حـــــــــــدث في دولـــــــــــة افخـاذيـــــا

[Tafshan]

تتميز دولة افخاذيا بسرعة الاداء و الدقه اللا متناهيه .. ليس في العمل و الانماء و الى آخر الاغراض الايجابيه .. و انما في التصريحات و اللقائات و الحوارات التليفزيونيه .. القصه من الادب الافخاذى العريق فيها معانى التفخيذ و التبليط و الانتخه و كل السمات العريقه التى تميز الشعب الافخاذى .. القصه من وحى الخيال و اذا تشابهت بعض الظروف او الشخصيات بصوره عرضيه مع اشخاص واقعيين فهو تشابه مقصود و الحدق يفهم .. المهم ..

في عصر يوم حار و بينما العميد انتيخ كان مزوغ كالعاده من النوباجيه ليتناول الغذاء عند حماته ليتقى لسان زوجته الذى هو اطول ما تملك .. رن موبيله الخاص ..

العميد انتيخ : ده وقته يا غبي .. انت مش عارف انى عند حماتى باتغدى ..

المجند نيخه : يا باشا في دخنه جامده طالعه من وراء البرطمان

العميد انتيخ : بقى مكلمنى عشان شوية دخنه في المطبخ .. انت اتجننت

المجند نيخه :لأ يا باشا .. انا اقصد البرطمان اللى بنخدم فيه يا باشا .. مجلس الشِعب

العميد انتيخ : يا نهارك مطين .. و ماروحتش ليه تشوف ايه الموضوع

المجند نيخه : مانى بعت الولا عوض من نص ساعه و من ساعتها مارجعش .. و الدخنه عماله تزيد .. ايه رأيك يا باشا اروح انا كمان ؟؟

العميد انتيخ : امال مين اللى ح يشغل مدفع الحريق لو كان فيه حاجه .. استنانى و اوعى تبلغ اي حد انى مش موجود .. الله يحرقك و يحرق ايامك ..

يتحرك ضابط المطافى مسرعاً بينما الشوارع واقفه كالعاده .. و يرن التليفون

اللواء فخذى: ايه الاخبار عندك .. انت مسيطر على الوضع و لا لأ

العميد انتيخ : مسيطر يا فندم

اللواء فخذى: الحريقه كبيره يعنى و لا ايه

العميد انتيخ : دى شوية دخنه و ح يروحوا لحالهم يا فندم

اللواء فخذى: امال انت فين ده الوقت

العميد انتيخ : انا على عربية المطافى يا فندم و دخلت المجند عوض يكافح الحريق داخل المبنى يا فندم

اللواء فخذى: عال عال .. عايزين نسمع اخبار حلوه .. ابعث لك مدد ؟؟

العميد انتيخ : الموضوع مش مستاهل يا فندم ..

يدخل العميد انتيخ بينما المجند نيخه في انتظاره على الباب

المجند نيخه : يا باشا .. النار كلت سقف المجلس .. اجيب العربيه ..

الضابط: طلعها بسرعه يا غبي و رش شوية ميه حواليها كأنها بتشتغل بقالها ساعه

المجند نيخه : بس ياباشا المدفع مش شغال

الضابط: يا نهارك مطين .. هو لسه ماتصلحش ؟؟

المجند نيخه : اتصلح بس يا دوب بيرش حواليه .. مش ح يوصل للحريقه ..

العميد انتيخ : المهم تتحرك ده الوقت يا بجم بدل ما تجيب لنا جزى

لعميد انتيخ( موبيل) : يا باشا الحريقه كبرت و مابقتش تحت السيطره .. ابعثلى العربيات اللى في المتحف و اللى في المجمع و اللى في ماسبيرو الله يخليك ..

اللواء فخذى : الا ماسبيرو .. انت اتجننت .. انا ح ابعث كل العربيات اللى حواليك الله ينكد عليك

العميد انتيخ : متشكر يا فندم .. قفل ابن ال ..

المجند نيخه : الميه قطعت يا باشا ..

في مكان اخر ..

اللواء فخذى : الموقف تحت السيطره يا فندم ..

وزير الداخليه : سيطرة ايه و هباب ايه ... هو الافندى النباجى في المجلس ما سمعش اجهزة الانزار ؟؟

اللواء فخذى : يا فندم ماهو ..

وزير الداخليه : ماهو ايه ؟؟ اطرش ؟؟

اللواء فخذى : لأ يا فندم .. الاجهزه عطلناها سعادتك عشان الاعضاء بيشتكو من الصوت كل ما يدخنوا .. و انت عارف كلهم من كبارات البلد و ماينفعش نزعلهم ..

وزير الداخليه : يعنى مافيش انزار .. طب ما شافش الدخان ..

اللواء فخذى : العميد انتيخ حسين من اكفأ الضباط يا فندم .. ده اقتحم بنفسه المكان و فيه مجند مفقود لغاية ده الوقت سعادتك ..

- و يرن التليفون -

وزير الداخليه : ... افندم .. حاضر .. حاضر ... بس يا فندم .. زي ما تأمر سيادتك .. متشكر سيادتك .. الله يحفظك سعادتك .. بتدعيلك .. الله يحفظك .. الله يرحمه .. زي ما تشوف سيادتك .. اوامرك .. اوامرك سيادتك ..

انت يا زفت ..

اللواء فخذى : انا ؟؟

وزير الداخليه : جبتوا لنا الكلام الله يحرقكم .. ( يرفع التليفون) ادي لى رئيس الوزراء بسرعه .. ايه .. ع الخط .. حوله بسرعه .. ايوا ازيك يا سيدي .. اه شفت المصيبه .. كلم لنا بتوع البترول الله يخليك يبعثولنا كام عربيه من اللى بيتمنظروا بيهم علينا .. على كام طياره من الجداد .. بتقول الطيارات ما تنفعش .. ما الجيش بعث طيارتين .. اه .. اوامر سياديه .. ماشى .. و كلم لنا وحياتك المحافظين يبعثوا لنا العربيات اللى عندهم ..

اللواء فخذى : تأمرنى بحاجه سيادتك ؟؟

وزير الداخليه : انت لسه هنا .. روح يا افندى اقف في الحريقه ياكش تأخذ اجلك و اخلص منك ..

و امام مجلس الشعب .. تجمع الاف من الشباب ..

شاب 1: شوفت الحريقه .. حاجه زى يوم القيامه

شاب 2: يا عم سيبك .. شايف الموزه اللى بتصور هناك دى .. حتة موزيعه .. مووووز

شاب 1: يابن اللاعيبه ... و انا اقول من امتى ليك في السياسه .. طب .. ما تيجي نعمل لقاء في السريع ؟؟

....

رجل عجوز : من عمايلهم

زميله : اقطع ذراعى من هنا - يشير الى رقبته - ان ما كانت متدبره

رجل عجوز : جبت التايهه يا خى .. طب ده انا جالى اخبار ان النائب عبده المبلط هو اللى عمالها عشان يغطرش على موضوع الطياره

زميله : و لا النائب ابو حديد .. لقى السوق نايم قال يبيعله سيخين

رجل عجوز : انا باتكلم كلام جد مش تخمين .. الولا جوز بنتى بيشتغل فراش مكتب جوز بنت خالة شريك عبده المبلط .. و سمع طراطيش كلام ... بس واد يعجبك .. فهم الفوله على طول

زميله : حسسسسبي الله و نعم الوكيل

....

المزيعه : يلا يا جماعه بنصور .. آي ... قلة ادب !

المصور : يا جماعه حد يزبط الجمهور .. مش عارفين نشتغل ..

النائب : بودى جارد .. اعملوا كوردون حولينا هنا ..

المصور : تصوييير

المزيعه : كان ايه شعور سيادتك لما شوفت الحريقه

النائب : و الله و ما ليكي عليا حلفان .. انا من اول اليوم على لحم بطنى .. و نفسي اتسدت نوهائياً على الاكل ..

...

و على الهواء ... برنامج تسعين خانيقه ..

المزيعه الرخمه : و حضرتك شايف يعنى ان الحريقه ممكن تطفى و لا ايه بالضبط .. معقول كل اجهزة الدوله بتشتغل بقالها 4 ساعات و ما فيش فائده

وزير الداخليه (ع التليفون) : كل حاجه تمام التمام .. و تم السيطره على الحريقه تماماً .. اللى موجودين حالياً بيبردوا المبانى المحيطه عشان ما تتأثرش

المزيعه الرخمه : بس حضرتك النار طالعه قدامنا اهه من المجلس

وزير الداخليه (ع التليفون) : ده تسجيل قديم

المزيعه الرخمه : يا فندم ده تصوير ع الهواء

وزير الداخليه (ع التليفون) : دى شوية شظايا بسيطه ... مش عايزين نهول الموضوع و نزعج الناس .. الموقف تحت السيطره ..

المزيعه الرخمه : بس يا فندم .. الو ... الخط قطع ..

...

... برنامج العاشره كآبه

المزيعه العايقه : استشعر من كلام حضرتك آ .. آ .. آ .. ان المبنى راح

الخبير سيد المفتى : الحرائق اللى زي دى نسبة اخمادها لا تتعدى ال 1% .. انا لما كنت فى الخدمه قبل ما اتقلش .. اقصد استقيل .. ما كنش ممكن ابدأً يحصل حاجه زى كده ..

المزيعه العايقه : يعنى .. آ .. آ .. آ .. في تقصير .. لابد انه في تقصير طبعاً .. تفتكر من مين ؟؟

الخبير سيد المفتى : ( عقله الباطن : عايزه تلبسينى الغلط .. ماشى .. ) في الواقع .. لسه بدرى جددداً على اي استنتجات .. لسه في تحقيق و نيابه .. الامور دى بتأخذ وقت .. المهم خماد الحريق ( عقله الباطن : امال .. عايزانى البسها !)

و يستمر الحريق الى صباح اليوم التالى و كالعاده يتبقى من المبنى كوم تراب ..

ربما يتبع >>>

[الباشمهندس ياسر]

الموقف تحت السيطرة

بيقولك البرلمان بتاع باكستان نجح وعملها

ال ايه بقى الجماعه بتوعنا خافوا راحو مولعين فى البرلمان

[Virus]

اسكتش أكتر من رائع ..وتغطية ملعوبة لكل جوانب الحادثة..

اسمحلنا نقتبسه وننشره على الإيميلات ..الطريقة الساخرة دي بتجيب نتيجة مباشرة في توعية المصريين

تحياتي

[~Heba~]

اسكتش أكتر من رائع ..وتغطية ملعوبة لكل جوانب الحادثة..

اسمحلنا نقتبسه وننشره على الإيميلات ..الطريقة الساخرة دي بتجيب نتيجة مباشرة في توعية المصريين

تحياتي

اي و الله يا طفشان رااااااائع جدا

و اسمحلى انا كمان انشره

[Tafshan]

الموقف تحت السيطرة

بيقولك البرلمان بتاع باكستان نجح وعملها

ال ايه بقى الجماعه بتوعنا خافوا راحو مولعين فى البرلمان

انا اعتقد ان الحريق كان بسبب الاهمال و الاهمال في اعتقادى هو اشد قسوه من العمد .. و بعدين ايه اللى ح يخوف الجماعه بتوعنا .. و لا حد في دماغه اساساً

تحياتى ..

اسكتش أكتر من رائع ..وتغطية ملعوبة لكل جوانب الحادثة..

اسمحلنا نقتبسه وننشره على الإيميلات ..الطريقة الساخرة دي بتجيب نتيجة مباشرة في توعية المصريين

تحياتي

براحتك خالص ..

انا ماعنديش مشاكل مع النقل ..

تحياتى

اسكتش أكتر من رائع ..وتغطية ملعوبة لكل جوانب الحادثة..

اسمحلنا نقتبسه وننشره على الإيميلات ..الطريقة الساخرة دي بتجيب نتيجة مباشرة في توعية المصريين

تحياتي

اي و الله يا طفشان رااااااائع جدا

و اسمحلى انا كمان انشره

براحتك طبعاً ..

انا يهمنى ان كلامى "يقرأ" .. مش مهم بقى يبقى حتى بأسمى و لا باسم غيرى ...

تحياتى

[se_ Elsyed]

يا دمغاتك يا طفطش ... عسل والله

بس إنت من غير ما تقصد عملت حركة مش هي

بص كده

ابعثلى العربيات اللى في المتحف و اللى في المجمع

إنت قصدت إن الأنتيخ الكبير يبعت للانتيخ الصغير العربيات اللي في المتحف المصري ؟

ولا تقصد العربيات اللي مخزنينها في المتحف الحربي وهي من بواكير عربات الإطفاء وما تنفعش تطفي عُقب سجارة حتى .. زي اللي كنا شايفينها في التليفزيون كده ؟

آه بالمناسبة ..... عرفت إن الحريقة لسه شغالة في المخازن بتاعت مجلس الشورى ؟ آه والله العظيم يا طفطش ياخويا لحد دلوقت شغالة

[Tafshan]

يا دمغاتك يا طفطش ... عسل والله

بس إنت من غير ما تقصد عملت حركة مش هي

بص كده

ابعثلى العربيات اللى في المتحف و اللى في المجمع

إنت قصدت إن الأنتيخ الكبير يبعت للانتيخ الصغير العربيات اللي في المتحف المصري ؟

ولا تقصد العربيات اللي مخزنينها في المتحف الحربي وهي من بواكير عربات الإطفاء وما تنفعش تطفي عُقب سجارة حتى .. زي اللي كنا شايفينها في التليفزيون كده ؟

آه بالمناسبة ..... عرفت إن الحريقة لسه شغالة في المخازن بتاعت مجلس الشورى ؟ آه والله العظيم يا طفطش ياخويا لحد دلوقت شغالة

المتحف و المجمع كل واحد منهم فيه عربيه بنفس المقومات بتاعة اللى في المجمع النيابي .. على فكره كل القصه عباره عن مقتطفات حقيقيه من البرامج الحواريه .. اللى متابع ح يلاقى ان الكلام ده مش كوميديا .. ده اتقال فعلاً .. و هى دى المصيبه .. احنا وصل حالنا لمرحله تموت من الضحك !!!

قرأت النهارده موضوع الحريقه اللى ما بتطفيش .. واضح انه فعلاً معندناش فكره عن البطيخ في موضوع المطافى .. بكره يبيعوا مرفق المطافى و يجيبوا لنا مستثمر اجنبي يديرها .. يمكن ساعتها نعرف نطفي اي حريقه في حياتنا

ما علينا ..

[galaxy]

اسجل تحياتي لاستاذنا طفشان واورجو ان يتبع فعلا

الوضع فعلا وصل بنا لدرجه الضحك والسخريه المريرة.........ومتابعه الاخبار في البرامج المذكورة اصبحت نوعا من تسالي ساعه لقلبك .........والبحث عن الحقيقه بقي درب من دروب الخيال الغير مطروق والحمدلله................اسجل اعجابي مره اخري بتحليلك الساخر الرائع واتمني ان يتبع

[مسافر]

الاخ طفشان

اسجل تحياتي لك

[Tafshan]

اسجل تحياتي لاستاذنا طفشان واورجو ان يتبع فعلا

الوضع فعلا وصل بنا لدرجه الضحك والسخريه المريرة.........ومتابعه الاخبار في البرامج المذكورة اصبحت نوعا من تسالي ساعه لقلبك .........والبحث عن الحقيقه بقي درب من دروب الخيال الغير مطروق والحمدلله................اسجل اعجابي مره اخري بتحليلك الساخر الرائع واتمني ان يتبع :wub:

الاخ طفشان

اسجل تحياتي لك

اشكر لكم مشاركتكم اعزائى و اسف على تأخر الرد و كل عام و انتم بخير