[تعقيب] على موضوع استفسار تاشيرة عمل الى الامارات

[arabsharing]

السلام عليكم

الأخى ماجد

ألف مبروك على التأشيرة ، ربنا يجعلها فاتحه خير

شوف يا عزيزى ، طبعاً إنت طالع عمل ، يعنى لازم تروح تطلع تصريح عمل لأن إحتمال ضابط الجوازات بمطار القاهرة يسئلك عليه . ده بيطلع لمده سنه و يجب تجديده كله سنه (سمعت إن ممكن يطلع بسنتين ، لكن غير متأكد)

إحجز تذكرة طيران ، حالياً صعب تلاقى مكان لأن الناس بترجع من مصر إلى الإمارات لأن المدارس قربت

فى مطار أبو ظبى (ده لو هتشرفنا فى أبو ظبى ) ، لابد من تواجد أصل التأشيرة فى المطار ليسمح لك بدخول البلد

لذا رتب مع شركتك ، علشان يسلموا الـاشيرة الأصليه للمطار قبل و صولك

لما توصل بالسلامه ، هتلاقى شبكاك تسليم التأشيرات ، عليه طابور طويل غالبا ، هتاخد منهم أصل التأشيره ، و تروح على الشباك اللى جنبه على اليمبن

هناك بقى بصمة العين ، و هى ضروريه لكل قادم جديد للإقامه

بعدها يا باشا تروح على ضابط الجوازات و ده فى نفس المكان

ضابط الجوازات هيختم التأشيره ختم دخول ، و من حقك الأن أن تدخل الإمارات لمده 60 يوم ، يا إما تتطلع إقامه يا إما تغادر البلد

التأشيرة المختومه مهمه جدا ، حافظ عليها

شركتك هتبدا إجراءات الإقامه ليك ، لازم تحليل ده علشان الإيدز و لازم يعملوا تأمين صحى و شويه إجراءات و بعدين تحصل على لإقامه 3 سنوات بالإمارات.

أى أسئله إحنا فى الخدمه

بالتوفيق

أبو عاصم

اخى الكريم ابو عصام مشكور على هذه المعلومات القيمه , لكن هل من الممكن ان اسافر بدون تصريح العمل ؟؟

لانى لا امتلك الا صوره من الفيزا مطبوعه من الايميل مثل حاله الاخ الكريم صاحب الموضوع ومكتب تصاريح العمل التابع له يرفض استخراج تصريح العمل الا باصل الفيزا او صوره منها موثقه من مستشار العمل والعمال فى الدوله المسافر اليها وبعد ذلك توثق من الاداره العامه للقوى العامله بمدينة نصر , وفى كلتا الحالتين سواء الاصل او الصوره المعتمده فيها تأخير كبير , والشركه ترفض ارسال اصل الفيزا لاعتبارها مستند هام , واذا قاموا بتوثيق الفيزا من مستشار العمل والعمال هناك من الممكن ان تستغرق شهر او اكثر نظراً للاجراءات وانا حجزت طيران على الاسبوع القادم باذن الله.

الف شكر يا اخ محمد على المعلومات ده

انا انهرده رحت وزارة القوى العامله وختمت على التاشيره اللى جتلى على الايميل من الشركه

و انا واخد اعفاء نهائى خلاص

المفروض فيه حاجه قبل ما اروح اعمل تصريح العمل فى العباسيه ولا كده خلاص

و انا معايا فعلا رخصه من اكتر من سنتين

اخى الكريم هل قمت بالختم على الصوره من وزارة القوى العامله فقط ؟ وهل الفيزا كانت موثقه من مستشار العمل والعمال فى الامارات ؟؟ ام فقط فيزا بدون اختام ؟

واين يقع مقر الاداره العامه لوزارة القوى العامله ؟؟ لانى لست من سكان القاهره.

سلام عليكم

الله يكرمك يا اخ محمد

انا الحمد لله رحت عملت تصريح العمل انهرده و دفعت الرسوم

بس قالولى تعالى استلمه لما تجيب تذكرة الطيران معاك ونشوفها

بس للاسف فيه مشكله فى موضوع حجز التذكره بسبب الزحمه الجامده

انا مستنى الشركه تلاقى حجز وان شاء الله هاروح استلم التصريح

بالنسبه للختم البيضاوى ماهو مختوم فى الباسبور

يعنى ايه محتاج اثبات

هل تم قبول الفيزا بختم وزارة القوى العامله فقط ؟؟ وماهى الرسوم التى دفعتها فى مكتب تصاريح العمل ؟؟؟

ارجوكم الاهتمام بالموضوع لانى باذن الله مسافر كمان اسبوع بالظبط من مطار الاسكندريه.

جزاكم الله كل خير

[arabsharing]

ارجوكم اخوانى الكرام عدم اهمال الموضوع والرد عليه فى اقرب وقت ممكن لانى عايز اعرف راسى من رجلى قبل ما اسافر بمشئية الله. مثل ماذكرت انا حجزت خلاص على نصف الاسبوع القادم باذن الله ومعرفش حاجه عن موضوع تصريح العمل دا ؟؟؟؟

تم تعديل 27 أغسطس 2008 بواسطة arabsharing

[mezo]

مش هتعرف تسافر من غير ماتاخد تصريح العمل معاك بس فيه حركة عملها ناس كتير قبل كدة خلى حد يعرف فوتوشوب بس يكون محترف شوية يغير ليك كلمة عمل الى على التاشيرة الى زيارة بس يكون معاك شكل تاشيرة الزيارة هى بتبقى نفس الشكل بس التغيير فى العنوان ووريهم فى المطار الصورة دى وهتعدى ولما توصل الامارات يكون معاك الصورة بتاعة التاشيرة الى مكتوب فيها عمل علشان تاخد اصل التاشيرة من المطار وتعدى غير كدة ملهاش حل غير ان الشركة تبعتلك اصل التاشيرة ومختومة من السفارة المصرية فى ابو ظبى وعلى اساسها تقدر تتطلع تصريح العمل وده مش هيحصل لانهم فى الغالب مبيبعتوش الاصل لانهم بيسيبوه فى المطار قبل وصولك بيوم او تعمل الحل الى قلتلك عليه لان الى بيسال على التاشيرة فى المطار الموظف بتاع شركة الطيران الى بيوزنلك الشنط ويعملك البوردنج ان ظابط الجوازات مبيسالش على التاشيرة وتوصل بالسلامة ان شاء الله

تم تعديل 27 أغسطس 2008 بواسطة mezo

[AboAsem]

الأخ arabsharing

طالما مسافر للعمل ، يعنى معاك فيزا عمل لللإمارات ، يبقى لازم و لابد تصريح عمل

أما المسافر بتأشيرة زيارة ، أو الزوجه الى مسافرة كمرافقه لزوجها لا يلزمها تصريح عمل

و فعلاً فيزا العمل لابد تكون مختومه من المستشار العمالى المصرى المقيم بالإمارات

لكن أنا أول مرة أسمع إن بتوع تصاريح العمل عايزين الأصل !! ليه !! أنا شخصياً كان معايا صورة بس ، و ده كان فى يناير 2004 ، مش عارف لو الأوضاع إختلفت حالياً

توثيق الفيزا من السفارة المصريه لا يستغرق وقت طويل ، ليس شهر كما تظن ، بالعكس ممكن فى نفس اليوم على حد علمى ، بس هى عايزه مشوار للسفارة و تدفع الرسوم ، و الشركه اللى جيت عليها فى 2004 و ثقت الفيزا من المستشار العمالى المصرى قبل إرسال صورتها لى فى مصر ، و بدون طلب منى لأنهم عارفين الإجراءات

للأسف مش عارف لو فيه حل أخر ، و أتمنى لك التوفيق

أبو عاصم

[arabsharing]

انا شاكر لك مرورك اخى الكريم وجزاك الله كل خير على هذه المعلومات جعلها الله فى ميزان حسناتك.

لكن انا كنت سألت فى الشركه اللى حجزت منها على الموضوع دا ووريت صورة الفيزا لصاحب شركة السياحه قال لى عادى مش محتاج تصريح لانك اول مره لما تبقى تاخد الاقامه على الجواز تبقى اول لما تنزل تعمل التصريح.

فانا حيران دلوقتى لانى باسمع كلام متناقض طول الوقت.

ياريت لو حد عدى بنفس التجربه يناقشها هنا ويقول ايه اللى عمله بالظبط ولكم منى جزيل الشكر.

[الباشمهندس ياسر]

السلام عليكم

الاخ arabsharing

انا لسه مغادر الاراضى المصرية شهر ابريل اللى فات الى الخليج و محدش قاللى تصريح عمل خالص

و صلت هناك عملت الاقامة وبعدها رحت طالع ع السفارة مسجل نفسى فيها

و رجعت مصر شهر يونيو و سافرت بعدها يداخر يوليو برده محدش قاللى حاجة

موضوع تصريح العمل معداش عليا خالص

و ربنا يوفقك يا عم

بس اوعى تزور حاجة بلا بتاع

[arabsharing]

جزاكم الله كل خير جميعاً اخى الغالى ( ابوعصام ) و ( البشمهندس ياسر ) على معلوماتكم .

وربنا يوفق الجميع .

وبالنسبه لموضوع اللعب فى الفيزا دا مستبعد لانى مش عايز ادخل نفسى فى مشاكل انا فى غنى عنها.

واى عضو كريم عنده نفس التجربه خلال الاشهر القليله الماضيه ياريت يضيف تعليقه فى هذا الموضوع ويقول اتصرف ازاى بحيث يستفيد به الجميع لانه موضوع مهم وبرضه نعرف اغلب الاراء .

[roka]

بصى يا أخى مسافرتش بس جوزى لسه مسافر من أقل من أسبوعين وكانن نفس الوضع صورة الفيزا بالفاكس بس اللى أتبعت بص هتلاقى على الفيزا اللى معك ختم من سفارتنا هناك وده ضمان ليك على فكرة المهم لو كده خد الصورة وروح بيها القوى العاملة وأختمها وبعدين تروح تعمل تصريح العمل المكتب الرئيسى فى العباسية وهما بيقبلوا الصور صورة العقد او الفيزا وممكن تعملوا من أى مكتب تصريح عمل بيأخد 24ساعة ولو فى أول الأسبوع ممكن تستلموا فى نفس اليوم

بس على فكرة أنا زوجى بعد ماعمل كل ده فى المطار مسألوش عليه لأنه أول مرة و أنا لما سألت الموظفة لأنه الوقت معه كان يدوب قالتلى خليه يسافر كده

وربنا معاك

[arabsharing]

مشكوره اختى الغاليه (roka) على المشاركه فى هذا الموضوع , جزاكى الله كل خير.

"و أنا لما سألت الموظفة لأنه الوقت معه كان يدوب قالتلى خليه يسافر كده" ؟؟

حضرتك تقصدى الموظفه فى مكتب تصاريح العمل ؟ وخليه يسافر كدا تعني بدون تصريح ؟؟

وتقبلى منى جزيل الشكر

[mezo]

على فكرة انا لا قلتلك زور ولا حاجة انا قلتلك على حاجة عملها ناس هنا مروا بنفس تجربتك لان موضوع انك تعدى من المطار من غير تصريح عمل دى بتعتمد على حظك وعلى مزاج ظابط الجوازات وفى ناس رجعت من المطار بسبب الموضوع ده على حسب حظك واسف يا سيدى لو كنت نصحتك نصيحة غلط بس انا قلت حاجة شفتها من ناس اتعرضت لنفس الموقف بالنسبة ليا انا متعرضتش لحاجة زى كدة لان شركتى بعتتلى الاصل

[محمد عيسى]

على أي حال التدقيق على تصريح العمل في حالة الخروج من المطار قل كثيرا في الفترة الأخيرة، و لو ضابط الجوازات سالك عنه قولله اللي حصل بصراحه (انهم طلبوا توثيقات لصورة التأشيرة لم يتسع الوقت للحصول عليها) و ان شاء الله يعديك

في حالة السفر أول مره موضوع تصريح العمل بيكون بسيط (خاصة لو المهنة اللي في الجواز مش تابعه لأي مصلحة حكومية) و التدقيق الأكبر على موقفك من التجنيد

[madzoro]

السلام عليكم و رحمة الله و بركاته .............

اخي الكريم انت حاول معاهم في الشركة يبعاتولك الاصل او الصورة الموثقة خلال اليومين دول ....... و اذا ما حصلش توكل على الله و روح المطار ... فاذا ضابط الجوازات اصر على اذن العمل قوله انك هاتعمله من هناك لما تاخد الاقامة على الجواز و انك ممكن تعمله تعهد بكده .... لاني اذكر من فترة حصل الكلام ده مع واحد مسافر على نفس الطيارة اللي سافرت بيها خلوه يمضي تعهد بكده بس للمصداقية في الكلام كان الموضوع متعلق بتجديد اذن العمل

انا دردشت مع الراجل ده و قالي ان ده تقريبا تاني تعهد يكتبه بنفس الطريقة يعني كان اذن العمل منتهي بقالو سنتين

يارب اكون افدتك

بالتوفيق ان شاء الله في حياتك و عملك

[arabsharing]

الف الف مليون شكر ياجماعه على التفاعل وعلى الحلول اللى طرحتوها فى الموضوع

جزاكم الله كل خير جميعاً وجعله فى ميزان حسانتكم باذن الله.

وبالنسبه لاخى العزيز (mezo) انا عارف والله ان انت قصدك خير وانا فعلاً ناس اقترحت على نفس الفكره فى الاول بس انا بامانه اترددت فى الموضوع دا وقلت اسأل الناس الطيبين اللى هنا واخد اراء الجميع.

ولكم منى جميعاً جزيل الشكر والتقدير على هذا التعاون الطيب , والله مصر لسه بخير ان فيها ناس محترمه وخدومه زى حضارتكم.

وادعولى ان ربنا يوفقنى ويوفق الجميع ويوقفلى ناس طيبه زيكم .

[roka]

أيوة الموظفة فى مكتب تصاريح العمل وكان قصدها انى مش مهم يعمله

بص أنت حاول مع شركتك تانى وشوف مكتب تصاريح تانى ممكن تقع فى ظابط أبن حلال يرضى بالصورة اللى معاك ولو منفعش يبقى ربنا يكرمك وتحلها فى المطار وعلى فى مكتب تصاريح عمل فى المطار

[enerky]

أيوة الموظفة فى مكتب تصاريح العمل وكان قصدها انى مش مهم يعمله

بص أنت حاول مع شركتك تانى وشوف مكتب تصاريح تانى ممكن تقع فى ظابط أبن حلال يرضى بالصورة اللى معاك ولو منفعش يبقى ربنا يكرمك وتحلها فى المطار وعلى فى مكتب تصاريح عمل فى المطار

السلام عليكم يا شباب

اتمني انك تكون وصلت بالسلامه يا باشا

انا بواجه نفس موقفك بالظبط ورايح ابو ظبي والمفروض اني مسافر يوم التلات الجاي ومعايا صوره الفيزا بس

هروح اختمها من الوزاره واعمل محاوله تانيه ف مكتب العمل

بس انا سالت واحد صاحبي راح دبي من شهر وقالي ان ظابط الجوازات ساله عليه وهو قاله مكانش عندي وقت وكان مطلوب توثيقات كتير وملحقش يعمله

والموضوع عدي واتمني يارب يعدي عليا

ياريت تطمنا عليك وربنا يكرمنا كلنا انشاء الله

[Guest مينا]

عندى استفسار وارجو سرعة الرد هل التاشيره لازم تكون مختومه من المستشار العمالى علشان فى المطار ولا مش لازم يعنى لو سافرت وموضوع تصريح العمل كتبت تعهد على نفسى انه اعمله لما اوصل هناك هل لازم تكون التاشيره عليها ختم المستشار العمالى