الشرطة والشعب في خدمة الوطن...

[mnman]

بصراحة مش عارف إبداء منين و أقول اية…. آنا لسة في قمة الذهول….. كنت بحضر لموضوعين و احد بعنوان منمان في زنقة الستات و التاني بعنوان هامش الحرية…. بس بعد الموقف الي حصلي لسة مفيش من ساعة و احدة قررت اكتبة ليكم و لكل المصريين علشان نعرف احنا وصلنا لحد فين……

رحت أمبارح علشان أطلع تصريح عمل من وزارة الداخلية… رحت قسم تصاريح العمل و دفعت الرسوم و قلبوا في البصبور يمين و شمال و قالولي فوت علينا بكرة الساعة 3 تستلم التصريح…….

وطبعا انا كان معايا واحد قديم قوي لما رحت بلجيكا….. وبحكم اني رحت من بلجيكا علي البرازيل عدل مكنش معايا و احد تاني للبرازيل…. بس مش هية دي المشكلة…..

رحت … واذا بالموظف يقولي البية العميد عايزك…. قولت في عقل بالي خير استر يارب….

دخلت السلام عليكم …بصراحة الراجل ذوق جدا جدا…. قالي انت كنت ساكن في الشارع الفلاني في اسكندرية… قلتلة لآ…. قالي بس اسمك الرباعي زي اسم واحد علية حكم و سقط بالتقادم سنة 91 ….. لحد هنا و انا مش فاهم… قلتلة طيب حضرتك اعمل اية او انا ممكن اعمل اية…. قالي ولاحاجة لازم نتأكد من شخصيتك وانكم مش نفس الشخص….. قلتلة نعم…. طيب هو عمرة نفس عمري انا سنة 91 كنت عيل كنت 15 سنة و هو كان عندة حكم سقط بالتقادم سنة 91 يعني كان عندة 50 سنة علي الاقل… قالي مش عارف… بس الاسماء متشابها….. قلتلة بس حضرتك الاسم مش كل حاجة ارجوك انا طيارتي بكرة و مفيش وقت ممكن نعمل اية…. قالي نجيب تصريحات امنية… قلتلة ازاي يعني…. قالي نكشف علي بينات الشخص التاني و نطبقها ببياناتك…. و عمل كدة و الحمد لله مطلعش انا وخدت التصريح…بس الظابط حذرني ان بكرة في المطار ممكن تتكرر تاني نفس المشكلة….. ربنا يستر…

يعني و النبي مش خيبة وهبل وعبط… هو البني ادم اسم و بس… مفيش سن و تاريخ ميلاد و اسم الام و العنوان و البصمات… ولازم البية ينشف دمي الاول قبل ما يعمل الكشف… هو مش الكشف دة كان المفروض يتم حتي من غير انا ما أخد خبر …. بس لية يتعبوا من الاول الاسم متشابة يبقي هو و انا المفروض اثبت العكس…. اثبت للبوليس بمساعدة البوليس اني مش هو.. دماغي حيفرقع…. ارحمني يارب و ارحم كل المصريين…

[se_ Elsyed]

أقرأ الحادثة ....... أقرأ الحادثة

القبض على المجرم الهارب منمان .

هذا وقد صرح مصدر مسئول رُفيع بوزارة الداخلية بإنه طبقاً لتعليمات السيد وزير الداخلية والسيد مدير أمن محافظة الأسكندرية والأومباشى حسنين مدير قسم شرطة الأنفوشي بأنه قد تم إلقاء القبض على المدعو مانمان وفي رواية آخرى باتمان أثناء محاولته الهرب خارج البلاد إلى جهه غير معلومة .

والجدير بالذكر أن هذا المانمان هو السبب فى إرتفاع قيمة الدولار وأنبعاج قيمة الجنية المصري وأكتئاب المواطن المصري وأنشراخ السد العالي .

تحية لعيون مصر الساهرة ) برضوا سهر تاني مش بقولكم الحكومة فى مصر مابتشتغلش إلا بالليل .. نايت شيفت )

[mnman]

سي السيد كتب:

المجرم الهارب منمان

القبض على المدعو مانمان

هو دة تشابة الاسماء الي كان حيودينا في داهية....

( وش واحد مسخسخ من الضحك)

[mnman]

سي السيد كتب:

والجدير بالذكر أن هذا المانمان هو السبب فى إرتفاع قيمة الدولار وأنبعاج قيمة الجنية المصري وأكتئاب المواطن المصري وأنشراخ السد العالي .

وش واحد واخدينة علي حبل المشنقة عددددددددددل.....

[DARWEEN]

أخي منمان ..

سؤال صغير بريء كده على الماشي

هوا فيه مكافأة للي يبلغ عنك ؟؟؟؟؟

معلش ياخويا الدنيا غلااااااااااااا

وش واحد مبرق وعينه مزغلله ولسانه مدلدل

[mnman]

داروين كتب:

أخي منمان ..  

سؤال صغير بريء كده على الماشي  

هوا فيه مكافأة للي يبلغ عنك ؟؟؟؟؟  

معلش ياخويا الدنيا غلااااااااااااا  

وش واحد مبرق وعينه مزغلله ولسانه مدلدل

سعر البني ادم في مصر 500 جنية.... يعني المكافئة مش حتعدي 300 جنية.... خد مني انا 1000 جنية و خبيني عندك دانا بريئ و الله مش ممكن اعمل كدة...تصدق بالله انا حتي معرفش اية القضية بتاعت الراجل الاخر.....

حلوة... منمان الرجل الاخر...

وش واحد ميت من الضحك....

[se_ Elsyed]

وش واحد مبرق وعينه مزغلله ولسانه مدلدل

داروين ....... آميه يا صاحبي آميه . أنا صاحب الفكره يعني المكافأة تيفتي تيفتي ... الزبون طيب وشكله مش هايتعبنا . شوفت كاتب أيه

تصدق بالله انا حتي معرفش اية القضية بتاعت الراجل الاخر.....

يعني تفصل عليه أى قضية مش هايمانع ..... مش بقولك طيب

[DARWEEN]

يعني تفصل عليه أى قضية مش هايمانع .....

أيوه هوا هوا .. أنا عارفة ..

هوا دا ياباشا اللي سرق ونش الأنفاق

ألف جنيه يامنمان مش توزن كويس ماأنت شايف اللي بيقولك فيفتي فيفتي قبل ما نقبض أهوه

[Scorpion]

الأخ منمان...

سيبك من الكل... بيتي تحت أمرك هنا.... و من غير أي مقابل...و هتلاقي باقي الشله كلهم... سوبرمان ، سبايدرمان ، داركمان و كمان و كمان.. بس علشان خاطرى تخلينى آخد لفة بالباتموبيل... حلم طفولتي كان متركز فى العربيه دى... في أنتظارك...

[mnman]

دارون كتب:

ألف جنيه يامنمان مش توزن كويس ماأنت شايف اللي بيقولك فيفتي فيفتي قبل ما نقبض أهوه

انتي أأمر.... دة سجن و بهدلة.... نخليهم 1050 خلاص و الله ماهم راجعين......

سكوربيون كتب:

الأخ منمان... 

سيبك من الكل... بيتي تحت أمرك هنا.... و من غير أي مقابل...و هتلاقي باقي الشله كلهم... سوبرمان ، سبايدرمان ، داركمان و كمان و كمان.. بس علشان خاطرى تخلينى آخد لفة بالباتموبيل... حلم طفولتي كان متركز فى العربيه دى... في أنتظارك...

الله يخليك ياسكوربيون يا اخويا.... هيا دي شهامة وشجاعة ولاد البلد....... ولو علي الباتموبيل تحت امرك من لفة الي مائة لفة.....

[بنت شعنونة]

انا كان قلبيييييييييي حاااااااااااسسسسسس

"وش رافع سماعة التلفون "

[White heart]

mnman كتب:

…بصراحة الراجل ذوق جدا جدا….

يا عزيزى...دة انت تحمد ربنا و تبوس ايدك وش و ضهر...

غيرك بيعملولوا "كعب داير" و يلففوة محافظات مص كلها!!!

المهم فى المطار لو جد اتعرض لك طلعلهم البطاقة المتينة.....

بس على الله ما يعتبروهاش "انتحال شخصية" عزيزنا سبايدر، فى حين ان انت عزيزنا "منمان".........

الا على فكرة اية اخبار الرقم القومى....و البطاقة الشخصية الجديدة؟!

[mnman]

شعنونة كتبت:

انا كان قلبيييييييييي حاااااااااااسسسسسس 

"وش رافع سماعة التلفون "

رافع السماعة.... حتبلغي عني ياشانا.. ماشي ماشي....

وش مش مصدق ودانة........وش بيضحك....

وايت هارت كتب:

يا عزيزى...دة انت تحمد ربنا و تبوس ايدك وش و ضهر... 

غيرك بيعملولوا "كعب داير" و يلففوة محافظات مص كلها!!! 

المهم فى المطار لو جد اتعرض لك طلعلهم البطاقة المتينة.....

الظابط قالي كدة ان الموضوع مش ساهل... بس بجد كان ابن ناس و خلصلي الورق بعد ما سيب ركبي....

وايت هارت كتب:

بس على الله ما يعتبروهاش "انتحال شخصية" عزيزنا سبايدر، فى حين ان انت عزيزنا "منمان"......... 

أنتحال تاني... هو احنا خلصنا من الاول لما ندخل في التاني....

[crossfield]

فكرتنى يا منمان بذكاء الموظف المصرى الجبار اللى الروتين قاعد و معشش فى نافوخه .

لما اتعينت كان فى موظفة هى اللى بتملا لى البيانات وهى بتكتب سألتنى:متجوزة؟ قلتلها "لأ" مفيش بعدها بربع ثانية "عندك أولاد؟ وبعدها راحت من عندها نوبة الهوستاكا و فاقت و بقت كويسة و قالتلى خلاص.

مرة تانية و أنا باطلع البطاقة بتاعة الرقم القومى سألنى الموظف بعد ما أخد بطاقتى القديمة والدك فين؟ قلتله ليه؟ قالى أصل التعليمات اللى عندنا بتقول ان لازم البنت يمضي ولى أمرها على اقرار انها مش متجوزة قلتله طيب ما هو البطاقة اللى قدامك بتقول انى مش قاصر و لا حاجة؛المهم قرفنىو استغبى فيها و عملى عبده الروتين و أنا راسى و ألف سيف لاهطلع البطاقة كده و من غير اقرارات .وقد كان بس بعد ما كرهته فى عيشته.

وش واحدة واكلة دراع موظف حكومى الروتين لحس دماغه .

[Cleo]

برضوا سهر تاني مش بقولكم الحكومة فى مصر مابتشتغلش إلا بالليل .. نايت شيفت )

ما هم لو مؤدبين و بيسمعوا الكلام و بيناموا بدرى و مافشي سهر.. كان زمانهم مصحصحين للى بيعملوه...

[Cleo]

ممكن يا منمان آخذ وصلة الموضوع ده فى "ملف" فساد الشرطة؟؟

أنا عندى سؤال...

لو الحكومة بتراقب المنتدى صحيح..........

أماااااال مش بتسأل فينا لييييييييييه....!!!!!!!

[ابو يوسف]

انت ربنا بيحبك يا منمان ....

يعنى الراجل كان لطيف معاك و خد من وقتك دقايق و بعدين مشيت و كل اللى مضايقك ان الواحد مش اسم بس ‍‍‍‍‍‍‍ ؟؟؟؟

يا سيدى ... لقد ارتكبت جريمة يعاقب عليها القانون ( البوليسى ) بالحبس لاجل غير مسمى و تلقى كافة انواع الاهانة بدءاً من السب الى اقصى ما يمكن ان يدور فى الخيال ....

و هذه هى العقوبة الرسمية - غير العقوبة الاخرى على يد زملاء الحجز ‍‍‍

و فى النهاية سيكتشفوا انهم اخطأوا و تخرج بعد ما تكون كرهت اسمك

و بعدين ازاى يا منمان تسمح لنفسك ان يكون اسمك زى اسم مجرم عتيد الاجرام ؟؟؟

انت فاكر ان البلد ما فيهاش قانون و الا ايه ...

لأ دى فيها قانون و عود و ربابة كمان

(وش واحد مقبوض عليه)

[mnman]

منمان يحيكم من خارج ارض الوطن وبعد الهروب الكبير.......هيةةةةةةةةةةةةةةةةةةةةةةةةةةة

كليو... يافندم حضرتك تأمري...ممكن طبعا تاخدي الوصلة لاي حتة في مصر مش لموضوع فساد الشرطة بس.... (وش مبتسم)

كروسفيلد.... انتي جاية اشتغلي اية.... (وش واحدمسخسخ من الضحك).....

الحمد لله اني متبهدلتش والله كنت عاملتله بن لادن ...... (وش واحد كداب ياخيشة)

سي السيد... انا خلاص بقيت جنبك يعني نصف ساعة بالطيارة واجيلك .... عاد لينتقم.....(وش واحد رايح ينتقم من سي السيد مخصوص و بعدين داروين).....

[Scorpion]

الأخ منمان... من هنا و رايح حأسميك الكونت دى مونت دي كريستو أمير الأنتقام... بس ما تخلي قلبك أبيض يا أخويا و تعفي عنهم.. دول أخوتنا و رفقاء السلاح في معركة رجال الموقع ضد نسائها... و لو مصر نعاقبهم عقاب بسيط .. يعني مثلآ يقروا عشر مقالات لسمير رجب يوميا و لمدة شهر لغاية ما يعرفوا أن الله حق...

بالمناسبةأنا عندي أعتراف صغير ... لما كنت بقرأ منين بتكتب... و الحق عليك اللي كتبتها بالأنجليزي ALKHOBAR... يعني قريتها بسرعه الخابور.. فصعبت علي قوي... و قلت في نفسي لاحول الله يا رب أمال لو كان أسمه حسني كان عملوا فيه أيه..بس الحمد لله جت سليمة..

[se_ Elsyed]

الأخ منمان... من هنا و رايح حأسميك الكونت دى مونت دي كريستو أمير الأنتقام... بس ما تخلي قلبك أبيض يا أخويا و تعفي عنهم.. دول أخوتنا و رفقاء السلاح في معركة رجال الموقع ضد نسائها

لأ سيبه يا سكوربيون ، مهي كده الثورة تأكل أولادها ... مش هو ده منمان اللى كان عجينة طرية فى أيد المخبرين من كام يوم ... دلوقتي شم نفسه .. لكن مسيرة ينزا مصر ونبلغ عنه - تاني - هو هايروح ممنا فين .

على العموم مرحباً بك فى لاسعودية وأنت برضوا تحت عنينا وتحركات كلها مرصودة ، يعني انت دلوقتي ملقوط يا باتمان.

( وش واحد ماسك لاسلكي وبيبلغ القيادة العامة وبيقولهم الهدف دخل القفص )