اخواني المصريين بالكويت ارجو الإفادة لوجه الله تعالي

[نبض الحروف]

السلام عليكم ورحمة الله وبركاته

كل عام وحضراتكم بخير

اخواني المصريين بالكويت ارجو الافادة لوجه الله تعالي

انا تم ارسال دعوة تجارية لي مدتها شهر واحد فارجو من سيادتكم ان تزيلوا الحيرة التي اصابتني خاصة انني اسمع ان الزيارة للكويت من الصعب تحويلها الى اقامة ومن الصعب الحصول على عمل بها

بالنسبة الى ظروفي في مصر هي كالآتي :

السن 35 سنة

العمل مصمم جرافيك

الراتب يزيد عن 1300 جنيه مصري ( غير العمل الحر)

متزوج ولدي طفلان كلاهما بالمدارس ( مدارس خاصة )

جهة العمل في مصر شركة جيدة جدا

بعد كل ما سبق هل هذا العرض بالنسبة لي يستاهل المجازفة ساختصر واضع تساؤلاتي في نقاط حتي يتسنى الرد

1- هل من السهل ان اجد وظيفة في الكويت كمصمم جرافيك او مدرس جرافيك او مدرب في احد مراكز التدريب

2- ما هو متوسط الراتب بالنسبة لتخصصي خاصة انني خبرة اكثر من ثماني سنوات واتحدث الانجليزية بطلاقة

3- انوي باذن الله ان اصطحب الأسرة بعد الأستقرار فهل هذا ميسر باذن الله ( السكن - المدارس - المعيشة)

4- هل تستاهل تجربة العمل في الكويت ان اجازف بترك الوظيفة خاصة اني ساقدم استقالة ( غير مقبول بالأجازة بدون مرتب) وفي حالة الفشل في تحويل الزيارة الى اقامة فساعود لابحث عن وظيفة اخرى خاصة في حالة الركود المصاب بها السوق المصري

واخيرا جزى الله خيرا لكل من اخرجني من حالة الحيرة التي انا بها واعاد على كل المسلمين هذه الأيام المباركة بالخير واليمن والبركات

[HDarwish]

نصيحتي ليك أن تنتظر ولا تتسرع .. وسوف أرد على تساؤلاتك في وقت آخر نظرا لانشغالي حاليا

[نبض الحروف]

الأخ الغالي HDarwish اشكر لك اهتمامك وبانتظار رد بفارغ الصبر ومع العلم ان اخر تاريخ لصلاحية الزيارة يوم 12 / 10

وشكرا

[HDarwish]

السلام عليكم ورحمة الله وبركاته

وعليكم السلام ورحمة الله وبركاته

كل عام وحضراتكم بخير

وإنت بخير وبصحة وسلامة

اخواني المصريين بالكويت ارجو الافادة لوجه الله تعالي

انا تم ارسال دعوة تجارية لي مدتها شهر واحد فارجو من سيادتكم ان تزيلوا الحيرة التي اصابتني خاصة انني اسمع ان الزيارة للكويت من الصعب تحويلها الى اقامة ومن الصعب الحصول على عمل بها

الزيارة التجارية يتم تحويلها إلى إقامة

واليومين دول كل اللي عاوز يجيب حد بيجيبه على زيارة تجارية لإن الممانعات مقفولة اليومين دول واحتمال تستمر على الحال ده لآخر هذه السنة

أنا دخلت الكويت عن طريق زيارة تجارية وتم تحويلها إلى إقامة .. ولكن الأوضاع في البلد في هذه الأيام كل يوم على حال يعني كل يوم نصحى الصبح على قرار جديد .. آخر حاجه سمعناها إن من 570 ألف مصري في الكويت سيتم تصفية 250 ألف منهم على إعتبار إنهم عمالة هامشية وده حتى آخر هذا العام .. والله أعلم هيحصل إيه بعد كده ...

الزيارة التجارية فيها ميزه حلوة بس ده الأول لما كانت بتطلع بثلاث شهور إن الناس كانت بتيجي بالزيارة دي ويشوف وضع البلد عامل إزاي وبعدها يقرر إذا كان يقعد في البلد ولا لأ حسب إمكانياته ورؤيته إذا كان يقدر يحصل على وظيفة بسهولة ولا لأ وفي الحالة دي ما يكونشي خسر كثير

بالنسبة الى ظروفي في مصر هي كالآتي :

السن 35 سنة

يعني مش عايزين بهدلة

العمل مصمم جرافيك

ممتاز

الراتب يزيد عن 1300 جنيه مصري ( غير العمل الحر)

ربنا يزيد ويبارك

متزوج ولدي طفلان كلاهما بالمدارس ( مدارس خاصة )

ربنا يخليهملك وتفرح بيهم

جهة العمل في مصر شركة جيدة جدا

ممتاز

بعد كل ما سبق هل هذا العرض بالنسبة لي يستاهل المجازفة ساختصر واضع تساؤلاتي في نقاط حتي يتسنى الرد

1- هل من السهل ان اجد وظيفة في الكويت كمصمم جرافيك او مدرس جرافيك او مدرب في احد مراكز التدريب

مصمم جرافيك مطلوب جدا وفي أماكن كثير هنا في البلد .. وكمان مدرب في مراكز التدريب .. بس في الأول والآخر دي عملية نصيب وأرزاق

2- ما هو متوسط الراتب بالنسبة لتخصصي خاصة انني خبرة اكثر من ثماني سنوات واتحدث الانجليزية بطلاقة

متوسط الراتب من 250 إلى 350 .. حسب الشركة اللي هتشتغل فيها

3- انوي باذن الله ان اصطحب الأسرة بعد الأستقرار فهل هذا ميسر باذن الله ( السكن - المدارس - المعيشة)

زي ما قلت قبل كده لازم الراتب في إذن العمل يكون 250 أو أكثر علشان تعرف تصطحب الأسرة رسميا

السكن غرفتين وصالة يبدا من 180 وإنت طالع ولو في اماكن بعيده شويه ممكن تحصل أقل من كده

المدارس .. مش هاقدر افتي فيها لإني لسه ما فيش عندي أولاد في مدارس لكن على ما أسمع من زملائي تقريبا الباكستينية ب 600 دينار ودي مش وحشة لكن الإنجليزية او الامريكية مش اقل من ألف دينار

المعيشة لو عازب مصاريفك كلها في حدود 100 دينار ولو معاك العائلة ممكن تضرب في اثنين

4- هل تستاهل تجربة العمل في الكويت ان اجازف بترك الوظيفة خاصة اني ساقدم استقالة ( غير مقبول بالأجازة بدون مرتب) وفي حالة الفشل في تحويل الزيارة الى اقامة فساعود لابحث عن وظيفة اخرى خاصة في حالة الركود المصاب بها السوق المصري

لأ ما تستاهلش .. ده في رأيي الشخصي

واخيرا جزى الله خيرا لكل من اخرجني من حالة الحيرة التي انا بها واعاد على كل المسلمين هذه الأيام المباركة بالخير واليمن والبركات

تمنياتي لك بالتوفيق ... وفي حالة أي استفسار أو توضيح أنا تحت أمرك إذا كان في استطاعتي

[نبض الحروف]

بارك الله فيك اخي العزيز وشكرا جدا على اهتمامك

بس انا لما حطيت ظروفي في مصر كان قصدي ان انا بالوضع ده في مصر احسن ولا اجي الكويت واجرب احسن ولا ما تستهلش اخليني زي ما انا واقول الحمد لله على ما رزق

وبرده شكرا على اهتمامك وذوقك

[أبو نادر]

تعقيب على كلام HDarwish:

"على ما أسمع من زملائي تقريبا الباكستينية ب 600 دينار"

مصاريف المدرسة الباكستانية من 240 د.ك إلى 300 د.ك سنويا بالنسبة ل KG1 وبتزيد زيادة بسيطة للسنوات الأعلى

"المعيشة لو عازب مصاريفك كلها في حدود 100 دينار ولو معاك العائلة ممكن تضرب في اثنين"

أعتقد زوج وزوجة وطفلين هيكون المصاريف أكتر شوية

مع ملاحظة مصاريف الإقامة للزوجة والأولاد (إلتحاق بعائل - أول مرة) + مصاريف تأسيس الشقة حوالي 1000 د.ك

* أنصحك ما تسافرش إلا لما يكون معاك Offer

يعني ما تروحش تدور على شغل وتخسر شغلك في مصر لأن ده مش مضمون

اكتبلي إيميلك و أنا هابعتلك عليه أسماء شركات تقدم فيها ان شاء الله

بالتوفيق

[نبض الحروف]

الأخ العزيز ابو نادر شكرا لاهتمامك

يمكنك مراسلتي على

ncc112 على الياهو

وطبعا الدعو ل HDarwish ولاي عضو اخر اهلا بيه

وجزاكم الله جميعا خيرا ان شاء الله

[HDarwish]

صباح الخير عليكم جميعا

الأخ أبو نادر .. الأخ نبض الحروف .. تحية طيبة وغالية

تعقيب على كلام HDarwish:

"على ما أسمع من زملائي تقريبا الباكستينية ب 600 دينار"

مصاريف المدرسة الباكستانية من 240 د.ك إلى 300 د.ك سنويا بالنسبة ل KG1 وبتزيد زيادة بسيطة للسنوات الأعلى

لو تلاحظ أنا قولت قبلها إني مش هاقدر افتي لإن لسه ما فيش عندي أولاد في مدارس والكلام اللي ذكرته لو خطأ يتحمل جزائه اللي أنا سمعت منهم.

"المعيشة لو عازب مصاريفك كلها في حدود 100 دينار ولو معاك العائلة ممكن تضرب في اثنين"

أعتقد زوج وزوجة وطفلين هيكون المصاريف أكتر شوية

أنا كنت أقصد زوج وزوجه بس بدون أطفال .. لكن فعلا لو فيه أطفال يبقى هتزيد عن كده

مع ملاحظة مصاريف الإقامة للزوجة والأولاد (إلتحاق بعائل - أول مرة) + مصاريف تأسيس الشقة حوالي 1000 د.ك

* أنصحك ما تسافرش إلا لما يكون معاك Offer

وأنا بضم صوتي ليك يا ابو نادر .. اللي بيبقى جاي مش على شغل بيتعب قوي حتى لو معاه كوم شهادات وكوم خبرات

أهلا بيك ابو نادر في المحاورات .. بالتوفيق نبض الحروف ...

[النسر المصري]

جيت برجلك ليا يا نبض الحروف...عااااووووووووووو

انا ياسيدي مصمم جرافيك في الكويت منذ تسع سنوات ...وخريج فنون جميله ٩٩...وباذن الله هساعدك والله المستعان

اسمع ياسيدي..اولا عاوزك ترصلي البرامج اللي بتشتغل عليها وبتشتغل ايه بالظبط كجرافيك ديزاين

يعني هل اخراج مجلات....ولا بتصمم مطبوعات....ولا انت رسام اساسا ....ولا ويب ديزاين.......اديني فكره..عشان كل حاجة من دول ليها راتب وسعر

ثانيا...ايه اللي يخليك تاخد اجازه بدون راتب..وايه اللي يخليك تقولهم انك مسافر اساسا......ماتقولهم انك عاوز اجازه لظرف طاريء وخلاص......وانزل وهم كلهم شهر بالطول والعرض......اذا صابت...تنزل وتستقيل..واذا خابت ادي شغلك موجود...

وباذن الله مش هتخيب

يلا ابعتلي سي في بتاعك وربنا يجيب اللي فيه الخير

[نبض الحروف]

الاخ النسر المصري

شكرا لاهتمامك

الاخ ابو نادر

انا اسف كتبت الميل خطأ

الميل الصحيح

msn112 على الياهو

اما الميل السابق فعلى الهوتميل وليس الياهوو

معلش ارتباك بقى

ارجع للنسر المصري

شكرا مرة اخرى لاهتمماك

بص ياسيدي

بالتفصيل

انا مدرب حاسب آلي في احد مراكز التدريب العروفة والتي لها اكثر من فرع في القاهرة

اختصاصي

فوتوشوب - انديزاين - اليستراتور - ثريدي ماكس - فلاش

بالاضافة الى تصميم المواقع

بالنسبة للعمل الحر فانا اعمل في مجال تصميم المطبوعات والمجلات

كما اني حاصل على شهادة مدرب معتمد من ميكروسوفت ايجيت في تدريب المكفوفين ( دربت اكثر من 50 مكفوف ) والمعاقين ذهنيا وحاليا بتعلم لغة الصم والبكم

اما بالنسبة لموضوع الأجازة انا فعلا مش هقولهم اني مسافر بس عندنا في رخامة شوية في موضوع الأجازات الطويلة بدون مرتب يعني يا إما أقدم استقالة يا إما اقصى حاجة اقدر اعملها اخد 15 يوم فقط تجدد مرتان ولكن يجب ان اكون موجود لاقوم بالتجديد

وبصراحة انا لو ضامن ان الوضع في الكويت مبشر بالنسبة ليا معنديش مانع اني اقدم استقالة على الأقل هأدر استفيد من مكافاة نهاية الخدمة في المصروفات اللازمة للسفر

لكن كل خوفي اني ماوفقش هناك ويالتالي ارجع تاني لمصر وساعتها هيبقى من الصعب الحصول على وظيفة أخرى

صحيح لا أنكر اعتمادي على الله هنا او هناك او في اي حته في العالم بس هو ده الوضع قولتو بصراحة ومنتظر رايكم فيه

خاصة ان كل الناس تقريبا مخوفاني من الخطوة دي جامد وبيقولولي ان الشغل في الكويت مش سهل ولو لقيت هيبقى بمرتب ضعيف لمدة في الأول لغاية ما افهم الوضع ماشي هناك ازاي

انا طولت في الكلام بس انا قلتلكم اللى انا متخوف منه بصراحة

ومستني النصيحة منكم خاصة ان النسر المصري بقالة 9 سنين يعنى عارف الوضع ماشي هناك ازاي

برده بقول مفيش حد هيبقى زي حد كل واحد وليه ظروفة الخاصة بس ادينا بنفكر سوى لغاية ما نوصل لحل

ان شاء الله

وشكرا لكل من رد عليا ونصحنى من خلال رؤيته او تجربته

[نبض الحروف]

السلام عليكم ورحمة الله وبركاته

انتم فين يا شباب

محدش رد عليا

عل المانع خير

[نبض الحروف]

السلام عليكم ورحمة الله وبركاته

انتم فين يا شباب

محدش رد عليا

عل المانع خير

[Simba]

السلام عليكم

حضرتك متجوز وعندك اطفال

شوف هو اذا ما كنتش جاي علي عقد وواثق منه تماما وبراتب جيد يبقي بلاش المجازفة بشغلك في مصر غير اني حسيت لما قولت فلوس نهاية الخدمة هتنفعك في مصاريف السفر مفيش داعي لانك تخسرها

الشغل في الكويت مش سهل تلاقيه غير ان ظروف المعيشة هنا غالية سواء سكن او اكل او مواصلات وغيره