آخر كلام .. الشاعر آمين أديب

[HDarwish]

وصلت إلي هذه القصيدة صباح اليوم بالبريد الإلكتروني

وهي للشاعر امين الديب عضو اتحاد كتاب العرب

وقد كتبها كرد فعل لحصول الشاعر الابنودى على جائزة الدولة التقديرية عام 2000

وكانت مصر مشاركة فى كاس الامم للشباب وهو ما اثار الشاعر الكبير وجعله يكتب هذه القصيدة الرائعة

حقيقي أعجبتني روعة الكلمات وأسلوب الكتابة .. وحبيت تشاركوني

مستني مشاركاتكم

آخر كلام

بعد مابقلع هدومى

قبل نومى

لازم أقرا كام مقاله

نرفزونى..سخنونى

حفزونى..إنى أكتب

عن ولاد الكلب

والسفاح شارون

قول سهرت

نمت..بعد الفجر ما إدن

والعيال بيقومونى

صحصحونى

قمت مفزوع من منامى

هجت فيهم

جت مراتى قالت لى..مالك

إيه جرالك؟

ليه بتشخط فى العيال

قلت باحلم

كنت باحلم إنى ميت وانفزعت

انبسطى..؟

كشرت وبسرعة قالت:

إيه دا أصله. طب وماله

يستحق الموت وأكثر

اللى يهرب من عياله

كنت فين م المغربية؟

تيجى بعد الفجر مادن؟

إنت فاكر إن دا ح يخيل على

شعرإيه؟

واللا إيه بتهببه.. وتقول قضيه

هى فين هى القضيه؟

هم يعنى كلمتينك.. اللى حى يحلوا

القضية؟

هيه ناقصة

وإحنا مالنا

ما انت شايف . كله خايف

والمدافع همسه حايره..عالشفايف

وانت عارف

الصهاينة ناس قويه.. ومفتريه

واللى أدهى من داكله

لما يبقى الكل نايم.. وانت قال تكتب

قصيده!!

عن ولاد الكلب والسفاح شارون

أبقى نايمه!!

أسمعك بتقول شارون؟

من غير سلام ولا يحزنون!

انت فاهم إنه ح يهمه الكلام؟

واللا دول عايزين سلام؟

واللا ح يخاف من كلام؟

هو همه من كلينتون. واللابوش

واللاهمه من باراك.. واللاهمه من...!

واللا عايز تبقى شاعر؟

واللا من أبنود جنابك؟

واللا عايز تقديريه؟

قلت طبعاً

أى شاعر يستحق التقديريه

يستاهلها عن جداره

مش خساره

ليه يا خويا

هو طلع إسرائيل؟

واللا عمر فى الصحارا

حاجه تانيه!!

والقطاع العام بيخسر

كان منع عنه الخساره؟

واللاسكان المقابر

كان بنالهم كام عماره؟

واللاشغل ألف عامل

أو منعهم من الدواره؟

واللا وزع عالغلابة

ألف طن من الدقيق

واللاحتى كام شيكاره؟

فوق لروحك

هو خدها عن وهيبه

والأغانى لعبد حليم

مش عشان حل القضيه

القضية هى.. هى

واحنا فى الخيبه القويه!

قلت جاهله.

إنتى جاهله

انتى فاكره الشعر ساهل؟

دا اللى ينكر فضل شاعر

يبقى جاهل

قلبك ابيض

مش حترجع الا لما يحبسوك

عالكبر ويبهدلوك

انت بتقول يا سادتنا يا قادتنا..

ارفضوا تهديد أمريكا والتحيز لليهود؟

طب ولو زعلت أمريكا

طب منين حيأكلونا؟

والحكومة نفسها بتمد إيدها

ويقولوا لهم شحتونا!!

انت عايز يحبسونا ؟

لوعايزنا نقب اكتب

حط همك فى الأغانى

فطر الشعب بأغانى

نيم الشعب باغانى

والأغانى..

بيبعوها بالدولار الأمريكانى

واللا يعنى جت علينا

واشتهينا الفقر.. تانى؟

عيش وهيص

شجع الأبطال ولادنا

اللى رفعوا راس بلدنا

مسخروا أولاد ناميبيا

واللا ليبيا.

عيش وهيص..

انت يعنى كنت غاندى..؟

واللا حافظ واللا شوقى؟

واللا بيرم أو جاهين؟

مانت طول عمرك بتكتب!

حد سمعك؟

قول لى مين؟

والا كام واحد بيحضر

فى النداوى ف أى حته

حتلاقيهم..خمسه سته!

أما لو تكتب أغانى

تبقى نجم ولك سماك

واللى جاى يطلب لقاك

واللى يتصور معاك

والصحافة والإذاعه

والبرامج..

كله ح يسجل معاك

زى شعبان عبدالرحيم

واللا شوف جمهور حكيم

تبقى شاعر زى صاحبك

كل واحد يرضى عنك

الحكومه والصهاينه والخلايجه

والتوانسه

والاجانب والذوات

بالخصوص صنف البنات

هو دا آخر كلامى

تمشى بيه.. أو تفارق من سكات

ميت يمين ماتقول قصيده

لاملا كل الدار صوات

واللى يسأل تانى عنك

راح اقول له غار ومات!

[لولا]

قلت جاهله.

إنتى جاهله

انتى فاكره الشعر ساهل؟

دا اللى ينكر فضل شاعر

يبقى جاهل

قلبك ابيض

مين قال الشعر سهل وبسيط ؟!

دا الشعر سلاح

الشعر عَلمْ

من ينكر شعر من ضي قمر ؟!

دا الكلمة سلاح

الكلمة بدن

والكلمة دى صوت

والصوت دا نغم.

[HDarwish]

لا مؤاخذة أختى لولا ...

أنا مش هاجي جنبك حاجة في الشعر والأدب .. ماشاء الله عليكي

بس فيه مقولة سمعتها زمان وياريت تصحيحهالي لو شايفاها غلط

إن الشعر الجيد يتسم بالبساطة في كلماته ومعانية بحيث يراه القارئ أنه سهل حتى أنه يصل بتفكيره أنه يستطيع أن يكتب أفضل من هذا .. ولكنه بمجرد أن يحاول يجد نفسه لا يستطيع

كان فيه مقولة بالمعنى ده .. بس صراحة مش مستحضراني الذاكرة في الوقت الحال

بس بجد من الأشعار الجميلة اللي قرئتها هي القصيدة دي

بالمناسبة .. أؤيد إعجابي بكتاباتك الرائعة

[لولا]

انت تقصد توصف نوعيه الشعر اللى يتقال عليها السهل الممتنع

تظهر لنا شديده السهوله ونظن كما قلت اننا نقدر ان نكتب مثلها

فيحدث ان يستخف البعض بسهوله الأبيات وانسيابيتها

غير ان الحقيقه كما اردت ان اقول هنا

مين قال الشعر سهل وبسيط ؟!

للشعر دور كبير فى المجتمع حتما ..

الشعر يغذى الوجدان ،يفتح الأفاق، يزرع آلاف الأشياء

الشعر ليس مجرد كلام جميل ، الشعر فكر عميق

رؤيا ثاقبه ..

الشعر حقا سلاح.

شكرا على اختيارك الجميل لهذه الأبيات.

وشكرا ايضا على كلماتك الرقيقه.