حدث مع شرطة مرور قطر

[ayman elsherif]

النهاردة قولت افسح الاولاد ونغير جو ونروح البحر و أنا في الطريق و العيال عماله تطنطط وراء في العربية . فجاءة لاقت سيارة الشرطة بتجري وريا و عماله تقلبلي النور. اديت اشارة يمين و دماغي شغالة و عمال اقول لنفسي انا اكيد عملت مخالفة .. حزام لا .. سرعة يمكن .. ولا ايه بالظبط.... اكيد انا عملت حاجة غلط.

المهم ركنت السيارة على اليمن و نزلت من السيارة و و في نفس الوقت نزل الشرطي من السيارة ومعاة شنطة كبيرة و قالي وهو يبتسم كل سنة وانتم طيبين بمناسبة رمضان و المدارس و اداني الشنطة ... بصراحة كانت مفاجئه لم اتوقعها و طبعا شكرته ومشينا.

و الشطنة كان فيها شنطة اطفال مدرسية بالتروللي و علبة اقلام الوان و كراسة رسم وعلبة اقلام رصاص.

بصراحة الحركة دي عجبتني اوي وزاد احترامي لهذة البلد و شرطة المرور وحبيت اكتب الموضوع دة علشان اشكرهم.

و جعلتني اقارن بين تعامل الشرطة هنا وتعامل الشرطة المصرية .

الشرطة هنا بتدي كل واحد حقة بصرف النظر عن الجنسية و التعامل بمنتهى الادب و الاحترام

ودة عن اكثر من تجربة حدثت معي او حدثت مع بعض الزملاء.

تحية شكر وتقدير لجهاز الشرطة القطري ويارب نلاقي التعامل دة والنظام دة في مصرنا الحبيبة

[الباشدكتور]

حاسب كله الا الشرطة المصرية

دول ادب ايه واخلاق ايه

ومش حارمين المواطن المصري من اي حاجة

تقوللي الشرطة القطرية ييجوا ايه دول جنب السادة الباشوات اصحاب السعادة والرقي والسمو الضباط المصريين

ده فيه موضوع انا عامله مخصوص عنهم

http://www.egyptiantalks.org/invb/index.php?showtopic=63849

[الباشمهندس ياسر]

عقبال الشرطة بتاعتنا

استاذ ايمن كل سنة وانت طيب

[iloveegypt]

مع احترامى للجميع افضل شرطة فى العالم هى الشرطة المصرية

يا عم كفايا عيالهم معاهم عصى كهرباء لتاديب الشعب

[ssmaly]

بعد قرائتى لمقلك عن الشرطة القطريه احب اقولك قصة مع الشرطة هنا:مره كنت ماشى بالعربية الساعة واحدة مساء فجأة العربية توقفت عن العمل(يمكن عاوزة كادر هى كمان) وراسها والف موتور انها مش ماشية وكان الجو كله تراب كثيف (مثل الخماسين وأكثر) قعدت فى العربية لاقيت عربية شرطة توقفت ونزل منها عريف شرطة .قلت لنفسى الليلة دى مش حتعادى على خير (لانى واقف فى مخرج وانا راكن اقصى اليمين ويادوبك عربية تمر بجانى بدون ما افتح باب) ونزل سألنى عندك ايه قلتلة والله العظيم العربية عطلانة وانا برىء من اتهام قللى افتح الكابوت ودور العربية مادرت زحاول كمان مره مش عايزه .دخل العربية وحاول هو بنفسه وقعد على هذا الحال (و الجو تراب يعمى )حوالى ربع ساعة .المهم دورها بالعافية حتى ركنها فوق الرصيف وبعد كدة قلى انت سامن فين .قلتله انا حأخذ تاكسى.. اصر انه يوصللنى حتى امام البيت نزلت و انا مش عارف اقله.شكرته كثيرا ومن هنا اشكره كمان ..........طبعا الكلام دة حصل مش فى مصر زالكام ده حصل فى الكويت............و هناك اكثر من قصة على الشرطة الغير مصرية لان دة الطبيعى ولكن ما يحدث فى مصر هو الغير طبيعى..................ولكى ال له يامصر

[شاب مصري]

جميل جدا وهو دا دور الشرطة الحقيقي

اللي بيحصل خارج مصر بيخلينا نحس ان البلاد التانية (خارج مصر) واحترام الانسان فيها وكأنها بلاد من افلام الكرتون وغير واقعية وان اللي بيحصل هنا هو الطبيعي وحسبنا الله ونعم الوكيل .

[Senior]

و عجبى

[meeeedoooo]

ساحكي عن موقفين حدثا معي في نفس اليوم

الموقف الاول

المكان : مطار القاهرة عند شباك الجوازات

الزمان : الساعة 10 الصبح

بعد طول انتظار وصلت اخيرا لامين الشرطة في الشباك واعطيته الجواز وانظر في وحهه العابس وقالي ياستاذ فين تصريح السفر بتاعك

فاظهرته له عبر الزجاج

قالي: انت حاططهولي من الازاز هصوره يعني متجيبه يافندي

قولت لنفسي معلش ياواد وخلي اليوم يعدي

الموقف الثاني

المكان : مطار الدوحه عند شباك الجوازات

الزمان : الساعه اتنين ونص

في سرعه وصلت للشباك وكانت تنظر لي سيده وعلى وجهها ابتسامه خفيفه فاعطيتها جواز السفر وكنت ابحث في شنطة يدي عن صورة تاشيرة الزيارة وجدتها تعطيني الجواز وتبتسم وتقول لي اجازة سعيدة

قولت لها انتظري حتى اظهر لكي التاشيره

قالت لا سيدي لا يوجد داعي كل شئ على الكومبيوتر وابتسمت في وجهي

قولت في نفسي ((( ياعيني عليكي يامصر)))

[أحمد سيف]

هذا هو الطبيعي في البلاد المتقدمة ... الشرطة في خدمة الشعب وليس العكس

[se_ Elsyed]

الموقف الاول

المكان : مطار القاهرة عند شباك الجوازات

الزمان : الساعة 10 الصبح

بعد طول انتظار وصلت اخيرا لامين الشرطة في الشباك واعطيته الجواز وانظر في وحهه العابس وقالي ياستاذ فين تصريح السفر بتاعك

فاظهرته له عبر الزجاج

قالي: انت حاططهولي من الازاز هصوره يعني متجيبه يافندي

قولت لنفسي معلش ياواد وخلي اليوم يعدي

نصيحة من واحد خبرة له عدة سنوات - اللهم لا حسد - لا بيجدد تصريح العمل ولا يحزنون وتقريباً لفيت فيه طعمية أو عملته قراطيس لب ....

تصريح العمل يا سادة إتلغى في الخباثة من زمان ........ز بس الحكومة خايفه على مشاعرنا ومش عايزة تقول لنا عشان ما تجرحناش ... والضباط .. الضباط فقط عندهم تعليمات بذلك وجرب كده اقف قدام اي ظابط جوازات وشوف هايطلبه ولا لأ ..

لكن لإن أمناء الشرطة مازالوا زي عساكر الأمن المركزي متبرمجين على إنه يقولك : فين تصريح العمل ؟ .. وماحدش عارف يعمل لهم آب ديت للبرنامج ده فمازالوا يطلبونه ...

مش انا بس على فكرة .. ده انا وأصدقاء وزمايل كتير .. وأنا اللي كنت عامل فيها مواطن شريف وكل سنة أنزل أدفع 120 ج ثمنه وأصمم إن الضابط يطلع عليه وكان يرفض او ياخده ويرميه جنبه ممن غير ما يبص فيه ..

الأعجب من كده الزملاء اللي بييجوا أول مرة للسعودية وهرشوا الموضوع ... ما طلعوش تصريح عمل .. ولا يحزنون ...

قشطه عليكو ..

[ayman elsherif]

اية دة يا س س

يعني الشرطة في الغربه بتدينا هدايا و الشرطة في مصر بتستغفلنا و بتأخذ مصاريف استخراج تصريح العمل بدون داعي

[HDarwish]

أنا في مرة واقف برده قدام شباك الجوازات ومجهز كل الورق في إيدي علشان ما نسمعشي كلمتين مالهومش لازمة ومن بين الورق تصريح العمل ده واللي دوخني على ما خلصته وشوفت الويل وأول ما طلعته وكإني طلعت الرخصة .. لأ يا رب ده الرخصة كانت أسهل شوية

ولقيت الراجل اللي بعدي في الصف بيقولي إيه

" إيه ده يا أستاذ ما تحط البتاع اللي انت شايله ده في جيبك وما تقومشي الناس علينا"

قولتله " هوه إيه ده .. يا أستاذي ده أنا طلع عيني على ما عملته .. وإوعي تقوللي إنك ما عملتش تصريح العمل شكلك هترجع يا حلو"

قاللي " طب إحنا فيها مش إنت عامللي إنك في السليم (وسبع البرمبه يعني) حط التصريح ده في جيبك وإنت مش خسران حاجه لو سألك الظابط عن التصريح ده إبقى طلعهولوا .. إتفقنا؟"

قولتله " خلاص هو انا يعني كده كده هاخسر حاجه!"

وفعلا رحت عند الشباك الظابط خلص أوراقي كلها وتمام التمام من غير ما يسأل على التصريح ده خالص .. بس أنا إتغظت قوي بئا يعني بعد ماطلع عيني ودفعتلي أزيد من 150 جنيه علشان كان أول مرة وكمان ضيعت يومين من الأجازة بسببه لإن أول يوم قالولي تعالى بكره ولا غير البهدلة في الطابور وأروح اتصور علشان ما كانشي معايا صور وإيه اتصور صور فورية من أم 16 جنية علشان ما اضيعشي يوم كمان .. والله كل ده جيه في بالي .. وقولت لازم حتى أوريه الزفت ده وقمت مطلع التصريح وقولتله مش عايز تصريح العمل على أساس إنه حتى يبقى اسمه بص فيه قاللي لأ خلاص"

وتوبة من دي النوبة عدت أهوب ناحية حاجة اسمها تصريح العمل

بلا افلام كرتون بلا أفلام هندي ... دي مسائل أكبر وثقافات بلاد .. مش توم أند جيري

[Virus]

عمار يا قطر

[ayman elsherif]

الباشدكتور

الحمد لله انك صلحت بوية العربية و مكلفتكش كتير و ربنا يصلح حال الشرطة في مصر.

الباشمهندس ياسر

كل عام وانت و جميع اعضاء محاورات المصريين بخير

iloveegypt

الحمد لله ان العصاية اللي معاهم بيستخدموها في كهربة الشعب مش بيستخدموها لحاجة تانية.

SSmaly

جميل اوي انك ذكرت الموقف اللي حصل لك و ياريت كل اللي حصل معاه مواقف مشابه يذكرها واهي تعتبر رسالة شكر.

شاب مصري

لعل و عسى حد من المسؤلين في الشرطة المصرية يقراءه هذة القصص ويتعلموا ويعلموا لغيرهم دور الشرطة الحقيقي و يحسو على دمهم و يحسنوا طريقتهم في التعامل مع الشعب.

Senior و meeeedoooo و ansaif وse_ Elsyed و HDarwish وVirus

شكرا على مشاركتكم القيمة

[alaa elshafiey]

اولا كل سنة وانتوا كلكوا طيبين ورمضان كريم علينا كلنا

انا ياجماعة الخير بردة عايش فى قطر

ومش هقول غير كلمة واحدة بس

الشرطة هنا بجد بيعملوا الناس بطريقة تخليلك لو انت عاوز تعمل غلط تتكسف والله العظيم والى بجد عجبنى اكتر حاجة ان مفيش حاجة

اسمها قطرى من مصرى من نيبالى كلة ادام القانون واحد

واقف مخالف هتتجزى لو انت شيخ حتى والله دى حقيقة ياجماعة

بجد انا مبسوط انى هنا فى البلد دى

وكل سنة وانتوا طييبن

تم تعديل 31 أغسطس 2008 بواسطة alaa elshafiey

[ayman elsherif]

صورة لسيارة الشرطة في قطر

[osaimi]

انت نتأكد ياسي السيد انهم لغوا تصاريح السفر ؟ أنا سافرت من حوالي 6 شهور بس وانا راجع الضابط طلب يشوفة وسافرت فى شهر 7 /2008 بس فعلا محدش طلبه خالص ومسافر عالعيد انشاء الله بس هيكون مدة التصريح خلصت عشان كده عاوز اعرف اجدده ولا مضيعش وقت عالفاضي

[moheltohamy]

معلش أحب أضيف نقطة صغيرة خارج الموضوع الأساسي...

بالنسبة لتصريح العمل...

فضلت بتاع 8-10 شهور رايح جاي وما عملتوش. يمكن عشان الفيزا بتاعتي كان مكتوب فيها "زيارة عمل". وبعد ما بقت فيزا عمل ، زمايلي ف الشغل نصحوني إني المفروض أعمل تصريح العمل عشان ممكن أوي وبكل بساطة الظابط اللي في الجوازات يرجعني عشانه.

عملته بعد ما طلعت عيني! والموظف اللي هناك عملهولي بأثر رجعي!!!

يعني أنا رايح أطلع تصريح سفر بسنة واحدة ، ورايح له بباسبور جديد (بشوكه)! البيه آللي عاوز القديم ، يا سيدي مش معايا ، دوّر عليه يا بيه عشان أخلّص لك ورأك وما تتعطّلش! وطبعاً من منطلق إني كان بقالي بتاع ساعتين تلاتة واقف في طابور مالوش لزمة ، منهم نص ساعة عشان الموظف مشي ما اعرفش راح يستحما ولاّ إيه بالظبط! أولت يا واد اشتري دماغك. رحت جبتهوله ، وزي ما يكون قفش حرامي :blink: ؛ إنتا ازاي يا بيه كنت داخل خارج م البلد من غير ما تكون عملته قبل كده؟ أولتله أساساً محدش سألني عليه ، ولا لُه لزمة ؛ أنا اللي جاي اعمله فانطاظية كيداهوه!

أحب اقول لكم إن الراجل ذهل... وما كانش متخيل إن محدش بيدوّر عليه أصلاً اليومين دول!

المهم ، برضه أصر إني أحاسب ع السنة اللي فاتت ، يا سيدي إذا كنت أنا أصلاً طالعها زيارة ، وتصريح السفر بتاع شئون الظباط بيقول زيارة ، والفيزا بتقول زيارة! آللي طالما ذُكر فيها كلمة عمل ، طالما كلمة الزيارة اقترنت بكلمة العمل ؛ يبقى تحاسب عليها ، واتحاسب بأثر رجعي؟! أيوه يا بيه ، هوه ده النظام!

ومن منطلق إني أنا اللي محتاجه ، أولت حار ونار ... اتفضل الـ 260 جنيه ، ع الجزمة! md2:

وفضلت مرتين بعدها محدش يسألني تلت التلاتة كام (مع إني عارف يطلع كام)! وجيت في مرّة سألت ظابط الجوازات "هيه إيه حكاية تصريح العمل بالظبط؟ آللي : "يستحسن يكون معاك ، همه بقالهم مده محدش بيسأل عليه ، لكن ممكن في يوم تجيلنا تعليمات بالسؤال عن تصريح العمل ، ساعتها مش هتطلع بره البلد من غيره".

وحصلت مرتين معايا بعد كده ، وبالذات من المطار القديم (تيرمينال 1) ، الظابط سألني عليه ، وطلّعتهوله ، بص عليه بصّة وادّاهولي.

فيه ناس من زمايلنا هنا بيُسألوا عليه ، ويردوا ع الظابط إنهم لسّه ماشيين في الإجراءات ، وإن دي أول مرة يطلعوا على فيزت عمل ، بس ما لحقوش يطلّعوه! وبيعدّيها ويقول لهم ، إعملوا حسابكم إن مش هتطلعوا كل مرة من غيره ، المرة الجايّة يكون معاكم! حاضر يا بيه! wst::

واللي لاحظته إنه بيطلب تصريح العمل ، بعد ما بيشوف الغرض من السفر المكتوب في تصريح السفر. طبعاً مكتوب "بغرض: العمل"

وبالمناسبة صحيح ، ولا مرة لقيت قاعد في الشباك أمين شرطة ، دايماً ظابط ؛ من ملازم أول حتى رائد ، وأحياناً بنت ظابطاية (وفي الفجرية الساعة 3 ص)... تحيا المساواه! :huh:

دي بس ملحوظة حسيت إنو من واجبي أطلعكم عليها ، عشان مش طالبة غلاسة الصراحة وانتو خارجين م البلد! مش ناءصة حرئت دم خالص ف الوأت ده!

N.B. : أنا كل شهر باسافر ؛ شهر في السعودية ، وشهر في مصر... وآخر مرة طلبوه منّي - عشان خاطر سؤال أخونا osaimi - كانت المرة اللي فاتت ؛ في شهر يونيو 2008.

تم تعديل 31 أغسطس 2008 بواسطة moheltohamy

[moheltohamy]

صورة لسيارة الشرطة في قطر

دا إجرام بجد!!!!!!!!!!!!! :blink: :blink: :blink:

هيه دي لاند روفر (من أم 2 مليون جنيه في مصر)؟ ولاّ أنا اللي بيتهيّألي؟!!

وفرحانينلي بالنوبيرا ، والكورولاّ في مصر! mfb:

[الحاج فوزى]

بخصوص تصريح السفر ..

فعلاً انا كنت بعمله مرة كل سنة ..

وأذكر أخر مرة عملته بسنتين علشان المشوار ..

وأذكر أيضاً أن ظابط الجوزات طلبه منى مرة واحدة من عدة سنوات .. ولم يطلبه من ذاك الوقت .. مع العلم أنى كنت أسافر فى العام أكثر من 3 مرات لمصر ..

حالياً لم ألاحظ أنه يطلب نهائى .. حتى زوجتى لم تعمله من الأساس . .

لكنى لآزلت أفضل مشوار فى أيام الأجازة .. خير من بهدلة ساعت السفر ولو بالحظ .