إصنع فانوسك بنفسك

[Scorpion]

إهداء خاص الي الأخت العزيزة لولا ...

و لكل من يتواجد في غربة ما بيبيعوش فيها فوانيس ....

و مش عايز ضحك و لا تريقة .... انا تعبت في الموضوع ده ...

يا هاااادي ... نبتدي

المقادير .. قصدي المطلوب :

برتقانة .... آه برتقانه اللي هي من فصيلة الموالح و بنت عم اليوستفندي عِدِل

نعملها بالصور أحسن :

المطلوب :

برتقانة حلوة و كبيرة .. أو ثمرة جريب فرووت ( الموسم مش دلوقتي فكل اللي لقيته البرتقانة اليتيمة دي ) ... مشرط أو موس او آلة حادة .. قلم ... مفك مدبب أو أي حاجة نعمل بيها خروم ( سيخ / قلم رصاص / مسواك ) ... شمعة ...دوبارة نقسمها لتلات أجزاء متساويين .... و راديو ترانزيستور ...

طريقة العمل

أولآ ... أولع الراديو الترانزيستور و أحطه عالبرنامج اللي بيعجبني و اسيبه عالرف جنبي ....

ثانيآ

أقطع الجزء العلوي من البرتقانة و اللي حعمله بعد كده الغطا و الفتحة اللي حولع الشمعة منها

أفرغ قلب البرتقانة اللي في النص الأول بالسكينة

بعدين جدار البرتقانة الداخلي أفرغه بطرف ملعقة شاي بشويش بشويش لحد ما تبقي عالمحارة

أبتدي أرسم الحروف أو الأشكال علي جسم البرتقانة الخارجي

يتبع

تم تعديل 24 أغسطس 2009 بواسطة Scorpion
إضافة صور لخطوات العمل

[Scorpion]

أبتدي أفرغ الأشكال المرسومة بطرف المشرط او الموس و ناخد بالنا في المرحلة دي أولا علشان ما نتجرحش و ثانيآ علشان ايدينا ما تتهزش و القطع ييجي غلط ... بعد ما أخلص .. ابتدي ازيل كل عوالق التفريغ من الطرف الداخلي ...

و بعدين أقوم بكل عصبية و أغير محطة الراديو علشان المغنية دي انا ما بطيقهاش .....

و بعدين أحط "الغطا" تاني و بالقلم أحدد تلات نقاط متوازية في جسم البرتقانة و غطاها

و بعدين أجيب التلات دوبارات و اعمل عقدة في طرف واحد بس من كل دوبارة و أبتدي أمررها الأول في الثقب اللي كنت معلمه في جسم البرتقانة نفسها

و بعدين في الثقب الموازي ليه في الغطا ....

و بعدين أضم التلات أطراف السايبين بطريقة تخلي "الفانوس" متوازن و أعمل عقدة تجمعهم ... دلوقتي الغطا ممكن يتحرك لفوق و لتحت ...

أعمل ثقب صغير في قاع البرتقانة و بعدين أدخل فيه الشمعة خارجيآ ... و ممكن اسيب نصها بره ...

أرفع الغطا ... أولع الشمعة .... أنزل الغطا

و

حلو يا حلو

رمضان كريم يا حلو

حل الكيس و إدينا بقشيش

يا نروح ما نجيش يا حلو

حلو يا حلو

رمضان كريم يا حلو

:lol: wst::

تم تعديل 24 أغسطس 2009 بواسطة Scorpion
اضافة صور لخطوات العمل

[عبقرينو]

شكرا علي الفكرة الجميلة

جاري البحث عن برتقالة لتنفيذ الخطة

كل ستة وسيادتك بخير

[لولا]

استاذى الفاضل سكوربيون.

حقيقة اعجز حقا عن التعبير عن مدى شكرى وامتنانى الذى لا يمكن ان تتخيله

عندما قرأت الموضوع الذى اهديته لى عن كيف تصنع فانوسك بنفسك.

حقا حقا لا اعرف ماذا اقول الموضوع فى حد ذاته عوضنى عن الفانوس

فما عدت اشعر انى احتاجه الآن ، كانت المسألة صدقنى مجرد حنين

لأشياء كانت تشعرنا بالفرحه والهدوء وتجعل للحياه طعم مختلف.

فى الغربه قد تتوه منا الكثير من المعانى الجميله، قد نتوه نحن انفسنا

من انفسنا ، قد نفقد متعة الكثير من الأشياء، وقد تتحول الحياة من صورة

جميلة ملونه الى مجرد صورة من اللون الأبيض و الأسود لا غير.

فى الغربه نشعر مع اشياء شديدة البساطة بحنين

جارف لذكرياتنا التى كانت ، لفانوسنا الصغير،لأغنية رمضان.

لا اعرف لماذا فى لحظة ما عندما قرات موضوعك الأول عن الفانوس

شعرت كمن كان فى غفوة عميعة جدا واستفاق ، كمن تذكر فجأة

ان هناك الوان جميلة جدا فى الحياة نحن فقط من نملك ان نلون

حياتنا بها فلا نستسلم لروتين الحياة السخيف، وضغط العمل القاتل

ومع الفانوس والحنين اليه تذكرت اغانى رمضان ، واستولت على رغبة

غريبه وقويه للحصول على فانوس رمضان واشعال شمعة بداخله والإستماع

لأغنية من اغانى رمضان. تذكرت فجأة انى املك ان اصنع ذات العالم هنا

فى منزلى فى الغربه ..ان اعلق الفانوس واسمع الأغنية وربما اغمض عينى

لأتذكر كل الذكريات الجميلة.التى من الغريب انها غالبا كانت فى الغربه

بما انى عشت فيها طوال حياتى ولكنها كانت وسط اسره كبيره تملأها

الروح والرغبه فى صنع الحياة وتلوينها، ولكن يبدو اننا احيانا ننسى ونستسلم0

حقا لا اشعر ان مجرد كلمة شكراً تكفى أستاذى الفاضل 0

وحتى لا يذهب مجهودك هباء ساقوم حتما بالتطبيق حسب الخطوات

مع تغيير بسيط جدا ، أظننى قد استعمل شيئ اكبر من البرتقاله..

بطيخة مثلا :blink: حتى استطيع تعليقة فى مكان ما.

عموما احب كثيرا الأعمال اليدويه لذلك ساحب ان اقوم بالخطوات

وساكون جدا مستمتعه . حتما نحتاج احيانا ان نقوم باشياء خارج نطاق

الروتين .

شكرا سكوربيون.

لولا

[Scorpion]

الأخت العزيزة لولا ....

كلماتك تلك سيدتي الفاضلة ملأتني بالبهجة و الرضا .... و لكن أعجز عن العثور علي ردآ يضاهيها في عمق معانيها ... فلقد جعلتيني مثل الآخرين نعيش تفاصيل مشاعر أجزم بأنها تختلج دائمآ في قلوبنا و لكنها تنتهي هناك .... أو ربما تنتهي بأبتسامة ساخرة علي واقعنا ... أو تنتهي مثل الآن بتمرد هاديء يظهر علي شكل ... برتقالة ... أو ... بطيخة ...

عميق شكري و شديد احترامي ...

[lieutenant]

ممكن كانتلوب بدل البرتقال؟؟

بجد فكرة هايلة

[سهيلة]

بجد يااستاذ سكوربيون انت عبقرىىىىىىىىىى

عجبتنى الفكرة جدااااااااااااااااا

تسلم الايادى

[لولا]

هاقد مر عام !!

واكاد اعجز عن استيعاب تلك السرعة التى تمضى بها الأيام عندما استوعب ان هذا الموضوع الرائع كان من اكثر ما اثر فى العام الماضى وجعلنى افقد السيطرة التامة على التحكم فى تلك الدموع التى اغرقت عينى والتى كانت ترى فى ذات الوقت كل ذكريات الماضى كشريط ملون رائع توقف فجأة فى محطة قاحلة تذكرك بغربتك

وافتقاد اهلك

وبرمضان جديد خالى من الفانوس ..

فى الغربة تبدو الأشياء الشديدة البساطة بطعم آخر..

يأخدنا الحنين الجارف لها..

ونشتاق لذكرياتنا معها..

ويصبح مجرد فانوس ملون فانوس سحرى قادر على اشعال روحك بالزهور وطعم الفرح وكأنك طفل .. رغم انك قد كبرت !!

سكوربيون العزيز ..

مرة اخرى شكرا .. شكرا جدا يا عزيزى على ما بذلته من جهد فى هذا الموضوع ذو الإهداء الرقيق الذى يعكس روحك الصافية الجميلة..

كنت وقتها مازلت عضوة جديده بشكل ما وكانت المحاورات بأهلها - ومازالت - من اجمل الأحداث التى ملئت مساحة مميزه فى حياتى..

هذ المرة تداركت جفاف الغربة بتأمين فانوس جميل احضرته معى فى الساعات الأخيره قبل العودة ..

ولكن ..

يبقى الإنتاج اليدوى لا يضاهيه شيء آخر ..

خصوصا عندما يكون انتاج مصرى اصيل خالى من اى طابع صينى !!

كل سنة واحنا كلنا طيبين ..

كل رمضان واحنا بخير وسلامة ومتجمعين كده مع بعض فى اسرة محاورات جميلة ومميزة.

تحياتى

لولا

[عنبو]

ياجماعه الصور مش شغاله عندى

[Scorpion]

ياجماعه الصور مش شغاله عندى

عزيزي العنبي ..

عند حضرتك حق .. الصور مش شغالة خالص ...

السنة اللي فاتت رفعتها علي موقع من ابو بلاش .. و الظاهر ان مدة صلاحيتها انتهت .... و المؤسف اني مش محتفظ بالصور الأصلية ..

لكن علشان خاطرك ... و خاطر العزيزة مدام لولا .. و بما ان الموضوع بسيط .. فححاول اكرر التجربة و اصورها ...

اديني ربع ساعة