اجازة شهر فى السنة

[moheltohamy]

اسمحولي يا جماعة أعبر عن حزني للوضع اللي انا شايفه هنا!

بصراحة حاجة تزعّل لما أشوف 2 من أعمدة المنتدى ؛ ويصبحوا من المطاريد! أياً كان السبب ، فهم زملاء أعزاء ... جيت لقيتهم قبلي ، ويزعلني لما ألاقي الدنيا بتلطّش فيهم كده ، بغض النظر عن الأسباب!

نيجي بأه لموضوع التحفز اللي شايفاه هبه من ناحية الإدارة تجاه أحد الزملاء!

اسمحيلي يا هبه أقول لك : إني استغربت زيك من تصرّف الإدارة تجاهه!

والله بجد استغربت!

استغربت همه ليه أصلاً ما وقفوش عضويته بأي شكل هوه والعضوة صاحبة الصيحة الجهادية ضدنا!

لما قريت الكلام هناك في منتداهم ، أنا اتصدمت ، وتوقعت رد الفعل... مع السلامة ، وما شرّفتوناش الشوية اللي قضيتوها معانا!

لما أجد حملة تحاك ضد منتدانا ، ويتم الحشد لها - أياً كانت المبررات - يبقى أبسط دفاع سلبي... سيبونا في حالنا ، وغير مُرَحّب بيكو وسطنا!

المنتدى كان بسيط جداً ، ولغة الحوار هادئة وراقية (زي هدوء تورونتو اللي حبيته ، وحسسني إن الواحد صحته هترتفع هناك) ؛ وبدأ شوية شوية يقلب إيجيبشيان ستايل! (الله يمسيها بالخير نيكول :lol: )

وبدأ الشد والجذب! والتطاول والشخصنة ، والتجمعات والتحالفات والمساندات من الجانبين! لم يعد هذا بيتي اللي تعوّدت عليه!

يا ربي... يعني أرجع المنصورة ، مش دي البلد اللي اتربيت فيها!

ميت غمر ، مش دي اللي عشنا فيها!

القاهرة... بتتغير يوم عن يوم! وإحساس الغربة بالاقيه في مصر! وكلمة Home مش لاقيلها مكان!

حتى الـ E-Home ، بيتغيّر ، وبابدأ أحس بالغربة فيه؟!

هيه الدنيا ليه ملطّشة معايا كده؟!

المنتدى يا هبه منتدى معتدل ؛ محاورات المصريين ؛ وليس محاورات الإسلاميين أو السلفيين ، أو القرآنيين ، أو المسيحيين!

هناك منتديات إسلامية ودينية متخصصة. منتدانا هذا معتدل ، وليس فيه هذا الفكر (خطب المنابر). وإذا كنتي ملاحظة إن دايماً المشاكل مع أشخاص بعينهم ، من أغلبية الأعضاء ، ودايماً بتقلب بخناقة!

أليس هذا دليلاً على إن هذا الفكر أو هؤلاء الأشخاص الكلام غير مُتَقبّل منهم؟!

بيقولوا اللي على راسه بطحة... يحسس عليها!

وانا راسي كلها ورمت لما قريت اللي اتنشر علينا في المنتدى إياه!

واللي أستغربله ، إيه السماحة دي اللي بيتعامل بها الأعضاء والإدارة مع هؤلاء؟!

خلاصة الموضوع... المفروض يكون فيه تحفز ، وأنا شايف إنه يبقى أقل من المطلوب كمان!

أنا آسف يا حسام إن موضوعك ، اللي معمول عشان تلطيف الأجواء والنفسيات في رمضان قلب كده!

على رأي اللي قالها... دا مش رمضان خالص! wst::

تم تعديل 3 سبتمبر 2008 بواسطة moheltohamy

[عصام]

يعنى بالله عليكم

لما الواحد يفك من مشاغله وزهقه وصداع الشغل والبيت والدنيا واللى فيها وييجى هنا يهدى أعصابه أو يقول أو يقرا كلمتين يستفيد منهم حاجة جديدة أو يفيد حد بحاجة جديدة أو حتى يوطد علاقته بناس حبهم يقوم يلاقى الصداع دا؟

يا هبة .. لو كنتى فاضية إحنا مش فاضيين ولو كنتى غاوية مشاكل إحنا مش غاويين

ونفس اللى أتاح للزملا اللى بتدافعى عنهم الفرصة انهم يتكلموا ويعبروا عن رأيهم هو برضه اللى مديلك الفرصة تقولى وتشرحى

لكن للصبر حدود

[حسام يوسف]

والله يا عم تهامى

انت شايف الموضوع كان اية

وبقى اية

انا مش هعلق

لأنى سايب الأمور للادارة عشان اعرف رأيها

وكل سنة وانت طيب

[~Heba~]

يا لولا نفسى تكونى واضحة زى ما انا واضحة كده

انتى شايفانى ماشية بلطش فى الخلق يعنى

ماهو عندك موضوع الباشمهندس ياسر رديت فيه فى نفس اليوم او قبله تقريبا و ردودى عادية جدا

اما التحفز الذى تقصديه فهو له سبب واحد

و اظن واضح تماما

انا لا اطالب سوى بالمساواه فى حماية الاعضاء

انا مش شايفة المواضيع الدعوية تضر بالمنتدى و بمثقفيه بالعكس احنا نحتاجها خاصة اذا كانت معتدلة

واخد بالك يا محمد تهامى معتدلة

يعنى بلاش تقارنها بمواضيع جويرية ارجوك

و بعدين اللى فات مات و حرب المنتديات خلصت من بدرى و بالفعل سقط فيها ضحايا انذارات و توقيفات منهم عضو اشتكى لى و انا معرفوش و الله اشتكى انه اتوقف ظلم فى الحكايه دى و هو مش متورط فيها

و انا طبعا آسفة انى مقدرتش اعمله حاجة

اللى اتظلم و لو حتى فى منتدى ربنا بيجبله حقه من اللى ظلمه

و ان مكنش مظلوم يبقى برضو سوء الظن عاقبته وخيمه

انا كل همى دلوقتى اللى عايز يناقش فى المواضيع الدينية يناقش الفكرة لكن مش على طريقة المواضيع دى من مقامنا..تقريبا ده التوضيح للمرة الكام مش فاكرة

و زميلنا سيف الحق طبعا شاف الموضوع ده و مردش فيه هو حر

بالعكس انا شايفة عدم رده افضل لان تدخلى انا كان نوع من الحيادية فانا رغم خلافى السابق لكن معه و مع السيدة الفاضلة والدته كنت صاحبة مناقشة المشكلة دى و ده ينفى تماما اى شبهه للتحزب و الشللية فلا انا من شلتهم لادافع عنهم او من حزبهم انما سمحت نفسى بتكرار المثل الذى حدث معى سابقا و كان بطله الاستاذ محمد...تصورى هو فتح موضوع مكانى يحتج على قرار الادارة بتغيير عنوان موضوعى...او هكذا اعتقدت

و آدى اللنك يا لولا

http://www.egyptiantalks.org/invb/index.ph...ic=18120&hl=

محدش قاله ساعتها

Mind your own business

[~Heba~]

يعنى بالله عليكم

لما الواحد يفك من مشاغله وزهقه وصداع الشغل والبيت والدنيا واللى فيها وييجى هنا يهدى أعصابه أو يقول أو يقرا كلمتين يستفيد منهم حاجة جديدة أو يفيد حد بحاجة جديدة أو حتى يوطد علاقته بناس حبهم يقوم يلاقى الصداع دا؟

يا هبة .. لو كنتى فاضية إحنا مش فاضيين ولو كنتى غاوية مشاكل إحنا مش غاويين

ونفس اللى أتاح للزملا اللى بتدافعى عنهم الفرصة انهم يتكلموا ويعبروا عن رأيهم هو برضه اللى مديلك الفرصة تقولى وتشرحى

لكن للصبر حدود

يا عصام الله يكرم اصلك يا شيخ

اللى بيكون فى موضع سلطة مبيعملش كده

انا اسأت فقومونى و ان احسنت فأعينونى

و بعدين هو فيه اسهل من طسة الانذار؟؟؟

مكنش سى السيد ادانى اتنين فى يوم واحد

و مين قال انى فاضية انا مزنوقة لشوشتى فى الاعداد لمشروع تخرجى بالاضافة لامتحان مايكروسوفت التانى بعد اسبوعين

انما تقدر تقول معرفتش امسك نفسى و الموضوع ميسكتش عليه

و بعدين اذا كنت تعبان للدرجة من مشاغل الاشراف مكنتش اتولتها و انت عارف انه فيه ناس فاضية و غاوية مشاكل زيى wst::

ماذا لو لم تصبح هبه عضوة فى المحاورات...سؤال يستحق المناقشة :lol:

تم تعديل 3 سبتمبر 2008 بواسطة ~Heba~

[لولا]

يا لولا نفسى تكونى واضحة زى ما انا واضحة كده

هبه .. انا طول عمرى واضحه وبقول الحق.

ممكن اقول رأى من غير ما احول الموضوع

لساحه محاكمه ومتهمين ومظلومين

واعتبر نفسي القاضى.

[عصام]

لا حول ولا قوة إلا بالله

يا هبة

النافذة اللى طلبتيها تفضل متاحة ليكى من أجل التواصل لسا مفتوحة

أرجوكى ما تقفليهاش

ويا رب يكون دا آخر كلام فى المسألة دى

[Alshiekh]

الأستاذة الفاضلة / ~Heba~

صدقينى لو كان هذا هو اسلوبك فى الحياة ( خلق المشاكل ، واستقراء مكنون الصدور ) فصدقينى ستملأين حياتك بالمشاكل ولن تبقى لنفسك صديق واحد.

الناس تغوص فى اعماق البحار لاستخراج اللؤلؤ وليس لاستخراج المشاكل ، وتحفر باطن الارض لاستخراج الكنوز والمعادن والبترول والفحم ، وليس للبحث عما يؤذيهم ويعكر بالهم وبال من يحيطون بهم ومن يتعاملون معهم ، فلاداعى لان تدخلى منجم الذهب لتبحثى عن حيات وثعابين تلقيها فى وجوهنا ، بل سنكون سعداء شاكرين ان تخرجى لنا ببعض من ذهبه.

ليتك تستخرجين من كتابات الآخرين مايفيدك وليس ماينغص عليك وعليهم اوقاتهم.

ولو كنت قد بألمعيتك قد فهمتى ان فلانا يقصد علانا فى كتاباته فالافضل لك ان تبقى مافهمتيه بداخلك ولاتصرحى به لانك ان صرحتى به فهذا يسمى " فتنة " وانت تعرفين ماالفتنة وقانا الله واياك شرها.

وليتك تطبقى على نفسك ماكتبتيه سابقا

اللى مش بيحب يسمع الخطب ببساطة ميدخلش الجامع....قصدى ميدخلشى الموضوع اللى فيه خطبة

فيه ناس تانية محتاجة الخطب :lol:

فلتقل خيرا اولتصمت

ده حديث بيعلموه للاطفال فى الابتدائى wst::

وفى حال ان كنت لاتزالين تصرين على ممارسة هواية قراءة مافى الصدور ، فلو سمحت ابتعدى عن صدرى وعن كتاباتى ولاتتبرعى بتحليل ماأكتب.

شكرا

[~Heba~]

طاقة القدر اتفتحت لى بلاش ابقى ناكرة للجميل و اقفلها

استاذ محمد انت بينك و بين ربك و انا مليش دعوه

لولا انتى واضحة للجميع الا لى انا للاسف

عصام شوقى اسفة انى عطلتك شوية عن قهوه ماذا لو لم...تفضل مشكور و تقبل اعتذارى

و سلامى للاستاذ ابو محمد فى غيابه

[لولا]

لولا انتى واضحة للجميع الا لى انا للاسف

بجد مش فاهمه انت قصدك ايه؟

ازاى حد ممكن يكون واضح للكل ماعدا شخص واحد؟

يبقى ساعتها المشكله فى الكل ولا فى الواحد؟

ليه يا هبه بتخلى الموضوع يظهر ان فى ضحيه وفى ظالم

وفى غلبان وفى مفترى..

وايه اللى يستاهل نوصل المواضيع للمرحله دى ؟

[~Heba~]

لولا انتى واضحة للجميع الا لى انا للاسف

بجد مش فاهمه انت قصدك ايه؟

ازاى حد ممكن يكون واضح للكل ماعدا شخص واحد؟

يبقى ساعتها المشكله فى الكل ولا فى الواحد؟

ليه يا هبه بتخلى الموضوع يظهر ان فى ضحيه وفى ظالم

وفى غلبان وفى مفترى..

وايه اللى يستاهل نوصل المواضيع للمرحله دى ؟

قصدى انى مفهمتش ردودك فى الموضوع ده و هى غامضة بالنسبة بس دى كل الحكاية

و انتى مش بطالبه بكثرة الشروح

انا بس اللى عقلى على قدى :lol:

و مفيش حاجة تستاهل هى بس المحاورات متغيرة wst::

ربنا يردها بالسلامة

[زقلط]

بجد

أصبح باب هدى الاسلام وموضوعات جادة من الابواب التى يحتدم فيها النقاش بشكل يومى

ايا كانت القضية

بين الفريقين تدور نقاشات حادة

بعد عام واحد كامل فى المحاورات اصبحت أزعم انة لا طائل منها

دايما خلاف

ومحدش مستعد يغير وجهة نظرة

طب لية اصلا؟

احنا المفروض اننا اخوات فى الانسانية

والوطن

لية هنقعد نتخانق؟

محدش يقولى دة جدال صحى ونقاش مفيد

لأ

انا رأيى المتواضع انة مش مفيد لأن مفيش حد بيتغير

أو مستعد يتغير

طيب

مش هنتحرم من موضوعات الخناق

ممكن ناخد أجازة شهر واحد اللى هوة شهر رمضان من الموضوعات الخلافية الحادة؟

ممكن نفضل على هدوء لشهر واحد؟

وباذن الله نرجع للموضوعات اياها دى تانى

أتمنى

كل سنة وانتوا طيبين

يا أحلى منتدى

واحلى ناس عرفتهم

دعوة جميلة يا استاذ حسام لوقف النقاش في باب حوارات جادة وهدى الاسلام لمدة شهر بسبب حدة الحوار.

وعلى الجانب الآخر – بسبب تعليقك على احدى الموضوعات الحالية في باب الاسلام والتي اتسمت بالفعل بما طلب، موضوع هادي لا به نقاشات أو خلافات حادة – أرى تناقض في كلامك.

[iloveegypt]

صلوا على النبى يا جماعة رمضان كريم

مش عايزين حد يزعل من حد فى هذا الشهر الكريم

مهندسة هبة انت عضو مهم فى المحاورات واحترم ارائك ومش عايزينك تبقى زعلانة

وكذللك ا حسام انتا اخ فاضل وعزيز

والاخت لولا اخت فاضلة

ورمضان كريم :lol: wst::

[أبو محمد]

هبة ...

خدى حتة انجليزى تانية .. " !!!! Don't cry : Wolves "

A shepherd boy tending his flock one night amused himself by shouting to the local villagers, "Wolf, wolf!" when there was none, just to see them come running. He repeated the trick and each time the villagers came to help, just to find the boy had tricked them again. Later that night a wolf really did come. The boy again called "Wolf, wolf!", but believing it to be another trick, no-one came, leaving the wolf free to kill all the sheep he wanted

دى عن راعى الغنم اللى كان فاضى وحب يسلى نفسه فأخذ يصيح " الذئب .. الذئب " فيهرع أهل القرية لنجدته ليجدوا أن لا ذئب هناك ... وكرر الراعى فعلته أكثر من مرة للتسلية والضحك على أهل القرية الذين صدقوه إلى أن أدركوا أنه يتسلى بهم .. وعندما هاجمه ذئب حقيقى وأخذ يستنجد فعلا بأهل قريته .. كانت مصداقيته قد ضاعت .. فأكل الذئب ما شاء له أن يأكل من غنمه

يابنتى .. لعلك قرأتى مداخلة الفاضل / moheltohamy التى استغرب فيها من عدم اتخاذ قرار "راديكالى" ضد من تدافعين عنهم .. كل ده وشايفة إن فيه ظلم أو تحزب ؟

أنا لا أريد أن أقول رأيا مكررا فى أسلوب الفاضل / سيف الحق .. خاصة وأنه ومعظم من ينتهجون نهجه متفرغون فى رمضان لأداء الفروض والسنن (أثابهم الله) .. مع أنه كان له موضوع يتساءل فيه عن الظاهرة !!!!!!!!!

كل واحد حر فى التعبير عن رأيه .. وكل واحد حر فى أن يؤيد أسلوب معين فى نفس الوقت اللى فيه ناس تانية لا يعجبها هذا الأسلوب ويعبر عن عدم رضاه

كيف تدافعين عن حرية البعض وأنت تستنكرين حرية البعض الآخر ؟ ...

خللينى بقى أكتب ملحوظة إدارية باللون الإدارى اللى انتى كتبتى بيه

السادة الأعضاء ..

نلفت أنتباهكم إلى المادة رقم 15 من قواعد المشاركات فى "محاورات المصريين" والتى نصها

15- ما ينشر في صفحات المنتدى من حوارات لا يمثل الرأي الرسمي للموقع و إدارتها، بل هي آراء للكتاب و هم يتحملون تبعة آرائهم، و تقع عليهم وحدهم مسؤولية الدفاع عن آرائهم وأفكارهم.

الإدارة

فلا تكونى ملكية أكثر من الملك يا بنتى العزيزة ... و .... " !!!! Don't cry : Wolves "

[capitshino]

انا مش عارف ايه اللى حصل للمحاورات .. لا ننتهى من توبيك كله خلافات الا ويفتح اخر

بالامس القريب ماكنت الاخت السعودية التى نذكرها جميعا . ولقد اثر فى جدا مداخلتها - ولا انسى رد الاخ الفاضل ابو محمد عليها الذى اوفى واوجز فى نفس الوقت . وانتى الامر

واليوم موضوع تانى ولمجرد تذكير احد الاخوة او الاخوات بان يهدئ شوية الا واجده يتطاول على اسم "كابتشينو". لا اتذكر كام مرة تم التطاول ولكن اولها كان من عضو يدعى بقشيش ولقد قامت احد اكثر الاخوات احتراما وثقافا بالمنتدى بتنبيهى لذلك . واخرها كان وللاسف الشديد من احد المشرقين الذين للكثيرين قدوة من المفترض يحتزى بها. وعندما يصل الى ان يكون التطاول من احد المشرفين يكون الوقت قد حان لان اقلص مداخلاتى الى الحد الادنى ومن ثم توديع الاخوة والاخوات الاعزاء بالمنتدى.

ارقى المنى

احمد

[~Heba~]

لحظة واحدة يا استاذ كابتشينو

انا لم اتطاول عليك

كل ما قلته انى كمان صايمة و مش بشرب كابتشينو دى فها حاجة دى

رغم انى فى الحقيقة بحب الكابتشينو جدا و الاسم مش وحش و الله و عاجبنى انا شخصيا

و انا بالفعل اعتذرت لك و قلت حقك عليا فى احدى المداخلات التى حذفت

اذا كان لابد من احد انه يترك المنتدى فليكون انا

لانه شوية كده و بابا ابو محمد حيقول عليا مجنونة

اذا كان الجنون هو المحافظة على محاورات المصريين كما عهدتها فليشهد الاعضاء انى مجنونة

[هشام عباس]

صباح الخير

رمضان كريم

وكل سنه وانتو طيبين

بالرغم من اني متابع يومي لكن مداخلاتي قليله

لكن بجد انا حزين جدا جدا

ارجوكم كاكم رجاء خاص ......... بلاش النبره الي فيها حده ذائده

نحن في ايام كريمه

طيب تصدقو اخر حاجه كنت اتوقعها اني الاقي المحاورات في رمضان بهذا الشكل

لا حول ولا قوة الا بالله

[عصام]

أستاذ حسام ..

أعتقد فكرتك وصلت .. وطلبك مقبول لدى الغالبية ..

أستاذة هبة ..

رسالتك أيضا وصلت ..

وأستأذن صاحب الموضوع فى إغلاقه

الإدارة