استفسار لمن يعمل فى قطاع الحكومة داخل الامارت

[قاهرى]

السلام عليكم

الاخوة الاعزاء تحياتى لكم

كونت عايز استفسر من الناس الى بتشتغل فى قطاع الحكومة داخل دولة الامارات

اية هى الاجراءات الروتينية الحكومية الى المفروض الواحد يعملها علشان يبدأ الشغل

يعنى مثلا سمعت ان فى حاجة اسمها معادلة الشهادة العلمية من خلال وزارة التعليم العالى بابوظبى

وسمعت ان فية حاجة اسمها الملحقية الثقافية المصرية بابوظبى لازم تجيب جواب من الجامعة بتاعتك ان الشهادة بتاعتك معترف بيها ,وهل الموضوع دة بياخد وقت كبير ولا لا ؟ وقد اية تقريبا

وهل لما تسلم الاوراق بتاعتك كلها لوزارة التعليم العالى دى بتديك الشهادة المعادلة دى على طول ولا بردوا الموضوع بيطول

وهل الموضوع دة فى جميع الجهات الحكوملة ولا بعضها

واية موضوع العقد الى لازم يتمضى من الجهة الحكومية وهل الطبيعى انو يتاخر ولا لا ؟؟؟ لانهم قالولى اسبوع وبقلهم اكثر من شهر ولما حبيت استفسر منهم محدش رد عليا وقالولى مينفعش انت تستفسر هما لو فى حاجة هنتصل بيك وعقدك لسة مجاش بس الموضوع طول اوىىىىىى وحاسس انو اشتغالة

الى عندوا معلومات بخصوص الموضوع دة ارجو انو يعرفنى ولكم جززززززززيل الشكر

[محمد عيسى]

طبيعي التاخير في الرد لانه موسم اجازات

اعرف مهندس كهربا اتقبل في كهربة العين و بعتوله العقد بعد اكتر من اربع شهور و كل ما يكلمهم ياجلوه

[قاهرى]

شكرا لردك واهتمام الاخ محمد عيسى

وربنا يطمنك 4 شهور

ربنا يسطر باء

هما بيعملو اية فى الاوراق هو مش المفروض الموضوع موضوع توقيع من مدير الجهة الحكومية وخلاص ولا اية بالظبط ؟؟؟

هل حد عندوا تعليق على موضوع الشهادة المعادلة ؟؟؟؟؟؟؟

[tahereyad]

الأخ قاهري... أنا آسف عالتأخير فالرد,, أنا من موظفي حكومة دبي, مهندس في هيئه الكهرباء و المياه , لحد يوم الأحد الجاي بس ان شاء الله. وبعد كده باي باي دبي.

شوف يا سيدي الفاضل, بالنسبة للي بيحصل هنا في دبي, و بالنسبه لشهادة التخرج قالولنا نوثقها فعلا من السفارة الاماراتيه في مصر, و لازم قبلها تصدق علي الشهاده من إدارة الجامعة بتاعتك (ختم بس بيخلص في نص ساعه) -ولو انت خريج معهد مثلا مش تابع لجامعه يبقي تروح وزارة التعليم العالي- و بعدين الملحقية الثقافيه لسفارة الامارات تمضيها الأول قبل التصديق,,, بس بيني و بينك, في ناس زمايلنا لا وثقوا ولا عملوا حاجه و الإجراءات مشيت مافيش أي مشكله, هما عامة بيشوفوا أصل الشهادات و الأوراق كلها, لكن بيحتفظوا بالصور بس.. و يمكن كمان يطلبوا منك شهادة طبيه من أي مستشفي,, بس انت لما بتدخل بتعمل التحاليل الطبيه بتاعت الاقامة,, عالعموم الموضوع سهل جدا فالإمارات و ابسط و أسهل بكتير جدا من السعوديه... بس المهم يبعتولك صورة تصريح الدخول (للعمل), عشان تدخل بيه البلد و هاتلاقي الأصل موجود فالمطار. تستلمه و تروح تعمل بصمة العين وتدخل الامارات ان شاء الله ءامنا مطمئنا.

بالنسبه للعقد ان شاء الله مدام اتصلوا بيك و قالو هايوصلك ماتقلقش,, هما الناس هنا هاديين و بيعملوا الحاجه بمزاج,, ومش بيحبوا اللي بيجري وراهم,,, مش اللي اتصلوا بيك من نفس الهيئه الحكوميه نفسها ولا مكتب سفريات بيشتغلك؟؟؟

عشان تستخرج تصريح العمل من مصر, لازم يكون مبعوتلك العقد و مختوم من المستشار العمالي في السفارة المصريه في أبو ظبي, و بعدين تاخده و تروح علي وزارة القوي العامله تأشر عليه,, و برضه لو العقد اللي جايلك من الحكومه أو شركه معروفه ممكن يتغاضوا عن ختم المستشار العمالي, بس انت خد و ادي معاهم فالكلام.. و بعدين تاخد العقد و معاه الباسبور و و البطاقة الشخصية (و لازم الوظيفه فالباسبور تكون زي البطاقه) و تذكرة الطيران و أربع صور و حوالي 150 جنيه,, وربنا معاك

لو سعادتك متزوج و ناوي تجيب المدام يبقي لازم توثق قسيمة الزواج من السفاره,, بس ده طبعا بعد لفة كبيره أنا ماعرفهاش لأني اديت القسيمة للمأذون و هو خلصلي كل الإجراءات اللي قبل التصديق من الخارجيه ثم السفاره الاماراتيه

لو عندك أولاد فالتعليم يبقي تطلعلهم شهادات الميلاد الجديده و توثقها من الخارجيه ثم السفاره الاماراتيه, و ماتنساش تجيب معاك بطاقة التطعيمات بتاعتهم.

أرجوا أن أكون قد أفدتك,,, ربنا يوفقك ان شاء الله

[قاهرى]

الاخ العزيز tahereyad

شكرا لاهتمامك وردك

بس هو الموضوع وصل عندك ناقص شويتين

انا هشرحلك تانى الموضوع

اولا انا مش فى مصر انا فى الامارات بس بشتغل فى امارة غير الامارة الى جيلى فيها الشغل الحكومة

وفعلا عملت انترفيو وبعدها امتحان ونجحت فيهم وعملت كشف طبى وعملت شهادة حسن سير وسلوك وبعد لما سلمتلهم الاوراق كلها قالولى اسبوع والعقد يجى وبعدها نتصل بيك علشان توقع علية ونبدأ فى اجراءت التعين قولت ماشى ممتاز

بس الى حصل انهم متصلوش بعد اسبوع ولا 2 ولا 3

اتصلت انا بيهم قولت اشوف الدنيا مشية ازاى قالولى ان العقد طبيعى انو يتاخر ودة روتين

بس مش عارف على اى اساس فى الاول قالو اسبوع المهم ما علينا

هما اظاهر لما حسو انى مستعجل قالولى طيب تعالى علشان فى اقرار لازم تمضى علية

قالتهو ودة اية انشاء الله قالولى حاجة اسمعها معادلة الشهادة .. انا سالت بالتلفون على موضوع شهادة المعادلة من وزارة التعليم العالى والبحث العلمى بابوظبى قالولى انك لازم تسلم شهادة الكلية متوثقة + شكف درجات الكية متوثق + صورة مش شهادة الثانوية العامة + جواب مقدم من الملحقية الثقافية المصرية بابوظبى يفيد بان الشهادة بتاعتك مش مضروبة

اتصلت بملحقية الثقافية قالولى انك بتجيب صورة من شهادة الكلية واحنا هنبعتها لكليتك وهما بردوا علينا وبعدها بنديك جواب مغلق سرى تقدمو مع الاوراق لوزارة التعليم العالى

بس كدة المهم ان الموضوع لفة سودة وخصوصا الاوراق الى مش معايا الى المفروض اجبها من مصر

وثانيا مشوار ابوظبى الى مش هيكون مشوار واحد وخصوصا وانا ساكن فى راس الخيمة وعمرى مرحت ابوظبى

واخيرا احب اوضح لحضرتك انى بردوا مش خريج معهد علشان اعمل اللفة دى كلها ولا حاجة انا مهندس بردوا زى حضرتك خريج كلية الهندسة جامعة الزقازيق .....

فمش عارف لية هيعملو معايا كدة مدام انا مش خريج معهد

بيتهيالى الموضوع وصل كامل دلوقتى لحضرتك وفى انتظار ردك وشكراااااااااااااااا بجد للاهتمام

وبعد كدة طمنى لية هتسيب FEWA دبى

اسمع انها ممتازة ولسة ليا واحد صحبى هيتعين فيها قريب كان شغال فى مترو دبى وجالى العرض بتاع ال FEWA وخلاص هيشتغل على اول رمضان

اية الحكومة مش قد كدة ولا ايةةةةةةةةةةةةةةة ؟؟؟؟؟

تحياتى لك يا بشمهندس tahereyad

واسف على الاطالة

[قاهرى]

فى انتظار الرد بعد توضيع الموضوع

[tahereyad]

الأخ العزيز قاهري,,, أكيد طبعا تشرفني جدا بصداقتك..

بالنسبه للإجراءات الي بيطلبوها منك دي متهيألي انها فعلا معقده و أول مره اسمع عنها, ليه أصدقاء بيشتغلوا في أماكن كتير فالإمارات بس دي أول مره اسمع الإجراءات دي... بس متهيألي يعني والله اعلي و أعلم إنك مدام موثق شهادة التخرج بتاعتك من إدارة الجامعة ثم الملحقية الثقافيه لسفارة الإمارات ثم سفارة الإمارات (كل ده في مصر),, يبقي الموضوع مش محتاج الكلام اللي هما طالبينه ده كله, و حاول تتكلم معاهم و دور بينهم علي رجل رشيد.. و لو شهادتك من مصر مش موثقه, يبقي أسهل تخلي حد من حبايبك في مصر يوثقهالك.

علي فكره انا صدّقت الشهاده بتاعتي من وزارة التعليم العالي لأني خريج المعهد العالي للتكنولوجيا ببنها و ده تابع علطول لوزارة التعليم العالي مش لأي جامعه. و كلامي كان للتوضيح بس.

حكاية هاسيب DEWA ليه دي قصه كده يطول شرحها, بس للإيجاز الحمد لله جالي فرصه أحسن منها و الحمد لله.. علي فكره DEWA اللي هيه Dubai Electricity & water Authority غير FEWA اللي هي FEDERAL Electricity & water Authority

بس عامة ماتقلقش من شغل الحكومة هنا,, كويس جدا و دايما بيلتزموا بالقوانين الجديده للحكومة اللي دايما بتكون خير للموظفين زي الزيادات اللي سمعت عنها لسنه اللي فاتت.. و يمكن تتكرر تاني السنه دي.

[محمد عيسى]

بالنسبة للتوثيقات انا ريحت بالي خالص و معملتش لفة مصر و لا وقفت في الشارع ادام السفارة و مفيش ركنة قريبة و لا الكلام ده .. مجرد وثقت اوراقي (شهادة الكلية - قسيمة الزواج .... ) من الخارجية في مصر و جيت بيها علطول و بعدن وثقتها من السفارة المصرية و بعدين الخارجية الاماراتية هنا .. و شهادة الكلية اتوثقت علطول و محدش قال اي حاجه

مشوار نص ساعه في اللذيذ و لا بهدلة مصر .. و كمان مبتوثقش غير اللي محتاجه بس