ترحيل 150 مصري من فرنسا

[ابو حلاوه]

وصل إلي القاهرة امس 150 شابا مصريا قامت السلطات الفرنسية بترحيلهم من باريس بعد ان تعرضوا لعملية نصب من عصابة مصرية أوهمتهم بقدرتها علي ادخالهم أوروبا مقابل 20 ألف دولار للفرد.. وسوف تقوم السلطات الفرنسية خلال الايام القادمة باعادة المزيد من الشباب بمعدل 11 فردا علي كل رحلة طيران. واكد هؤلاء الشباب لدي عودتهم الي القاهرة ان هناك عددا من الاشخاص ينتشرون في وسط الدلتا بين دوائر الشباب ويروجون بينهم لفكرة السفر إلي أوروبا والحصول علي عمل هناك. واضاف هؤلاء الشباب ان العصابة تقوم بحجز التذكرة علي الخطوط الفرنسية إلي باريس 'ترانزيت' عبر كوبا أو داكار وعند وصولهم إلي باريس يطلبون منهم تمزيق جوازات سفرهم والادعاء بأنهم عراقيون ويطلبون حق اللجوء السياسي. وقد قام هؤلاء الشباب المرحلين بتحرير محاضر ضد اعضاء العصابة

http://www.akhbarelyom.org/akhbarelyom/iss.../3055/0400.html

عشرون الف دولار ثمن فسحة بالطائرة من القاهرة لباريس

لا حول و لا قوة الا بالله

[Spider]

حالة البلد مخلية الشباب عايز يهج بأى ثمن

لكى الله يا مصر ويا شباب مصر

[صعيدي]

بس الغريبة ان 20 ألف دولار مبلغ مش صغير يعنى يساوى 100ألف جنيه مصرى تقريبا ممكن الشاب يبدأ به أى مشروع صغير صح و لا لأ اصلى بقالى كتير منزلتش مصر.

[Spider]

فعلا 25 دولار مبلغ كبير جدا جدا

أنا آخر رقم سمعت عنه كان 5000 جنيه مصرى وخدوا الصابونة برضوا

وخصوصا ان هؤلاء الذين دفعوا هذه الأموال الضخمة سوف يذهبوا كلاجئيين يعنى العملية مش أكيده

أنا شاكك فى الرقم ده جدا جدا وحاسس أنه مبالغ فيه لأن اللى معاه 20 الف (مش 100 ألف) ممكن يعيش عيشه معقولة فى مصر لحد ما يجد شغلانه مناسبة

[الطفشان]

فعلا الرقم غريب

أي شاب عنده 100 الف جنيه فهو يعتبر غني في مصر

و يمكنه الزواج، و يدفع مهر محترم و فرح أبهة و يسكن بنظام الايجار الجديد

إيه اللي يجبره على الهروب من مصر بدون حتى احتمال قوي للحصول على اقامة شرعية، ناهيك عن الوظيفة

على فكرة

الصين فيها عصابات لتهريب الصينيين الى أمريكا

و يدفعون مبالغ طائلة

و لكن بالدين

و من يهرب و يصل الى امريكا، فعليه العمل ساعات طويلة لمدة سنين، و يترك بدون اقامة شرعية ليعمل باجر زهيد جدا و متخفي عن اعين السلطات

و كل هذا لسداد الدين، و الا تعرض اهله في الصين لمضايقات شديدة جدا!

[ragab2]

الشباب معذور

عليه التزامات وتكوين اسرة ومساعدة الأهل فى بعض الأوقات

[Proud Muslim]

بصراحة حاجة تجيب احباط ..!!

100 ألف جنيه أو يزيد و يسيب مصر .. هل هذا بطر أم سفه ؟؟

كما قال الأستاذ الطفشان من يمتلك هذا المبلغ في مصر يتعبر ميسورا أو غنيا .. و بامكانه فعل الكثير !!

فلماذا السفر اذا ؟؟

طيب .. هو يمتلك المبلغ و يريد أن يسافر ليحسن دخله أو ليجد وظيفة تناسب مؤهلاته .. ماشي ..

بس يدفع 100 ألف علشان كده !!

لا حول و لا قوة الا بالله !!

هو متخيل انه هايقبض كام في الشهر ؟؟

منذ سنتين .. قلت أعمل في السياحة في الصيف من باب تغيير مجال العمل و كسب خبرة في التعامل مع الناس .. و عملت في احدى الشركات التي تقوم برحلات بالسفن في الصيف بين عدة دول .. طبعا لا توجد تأشيرة في هذه الرحلات ..

يعني الراكب عند نزوله في البلد يعطي كارت مغادرة ميناء على أن يترك جواز السفر في المركب ..

و كان من ضمن البلاد .. اليونان ..

كان ييجي ناس من الأقاليم و ناس مهنيين .. من كل المهن الحرفية .. و يقول أنا مستعد ادفع أي مبلغ و أسافر ..

طبعا الموضوع كان بدأ يبقى خناقة ..فقررت الشركة عمل تأمين قدره 10 آلاف جنيه لكي يضمن عودة الشخص ( و هذا شرط غير معلن للتطفيش يعني للناس اللي شاكلها هاتهرب ) ..

و هذا بعد ان يكون حاصل على مؤهل و وظيفة محترمة ( شرط غير معلن أيضا ) ..يعني الراجل ييجي يحجز .. أبص في الجواز ..ألاقي مؤهل متوسط او ماشابه ..يبقى أرفض بلباقة ..

المهم .. ييجي واحد كاتب مهنة خيالية .. مدير مركز زراعي .. أي كلام طبعا .. مظهره لا يوحي بانه مدير كشك .. بس طبعا الواحد بيتكسف ..أقول الشرط بتاع المؤهل و الوظيفة ..يقول انت شايفني زبال !!

أقول ماشي .. الشرط الثاني .. المهم يقول انا هادفع 10 آلاف جنيه .. أقوله طيب روح عند ضابط التصال في مجمع التحرير ( و الله لا أعلم ما وظيفة هذا الضابط حتى الآن )

يقولي طيب .. و علشانك 5 كمان علشان المسائل تمشي !!!!!!

في منهم عرض 30 ألف جنيه !!!!!!!!!! بس دي كانت رايحة فرنسا !!

المصيبة ليست في أنه مستعد أن يدفع رشوة فهذا أمر طبيعي في مصر .. لكن أنا باقول بس ..طالما معاك المبلغ ده .. اعمل بيه أي حاجة .. محل عصير قصب ..تاكسي .. اي حاجة .. ليه ؟؟

و في الآخر ..هايروح و يهرب بدون جواز السفر ..

و لما يتمسكوا ( و هذا أكيد ) بيرجعوا على نفس المركب .. و طبعا مبلغ الضمان .. يبقى بخ !! و ييجي يعيط و يعمل هليلة !!

مناظر كانت تصيبني بالأسى و الحزن الشديد ..

أنا كنت بعيط و الله من اللي بيحصل لمصر و ناس مصر ..

حاجة تبكي على حالنا .

[alnadim]

حد لسه فاكر حكاية ان الموظف المصري لما كان يتنقل بعيد عن مسقط راسه يقول وحياتي غربتي

وحد شاف احد المسؤولين المصريين اللي كانوا استضافوه في محطه غربيه وبيسألوه عن سياسة الحكومة المصريه تجاه الازمه الاقتصاديه فقال : اننا نسعي للبحث عن اسواق عمل للمصريين بالخارج فالمذيع بدون دبلوماسيه رد عليه هو في سياسه تكون مرتكزه علي فكرة ترحيل الشعب

وحد فاكر لما كانوا المصريين يذهبون الي العراق اثناء اشتعال الحرب مع ايران دون ان نتساءل ما الذي يدفع الانسان لترك الوطن من اجل الذهاب اللي مكان مشتعل

الايبرر هذا وغيره ما تحدثتم عنه من وقائع محزنه

ومع ذلك يظل الراديو الحكومي وكذلك الفضائيات نتيجة للتقدم تذيع اغنية ياوطن تطن وا اتطنطن

ويخرج علينا الساده الحكام بابتسامات عبيطه فقدت حتي الحياء

مع تحياتي

[White heart]

ابو حلاوه كتب:

عشرون الف دولار ثمن فسحة بالطائرة من القاهرة لباريس  

لا حول و لا قوة الا بالله

هذة الكارثة من الممكن ان تضاف الى مهاذل من نفس العينة، كنا قد تناولنا احداها فى احداث مشابهة منذ بضع شهور...(اضغط على الطائرة)

كان الله فى عون أبناء هذا البلد..

[Guest Mohd Gramoun]

بصراحة يا جماعة انا موضوع النصبة دي بكام مأثرتش في لكن اللي شغل بالي و تفكيري حاجتين مهمين:

ليه المصري بيدفع فلوس عشان يتغرب و بعد ما يتغرب يدفع فلوس عشان يرجع مصر تاني.

موضوع السفر في الخارج ده صعب و عايز ضمانات كثيرة اولها عقد عمل قانوني و مكان عمل مناسب و إقامة قانونية.

لكن عشان أدفع فلوس و أعمل فيها همام في امستردام أخرتها هكون عثمان في اللومان أو أتحول و ابقي بدير في الدير