدقه جاريه وتوفيق من الله.........

كل خطوة يا دكتور عايزة تحويش ورصيد..............كل خطوة .لا دا كل لحظه رصيد ممكن نجمعه ونحوشه......ولو باضعف الايمان زي اننا نحتسب مثلا في اي عمل بنعمله لوجه الله حتي لو مكالمه تليفون او حتي طبخه الزوجه بتطبخها او ابتسامه او كلمه حسنه .........مش سهل نحوش ولو ان لمصادر كتير ......ربنا يقدرنا جميعا ويتقبل مننا صالح الاعمال

[الباشمهندس ياسر]

السلام عليكم

العزيز دكتور الشامى كل سنة وانت طيب و سائر الاعضاء

انا عايز اقول حاجة يمكن تكون مختلفة شوية عن بقية الاراء

تحويشة العمر عندى مصطلح بيختلف باختلاف الفترة اللى انا بعيشها يعنى ايه

من ايام الاعدادية و الثانوية وانا غاوى قراية اوى لدرجة تخنق بصراحة

كنت بعتبر انها هى دى الفترة اللى هقدر اقرا فيها وانا عندى الوقت الكافى و مفيش عندى التزامات تجاه اى حاجة وفعلا حصل

بعد شويه بديت الاهتمامات تختلف حبتين ايام الكلية من حيث الاتجاه لمحاولة فهم الواقع الاقتصادى و طبيعة السوق واحتياجاته و الحركات دى

و خلصت الكلية قلت ابدأ الاحتكاك العملى واحس السوق واشوف الوضع زى ماكنت متخيله و لا لأ

المهم علشان مطولش عليك مقضيها مراحل

و دلوقتى فى مرحلة بناء معينة لتحقيق اهداف معينة

و لـــــــــــــــــــــــــــــــــــــــــكن

فى وسط كل ده مبنساش انى هموت و يمكن قريب خالص

و ان كنت عارف انى مقصر

يعنى من الاخر العملية ماشية توازى

كفاية كده احسن السلوك لمست و مش عارف اجمع

[DIA ELDIN]

ازيك يا دكتور فعلا موضوع جميل

برضوا انا لسة مش حاسس اني عملت تحويشة العمر اللي تؤهلني للقاء ربي لكن كأي مسلم بسعى وندعوا الله الثبات على الحق

اللي بسعى لية هو الاكتر الحقيقة بسعى ان ربي يكون راضي عني رغم زلاتي

بسعى اني ارد جميل والدتي عليا اللي ربتني وللي طول الوقت حاسس بدعواتها

بسعى ان تحويشة عمري تبقى زوجة مستقبل صالحة واولاد احقق فيهم الحلم

بسعى قبل كل شئ لتطبيق الحديث الشريف "انما الاعمال بالنيات ..." الى اخر الحديث

وبدعى ربنا كلنا نتجمع في الجنة ان شاء الله

تم تعديل 25 أغسطس 2008 بواسطة DIA ELDIN