عريس من الانترنت

[DARWEEN]

غاده كتبت :

ثانيا : فترة التأكد من البيانات السابق ذكرها في الأنترنت  

ولكن كيف نتاكد من البيانات ونتقى الحذر من المخادعين؟؟  

شوفي ياغاده ... هو اللي أنا أعرفه وحسب فهمي لموضوع التعارف على النت أن حصل التعارف وخلصنا ( مجرد تعارف لا أكثر ) الخطوه التاليه لابد أن تكون التقدم للأهل ... وطبعا بيكون معاه بطاقة شخصيه وعنوان بيت وعنوان شغل .....

لحد هنا تبدأ مهمة الأهل في التأكد من صحة البيانات والسؤال عن العريس وأهله وظروفه ...

نيجي بقى لملاحظات مهمة جدا ....

1) ممنوع بتاتا ومطلقا كلمة نتقابل علشان نتعرف

2) ممنوع بتاتا موضوع أصبري شوية علشان ظروفي مش مساعدع اليومين دول

3) ممنوع بتاتا أستمرار أي تعارف على النت لفترة أطول من أسبوع أو أتنين بالكتير

4) أنا أصلا مش محبذ الموضوع من أوله ...

خلاصة الكلام يابنات ... البيوت لها أبواب واللي عاوز يدخل البيت الباب مكانه معروف .... اللي حتطلع وتقولي ماهو لازم التعارف والشخصيه والتوافق كل ده على راسي بس في البيت ورسمي وقدام الأهل

ونصيحة لأي بنت من بناتنا ... لو في يوم حسيتي أنك حتنكسفي لو أبوكي أو أخوكي شافوكي وأنتي بتعملي حاجه يبقى تأكدي أن الحاجه دي غلط .. ولو حسيتي أن واحد بيحكي قصص كتير يبقى بيسرح بدماغك

وربنا يحميكم جميعا

[بنت شعنونة]

طب معلش اسمحولي احول الكلام شوية على جزء من الموضوع دا

واللي انا قصدي عليه

هوا

الصياااااااادين

دول عبارة عن ناس قاعدا ليل ونهار ع النت وظيفتهم انهم يشوفوا اي بنت عشان يرسموا عليها دور الأحترام او دور الحب ايا ما كان

ومنهم اللي بيرسم عليها دور الزواج

يعني مثلا اعرف واحد رسم على واحدا دور الحب وكان يكلمها بينه وبينها كدا ع البرايفت بس وراااااااسم الهيام

وفي نفس الوقت راسم نفس الدووووووور على بنت تانية برضه

وشوية ودخل في رسم دور الجواز وبقى يكلم البنت دي ودي ع التلفون

ويكلم مامتها كمان وحاجات كدا

في اشكال من دول كتيييييييير جدا

منهم اللي بيتكشف بدري بدري والبنتين يبقوا عارفين نظامه

ومنهم اللي بيكمل اللعبة والبنتين على عماهم

وهوا مجرد مرييييض نفسي

كل هوايته جمع البنات مش اكتر؟؟؟؟؟

ودول موجودين في كلللللل المنتديات حتى هنا كمان...

طب الحل مع دول يكون ايه؟؟

[الطفشان]

صح في صيادين

مش بس في مجتمعاتنا

بل هنا ايضا

و كذا واحدة انتحرت و اللي قتلها صاحبها و اللي اتحاكم

بس الحل بسيط

مش قلنا اللي جد يروح يتقدم؟

و يسألوا عليه و على سيرته و اصله و فصله؟

خلاص

[DARWEEN]

أيه يادكتورة ماتقري اللي أحنا كاتبينه

وبعدين شوفوا بقى يابنات أنا حاتكلم معاكم بصراحة أب مع بنت من بناته بينصحها

المثل المصري بيقول ... أيش عرض الأعمى .. قال قفة عيون

يعني أي ولد أو شاب صغير وحيلاقي فرصة يتكلم مع بنت سواء في النت أو في التليفون أو على البوتاجاز على رأي لانسيلوت مش حيتأخر لو لم يكن عنده وازع دين وأخلاقي بالقدر الكافي ( وهذا نادر هذه الأيام )

يعني في الأول وفي الآخر (برضة باتكلم كأب ) أتصال البنت بالشاب منفردااااااا بأي نوع من أنواع الأتصال مرفوض بصراحة

شوفوا حتقولوا عليا رجعي حتقولوا متخلف مافيش مانع بس ده شعوري كأب عنده بنت

وبرضه بمنتهى الصراحة اللي يقولك علشان التفاهم وعلشان يحصل توافق ... أسمحوالي كل ده ضحك على الدقون

أيه يابنات زعلتوا من رأيي ...

مش مهم أزعلوا زي مانتم عايزين بس المهم تكونوا في أمان

وعندك وش أب مكشر ومبرق عينيه وعفاريت الدنيا والآخره بتطنطط في وشه ووش اللي يقابله

[Farah]

الموضوع متهيائلي واخد شقين

الشباب اللي بيعاكس ،،،،،والشباب الجد

كاوسيله للتعارف دون التمادي فيها ممكن تكون زي اي وسيله ،،،قابله للنجاح او الفشل لانه تعارف فقط ،،،،هما مش حيتجوزوا علي النت

انما المعاكسات دي موجوده في كل مكان في النت وغير النت المهم الاستعداد سواء من البنت او الولد

[DARWEEN]

يافرح اليوم وكل يوم أنشاء الله

الموضوع له شق واحد وحيد مفيش غيره ..

يابنتي باب البيت معروف واللي عاوز يتعرف فالطريق المحترم موجود وأهلا وسهلا بيه

غير كدا يبقى بيهرج

أما اللي بيعاكس فده موضوع تاني أحنا كل كلامنا على التعارف على النت وفتح مجال للحواديت اللي عواقبها غير مضمونه

يعني التعارق على النت لازم لازم ياأما ينتهي بميعاد بره ومقابلات ياأما بأرسال صور ياأمى بمكالمات تليفون

وكل ده مرفوووووووووووض

[Lancelot]

أظن لما نناقش فكرة تقدم عريس من الإنترنت ... يبقي إحنا موافقين مسبقا علي فكرة إن الولد و البنت ممكن يتعرفوا علي بعض الأول قبل ما يتقدم لها .... اللي مش موافق علي إن الولد و البنت ممكن يتعرفوا علي بعض الأول قبل ما يتقدم لها .... يبقي مش موافق علي إنه يتقدم لها من النت ... من التليفون .. أو حتى من البوتجاز ...

بالنسبة لموضوع إنه بيخفي شخصيته .... فإحنا قلنا إن البنت لازم تكون حذرة ..... و هي أكيد عاقلة كفاية إنها تحدد مين كويس و مين وحش .... لكن اللي عايز أقوله ... إنني متضايق أوي من الهجوم المستمر و المتواصل علي الشباب ... يعني مش معقول كده .... أنا قرأت كلام كتير كله إنتقاء لنماذج غريبة و منحرفة يتم وضعها – بقصد أو بدون قصد و أنا متأكد إنها بدون قصد – كأنها صورة للشباب عامة ..... يا إخوانا حرام عليكوا اللي إنتوا بتعملوه ده ... إرحمونا شوية .... النماذج اللي إنتوا عمالين تتكلموا عليها ديه قليلة و مش بالإنتشار ده ... و كمان إحنا كشباب بنرفضها و نقف ضدها ... و مش معقول تحسبوهم علينا ....

أنا عارف إنكم هتقولوا إن التعميم مش قصدنا و ديه مجرد نماذج و كل الكلام ده ... لكن بصراحة مش هو ده اللي أنا شايفه .... في شباب كتير أوي كويس جدا ... الشباب ده إنتوا – مش إنتوا شخصيا لكن إنتوا ككبار – متجاهلينه ... و مركزين علي الشباب الفاسد و الصايع و اللي بيمثل دور المهذب و دور الحب و دور المش عارف إيه ... الشباب الكويس ده عايز فرصة ... فرصة يثبت فيها نفسه ..... و علشان ما نخرجش عن الموضوع نعطي مثال علي الموضوع ... فيه شباب من دول مش عايزين جواز الصالونات ... تقدروا تقولوا رافضينه .... عايزين يتعرفوا علي البنت اللي هيقضوا معاها بقية حياتهم .... و ده قبل ما يتقدم أو يتخذ خطوة رسمية في إتجاه الجواز .... و ده في إطار من الأدب و الإحترام المتبادل و في ظل معرفة أهل الطرفين ... إيه المشكلة في الكلام ده ... ما أظنش إنه فيه حاجة غلط ... لكن لأ إحنا مش بنعمل كده .. إحنا نأخد المثل السئ و نكبره و نخاف منه و نمنع أي حاجة بحجة إن كل الناس كده بهذه الصورة السيئة و علي طريقة الباب اللي يجي منه الريح .......

ليه نأخد المثال السئ ... ليه عمرنا ما نستشرق الحاجة الكويسة اللي في الأشياء و نأمل فيها و نشجعها .... و علشان الشباب إياهم – ربنا يأخدهم – ممكن نكون حذرين .. إحنا مش هنلغي عقولنا يعني ... أخر حاجة عايز أقولها اللي يتسلع من الشوربة مش لازم أبدا ينفخ في الزبادي .....

معلهش أنا طولت عليكوا لكن بصراحة مرراتي إتفقعت ..... و يا ريت محدش يزعل من كلامي لكن أنا كتبت كل اللي جواي و مضايقني جدا ....

و علشان اللي سألوا علي البوتجازات .... أنا كنت بأهزر يا جماعة ... أهو مثال و خلاص ... و بعدين مش في أمريكا غرف للغسيل ... تلاقي فيها غسالات كتير كده .... هناك الشباب اللي عايشين لوحدهم بيتعرفوا في غرف الغسيل ديه .... هما شعب نضيف إحنا شعب جعان .. يمكن يعملوا عندنا غرف للبوتجازات ..... "وش بيضحك" ....

[ابو يوسف]

هل الانسان يكتب كما يتحدث فى التليفون ؟؟؟؟

هل يتحدث فى التليفون كما يتحدث وجهاً لوجه ؟؟

هل يتحدث وجها لوجه - ايام الحب و الخطوبة مثل ما بعد الزواج ؟؟؟

كيف يمكن اتخاذ قرار خطير مثل هذا من اجل اعجابى - مثلا- بكلمات الكترونية خطتها فتاة ..؟؟؟ او بصوتها عبر التليفون او عبر الكمبيوتر ؟؟

هذا مجرد سؤال ؟؟؟

[Advisor]

موضوع قديم وجد عددا من الزوار يتصفحوه

ما سبق كان استهلالا لابد منه

ترى بعد مرور عشرة سنوات ما هو الوضع الآن و هل تبقى نفس وجهات النظر

[Grandma]

أنا شايفة ان الانترنت أفضل من زواج الخاطبة و الصالونات كبداية تعارف

بعد ما العروسة تكون اتعرفت على أفكارالعريس وطباعه من خلال الانترنت وحصلت بينهم الكيميا المطلوبة ...

آجلا أو عاجلا هيتشاف العريس وجها لوجه و هيتعرف أصله وفصله و هتتعمل له الاختبارات اللازمة فيما بعد.

يعني الانترنت مجرد وسيلة إضافية للتعارف .

و في النهاية الزواج هيفضل بطيخة وكل واحد وحظه أيا كانت وسيلة التعارف .

[Grandma]

هل الانسان يكتب كما يتحدث فى التليفون ؟؟؟؟

لأ

هل يتحدث فى التليفون كما يتحدث وجهاً لوجه ؟؟

برضو لأ

هل يتحدث وجها لوجه - ايام الحب و الخطوبة مثل ما بعد الزواج ؟؟؟

أكيد لأ

كيف يمكن اتخاذ قرار خطير مثل هذا من اجل اعجابى - مثلا- بكلمات الكترونية خطتها فتاة ..؟؟؟ او بصوتها عبر التليفون او عبر الكمبيوتر ؟؟

دا يعتمد ... الأهم عندك الشكل ولا المضمون

وعلشان نتكلم بصراحة الشكل و المظهر و المكانة الاجتماعية تأتي في مرتبة متقدمة جدااا عن المضمون اللي بيظهر من خلال الكتابة دا اذا كان الكاتب صادق و بيعبر عن نفسه وأفكاره مش قص و لزق

هذا مجرد سؤال ؟؟؟

ودي مجرد إجابة :)

[Grandma]

بمناسبة العرايس و العرسان

https://www.youtube.com/watch?v=xKjv2xN145Q