ناوى أشترى عربية ومحتاج نصايحكم

[محمد عبدالعزيز]

يا أهل المحاورات الكرام.

أنا بإذن الله ناوى أشترى عربية و-كالعادة يعنى- خبرتى ضعيفة فى العربيات ومش عارف أبتدى منين وأبحث إزاى عن العربية المناسبة.

أنا عاوز عربية تكون فى حدود ميزانيتى, اللى هى 25 ألف

وكمان تكون كفاءة فى استهلاك البنزين, انتو عارفين دلوقتى إن أسعار البنزين ولعت ومحتاجين نرشد استهلاك البنزين.

الموديل من آواخر التمانينات وطالع.

تكفى أسرة مكونة من 4 أفراد, أعتقد إن معظم العربيات فيها الموضوع ده بس أنا ذكرته من باب الاحتياط واجب.

طبعاً طبعاً طبعاً توافر قطع الغيار فى السوق.

يعنى من الآخر عاوز حاجة حنينة ونضيفة ورخيصة وكل الصفات الكويسة دى, ممكن ألاقى حاجة زى كده بالميزانية دى؟

ياريت نصايحكم بالماركات والموديلات التى تحقق المواصفات المذكورة أعلاه.

وشكراً مقدماً

[الباشمهندس ياسر]

لو بتفكر فى حاجة مناسبة وعملية وقطع غيارها معقوله و استهلاكها مش عالى اوى

يبقى فيات 128 موديلات 80 و انت زى الاسد كده

تخبط واحده عملالها 20الف لغاية 23 الف و ماشية وتمام التمام

و ممكن تخش على الاسكودا و القصص التانية

بس كلمتك على نوع كنت راكبه

بصراحة عملية اوى اوى

[سكر]

جرب الموقعين دول اكتر تخصص

http://www.contactcars.com/UsedCars_All.asp

http://www.nilemotors.com/Nile/forumdisplay.php?f=45

[محمد عبدالعزيز]

ياباشمهندس ياسر, أنا من ضمن الاختيارات المتاحة أمامى 128 ولادا, تفتكر أنهى الأفضل؟

الأخ الفاضل ataamer

أشكرك على رابط المنتدى, وللعلم غير مسموح بقراءة المواضيع إلا للأعضاء فقط

[الباشمهندس ياسر]

السلام عليكم

اخى العزيز ممكن تحسبها بطريقة بسيطة جدا

ثمن السيارتين

سعر قطع الغيار

متوسط استهلاك الوقود

مستوى النعومة والخشونة

اخبار تسويقها ايه

و طبعا القرار قرارك انما لو تقبل منى فأنا افضل الفيات

و عموما الفيات بتتباع هوا يعنى قبل ما توصل السوق بتاع العاشر بتتاخد منك

و ربنا يوفقك و لا تنسانى من دعائك

[iloveegypt]

اولا رمضان كريم محمد عبد العزيز استاذنك بس اسئل سؤال

معلش بشمهندس ياسر

طيب لو المبلغ 40000 تنصح بايه هتعبك معايا

وشكرا مقدما

[الباشمهندس ياسر]

يا هندسه انا تحت امرك مفيش تعب ولا حاجة

بس انت لازم تقولى دماغك فيها ايه بالظبط

زيرو ولا مستعمل

لانى شايف انك ممكن تجيب بالاربعين الف حاجة زيرو و يفضل عليك قسط بسيط خالص

و لو انت دماغك فى المستعمل فممكن نعرف طبيعة مشاويرك ايه

يعنى مثلا بتحب تسافر بالعربية ولا بتفضل القطر او السوبر جيت او الطيران الداخلى

كمان نقطة استعدادك انك تصرف قد ايه يومياتى عليها زى ايه مثلا

انا ركبت البيجو 2000 سى سى فترة و لقيتها بتاكل بنزين كتير عما كنت راكب فيات 1100 سى سى

و كمان بند الراحة النفسية يعنى انا برتاح لدى ومش برتاح لدى

كل الامور اللى فاتت بتفرق

و عموما الواحد لازم يركب حاجة تريحه مش تدفع فلوس وتركب حاجة مش مريحاك

كمان

[الباشدكتور]

السلام عليكو

مفيش احسن من اللادا في العشرينات ( عربيتي حاليا)

سيبك من 128 ( مع احترامي للباشمهندس ياسر طبعا)

اللادا اوسع وموتورها اقوي 1200 او 1500 واقوي ( بودي وعفشة وكل حاجة ) 60 مرة من ال 128

قطع غيارها رخيصة جدا

مرة كسرت وش فانوس زعلت بقي وقلت عليه العوض في مصروف الشهر

كان عندي تجربة مع واحد صاحبي كسر فانوس أوبل وصلحه ب 800 جنية تقريبا علي ما افتكر

قولت يبقي وش الفانوس بتاع اللادا ببتاع 200

اشتريته والراجل ركبهولي بسيليكون وبقوله كام قالي 10 جنية

آه والله

الفانوس التاني كان متوسخ كان هاين عليا اقوله اكسره وغيره لا يقول ايه العبيط ده

وسوقها مفيش بعد كده

عيبها هو عيب كل الصناعة الروسي بتركز القوة والكفاءة والاقتصادية جدا

بس كل حاجة مانيوال وقصدي يعني انك وانت راكبها بتعمل جيم

ودايما كنت بقول اللادا اريح من المشي (حاجة بسيطة) :lol: :lol:

اما لو في الاربعينيات لغاية الستينات فالدايو هي الحل

لو اواخر التمانينيات او التسعينات فيبقي ماتركس او صني جديد او تويوتا او لانسر قديم

130 يبقي تويوتا (وهم)

140-150 اسكودا

تم تعديل 15 سبتمبر 2008 بواسطة الباشدكتور

[محمد عيسى]

طبعا اللادا احسن بس استهلاكها للبنزين اعلى

و ده في المستعمل (اللي ممكن تلاقي منه ب 25) او الجديد (اعتقد في حدود 47)

[iloveegypt]

شكرا للباشمهندس ياسر و ا محمد عيسى والباشدكتور على ردودهم

بس بالنسبة لسؤالك مهندس ياسر

انا عايز حاجة مصاريفاها الشهرية = صفر لو ينفع حاجة تكون بتشم بنزين ولو جديد ماشى ولو مستعمل معنديش مشكلة

حكاية السفر ما اظنش اسافر بالعربية والمدينة اللى انا عايش فيها فى مصر ممكن تكون فى حجم مدينة نصر او اقل يعنى مدينة صغيرة اكبر مشوار فيها حوالى 5 كم

حكاية القسط محبوش

واخيرا احنا عندنا محطات غاز طبيعى هل هناك امكانية اركب غاز طبيعى وهيوفر وايه عيوب على العربية

[HDarwish]

وأنا معدي كده لقيت ناس بتتكلم على اللادا والفيات

حبيت اقول كلمتين حق وواجب عليا في حق اللادا .. عربية متينة وبتتحمل بس فعلا على رأي الباشدكتور الواحد جوا اللادا بيعمل جيم

الفيات عايزة طالب في الجامعة يعني مشاوير قليلة .. بس اللي بيحب يدلع عربيته الفيات أي شوية دلع صغيرين يبانوا فيها .. زي اضواء زرقاء ليزر واستيكرات وحركات من دي .. فكرتوني باللذي مضى .. وياسلام لو ظبط الجنوط وريحت العربية شوية إوعى وشك ولا البي إم 530

بالنسبة للعزيز Iloveegypt

لو عايز نصيحتي .. إتوكل على الله في حتة كورولا حتى لو مش زيرو

[ozoozo]

ابعد عن الغاز لانه بيبهدل الموتور وبتحتاج عمره كل شويه هو عملي للناكسي والناس اللي مشاويرها كتيره وبتسافر كتير

[محمد عبدالعزيز]

أنا بشكر كل الأخوة الأفاضل اللى شاركوا بأرائهم

إن شاء الله لى عودة بس أفضى شوية

[محمد عبدالعزيز]

متشكر جداً يا جماعة على نصايحكم اللى فعلاً استفدت بيها

أنا حبيت بس أقولكم إنى خلاص اشتريت العربية والحمد لله مبسوط بيها, دعواتكم ربنا يبارك لى فيها إن شاء الله

هى لادا 2107 موديل 90 والحمد لله حالتها وكويسة ومش محتاجة مصاريف.

أشكركم مرة تانية على تعاونكم