طلب افادة و مشورة هام و عاجل

[ام عمر المصرية]

السلام عليكم و رحمة الله و بركاته

كيفكم اخواتي في الله

بحس لما بدخل المنتدي ده انه لسه في خير في الدنيا و ان المصريين لسه بيحبو بعض

المهم مشكلتي تتلخص في ان زوجي حفظه الله

وقع عقد لمدة سنتين مع شركة سعودية للصيانة و هو اساسا مهندس كهربا و راتبه المتفق عليه 3500 ريال

بمجرد نزوله الاراضي السعودية عملوا له تدريب لمدة شهرين و نصف الشهر

و بعدين عينك ما تشوف الا النور طحنوووووووووووووووووووووووووه

مسكوه مدير مشروع في مستشفي متهالكة انشئت منذ ما يقرب من 70 سنة

و اصبحت مدة دوامه 18 ساعة مهو بقي UNDER CALLING FOR 24 H

و المشكلة الحقيقة ان زوجي ظروفه الصحية لا تسمح بهذا العناء فلقد اجري عملية قلب مفتوح منذ 4 اعوام تقريبا و مغير صمام

هذا بلإضافة الي راتبه الذي لا يتوافق مع مجهوده المبذول و المحافظة اللي قاعد فيها باهظة الاسعار

هو امنية حياته ينزل مصر و كفي الله المؤمنين شر القتال

و نسي هدفه الاساسي من سفره الا و هو الحج

بس المرار اللي شافه و العهدة الكبيرة اللي ماسكها نسته كل شيء

و طبعا زي ما سيادتكم عارفين انهم لما بيعملو عقد بياخدو احطياطتهم جامد

و لما اعرب عن رغبته في النزول اخبره كفيله و هو دكتور مصري انه هيخرب بيته و هياخد كل الفلوس اللي خدها

قولو لي بالله عليكم ما المخرج و كيف نتصرف

فينا نلغي العقد ؟

و تذكروا كان الله في عون العبد مادام العبد في عون اخيه

اللهم اجزكم عنا الفردوس الاعلي

و السلام عليكم و رحمة الله و بركاته

[الباشمهندس ياسر]

اسال الله العظيم ان يرده اليك سالما غانما معافى محقق المأرب امين

و ان شاء الله الاخوة يساعدوك بما عندهم من معلومات

[nightmare]

هيا الدنيا سايبة , يعني ايه يخرب بيته

فيه حاجة يا ام عمر اسمها عقد بين طرفين , المفروض زوج حضرتك يقرأ عقده وينفذ اللى موجود فيه بالحرف الواحد

وأكيد عقده محدد فيه عدد ساعات العمل اليومية , فيلتزم بيها , وما زاد عن ذالك فيه حاجة اسمها اوفر تايم . والمفروض برضه يكون محدد في العقد الساعة بكام

ولو زوج حضرتك قدر يثبت انهم بيخالفوا بنود العقد سواء في ساعات العمل او اي بند اخر , ممكن ياخد الدليل علي كده ويروح يشتكيهم ويخرب هوا بيتهم في مكتب العمل , ولو ليه حق أكيد هياخده

ولو فيه شرط جزائي في العقد ممكن يتوجه لمكتب العمل مباشرة ويطلب فسخ عقده ويدفع الشرط الجزائي للشركة وشكراً

لازم زوج حضرتك يراجع بنود عقده تاني ويعرف اللى ليه واللى عليه

وربنا يكون معاه ويوفقه إلي الخير إن شاء الله

[عصام أبوالفتح]

هيا الدنيا سايبة , يعني ايه يخرب بيته

فيه حاجة يا ام عمر اسمها عقد بين طرفين , المفروض زوج حضرتك يقرأ عقده وينفذ اللى موجود فيه بالحرف الواحد

وأكيد عقده محدد فيه عدد ساعات العمل اليومية , فيلتزم بيها , وما زاد عن ذالك فيه حاجة اسمها اوفر تايم . والمفروض برضه يكون محدد في العقد الساعة بكام

ولو زوج حضرتك قدر يثبت انهم بيخالفوا بنود العقد سواء في ساعات العمل او اي بند اخر , ممكن ياخد الدليل علي كده ويروح يشتكيهم ويخرب هوا بيتهم في مكتب العمل , ولو ليه حق أكيد هياخده

ولو فيه شرط جزائي في العقد ممكن يتوجه لمكتب العمل مباشرة ويطلب فسخ عقده ويدفع الشرط الجزائي للشركة وشكراً

لازم زوج حضرتك يراجع بنود عقده تاني ويعرف اللى ليه واللى عليه

وربنا يكون معاه ويوفقه إلي الخير إن شاء الله

رأى جدير بالاحترام .. كل مشاكل المصريين فى السفر بسبب التعجل وعدم دراسة العقد منذ البداية .

[ام عمر المصرية]

جزاكم الله خيرا

باشمهندس ياسر

nightmare استاذ

استاذ عصام ابو الفتح

و لكنه اخبرني انه يتبع معهم سياسة الخسارة عشان يتخنقو منه و ينزلوه

بمعني انه مقرر له ميزانية تخص المستشفي فهو ينفق منه ببذخ طبعا عالشغل لتنفذ قريبا و يحدث لهم عجز

هو من وجهة نظره كده فهل ده ممكن و لا الكلام ده غير صائب

و اللهم اجزكم عني الفردوس الأعلي

[nightmare]

رأى جدير بالاحترام .. كل مشاكل المصريين فى السفر بسبب التعجل وعدم دراسة العقد منذ البداية .

الف شكر يا استاذ عصام , شهادة أعتز بها , وكلامك صحيح 100% , مشكلة المصريين انهم ما بيتعملوش باحترافية في العمل بمعني ان فيه عقد لازم نقرأه كويس ونعرف حقوقنا وواجباتنا وننفذ كافة بنود العقد بالحرف الواحد بلا تهاون او تنازلات

تم تعديل 26 أغسطس 2008 بواسطة nightmare

[nightmare]

و لكنه اخبرني انه يتبع معهم سياسة الخسارة عشان يتخنقو منه و ينزلوه

بمعني انه مقرر له ميزانية تخص المستشفي فهو ينفق منه ببذخ طبعا عالشغل لتنفذ قريبا و يحدث لهم عجز

هو من وجهة نظره كده فهل ده ممكن و لا الكلام ده غير صائب

من وجهة نظري الشخصية , ما يفعله زوج حضرتك غير صحيح بالمرة , يجب أن يجنب مشاكله بعيداً تماماً عن عمله , والمفروض أن ينفذ عمله على الوجه الأكمل الذي يرضي الله عز وجل , علشان ربنا يباركله في رزقه وفي أولاده.

وحقه يقدر ياخده بمليون طريقة غير الطريقة دي.

أرجو أن تتقبلي رأيي بصدر رحب , وربنا يفك عنه كربه وهمه ويرجعه سالم غانم إن شاء الله

[محمد عيسى]

رأى جدير بالاحترام .. كل مشاكل المصريين فى السفر بسبب التعجل وعدم دراسة العقد منذ البداية .

الف شكر يا استاذ عصام , شهادة أعتز بها , وكلامك صحيح 100% , مشكلة المصريين انهم ما بيتعملوش باحترافية في العمل بمعني ان فيه عقد لازم نقرأه كويس ونعرف حقوقنا وواجباتنا وننفذ كافة بنود العقد بالحرف الواحد بلا تهاون او تنازلات

ليه و احنا يعني كنا اتدربنا على كده في مصر؟؟؟

على قد مشاكل السخرة في الخليج الا ان لو ليك حق بتاخده عن طريق مكتب العمل مش زي مصر محدش بيسأل فيك و بيجبرك تمضي العقد و معاه استمارة 6 في نفس الوقت و لو مشيت ماليكش عندهم حاجه و لو اشتكينت محدش هايعبرك

أما بالنسبة لأختنا أم عمر ربنا يصبرها و يأجرها، خليه يثبت الإضافي اللي بيشتغله حتى لو بمقابل لان اعتقد ان فيه ماده في قانون العمل بتحدد الحد الأقصى بـ 11 ساعه يوميا يتخللها ساعة راحة اجبارية

تاني حاجه بس ياريت تأكيد الأخوة في السعوديه الأول انه يطلع تقرير طبي من مستشفى حكومي في السعودية بحالتة و يقدمة للشركة بطريقة رسمية او عن طريق مكتب العمل و يعتذر انه مش هايشتغل اضافي (وده من حقه لان العمل الإضافي يشترط أن يكون بموافقة الموظف)

تالت حاجه مفيش اي تعامل شفوي بينه و بين الشركة و يخلي كل تعاملاته مكتوبة و يرفض تنفيذ او الاتفاق على اي حاجه مش مكتوبة

[se_ Elsyed]

ممكن زوجك يقدم إستقالة لإدارة الشركة مدعومة بالتقارير الطبية وبالتالي هاتبقى إستقالة مُسببة .. وإذا رفضوها فممكن يتوجه لمكتب العمل ولإمارة المنطقة التي يعمل بها ويطلب تسفيره بأقصى سرعة لما ذي ذلك من خطر على صحته حيث أن طبيعة العمل ممكن أن تساعد في وجود مخاطر على صحته ...

أما موضوع الصرف من الميزانية ببذخ ... فأسمح لي هذا تصرفاً غير مقبولاً .. فالإنسان منا يجب أن يعمل عند ربنا سبحانه وتعالى وبالتالي يراعي ربنا في تصرفاته .. وحتى لو الأخرون أساءوا إلى .. فلا يجب أن ارد لهم الإساءه بالمثل لما في ذلك من معصية لله .

[ام عمر المصرية]

و الله العظيم انا مش عارفة اقول لكو حاجة

الجملة الوحيدة اللي حاسة بيها

اللهم اجزكم عني الفردوس الاعلي

كلامكم منطقي

من يتق الله يجعل له مخرجا و يرزقه من حيث لا يحتسب

اللهم يسر الامور و فرج كربي و كرب زوجي

و ان شاء الله هتصل به و اخبره بحلولكم في اقرب وقت ممكن

و لكم مني وافر الاحترام

بس هو موضوع مكتب العمل ده موجود في كل محافظة و موجود في ابها تحديدا

و بالنسبة للعاتمل معاه تعامل عادل حقاني و لا في كوسة زي مصر

يعني نفوذ الكفيل السعودي مش ممكن يدخل في الموضوع

[se_ Elsyed]

[و بالنسبة للتعامل معاه تعامل عادل حقاني و لا في كوسة زي مصر

يعني نفوذ الكفيل السعودي مش ممكن يدخل في الموضوع

في كوسة طبعاً والكوسة دي نوع من الخضورات العالمية ... لكن ما ضاع حق وراءه مطالبة واللي واثق من نفسه ومتوكل على الله ... فلا بيهمه كوسة ولا مكرونة بالبشامل حتى ...

[opera]

اللهم فرج كربه ويسر امره وبارك له وبارك عليه اللهم اعطه ماتمنى وابعد عنه الشر وقدر له الخير حيث كان