هو احنا ممكن نحقق حلمنا ولا ده كابوس برده

[حسن الاستاذ]

انا اسف على المقدمه المحبطه دى بس انا اول مرة دخلت فيها موقع محاورات المصريين والله حسيت بكابه واحباط الدنيا والاخره من لغه المغتربين فساورنى شعور غريب اننا اى الشباب ليس لنا اى امل فى تحقيق احلامنا وطموحاتنا والله انا لسه مخلص كليه تربيه وقلت ادور على شغل لقيت الحمد لله عقد مدرس وده بالواسطه لان عمى عضو فى المجلس وعنده معارفه وله فرص كل سنه بتجيله اتصل بيا وقالى على الفرصه دى انا فرحت وفى نفس الوقت الامر كان عادى بالنسبه لى لانى كنت متوقع الامر لكن الصدمه ان المرتب لقيته حيدخل فى200 جنيه قلت الحمد لله طبعا بس انا طموحى اكبر من كده طموحى انى اتزوج لانى لسه خاطب من اسبوع زالجواز عايز مرتب يكفى العيشه النار دلوقتى قعدت مع نفسى احسبها عشان اتجوز واسنقر واجيبلى عربيه صغيرة لقيت الموضوع يعدي ال1000 جنيه ويزيد بكتير للاسف انا حلمى وانا صغير انى ابقى استاذ والاساتذة فى الزمان ده فى مصر قصدى اكيد............. لقيت مقداميش غير السفر قلت اما اسال عن السفر سالت هنا لقيت اللى رد على باحترام واللى من غير وفى الاخر معرفتش الحل هل اسافر للخليج لتحقيق حلمى واعيش حياه جميله وهانئه ام ابقى فى مصر وهل السفر والغربه يستاهلوا وهل لو جالى عقد اوافق على طول وكيف اسافر للخليج وهل العمل الحكومى افضل من الخاص وكيف اقدم وماهى مواعيد التقديم والمسابقات .

انا اسف جدا على هذا المقال اذا اغضب احد منى بس حيران والله وارجع اقول هو احنا ممكن نحقق حلمنا ولا ده كابوس برده لو سمحتوا اللى قرا المقال يرد ولو بكلمه والكلمه الطيبه صدقه اخوكم حسن

انا استاذ لغه عربيه ابتدائى فهل من امل kingston_cd@yahoo.com

[HDarwish]

الموضوع كله على بعضه عملية نصيب وأرزاق .. واللي مكتوب عالجبين لازم هتشوفه العين

أهم حاجة الرضا علشان تبقى سعيد ومتهني بدونه والله عمرك ما هتشوف السعادة لو عملت ملايين الملايين

بص يا أخ حسن انا مضطر اقولك كلام اتقالي قبل كده في بداية المشوار وعملت أنا بجزء منه وما قدرتش أكمل الباقي

أولاً: لازم يكون لك هدف ويكون هدف رئيسي يعني هدف واحد ما تتخلاش عنه أبدا ودايما خليه قدام عينيك .. علشان بجد لو أصبح هدفين هتوه وهتحتار ولا هتقدر تحقق أي واحد منهم طالما حيرت نفسك

ثانياً: الغربة ليها ثمن .. وأنا متأكد ميه في المية عمرك ما هتعرف معنى كلمة الغربة ليها ثمن في الوقت اللي انت فيه ومهما زدنا وعدنا لإن الموضوع لازم تجربه بنفسك علشان تعرف معناه ... لو حسبتها صح وشوفت ان ثمن الغربة اللي انت هتتغربها دي هيتحقق وهيزيد كمان عن الثمن ده يبقى إنت في الحالة دي إنت الكسبان .. أما لو ما حققتش ثمن الغربة ده يبقى انت كده خسران

ثالثاً: كل واحد وله إمكانيات وطاقات ومهارات بتختلف عن الآخر .. حاول تعرف مهاراتك وطاقاتك وإمكانياتك إيه بالضبط .. وعلى قد لحافك مد رجليك وبعد ما نزود مهاراتنا وإمكانياتنا ممكن نمد رجلينا أكثر طالما اللحاف كبير والحمد لله ... ( إيه ده معليش سرحت شوية في موضوع اللحاف ده اصل حاسس اني عايز أنام)..

رابعاً: إكتسب من خبرات غيرك واللي يسأل مايتوهشي ... وما تعمليش فيها عنتر شايل سيفه ... مش هننحت في الحجر .. زي ما الواحد منا كانت بتاخده الهمة والحماسه قوي ويقول .. وديني إنت بس هناك وانا مش اشتغل ده أنا أنحت في الحجر ...

وفي الآخر نصيحتي ليك لو تعرف تعيش في مصر .. خليك أحسن .. أي أحسن بلا دول عربية بلا خليجية بلا أوروبية .. ما تعرفشي يبقى تكسب شرف المحاولة

والله كلامي مش تعقيد بس طموحك وطموحي وشباب كثير غيري وغيرك تعتبر نفس الطموح وبنتخيل إن مجرد السفر هيحقق الطموح دي كلها بس حتى لو حققنا جزء من الطموح ده فبيكون على حساب حاجات تانية أسمى وأرقى ... والحدق يفهم

تحياتي وتمنياتي القلبية بالتوفيق

[الباشمهندس ياسر]

.

انا اسف جدا على هذا المقال اذا اغضب احد منى بس حيران والله وارجع اقول هو احنا ممكن نحقق حلمنا ولا ده كابوس برده لو سمحتوا اللى قرا المقال يرد ولو بكلمه والكلمه الطيبه صدقه اخوكم حسن

انا استاذ لغه عربيه ابتدائى فهل من امل kingston_cd@yahoo.com

قال رسول الله صلى الله عليه و سلم ان ما عند الله لا ينال الا بطاعته فأجملوا فى الطلب او كما قال صلى الله عليه وسلم

[qenawy]

لا تغضب مني استاذ حسن

200 جنيه يا رجل

والله العظيم حرام اللي بيحصل في خيرة شبابنا

احزنتني

عموما طبعا انا اعرف المرتبات تمام حيث ان مرتبي بعد 11 سنة طبيب 804 جنيه بادفعهم ايجار للعيادة شاملا الكهرباء واجرة التمرجي

دخلي بعيد عن المرتب معقول والحمد لله

لا يوجد امل قريب في مصر

سافر افضل مية مرة

[حسن الاستاذ]

انا متشكر جدا لهذه الردود واتمنى ان ربنا يساعدنا للوصول للطريق الصحيح وانا والله مبسوط من الردود فعلا انتم ناس محترمين وكل عام وانتم بخير

[Ghost]

اخرج من البلد في اقرب فرصه

انا ده رائي

لو هتعيش بس بمرتب تاكل و تشرب و تعيش تمام انت و زوجتك و مش هتحوش قرش يكون كده السفر احسن ميه مره

[dino2010]

متضعيش وقت ولو جتلك فرصة سفر اتكل على الله ومتفكرش 5 دقائق على بعض

[moheltohamy]

يابو درويش...

كلامك زي الفل وتمام ، وأتفق معاه كُلّيةً...

بس انتا ما أخدتش بالك من كلامه؟

الراجل بواسطة عضو في البرلمان ، هيتعين ؛ وياخد 200 جنيه!

يعني أساسيّات الحياة (ومش شرط الكريمة) مش موجودة! والراجل كمان أحلامه بسيطة بشكل يكسف... ألف جنيه؟! دانا في غدواية في مطعم هجص في راس البر ؛ اتدبست في 400 جنيه! مطعم هاااااجص! ما قلتش فندق خمس نجوم!

ونرجع للمتين جنيه ؛ اللي مش عارف تكفّي إيه بالظبط!

سكن وميّه ونور وتليفون وغاز؟ هيسكن في عمارة أبوه؟ طيب!

والأكل والشرب واللبس والمواصلات (بلاها العربية) والأدوية والمكواه (هيكوي في البيت؟ طيب)؟!

بنتكلّم على ألف به حياه يا بشر...

إنتا لسه بتفكر تسافر ولاّ لأ يا أستاذنا؟ ومحتاج تسأل؟!

باستغرب يا حسام ويا لولا! إلحقوني هنا بأي مشاريب!

[HDarwish]

محمد باشا التهامي ..

أنا كتبت كلام كثير قوي وكان طالع من القلب .. لكن بضغطة غلط على الكيبورد راح كل الكلام اللي انا كتبته .. يارب أقدر أجمع حاجة منهم تاني

أنا كمان معاكم وما يقدرش حد في الدنيا يقول إن ممكن واحد يعيش في مصر ب 200 جنيه ... دول ما يكملوش ثمن السجاير لو كان بيدخن مارلبورو مثلا .. 200 جنيه دول ممكن يجيبوا ثمن المواصلات أو البنزين وعليهم ممكن باكو بسكويت مع كوباية الشاي الصبح كده في المكتب

حتى راتب ألف جنيه .. يادوب يكفوا واحد ومراته بدون أولاد .. وتبقى مستوى الحياة معاهم في المتوسط .. لسه ما وصلوش للرفاهية

يبقى أكيد فيه دخل تاني على ال 200 جنية ... صح كده ولا إيه يا أستاذ حسن؟

أنا كان كلامي للأستاذ حسن .. علشان انا حسيت في كلامه نفس الإحساس اللي كان عندي قبل ما اسافر واللي الكل بيحس بيه في فترة معينة ومهما يسمع كلام من اللي حوليه أو من اصحابه او قرايبه اللي مسافرين ما يقتنعشي بالكلام ده نهائي

يعني أنا قبل ما اسافر كنت اسأل اصحاب وقرايب ليا مسافرين واقولهم خلاص يا جدعان اتخنقت من العيشة واللي فيها وعايز أسافر .. وآه لو سافرت يا ولاد ده أنا هسوي الهاوايل .. بس أنا أسافر وشوفوا أنا هعمل إيه .. ولما كنت بلاقي الرد من معظم الناس .. يا بني اصبر .. يابني الحياة هنا صعبة مش زي ما انت فاكر .. واللي يقولك خليك عندك أحسن ...

ساعة ما كنت أسمع الكلام ده كان بيجيلي نفس احساس الإحباط والكآبة اللي بيتكلم عليهم أستاذنا حسن .. وكنت بحس إن بعد ما كنت شايف بادرة أمل في طريقي بحس أن الأمل ده كمان راح وخلاص مافيش فايده .. يعني لا جوه مصر عارفين نعيش ولا بره مصر هنعرف نعيش .. طيب نعمل إيه نولع في نفسنا ونخلص يعني ...

ومهما قولت وعدت في الكلام ده ما حدش هيقتنع بالكلام ده نهائي .. لكن بعد ما سافرت وجربت زيهم .. حسيت فعلا بكلامهم وقدرته جدا جدا .. وإن فعلا لو واحد عنده الإمكانيات إنه يوفر لنفسه اولويات الحياة في مصر وتبقى حياة متوسطة .. يبقى أحسن له إن ما يسافرش مهما كانت الدولة اللي رايحها ... كلامي في شوية كآبة صح؟؟ .. أه والله صح معاكم حق ... لكن زي ما قولت قبل كده علشان تحقق حاجات لازم بتيجي على حاجات وتدوس عليها ويمكن الحاجات اللي انت دوست عليها أهم واحلى وأولى من الحاجات اللي انت مشيت في طريقك علشان تحققها .. وأهي كلها حاجات في حاجات ...

المهم إن مداخلتي كلها كانت علشان أوضح الإستغراب (حسام ولولا) اللي مستغربله أستاذنا حسن

ويارب يوفق الجميع

وكل سنة وانتم طيبين بحلول الشهر الكريم

سلام عليكم

[الباشمهندس ياسر]

الراجل بواسطة عضو في البرلمان ، هيتعين ؛ وياخد 200 جنيه!

ربنا يسترها ع الغلابة