استعد لعمل لاندينج على العيد ... ارجو النصيحة لو سمحتم

[الطائر الحر]

الاخوة الاعزاء اعضاء هذا المنتدى ... كل عام و انتم بخير .. ادعو الله سبحانه و تعالى ان يعيد عليكم رمضان كل عام بالصحة و السعادة و التوفيق.

ان شاء الله نويت على عمل اللاندنج في تورونتو كندا اخر الشهر. يعنى اعيد انا و الاسرة هناك باذن الله. و احتاج بعض النصائح من الاخوة الذين سبقونا الى كندا:

1- ارجو النصيحة بخصوص عنوان سكن مناسب (شقة مفروشة غرفتين و صالة او فندق) في تورتنو بشكل مؤقت لمدة اسبوعين بحيث يكون سعره مناسب.

2- هل اخذ معايا الفلوس اللي كتبتها في الابليكيشن ؟ بمعنى هل يتم التدقيق عليها مع اللاندينج ام يمكن احضارها مستقبلا؟. و اذا لم يكن ضروريا احضار المبلغ كله فتنصحوني اجيب معايا كام للاقامة لمدة اول اسبوعين.

3- ما هي الاجراءات ما بعد اللاندنج ؟ و كم وقت تستغرق.

4- اي نصائح اخرى ترونها ضرورية.

مع تمنياتي لكم جميعا بالخير و السعادة

[nona alawaal]

كل سنة و حضرتك طيب

و رحلة موفقة ان شاء الله

بس انا عايزة اعرف يعنى ايه تعمل لاندينج ........... يعنى بعد كده هترجع تانى لبلدك و شغلك

و هل ده ينفع فى حالة الهجرة .... و المعادلة و الجنسية و الاكسبيرينس و الحاجات دى

انا شيفة ان كتير من الاعضاء بيعملوا لاندينج و يرجعه تانى ... ايه مميزات و عيوب ده ؟؟

اسفة على السؤال اللى فى غير مكانه ( توبيكه)بس عايزة افهم

و كل سنة و حضرتك و الاسرة بخير

[Phoenician]

مبروك وكل سنة و انت طيب ولاندنغ موفق بإذن الله أما بالنسبة لأسئلتك

1- للأسف معنديش اجابة تفيدك لكن ممكن تعمل سيرش عالانترنت او تسأل الشباب ممكن يجاوبوك احسن مني

2- براحتك ممكن تاخد الفلوس معاك وممكن لأ ... بس لاحظ ان اي مبلغ معاك داخل بيه كندا فوق 10000 دولار لازم تصرح عنه و ده بيكون في الطيارة و قبل الوصول بساعتين بيدوك ابليكيشن تعبيه و من ضمنه سؤال عن مقدار الفلوس اللي معاك وده بينطبق على الكاش او الشيكاتز

3-بعد اللندنغ حضرتك لازم تقدم على SIN card (كارد الضمان الاجتماعي و ده بيتعمل لكل فرد) و مش حياخد منك اكتر من 10 دقايق في المبنى الحكومي اللي عند تقاطع يانغ ستريت مع شيبارد (للأسف مش فاكر رقم المبنى ) و هناك بيدوك ورقة فيها رقم الضمان و الكروت بتوصلك على البريد بعد 5 ايام بالظبط و بعدين حضرتك تروح تفتح حساب و عندك خيارات كتير (ار بي سي بانك او اتش اس بي سي و انا شخصيا فتحت حساب في تي دي كندا TD Canada وده لان فروعهم وصرافاتهم متوفرة بشكل كبير في تورونتو وده مهم عشان العمولة عند السحب من اي صراف تاني بتتخصم منك و اجراءات فتح الحساب بسيطة لكن خدمات العملاء هناك ممتازة و الموظف او الموظفة بيكون مبسوط جدا وهو بيساعدك و بيجاوبك على اسئلتك و بعد فتح الحساب بييديك كرت الصراف المؤقت و مجموعة شيكات عشان تستعملها.... فتح الحساب و عمل كرت الضمان الاجتماعي ممكن يخلصوا في اقل من 3 ساعات و اذا كان عندك وقت ممكن تروح تمتحن عشان رخصة السواقة (للأسف معنديش خبرة فيها لأني معملتهاش)

4- النصايح ..... ايواااااااا دلوقت دخلنا على الكلام المهم

بص يا سيدي ... اولا حاول انك تقول الحقيقة علطول يعني لو موظف الجوزات سألك انت حتستقر على طول لازم تجاوب و تقول لأ انا حمعل لاندنغ و راجع اخلص اموري و بعدين ارجع استقر ومتخفش مش حيعضك

اوعى تسمع نصيحة حد و تروح تعمل كرت الضمان الصحي لأنك لازم تكون مقيم في البلد لا يقل عن 3 شهور و الافضل تؤجله لحين الاستقرار لأنك لو اتكشفت العواقب حتكون سيئة و حتكون نقطة سودا في سجلك

الافضل انك تعمل تامين صحي للمسافرين من بلدك وده للإحتياط يعني لو لا سمح الله حصل حاجة تكون متغطي

الكهرباء في كندا 110 فخلي بالك من الاجهزة الكهربائية (مكينات الحلاقةو شاحن التليفون و خلافه)و خللي بالك كمان لا ن فيشة الكهرباء عندهم ثلاثية مبططة

حاول تتأكد من حالة الطقس لأن احتمال يكون الجو بارد شويتين (خللي معاك جاكت او بلوفر للإحتياط)

لو عندك كريدت كارد خودها معاك احسن لأنه من المفضل انك متشيليش فلوس كاش كتير و على فكرة لما كنت اطلع ورقة الـ 100 دولار هناك كاش الناس كانت بتستغرب و تقعد تدقق فيها لأنها مش متداوله كتير

خللي معاك رخصة دوليه يعني لو حبيت تستأجر سيارة ولو ان المواصلات العامة في البلد اكتر من ممتازة وخللي بالك التكسي سعره عالي شويه ( من المطار الى نورث يورك مكان ما كنت ساكن حوالي 50 دولار)

اول مكان اكيد حتروحه هو السي ان تاور و هناك وعند قطع التيكت للدخول حتلاقي بروشورات كتير للأماكن السياحية اللي ممكن تدخلها ... وحاول تستمتع بكل لحظه في كندا

اوعى يفوتك تروح شلالات نياغارا

خللي بالك من الاكل وحتلاقي محلات كتير و خصوصا الداون تاون مكتوب عليها حلال و اذا نفسك هفتك عل بيتزا خد بيتزا بالخضار لأن اللحوم اغلبها خنزير (البيبيروني)

انتبه عند الشراء لان السعر المكتوب ده بيكون من غير ضرايب حتى لا تتفاجئ بمبلغ آخر عند الكاشير

لو افتكرت حاجة تانية اكيد حكتبلك عليها .... و بالتوفيق

تم تعديل 7 سبتمبر 2008 بواسطة Phoenician

[hosiny]

الاخوة الاعزاء اعضاء هذا المنتدى ... كل عام و انتم بخير .. ادعو الله سبحانه و تعالى ان يعيد عليكم رمضان كل عام بالصحة و السعادة و التوفيق.

ان شاء الله نويت على عمل اللاندنج في تورونتو كندا اخر الشهر. يعنى اعيد انا و الاسرة هناك باذن الله. و احتاج بعض النصائح من الاخوة الذين سبقونا الى كندا:

1- ارجو النصيحة بخصوص عنوان سكن مناسب (شقة مفروشة غرفتين و صالة او فندق) في تورتنو بشكل مؤقت لمدة اسبوعين بحيث يكون سعره مناسب.

2- هل اخذ معايا الفلوس اللي كتبتها في الابليكيشن ؟ بمعنى هل يتم التدقيق عليها مع اللاندينج ام يمكن احضارها مستقبلا؟. و اذا لم يكن ضروريا احضار المبلغ كله فتنصحوني اجيب معايا كام للاقامة لمدة اول اسبوعين.

3- ما هي الاجراءات ما بعد اللاندنج ؟ و كم وقت تستغرق.

4- اي نصائح اخرى ترونها ضرورية.

مع تمنياتي لكم جميعا بالخير و السعادة

يا عم الطائر الحر انت بتسأل كأنك اول مرة تدخل المنتدي

يا عم عندك موضوع الدكتور شامي و الدكتور تهامي مش سايبين قشة الا و شارحينها بالذات في الاول و حتي التهامي حاطط اسماء المواقع و اسم المكان اللي كان قاعد فيه اول اسبوعين و الويب سايت بتاعه و فيه التليفون كمان لو عايز تحجز بالتليفون....

مفيش حد هيعملك برشام لكل الموضوعات اللي انت بتسأل فيها و حتي لو حد شرحلك هينسي نفطة و لا اتنين....عشان كده احسنلك تقرأ