بذاءة فتاة تقول أنها إبنة عميد شرطة

[~Heba~]

البعض تعجب انه لم يكن هناك رجل يلطشها قلمين ، واتعجب واسأل من امتى احنا بنهين بنت او ست فى الشارع او فى خناقة؟

حضرتك اى حد سواء بنت او ولد يتصرف بالشكل البذئ ده لابد من ردعه بطريقة تليق بتصرفها

و واحدة زى ده لايمكن تسكتب بكلمة خلاص يا انسة معلش يا انسة

لو فيه تصرف حاسم مع اللى بيتلفظوا بالالفاظ دى اللى بتقول عليها بتكرر يوميا فى الشارع المصرى مكنتش اتكررت

لو رب اسرة فاضل و ابنه تلفظ بلفظ بذئ حيكون له تصرف شديد اكيد عشان الابن يعرف خطورة اللى عمله و ميكرروش

يعنى باختصار البنت صراحة كانت تساهل علقة جامدة مش قلم و بس رغم الضرب على الوش حرام

يمكن كانت تستاهل عود خيزران تضرب بيه على عصاقيلها

تم تعديل 29 أغسطس 2008 بواسطة ~Heba~

[~Heba~]

ومن أظرف التعليقات اللي تشوفها على مدونة وائل عبالس و احد لخص الليلة و قاللك يا جماعة دي مش بنت ضابط دي بنت ......

اه فعلا هيا مش بنت ظابط دى بنت ................

:happy: :happy: :o

عيب و الله عيب

و الله العظيم عيب و ستين عيب

هو دا اللى جايبنا لورا

هما كده ميختلفوش عنها خالص بالعكس دول زمايلها فى الكار

يارب ارحمنا برحمتك من دى مصايب

المصريين اصابهم عور شديد فى اخلاقهم للاسف الله يجازى اللى كان السبب بما هو اهله

الله يخيبك يا وائل عباس سايب التعليقات المنيلة على عينها و هى لا تختلف كثير عن كلام البنت

صدق و الله من قال

من اعمالك سلط عليكم

يستاهلوا بعد كده اللى بيحصلهم على ايادى زبانية وزارة الداخليه :o

[ayman elsherif]

اخر الاخبار من المصري اليوم

الشاب ضحية كليب «فتاة العصا الكهربائية»: الواقعة تكررت معي في «كفر طهرمس»

كتب فاروق الدسوقي ومصطفي المرصفاوي وأحمد رجب ٣١/٨/٢٠٠٨

كشف أحمد السيد الشاب الذي ظهر في كليب «فتاة العصا الكهربائية» عن تفاصيل جديدة، أكد أنها تدعي «شيرين»، وأن الواقعة تكررت مرة ثانية في كفر طهرمس عندما اتصل بصديق له يعمل ضابطا، وأخبره بالواقعة فطلب منه إيقافها في أي مكان، وتحرير محضر ضدها.. وقال إنه أوقفها بالفعل وفوجئ بها تكرر ما فعلته في شارع الملك فيصل.

وقال: بدأت الواقعة عند إشارة في شارع فيصل، عندما اصطدمت سيارتها الشيفروليه بسيارتي أثناء سيرها خلفي، ومرت أمامي بمنتهي البساطة، وكأنها لم تفعل شيئاً، أو تعتذر، مما أثار غضبي، فلحقت بها، ومررت من أمامها، وعند «أبراج سعودي» في محطة الكوم الأخضر توقفت أمامها بسيارتي، ونزلت لأعاتبها علي ما فعلته، لكنها تجاهلتني، وراحت تتحدث في هاتفها المحمول، فضربت بيدي علي زجاج سيارتها حتي تنتبه لي، فنظرت إلي بعدم اهتمام، وسألتني: «كم تتكلف السيارة»، وقررت تأديبها ومعاقبتها، قفلت لها: «٢٠٠ جنيه»، وبالفعل دفعت المبلغ، وقبل أن تمضي في الطريق سبتني بوالدتي قائلة «بس علي فكرة.... أمك»، مما اضطرني إلي الوقوف أمامها وعدم تركها ترحل دون اعتذار.

أضاف: فوجئت بها تخرج «عصا كهربائية» من سيارتها، وتسبني بألفاظ نابية، ووجدت عدداً من سكان منطقة أبراج سعودي حولي، وبعض المارة يطلبون مني الرحيل، وكان بصحبتي خطيبتي التي منعتني من الاقتراب منها، وطلبت مني الابتعاد عن المكان، لكني شعرت بغضب شديد بسبب الألفاظ التي استخدمتها، وبعد انتهاء المشكلة ركبت سيارتها وطلب مني أهالي المنطقة المغادرة،

وقررت الذهاب خلفها إلي المنزل لأقابل والدها الذي تدعي أنه «عميد» وفي الطريق اتصلت بصديق يعمل ضابطاً، ورويت له ما حدث، فطلب مني إيقافها في أي مكان لتحرير محضر ضدها بالواقعة، حتي لو كانت ابنة «وزير» ولحقت بها في شارع كفر طهرمس، وأوقفت سيارتي أمامها، وفوجئت بها تنزل من سيارتها مرة ثانية، وتكرر ما فعلته في شارع الملك فيصل، ومرت دقائق وحضرت والدتها، سيدة «طيبة»، انهارت عندما شاهدت الموقف، وفقدت الوعي،

وسقطت علي الأرض مغشياً عليها، وعندما أفاقت، اعتذرت لي ولخطيبتي، وطلبت مني عدم تحرير محضر ضد ابنتها، ووبختها، واعتذرت أكثر من مرة لخطيبتي، وقالت لي: «انت عندك اخوات بنات. وشيرين زي أختك»، لكنني لم أتأكد إذا كانت بنت عميد أم لا، ولهذه الأسباب لم أتقدم ببلاغ ضدها، واعتبرت أن الموضوع انتهي ولكني شاهدت الكليب علي الإنترنت منذ يومين، وغضبت مما حدث، وتمنيت أنني لم أعد والدتها بعدم تحرير محضر.

كانت مدونة «الوعي المصري» بثت الكليب تحت اسم «بنت الباشا الضابط بتبطلج بعصا كهربائية ممنوعة قانوناً»، وتظهر فيه فتاة ممسكة بعصا يستخدمها رجال الشرطة في صعق المجرمين وتتشاجر مع شاب، ويتضح من الكلمات أنها صدمته بسيارتها ماركة تحمل لوحة معدنية ملاكي إسكندرية.

وبدا صوت الفتاة واضحاً وهي تهدد الشاب بصعقه بالعصا، وإصابته بالشلل.

«المصري اليوم» انتقلت إلي منطقة أبراج سعودي في شارع الملك فيصل التي شهدت الواقعة، وتقابلت مع شهود عيان، أكدوا أن الحادث وقع منذ شهر تقريباً، وأنهم شاهدوا الفتاة تحاول الاعتداء علي شاب بعصا كهربائية يستخدمها رجال الشرطة، بعد أن صدمته بسيارتها، وقالوا: إن الشاب كان يتعامل معها بأدب، لكنه فوجئ بها تسبه وتشتمه بألفاظ غير لائقة.

وقال «عم محمد» شاهد علي الواقعة: سمعت صوت مشاجرة في الشارع أمام المحل وخرجت لأجد فتاة تمسك عصا كهربائية أخرجتها من سيارتها الشيفروليه، وتتشاجر مع شاب صدمته بسيارتها، طلب منها ٢٠٠ جنيه لإصلاح السيارة، فأعطته، وعندما علق علي أسلوبها في التعامل معه، عادت وهاجمته بألفاظ سيئة أمام الجميع.

قال «كريم» الذي قام بتصوير الكليب: إن تصرف الفتاة بهذه الطريقة جعل الأهالي في حالة «غضب» بسبب استخدام الفتاة عصا كهربائية، وذكرت في كلامها أنها ابنة عميد، ولولا أن الشاب كان معه فتاة طلبت منه الابتعاد والرحيل، لكان الناس في الشارع ضربوا تلك الفتاة.

.. وحملة شعبية علي الـ«فيس بوك» تطالب بالقبض علي «فتاة العصا الكهربائية»

أقام عدد من الشباب علي موقع «فيس بوك» جروب، أطلقوا عليه الحملة الشعبية للقبض علي الفتاة صاحبة السيارة رقم ١٨٠٧٠٧ ملاكي الإسكندرية والتي ظهرت في كليب «فتاة العصا الكهربائية» وهي تمسك بعصا كهربائية وتحاول الاعتداء علي شاب.

قال الشباب: إن الفتاة تطاولت علي الذات الإلهية في وضح النهار دون أي رادع، لأن والدها «باشا» في وزارة الداخلية - كما ادعت في الكليب - ووجه مؤسس «الجروب» دعوة للمشاركين، مطالباً كل من يغير علي دينه ورجولته بأن يحاول معرفة من تكون تلك الفتاة.. الجروب أنشأ منذ يومين علي موقع «فيس بوك»، ووصل عدد المشاركين فيه إلي أكثر من ٥٠٠٠ عضو.. بهدف التعرف علي هوية الفتاة صاحبة السيارة التي استغلت نفوذ والدها ضابط الشرطة.

[Advisor]

ما رأيناه و سمعناه و صدمنا جميعا سباب صادر من فتاة تقول أنها إبنة عميد شرطة ، و ما سمعناه بلا جدال صادم و لكنه يحدث فى بيئات معينة و فى ظروف معينة تختلف بالكامل مع أخلاقيات و سلوك متصفحى محاورات المصريين.

ما سبق كان إستهلالا لابد منه

ما رأيناه - كما أشار بعض الأفاضل - ليس إلا جزءا منزوعا من سياقه و لكننا لا نعرف ماذا حدث من الطرف الآخر كل الذى عرفناه أن الفتاة دفعت 200 جنيه كمقابل لإصلاح تلفيات أحدثتها فى سيارة الشاب و الذى نعرفه أن مثل هذه التسوية لا تتم بهذه البساطة ....

ما الذى حدث بالكامل لا نعرفه و القصة التى نشرتها جريدة "المصرى اليوم" على لسان الشاب قصة مهتزة و أنا لا أتقمص شخصية شرلوك هولمز و الذى أتصوره هو أن الحقيقة شيئ مختلف تماما عن القصة المروية بل ربما يكون نزاعا مشبوها بين الشاب و الفتاة.

و طالما تم نشر الموضوع فالأرجح أن يصدر بيان من الداخلية ينكر أن تكون الفتاة إبنة رجل شرطة و أن ما كان معها ليس عصاة كهربية أو عصا كهربية مهربة من الخارج أو مسروقة و ربما يقال أن الفتاة مختلة عقليا !!

[Alshiekh]

لدى ملاحظة

كل السيارات تحمل لوحات بيضاء بارقام سوداء بما فيهم سيارة البنت ، ولكن سيارة الشاب ذات لوحات سوداء بارقام بيضاء

هل هناك لوحات مخصوصة او مميزة فى مصر؟

ليت من يعلم يخبرنى

[ramiesm]

الى الاخ محمد... ملحوظة اللوحات ملحوظة ذكية جدا جدا لان المعروف عند أي واحد ضابط شرطة و خاصة لو كان عميد أن لوحاته مميزة (ولوحات سيارات العيلة كلها) اما انها تكون 4 ارقام أو 5 لانه بتبقى طالعة من المديرية من وحدة مرور خاصة بالضباط أو انهم بيعملوها لوح سودة (الضباط والنيابة و القضاء) ولو لاحظت هتلاقي ان عربية الولد هي اللي لوحتها سودة وده أثار ملاحظتي في الكليب و الله أعلم برده ايه اللي حصل في الجزء اللي متصورش من الواقعة :blink:

[Alshiekh]

الى الاخ محمد... ملحوظة اللوحات ملحوظة ذكية جدا جدا لان المعروف عند أي واحد ضابط شرطة و خاصة لو كان عميد أن لوحاته مميزة (ولوحات سيارات العيلة كلها) اما انها تكون 4 ارقام أو 5 لانه بتبقى طالعة من المديرية من وحدة مرور خاصة بالضباط أو انهم بيعملوها لوح سودة (الضباط والنيابة و القضاء) ولو لاحظت هتلاقي ان عربية الولد هي اللي لوحتها سودة وده أثار ملاحظتي في الكليب و الله أعلم برده ايه اللي حصل في الجزء اللي متصورش من الواقعة :blink:

وماذا يقول

وقررت الذهاب خلفها إلي المنزل لأقابل والدها الذي تدعي أنه «عميد» وفي الطريق اتصلت بصديق يعمل ضابطاً، ورويت له ما حدث، فطلب مني إيقافها في أي مكان لتحرير محضر ضدها بالواقعة، حتي لو كانت ابنة «وزير» ولحقت بها في شارع كفر طهرمس، وأوقفت سيارتي أمامها، وفوجئت بها تنزل من سيارتها مرة ثانية، وتكرر ما فعلته في شارع الملك فيصل، ومرت دقائق وحضرت والدتها، سيدة «طيبة»، انهارت عندما شاهدت الموقف، وفقدت الوعي،

يعنى الشاب اتصل بضابط صديقه على حد زعمه ، والضابط قال له ان " يزنق عليها " ويوقفها فى اى مكان ، وبالفعل اوقفها ، مش عارف احنا مسكنا فى البنت وصورنا الشاب على انه ضحية ، فى حين انها اعطته ماطلبه من مال لاصلاح تلفيات سيارته ، ولم يشغل بال الناس سبابه لها ، فقط انشغلوا بالبنت علشان قالت انها بنت عميد شرطة ... حساسية زايدة.

[se_ Elsyed]

ما هو لو كان في صبر شويه كنتوا إتفرجتوا على حلقة من مسلسل كنت أنا أحد أبطالة هذا الصيف .... وهي قصة حقيقية هاحكيها بكل تفاصيلها لإنها مشابهة لما حدث للشاب مع عدم وجود عصا كهربائي ..

- ألح علي اخي وإحنا في مدينة نصر إنه يفرجني على محل ادوات منزلية وكهربائية كبير إسمه " شارع عبد العزيز " المحل إسمه كده على إسم شارع عبد العزيز اللي موجود في العتبة ... ويقع المحل بالظبط خلف النادي الأهلي بمدينة نصر في شارع إسمه شارع الطاقة ... المهم كنت انا اللي سايق وعربية اخويا ما شاء الله لسه عالزيرو وعاملة 2000 كم بس وعليها اقساط :blink: ... المهم لسه داخل أركن قدام المحل إلا وواحد جاي من اليمين زنق عليه فأضطريت ألم العربية روحت خابط عربية وافقة قدام المحل .... ركنت بسرعة ونزلنا أنا وهو نستكشف إيه اللي حصل ... وأقسم بالله لقينا خدش في الجزء البلاستيكي للإكصدام الخلفي لتلك السيارة اللي كانت جديدة برضوا على ما يبدو .. ويكاد الخدش لا يُرى بالعين المجردة وما فيش لا خبطة ولا ردة ولا دياولو وكل ما في الأمر إن جزء من بوية سيارتنا علمت في هذا الخدش يعني بحتة فوطة الامور ترجع زي ما كانت ... فذوقياً انتظرنا صاحب السيارة حتى يخرج من المحل لإننا توقعنا يكون في داخلة .. وفعلاً دقيقة بالظبط وخرجت ..

طلعت واحده ست متخطية عامها الستين ومعها فتاة في حدود الخامسة والعشرين ... فاول ما شوفناها .... بالنص أخويا قال لها : إحنا اللي خبطنا عربية حضرتك وركننا عشان نشوفك ونسألك طلباتك إيه ...

ودي كانت أخر حاجه قولناها لإنها طلعت ست شلق - يعني بتردح - بالرغم من إن لبسها ومظهرها يقول إنها ست أرستقراطية و العيبة ما تطلعش من بؤها .. وإحنا لسنا أولاد شوارع عشان نخبطها ونجري ... وهاتك يا ردح وتخبطوني ليه وإشمعنى عربيتي أنا .. وانا عرفاكو إنتو من الشباب اللي بيجروا في الشوراع يخبط عربيات الناس ... بالرغم إن زوجتي كانت معايا وعلى كتفها بيبي صغير وشكلنا لا يدل على إننا شباب هيسي بيسي ... ويا ست الكل إحنا وقفنا لحد ما أنتي خرجتي وكنا ممكن نجري ... المهم خرج واحد محترم من المحل - كان زبون بالمحل - لابس بدلة ومحترم .. وقال لي : ناولني فوطة كده يا بيه .. وراح ماسح الجزء اللي إتخدش ويا دار ما دخلك شر .. مسكته الست بهدلته برضوا وإنت مالك وهي كانت عربيتك و و و و

فاخويا قال لها : يا ستي لو سمحتي إيه اللي يرضيكي : فقالت بكل بجاحة : أنا عايزة 500 ج ولعلمك أنا هاديهم للخدامة بتاعتي ومش هاخدهم ليه ... !!!!!!!!!!!!!!!!

هنا قلت لأخويا وزوجتي أركبوا العربية عشان كده طفح الكيل وسيبوني عليها لإني اعرف أتعامل مع الأشكال دي كويس ...

ومسكتها مرمطتها في الشارع - من غير ضرب ولا تطاول بالكلام - .. وقولت لها مالكيش حاجه عندنا وأعلى ما في خيلك إركبيه وبيننا وبينك الشرطة وروحت واخد نمرتها لقيتها اتنططت وتقول لي : وكمان بتاخد نمرتي وإنت اللي خابطني ؟ .. فقلت لها : قصري ولمي الدور انا معايا تأمين ولو عربيتك هاتتكلف مليون جنية تصليح فالتأمين هايغطيها لك ... فضلت تجعجع وانا هاعمل واسوي وأنا ست محترمة وانا عندي 62 سنة وبأشتغل دكتورة ... وروحت متصل أنا بالنجدة وقلت له بالنص : لو سمحتي يا نجدة إحنا خبطنا عربية واحده ست في المكان الفلاني والست دي طلعت مجنونة ... كده على طول قدامها ... فممكن تبعت لنا عربية شرطة بسرعة احسن حالتها خطرة ... وبدون مبالغة في خلال 10دقائق كانت سيارة النجدة في الموقع ..

وكنا إحنا سيبنها تهلل وتردح وركبنا عربيتنا وشغلنا التكييف ودي إتجننت أكتر وفضلت ماسكة المفاتيح وتخبط لي على قزاز العربية فقلت لها لمي نفسك يا ست وإوعي تتكلمي نص كلمة الشرطة جايه دلوقت ... إزاي ومش إزاي انا هاتأخر على العيادة انا مش عارف إيه ... قلت لها مالكيش عندي حاجه ... فضلت منتظرة 5 دقايق وراحت ماشية وقايل له لنا إنها هاتطلع على قسم شرطة مدينة نصر تعمل محضر ضدنا .. قلت لها اعلى ما في خيلك أركبيه وأعملي اللي تعملية لإنك ست غير متحضرة ومُحدثة نعمه يا أم خدامة ..

شويه وجم البشوات .. حكينا اللي حصل وجم الأمن بتوع المحل شهدوا وبصراحة قالوا إن إحنا ما قصرناش وما غلطناش في الوليه دي .... حتى امين الشرطة قال لي إنه سمع زعيقها في التليفون لما أتصل وهو في الطريق يستفسر عن المكان بالظبط .. فقلت له إحنا معانا تأمين وعمالين نهدي فيها وهي الحالة جاتلها وحاجه تقرف .... وهوب راح صاحبنا كاتب في المحضر الرسمي إنها هي اللي صدمتنا وفرت هاربه ... مع إن إحنا مش عايزين منها حاجه وهي لو راحت وزارة الداخلية حتى فهايحطوها في عنبر الحالات الحرجة لإن سيارتها لم تتضرر ...

فعايز أقول إن الناس في مصر أعصابها بقت تعبانه والكل بقى متربص ببعضه وعايز يتعشى باللي قدامه قبل ما يتغدا به وبقينا كإننا في غابة والكبير عايز ياكل الصغير ... ودي سلوكيات للأسف خاطئة وإتزرعت فينا نتيجة للكبت السياسية والقهر والحكم الفردي من أشخاص فاكرينها تكيه وميغه ..

ولنا ربنا يا جدعان والله ..

[ayman elsherif]

تصرف حكيم يا س السيد

بس غريبة ان النجدة جت بالسرعة دي :blink:

[se_ Elsyed]

تصرف حكيم يا س السيد

بس غريبة ان النجدة جت بالسرعة دي :blink:

يا أيمن باشا .. صاحب الحق عينه قويه وصوته عالي ... بالرغم إني لا بابايا عقيد متقاعد ولا خالو أمين شُرطة من معوقي الحرب ... لكنني إنسان اعرف حقوقي جيداً وبأمشي صح والقانون والقواعد حتى التي لا تُطبق فوق دماغي من فوق وبأحترمها ،فبالتالي ماحدش له عندي حاجه ... وبإذن الله في الإرهاصات بتاعتي هاتقرأ أنا كنت بأعمل إيه في سواقي التاكسي المرات اللي ما كانش معايا عربية وهاتقرا أنا كنت باعمل إيه في بتوع النجدة اللي أول حاجه بأقول لهم على إسمي وعنواني ورقم تليفوني وبعد كده أشوط فيهم لإنهم سايبين الدنيا تضرب تقلب واللي عايزني يجيلي منطقتي ... لدرجة الناس كانوا بيقولوا علي مجنون لكن بما إن المعايير إتغيرت والمباديء إتفتت فبقى صاحب الحق اللي بيطالب بتطبيق القانون ... بقى مجنون ... تخيل ؟

[عبقرينو]

ودي سلوكيات للأسف خاطئة وإتزرعت فينا نتيجة للكبت السياسية والقهر والحكم الفردي من أشخاص فاكرينها تكيه وميغه ..

po:: po:: po:: po:: po:: po::

[se_ Elsyed]

ياريت يا جماعة نكون إيجابين أكتر من كده ولو حد عنده ملاحظات على قانون المرور يتصلش ما يخافش بالرقم اللي مخصصاه ورزارة الداخلية لذلك وهو

136

والله إحنا اللي بنفرط في حقوقنا بالسلبية واللامبالاه

[ayman elsherif]

مفاجأة: فتاة «العصا الكهربائية» ليست ابنة عميد شرطة.. ووالدها طبيب.. والعصا كانت «شومة»

كتب سامي عبدالراضي وفاروق الدسوقي ومصطفي المرصفاوي ٤/٩/٢٠٠٨

فتاة كليب «العصا»

لم تكن ابنة عميد شرطة، كما زعمت في الكليب المثير الذي بثه مدونون علي شبكة الإنترنت، بل ابنة طبيبً في مدينة جرجا بسوهاج.

«فتاة العصا الكهربائية» التي شغلت الرأي العام طوال الأسبوعين الماضيين، ألقي القبض عليها إثر محضر حرره المحاسب أحمد السيد كامل في قسم العمرانية، قائلاً إنها صدمت سيارته من الخلف وحطمتها وسبته وهددته بعصا كهربائية،

وأجرت اتصالاً هاتفياً بشخص قالت بصوت عال إنه والدها الذي يعمل عميد شرطة. كشفت تحريات المباحث أن المتهمة شيرين عبدالحفيظ علي أحمد نور الدين «٣٠ سنة» كانت تعمل في تجارة الملابس، وهي من البيطاش بالإسكندرية.

قالت شيرين في التحقيقات إن والدها طبيب بشري وليس عميد شرطة، وأنها لجأت وقت المشاجرة إلي الاتصال بصاحب الفندق الذي تعمل فيه بشرم الشيخ لإيهام الشاب الذي صدمته بأن والدها عميد شرطة حتي تنهي المشاجرة.

ونفت شيرين أن تكون العصا التي ظهرت ممسكة بها في الكليب «كهربائية»، قائلة إنها مجرد عصا عادية «شومة» تخلصت منها بعد انصرافها من موقع المشاجرة وأحيلت الفتاة والمحاسب إلي نيابة العمرانية.

وقال عباس صاحب مدونة «الوعي المصري»، الذي بث الكليب مثير الضجة، إنه تلقاه من أحد الشباب وشاهده عدة مرات وتأكد أن العصا كهربائية، وأضاف أنه ليس ملزماً أن يجري تحريات حول الواقعة للتأكد من صدقه

المصدر : المصري اليوم

[عبقرينو]

قائلة إنها مجرد عصا عادية «شومة»

عفوا اخي الفاضل

الشومة لا تصدر صوت "طقطقة"

وصوت الطقطقة واضح جدا في الكليب

ولو صدقنا موضوع الشومة دة

بكرة نلاقي الناس بتتهدد ب " ار بي جي "

علي انة مسدس مية

[hamoudi]

البعض تعجب انه لم يكن هناك رجل يلطشها قلمين ، واتعجب واسأل من امتى احنا بنهين بنت او ست فى الشارع او فى خناقة؟

حضرتك اى حد سواء بنت او ولد يتصرف بالشكل البذئ ده لابد من ردعه بطريقة تليق بتصرفها

و واحدة زى ده لايمكن تسكتب بكلمة خلاص يا انسة معلش يا انسة

لو فيه تصرف حاسم مع اللى بيتلفظوا بالالفاظ دى اللى بتقول عليها بتكرر يوميا فى الشارع المصرى مكنتش اتكررت

لو رب اسرة فاضل و ابنه تلفظ بلفظ بذئ حيكون له تصرف شديد اكيد عشان الابن يعرف خطورة اللى عمله و ميكرروش

يعنى باختصار البنت صراحة كانت تساهل علقة جامدة مش قلم و بس رغم الضرب على الوش حرام

يمكن كانت تستاهل عود خيزران تضرب بيه على عصاقيلها

ارى تحليل الاخ محمد تحليل عاقل وهو شبيه بالتعليق بتاعي والذى كتبته على اليوتيوب ليس معنى ذلك عذر للفتاة او عذر للمجتمع ولكن الموضوع ببساطه حدوث حادثه اى كان الى مخطىء وتوابع حدوث ذلك وقامت الفتاه بالدفع وبالتالي عند هذه النقطه يجب ان ينتهي الموضوع ولكن الشاب واصل استفذاذها وهي نتيجه للسلطه الى ابوها معيشها فيها ونتيجه لامراض المجتمع ونتيجه لتربيتها البلطجيه ايا كانت (سواء كانت مستقويه ان ابيها عميد او انها حركات قرعه)قامت بعمل الشويتين دول

ولكن الطبيعي فى اى مكان فى العالم سواء بلاد النمنم او جمهوريات الموز تاتي الشرطة لاصلاح الامر وتحديد المخطىء ولكن عندنا

الرابح دائما الاعلى صوتا والاقوى بدنا والاكثر استلباطا وكان الولد صاحب الكورولا هو صاحب هذا الوضع الى ان انعكست الايه وقامت البنت بقول الكوبليهات الخاصه بها والتى انتقدها الجميع ولكن لكي نصدر حكم صحيح كان يجب ان نرى الحادث بالكامل ونسمع الاطراف ولايدين الفتاه فى هذا الا موضوع الا حقارتها فى السب (ولااستطيه توضيخه اكثر من ذلك)اما لماذا لم يتخل الماره تعالوا هنا ودي موروثات التراث المصري قف بجانب اى فتاه (الالو انت صايع مثلها)تستطيع ان تكون سبب فى سجنك على الاقل بسبب فعل فاضح فى الطريق العام واذكركم بانتخابات الحكومه وطلب الحكومه العون من البلطجيه والساقطات

فمثلا لو انت تسير فى مكان مظلم واتت فتاه وقالت لك بمنتهى الهدوء هات 100 جنيه وانت رفضت فقامت بتقطيع هدومها فى ال3 ثوانى قبل حضور الماره ماذا ستقول وماذا ستفعل وماذا سيكون رد فعل الماره ومالذي ستقوه به لدرء التهمه عنك

اعتقد بعد مالناس يربوك والقسم يربوك سترسل لك من يقول لك 10000 جنيه ويبقى محضر صلح؟؟!؟!؟؟!؟!؟!؟!؟؟!؟

صدقوني الحمد لله ان اكثر من 90 % من فياتنا مربين والا كان الكل معرض لشي مثل الى قلته الوقتى

الحمد لله نحن شعب طيب والا كان زمان فى حروب اهليه الوقتى

نحن دوله بلا تنظيم او حاجم ونغيش فى فوضى صدقونى لو ادارتنا هذه فى اى البلاد ذات الدم الحامي مثل دول امريكا اللاتينيه كان زمان العمليه كلها حروب اهليه وكان زمان ماشيين باسلحه ناريه

لانه عند حدوث مشكله مثل التى ريناها مين الى بيكسب ؟!؟!؟!؟!؟!؟!؟ الاعلى صوتا الاقوى بدنا والاكثر سلطه والاكثر استلبطا اى حل عنفواني وليس حل منظم مثل الدول التى لها هيكل وكيان وشطرا

[عبقرينو]

بكرة نقرا في الجرائد الحكومية لمحاولة الطرمخة علي الموضوع انها كانت بتسجل معاة حلقة من حلقات الكاميرا الخفية

[عاشق الترحال]

انا مكنتش عارف حاجه عن الموضوع ده وأخبرني به زميلي فى العمل (( يمني الجنسيه )) بأنه شاهده على اليوتيوب

وانا مستغربتش لأني شفت من ده كتير بس كان شكلى وحش لما قالى شوف البت المصريه بتعمل ايه ؟؟؟؟؟؟ بنت مين دي ؟؟؟؟؟؟؟ وخصوصا هما عارفين أني بتضايق من أي حد يجيب سيرة مصر أو أى مصري بكلام مش كويس.

صدقوني طول مالبلد فيها طوارئ ولما يتغير يبقى ارهاب وتغيرت المسميات والمضمون واحد

الناس دى ومن على شاكلتهم هما البشوات بتوع البلد ولازم تعرف كده ولو مش عاجبك اضرب دماغك في الحيط !!!!!1

ولو عاوز تجرب وانت من الناس الغلابه اللى (( ملهاش ضهر )) جرب تقع في مشكله وتدخل قسم شرطه وانت تعرف ...

العسكري جوه القسم مفكر نفسه لواء شرطه وممكن يعطيك على أفاك وأنت جامعي ومحترم ده طبعا أدنى رتبه موجوده هناك فمابالك بالسادة المخبرين وسعادة أمناء الشرطه وكبار عائلة (( النسر ))

أنا رفضت أشتغل بمهنتي محامي علشان مبقاش زيهم ولا أنكر أن هناك ناس محامين شرفاء ولكن (( من عاشر القوم أربعين يوم صار منهم ))

(( الشرطة في خدمة الشعب )) كان زمان ولما الشرطه أدركت أن الشعار ده لم يعد يخدع الشعب قرروا تغيره إلى (( الشرطة والشعب في خدمة القانون ))

أنتهاكات الشرطة وعائلات الشرطة وأقارب الشرطة كتيـــــــــــــــــــــــــــــــــــــــــــــــــــــــــــــــــــــــــــــ

ـــــــــــــــــــــــــر ............

ومش هتنتهي ولا هتخلص إلا لما الناس تبطل خوف وتطالب بحقها ولو كل واحد فكر أنه مش لازم يتخلى عن حقه ولازم يقدم شكوى ويستنصر الرأى العام أعتقد أنه هيلاقي مسانده من الناس وأنا في رأي الأيم اللي فاتت شهدت صحوه من الناس في عدم التواني في السكوت على الحقوق المنتهكه من الشرطة ولعل قضية (( عماد الكبير )) كانت شرارة وياريت الناس تبدأ تلتزم أولا بالقانون وثانيا تطالب بحقوقها في حال أي أنتهاك أو تعدي أو تعسف من رجال الشرطه وجهات الشكاوي كثيره ولعل من أبرزها النيابه العامة وأعتقد ان هناك لازال ناس شرفاء يعملون في سلك القضاء يخافون الله وحده ويساندون المظلوم وأنا أقدم لهم كل التحية والتقدير وربنا يوفقهم

وأخيرا (( إن الله لا يغير مابقوم حتى يغيروا ما بانفسهم ))

والسلام عليكم ورحمة الله وبركاته