هل أنت سعيد ؟؟؟

[حشيش]

لاحظت أن غالبية الأخوة والأخوات بالمنتدى (والأخوات بصورة أكبر) وأنا أول الجميع نعانى من الأكتئاب والقلق والتوتر بدون سبب محدد تستطيع أن تشير بأصبعك عليه وتقول أن هذا هو السبب فى حالة الأكتئاب التى أعانى منها...وهذا يقودنا إلى السؤال:

ما هو مفهوم السعادة بالنسبة لك؟؟؟

هل هو الرضا والقناعة...المال...الصحة...النجاح فى الحب...النجاح فى العمل...هل هو السكن الفاخر المريح والسيارة الفخمة... وقبل هذا وذاك السلام مع النفس بحسن وإخلاص العبادة لله سبحانه وتعالى...

ماذا تعنى السعادة بالنسبة لك أنت شخصياً؟؟؟...وهل أنت سعيد بالفعل؟؟؟...وإذا كنت سعيد ليه أنا مش سعيد؟؟؟......حاجة تقرف...وعلى رأى نورا (أنا خيفة..خيفة..خيفة)...على فكرة يانورا المفروض تتكتب كده (أنا خايفة..خايفة..خايفة).....قول لى ياصاحب السعادة...هى إيه معنى السعادة؟؟؟؟؟؟؟؟

[Farah]

السعاده في راءي هي كوكتيل من كل اللي قلته بنسب مختلفه من واحد لاخر معاها الرضا والقناعه عن اقتناع مش عن طريق الرضا بالامر الواقع

بس اللي بيخللي الواحد سعيد هو نفسه مش حد ثاني

يعني اللي يخلي حشيش سعيد هو حشيش

وتنتهي السعاده نهائيا من حياتنا لو اعتمدنا علي اخر في جلب السعاده لينا ،،،

[se_ Elsyed]

أنا مستغرب جداً أن حشيش نسي يضع لقبه أسفل الموضوع ( حشيش طمنني عنك في أيه . انت كويس ؟ )

السعادة يا عزيزي شيشو مفهوم نسبي تختلف بإختلاف الأشخاص ،

فانا مثلاً أجد سعادتي فى القناعة وتقربي إلى الله وتمتعي بالصحة أنا وعائلتي .. ومش عايز حاجة من الدنيا بعد كده .

وتجد مثلاً أن الأنسان البخيل سعادته فى جمع وتكنيز المال.

تجد مثلاً سعادة أخونا حشيش أنه يحس أنه أنسان محبوب من الآخرين وخاصة إذا كانوا الآخرين دول ..... آحم آحم ( وش واحد بياكل تفاح لبناني )

إذن فالمهم أن يحدد الأنسان هدفه فى الحياه وفى أثناء سعيه لتحقيق هذا الهدف سوف يشعر بالسعادة ... يعني بالبلدي لازم تعرف أنت عايز أيه.

( وش واحد فيلسوف شايل كتاب ( هو أصلاً مش كتاب واتضح أنه دليل تليفونات )

[Cleo]

السعادة بالنسبة لى تتكون من الآتى:

1 - حالة رضا عن النفس : أنا راضى عن كل تصرفاتى و أفكارى و أساليبى فى التعامل و علاقاتى

2 - شعور برضا الله عنك : أو على الأقل عدم الشعور بغضبه و ذلك بمراعاة الله فى كل تعاملاتك مع الناس و قبل أى خطوة تحسبك حساباتك كويس "العمل ده يغضب ربنا؟؟؟ طيب يؤدى لنتيجة تغب ربنا"؟؟ لو مكانش يبقى خلاص.... نرجع لنمرة 1

3 - رضا الوالدين و الأحباء : هل حد من الناس اللى أنا بعزهم زعلان منى فى شىء؟؟ هل أنا ظلمت حد؟؟ هل أنا مقصر فى حق حد؟؟ لو مكانش يبقى نرجع لنمرة 1

4 - هل حاجاتى الأساسية مشبعة؟؟ : مرتب معقول يسمح بالأكل و الشرب و حد معقول من الترفيه

5 - وجود صديق أو حبيب أهل للثقة يتمتع بنقاء القلب و رجاحة العقل يقدر يقف جنبك فى الشدايد أو كما يقول الشاعر :

ولا بد من شكوى لصديق ذو مروءة

يواسيك أو يسليك أو يتوجع

لو الواحد توفرت عنده كل العناصر السابقه.... يبقى إيه اللى ناقصه عشان ماكونش تعيس؟؟؟

أما السعادة الدائمة فهى درب من الخيال و قد ذكر فى القرآن الكريم فى أكثر من موقع أن الإنسان دائما يعانى "لقد خلقنا الإنسان فى كبد"

المهم إن الواحد يقدر يتعايش مع المصاعب و إن يتوفر لديه العنصر المذكور فى نمرة 1 و هو الرضا عن النفس

[حشيش]

وتنتهي السعاده نهائيا من حياتنا لو اعتمدنا علي اخر في جلب السعاده لينا ،،،

ليه؟؟؟؟؟؟

يعنى مش ممكن السعادة يدخلها عليكى إنسان تشعرى بالراحة معاه...سواء كان صديق أو خطيب (غير بتاع الأهلى) أو زوج...ليه السعادة حتنتهى من حياتنا يافرح اليوم لو ده حصل...يافرح اليوم أنا مش فاهم الحتة دى...معلش حاولى تفهمينى بالراحة...

تجد مثلاً سعادة أخونا حشيش أنه يحس أنه أنسان محبوب من الآخرين وخاصة إذا كانوا الآخرين دول ..... آحم آحم ( وش واحد بياكل تفاح لبناني )

والله يابو السييد إنته زى العسل...أنا بحب أقرأ مداخلاتك جداً...نفسى *****دماغى يابو السييد بس مش عارف....عقلى بيفكر على طول ومبوصلش من كتر التفكير إلا لمزيد من التوتر والإرهاق الذهنى والجسدى من قلة النوم...الموضوع شكله مش حيمشى يابو السييد...يعنى مافيهاش لا تفاح ولا برقوق ولا حتى حُمُص...

لو الواحد توفرت عنده كل العناصر السابقه.... يبقى إيه اللى ناقصه عشان ماكونش تعيس؟؟؟

الأخت العزيزة كليو...والله كلامك جميل ومتزن ربنا يزيدك من رجاحة العقل ودى نعمة كبيرة...مشكلتى إنى مطيور مش راسى زيك كده... يعنى زى ما قلتى (لووووووو الواحد توفرت عنده كل العناصر السابقة)....ما تحسبيه سهلاً من جانبك قد يكون تنفيذه صعباً بالنسبة لى...يعنى مسألة قدرات شخصية....

تقول الشاعرة المحدثة (مكرونة سكر) فى ديوانها الأخير بعنوان (عيب إختشى) :

ياحبيبى تعبنى هواك

علمنى إزاى أنساك

لا بحس بطعم الكحك

فى العيد...ولا غير العيد

ياحبيبى وإنته بعيد

[Cleo]

فيه سبب كمان مهم يا حشيش أنا نسيته....

هو الإيمان المطلق بقضاء ربنا و قدره... يعنى لو حصل لنا أى خير... مانقولش الفضل لفلان أو علان أو الفضل لى أنا شخصيا... لأ... الفضل لله تعالى و بس... أى إنسان تانى مرنبط بالخير اللى أصابنى ما هو إلا وسيلة و مادام ربنا كتبلى الشىء ده يبقى كان هايصيبنى سواء عن طريق الشخص ده أو لأ...

أى حاجة شر تصيبنى من ربنا برضه... يا إلا ربنا أصابنى بيها عشان يمنع عنى بها ضرر أكبر... أو على أضعف تقدير عشان يكفر بيها سيئاتى... فهى فى الأخر لمصلحتى برضه.... يعنى المفروض أفرح برضه و أكون - مش هاقول سعيد - لكن على الأقل مش تعيس أو يائس...

بسم الله الرحمن الرحيم

يعنى رحمة ربنا بينا موجودة على طول و مهما اتأخرت علينا فده اختبار لينا..

[Farah]

حشيش

ليه؟؟؟؟؟؟

يعنى مش ممكن السعادة يدخلها عليكى إنسان تشعرى بالراحة معاه...سواء كان صديق أو خطيب (غير بتاع الأهلى) أو زوج...ليه السعادة حتنتهى من حياتنا يافرح اليوم لو ده حصل...يافرح اليوم أنا مش فاهم الحتة دى...معلش حاولى تفهمينى بالراحة...

شوف يا حشيش بالنسبه لجزءية

وتنتهي السعاده نهائيا من حياتنا لو اعتمدنا علي اخر في جلب السعاده لينا

في رائيي انك لم تكن سعيدا ان وضعت سعدتك في شخص معين فقط لا غير مهما كان لانك بذلك سوف تغلق نظرك ان شياء اخري جميله ويصبح هذا الشخص هو مصدر السعاده الوحيده بالنسبه لك بفقدان هذا الشخص سلمت نعسك لاقرب بحر يآس

ولكن لو سعادتك في اشياء كثيره منها حبك لعملك ،،،حبك لاشخاص كثيرون،،،اقطناعك بما كتب الله ،،،،الرضا بحياتك ،،،،،سعيد لانك بتقدر تسعد اي انسان،،سعيد لوصولك لهدف معين،،،،سعيد لانك بتعمل اللي تقدر عليه ،،،سعيد لانك بتراعي ظروف الاخرين

ولكن ان تكون سعادتك ان تنتظر اخر يظهر في سماء حياتك لان ظهوره هو سعادتك او لان حبه دنيتك فده الاعتماد علي الغير في اسعادك ولكن لو كان الشخص ده مجرد جزء من اشياء كثيره بتسعدك لو اختفي لا قدر الله او كتب الله الفراق ،،،فسوف تسطيع ان تعدي الازمه

بسلام

[الطفشان]

حشيش

هو السؤال :

- ما هو تعريف السعادة؟

أم

- ما هي اسباب السعادة؟

السؤال الاول فلسفي بحت

و نوقش من زمان قوي، من ايام ارسطو، يعني حوالي 23 قرن و شوية

فمن قائل ان السعادة هي انعدام الألم (المرض، الاصابة، الحزن، الغم، الاكتئاب، الخ)

و من قائل ان السعادة هي الحصول على اللذات (الطعام، الشراب، الزواج، المنصب، المال، الخ)

و من قائل ان السعادة هي الحياة بالفضائل

و غير ذلك

و رأيي ان السعادة هي شئ نسبي يختلف من مجتمع و شخص الى اخر

اما السؤال الثاني

فهو ايضا نسبي

و لكن غير فلسفي، بمعنى انه بديهي للكثيرين منا

يعني الفقير يرى ان السعادة في المال

و العبد يرى السعادة في الحرية

و الغني يرى ان السعادة في القناعة

و الصغير يرى ان السعادة في الاستقلال المالي

و الكبير يرى ان السعادة في الصحة و الشباب

الخ

كل واحد منا عنده اشياء معينة هي السعادة في نظره

السعادة في نظري يمكن ان تكون اشياء كثيرة:

- الايمان

كم من اشخاص ماديين نراهم حصلوا على الكثير، و لم يرتاحوا

لانهم ينقصهم الايمان

- راحة البال

الهموم و المشاغل و الاكتئاب من المنغصات المستمرة في الحياة

- القناعة

رأيت اغنياء - عندهم الملايين - و لكنهم من اكثر الناس ضنكا في المعيشة

المال مطلوب لقضاء حاجات الانسان الاساسية

و لكنه بالتاكيد لا يمكن ان يشتري السعادة

- السلام او التهادن مع الناس

يعني يكون بينك و بين النسا اللي في محيطك (اسرة، اقارب، معارف، زملاء) علاقة جيدة، و لا يشترط ممتازة

- السلام مع النفس

يعني داخليا انت مرتاح

شئ عجيب حدث لي

عندما كنت طفل، كنت سعيد جدا، و كانت حياة الاسرة جيدة

ثم حدثت اشياء في محيط الاسرة سببت الكثير من التعاسة لنا

ثم تغلبنا عليها، و عادت السعادة نسبيا

ثم جاءت سنوات الكلية، و جاءت ضغوط اخرى و تعاسة، حتى العمل ثم الزواج

و الان نسبيا انا اسعد مما كنت عليه و انا شاب

هل لأني تعلمت ان اكون واقعي أكثر؟

أو لأني تعلمت ان الدنيا فيها السي و الردئ؟

أو لأن خبرتي في الحياة زادت، و صقلتني المصائب؟

أو لأني مجرد كبرت في السن؟

لا أدري

و لكني احمد الله على ذلك

[بنت شعنونة]

السعادة انواع

طويل المدى

وقصير المدى

متوقع وغير متوقع

في الف نوووع ونوع من السعادة

بتتكلموا عن مين بالضبط؟؟

في نظري المتواضع السعادة هيا ان تريد ان تكون سعيدا

وتصمم على ذلك..

مثلا..

اوقات اتمنى انبسط اروح العب مع اخويا الصغير

او اطييييييير بالعربية في اي هاي واي

او اجيب مسرحية كوميدية انا بحبها واتفرج عليها

او اكلم شخص عزيز عليا

او او او

مليووووووون حاجا!!.

كل دول بعدهم ببقى سعيدة لفترة

دقايق

ساعات

ممكن يوم او كام يوم كمان

بعدها نرجع للعادي بتاع الحياة.. الملل والروتين و المسؤوليات

وتيجي ايام يكون الحمل فيها اتقل ويبقى نكد وكئيب

لا اعتقد ان حد فينا جرب السعادة طويلة الأمد؟

يعني تقعد اسبوووع كدا سعييييييييد وبس؟

مش صعبة شوية؟

انا اسمع عن الرضا

ماشي

انما سعادة؟

اعتقد ان حلاوة السعادة في شحها وندرتها والا ما كناش كلنا نجري وراها

مع اني في نظري ان الرضا اهم

لآنه الرضا عامل زي اقل نسبة من السعادة ممكن تاخدها او تتعاطاها لآطول وققققت ممكن

انما السعادة فهي اكبر جرعة مكن تتعاطها لفترة قصيرة جدا

والا ممكن تموت فيها

"ان كثرة الضحك تميت القلب"

والله اعلم...

[الطفشان]

الامير عبد الرحمن الناصر

الخليفة الاموي في الاندلس في عهدها الذهبي

حكم 50 عاما

من 300 الى 350 هـ تقريبا

منذ ان كان عمره 22 سنة

فتح الفتوحات

و قوى الدولة

و وفد اليه سفارات من ملوك الفرنجة و الفرنجة و القسطنطينية، و اهدوا اليه الهدايا

و بنى مدينة الزهراء

و شيد فيها القصور

كان عنده "مفكرة" يكتب فيها الايام التي صفت له بلا كدر

(يعني كلها سعادة بدون منغصات)

عارفين كام يوم طلعوا في الاخر؟

14 يوم!

[بنت شعنونة]

عارفين كام يوم طلعوا في الاخر؟ 

14 يوم!

احمدددددددددك يااااا رب

دا على كدا انا اسعععععععد منه بمراااااااااحل

"وش سعييييييييييد"

[se_ Elsyed]

حشيش كتب

والله يابو السييد إنته زى العسل...أنا بحب أقرأ مداخلاتك جداً

الله يكرمك يا شيشو .. نفس الشعور والله .. أحنا كلنا بنعتبرك الحنركش بتاع المنتدى ( على فكرة أنا جاي البحرين فى شهر 7 إن شاء الله صبرك بس هازحلق الأولاد على مصر وأجيلك )

شعنونة كتبت

طويل المدى 

وقصير المدى

عارفها يا شعنونة دي صواريخ سام 6 .. صح ؟

وتيجي ايام يكون الحمل فيها اتقل ويبقى نكد وكئيب

تصدقي بالله يا شنشن أنا قريت كلمة " الحمل " بفتحة على الحاء .. وفى الأخر عرفت أنك تقصدي الحمل بكسر الحاء وموت على نفسي من الضحك ... الله يخليكي إهتمي بالتشكيل .

بذمتكم فيه سعادة أكتر من أنك تتكلم براحتكم مع ناس بتحبهم .

الخلاصة " أن الأنسان هو الذي يصنع سعادته بنفسه "

[Salwa]

السعادة ......

الاحساس بالرضا عن الذات ....والقناعة بما لديك...والايمان المطلق .

والتصرف بما يرضى ضميرك ..

السعادة هى بسمة طفل ....قهقهة من القلب ...

مجرد تأمل للبحر وقت الشروق والغروب .

احساسك انك كنت ولد صالح...احساسك انك ...حر....

تفعل ماتريد...وقت تريد.

تقول رأيك ....بلا خوف....أو....تجميل.

السعادة هى ....العطاء .....واحساسك انك ....اليد العليا ..

التى تعطى وليست التى تأخذ.

فعلا.....هى نسبية ...وتختلف من شخص الى آخر.

السعادة هى انى ....اتمنى ....واستطيع تحقيق ....ولو نصف ما تمنيت.

والسعادة ...هى احساسى انى .....ارقى.....حتى وانا جيبى فارغا.

والسعادة هى ....نوع من الانانية ....عندما اشعر بالزهو ...والجميع يشير لأبنائى ...قائلا ....هم ابناء....سلوى .

هى مجرد التأمل.....فى مخلوقات الله....طبيعة ...كون....حيوان...حتى ....نحلة....نملة...وتردد سبحان الله ما انا الا ....عابر.....اتيت وسأذهب فى لمح البصر .

انا سعيدة ......اعلم بعض من اسباب سعادتى ...ولا علم لى بباقى الاسباب ....الا رضا الله عنى ....واحساسى بالرضا .....فى السراء والضراء .

السعادة تنبع من داخلك.....

حب نفسك بلا انانية .....يحبك الكون كله .

وصباح سعيد جدا جدا جدا .

سلامى.

[Set_Amina]

السعادة بالنسبة لي القناعة والرضا، اذا رضيت فانت بالتأكيد سعيد، والرضا هنا منبعه الايمان بما يقدره الله لنا، مع التذكر دائما ان لا فائدة من صراع أو لهث على مطمح معين لأن ما كتبه الله لنا سنراه وهو بالتأكيد الخير.. انا راضية ومقتنعة بقضاء ربي ..إذن أنا سعيدة.

[moody00x]

تصدقي بالله يا شنشن أنا قريت كلمة " الحمل " بفتحة على الحاء .. وفى الأخر عرفت أنك تقصدي الحمل بكسر الحاء وموت على نفسي من الضحك ... الله يخليكي إهتمي بالتشكيل

والله هو ده اللى حصل معايا بالظبط...هو فى ايه؟؟؟

وش واحد إسمه كوهين

[crossfield]

الموضوع ده حد اتكلم فيه قبل كده و تقريباً كان فى موضوع الفضفضة أو "اتمنى" و ساعتها قلت رأى كئيب شوية بس أنا مقتنعة بيه .السعادة انك تعيش اللحظة من غير ما تقلب على نفسك المواجع اللى فاتت قبل كده أو تفكر فى المستقبل اللى جاى و تقلق نفسك عليه . و بما ان ده مستحيل فالسعادة ....كل سنة و انتو طيبين .

[BenNeal]

السعادة: القناعة والرضا

ما قل و دل.

[se_ Elsyed]

. و بما ان ده مستحيل فالسعادة ....كل سنة و انتو طيبين .

وأنتِ طيبة يا كروساية ... ها وأنت عمله أيه .. أن شاء الله تكوني بخير

( وش شايف وش محبط )

[حشيش]

أتفق مع جميع الإخوة والأخوات أن أهم أسباب السعادة هى الرضا بما قسمه الله سبحانه وتعالى لنا والسلام مع النفس وراحة البال...لكن السؤال هنا: ما هو تعريف الرضا بما قسمه الله لك؟؟؟...بمعنى... مثلاً تم تعيين شخص فى وظيفة ما بمرتب محدود أو خطب واحدة ثم وجد نفسه غير منجذب عاطفياً إليها هل يجب على هذا الشخص أن يرضى بهذا أو ذاك من منطلق الرضا بما قسمه الله له أم ينبغى عليه أن يفكر ويسعى ويتعب حتى يحصل على وظيفة أفضل بمرتب أحسن أو إنسانة أخرى يبادلها المشاعر والعاطفة؟؟؟...وهنا سوف يقول قائل يجب أن لا نخلط بين الطموح وبين الرضا بما قسمه الله لنا....وهنا سنصل إلى البداية مرة أخرى...لأن الإنسان الطموح الراغب فى تغيير واقعه إلى واقع أفضل (سواء كان هذا الواقع المراد تغييره فى مستواه المادى أو الإجتماعى أو فى علاقاته العاطفية) سوف يعانى...وطالما أن الطموح موجود ومشروع فإن التفكير والقلق والتوتر سيظلوا قائمين وتذهب معهم السعادة وراحة البال....بمعنى آخر هل لكى يكون الإنسان سعيد يجب أن لا يكون طموح؟؟؟؟؟؟...

قرأت ديواناً للأديب المحدث (السيد هدهد) بعنوان (إخييه عليك) يقول فيه:

إخييه عليك

إرحم شوية

ياللى زمانى

رماك على يه

أمتلئت عينى بالدموع وأنا أقرأ كلمات هدهد...حروح أننف...سلام مؤقتاً...

حشيش

أديب ومفكر

[الطفشان]

يبدو ان الرضا هو الرضا الحقيقي الداخلي

و ليس الرضا مع السخط الداخلي

و بالتالي

فموضوع الخطيبة دة سيكون رضا قسري

و ليس حقيقي

أو ان عدم الرضا يتم مع تحجيم الموضوع داخليا للشخص

يعني مثلا شخص يقول انه سعيد

هل كل شئ في حياته مثالي؟

لا يمكن

لكن الامور الغير مثالية او المنغضات ليس لها أولوية على أمور اخرى هي أولى عنده و هو راضي بها

فان كان الاغلب و الاعم في الامور هو سعيد بها

فهو سعيد

حتى لو في اشياء غير سعيد فيها

و اهمية امر ما او عدمه يرجع الى الشخص نفسه