احتاج مساعدتكم...

[بنت شعنونة]

ما عرفتش احط الكلام دا فين

بس هوا شكله هنا

دلوقتي ماشاء الله كل واحد هنا عنده خبرة افضل مني بامور الحياة بحكم العمل والتجربة والسن

دلوقتي اخنكم في الله اللي هيا انا معاها كام "مليم" يتامى كدا وعاوزة اعمل بيهم مشروع على قدي

ياريت تنسوا اني دكتورة خالص

:dozingoff:  ???

عايزة منكم النصح

تفتكروا ايه المشروع اللي ممكن ابدا فيه هنا في مصر ويمشي حالة

يعني ياكلني عيش على الأقل مش بقلاوة

عيش بس

طبعا في ظل جميع الظروف الراهنه

وسيبكم من اني بنت لأني بمية راجل

ارجوكم انا محتاجا مساعدتكم بجد لأنه الوقت بيجري مني ولازم اخد قرار وكلامكم اكيد ها يفرق معايا

ممكن... :inlove:  :angry2:  :angry2:

[amir]

عندى ليكى مشروع يجنن يا شعنونة....حديكى رقم حسابى فى البنك....حطى القرشين بتوعك فية لغاية ما الاخوة هنا يفكرولنا شوية ....وبعدين ... ربنا يسهل !!

[بنت شعنونة]

امير...

هممممممم

اكتب وصيتك ياريت :angry2:  :devil:

عشان نويت اقتللللللللللللك

انا بتكلم جد والله

:angry2:  ???  :(

[amir]

على فكرة أنا كلامى جد جدا..... وحقول لك اية اللى حصل معايا

من كام سنة كدة و صلنى E mail من واحد افريقى لا اعرفة و لا يعرفنى بيقول فية أنة قريب للرئيس مش عارف مين الذى تم الاطاحة بة و قتلة .... و ان المرحوم كان عندة ثروة لا تقدر بالبدنجان .... ونظرا للظروف السياسية اللى مش تمام ،فهو عايز يهرب الفلوس دى خارج بلدة و طبعا ملاقاش حد يثق فية غير شخصى المتواضع.... و كل المطلوب هو رقم حسابى و نموذج توقيعى ـ وبس ـ و بعدين هو هيحول مش عارف كام ميت مليون دولار لحسابى ، و بعدها حيشرفنى بالزيارة علشان يأخد فلوسة مقابل نسبة مش عارف كام من المبلغ الاصلى.  !!!!!!!

عرفتى لية بقى عايزك تحطى فلوسك معايا؟

الحقيقة هما سببين:

1ـ علشان تشاركينى فى نسبة الارباح اللى هنخدها منة

2ـ علشان نفتح حساب فى البنك، لأن أنا معنديش أصلا حساب

اية بقى رأيك فى المشروع دة .... تشاركينى ؟؟؟؟

[بنت شعنونة]

:0

دا بجد دا؟؟؟

وبعدين عملت ايه؟؟

وبعدين انا نفسي في افكار بجد الله يخليكم

واحد يقولي حطيهم لي في البنك باسمي

والتاني قالي هاتي عربية كبدة تكسبي دهب

???  :notify:  :nervous:

هاتموتووووووووووووني :nervous:

[amir]

عربة كبدة اية ؟ و بنك اية .... ما أنا قلت لك من الاول انى معديش حساب فالبنك

لكن بجد اذا مكونتيش عارفة مشروع معين و عارفه كل حاجه عنه يبقى بلاش تغامرى بفلوسك و اعتقد ان هناك بعض السندات فى البنوك ممكن تسألى عنها و شوفى المناسب لك منها.... و نصيحه مره تانية بلاش المشاريع الى ما تعرفيش حاجه عنها .

و رقم حسابى هو .......

بسرعه قبل الفرصه ما تفوتك !!!

[Sharkiah]

أيا كان المشروع الذى سينتهى إليه تفكيرك وتمحيصك ، قبل أن تبدأيه لاتنسى زكاه المال ، إذا كنت لم تخرجيها ولو إنى واثق إنها لم تفتك بإذن الله ، وخلى بالك إن الزكاه المستحقه على المال المكتنز الذى يحول عليه الحول ستتوقف وسيصبح عليكى حساب زكاه أخرى تبعا لنوع النشاط الذى سوف تمارسيه ـ  زكاه عروض التجاره مثلا

أرجو إخبارى لو إستقريتى على عربه الكبده لأنى بأموت فى سندوتشات الكبده الإسكندرانى

وبالتوفيق إن شاء الله رب العالمين

[متسائل]

الأخ أمير..

تصلني مثل الخطاب الذي ذكرته حوالي 4 أو 5 خطابات يومياً.. و المتغير هو إسماء الأشخاص و الأماكن.. لكن الموضوع هو هو.

طبعاً هي نصبة.. لكن إزاي.. مش عارف.

رداً على الأخت شعنونة..

1- هل أنتي دكتورة أم خريجة فنون جميلة؟؟؟؟؟؟؟؟

2- أحسن مشرع.. كشك من بتوع المحافظة  :angry2:  :angry2:  :angry2:  :D

[amir]

الاخ متسائل

طبعا الكلام كله نصب فى نصب لأن هو حيطلب منك رقم الحساب و بعدين نوذج تو قيعك فى البنك .... و بعدين سيقوم هو بتنظيف حسابك أول بأول ، ده طبعا بعد مايكون قام بعمل نسخه طبق الاصل من توقيعك .

و المناسبه هو رقم حسايك ايه ؟؟

[shokry]

كوفى شوب لان البلد كلها عواطليه وقاعدين على القهاوى وانا شفت بنفسى فى الكوفى شوب الى فتح تحت عمارتنا بمدينه نصر

[بنت شعنونة]

بالنسبة للزكاة

في بالي والله

:blush:

بس انا لسا ما خدتش الفلوس والله عشان يمر عليها الحول

بس ان شاء الله هيا في بالي

ندخل في الجد بقى

المشكلة الرئيسية دلوقتي انه انا اللي ها امسك الشغل دا يعني ها اعمله بنفسي

انا كنت قبل كدا عملت مشروع من غير ولا مليم اللي هوا

occasional Dj & dicoration for weddings & Birthdays

والحمدلله مشي الحال كنا ماشيين عال العال

لحد ما العيلة الكريمة ما عجبهاش الحال وازاي دكتورة تشتغل كدا وبتاع

واتلغى الموضوع

???

وبيني وبينكم اكتشفت اني كنت بشيل وزر كل اللي كانوا في الفرح او عيد الميلاد لأني انا اللي بسمعهم المزيكا وارقصهم ومش عاوزا اعمل كدا تاني

كفايا الذنوب اللي عندي خلقة

ف ادي حاجا راحت

رجعت قلت انا ذوقي عالي واعرف واحد فني تطريز غلبان

فكرت اشتري كام ماكينة تطريز ونسوق شغلنا

لقيت ان الموضوع صعب في وجود المصانع وبعد قفل المستورد

يعني فرصتي مش قوية بس مش للدرجة ضعيفة

موضوع الكافتيريا فكرت فيه فعلا

بس ما ينفعش ليا

عشان موضوع الذنوب زي ما قلتلكم

وعشان كمان الخناقات والمشاكل وحاجات كدا

نيجي للي بعده

انا عيني على محل كدا بفكر اخده ايجار جديد واعمله فول وفلافل خصوصا ان موقعه ممتاز

المشكلة ان العيلة برضه معترضة على اساس انه ما ينفعش اقف اتابع الشغل فيه؟؟

ليه؟؟؟؟؟ مش عارفا :notify:

اللي بعده

حضانه

العيلة فرحت بيها جدااااااااااا

خصوصا %

[هشام عبد الوهاب]

اى مشروع تجارى يعتمد فى تحديده او اختياره اولا على رأس المال

ثانيا على بعض الخبرات اذا توافرت  ثم احتياجات السوق

يعنى اولا معاكى كام تقريبا وثانيا عندك فكره عن ايه غير الطب،،،،  وبعدين نتكلم

[متسائل]

حلي مشكلتك مع العائلة أولاً.. و بعدين شوفي حاتشتغلي إيه.

:angry:

[بنت شعنونة]

بعدين رجعوا خافوا من الحضانة بعد صاحب الحضانة  اللي اتسجن عشان طفل فقع عين زميلة فيها

فكرت اتعلم البورصة وامشي فيها

بس انا ما اعرفش ايه نظامها في مصر؟؟

فكرت اشتري اسهم من شركة

بس دا مش عائد

اانا عايزا حاجا اقدر اعيش منها

وسيبكم من موضوع الخبرة

ماحدش اتولد عارف كل حاجا

وانا اتاكدت من دا بنفسي لما اشتغلت زي ما قلتلكم

ما كنتش اعرف حاجا في الشغلانة دي

وفي خلال شهرين كنت استاذة فيها وعملت اللي ما يعمل

ف سيبكم من الخبرة خااااااااالص

اما عن موضوع معايا كام

فهما ملاليم الصراحا

بس اللي عايز

ممكن يعمل كا حاجا بقرش واحد

يعني هما كام الف عمي كدا

على قدي

:lookaround:  :angry:

[بنت شعنونة]

باعكس يا متسائل

العيلة دي امرها هين عندي

المهم انا استقر على حاجا

ساعتها

مافيش حاجا ممكن تمنعني

عشان كدا انا ب استشيركم

ها ايه رايكم؟؟

:angry:  :notify:

[هشام عبد الوهاب]

شكلك كده معاكى مبلغ معقول

ممكن تشاركى اى دكتور صيدلى  او دكتوره وتفتحوا صيدليه

ملابس المحجبات كمان ارباحها ممتازه

و كذلك ملابس الاطفال  بما ان ذوقك حلو

لكن لازم يكون المحل فى مكان حيوى ومميز ويفضل يبقى فى سنتر

----------------------------------------------

فيه مشروع  تانى  بس مكلف شويه اكتر

محل مأكولات

take away

زى كوك دور وسمايلز وغيرهم  ،،،، المشكله انه محتاج شوية خبره

كفايه دول لما اشوف رأيك ايه

[toty2003]

البلد دى بلد هوجات

فى السبعينيات طلعت هوجة الملابس المستوردة والفراخ...

كله عمل فراخ لحد ما خربيت

طلعت هوجة الانترنيت كافية

كله عمل كافية لحد ما قفل

طلعت هوجة الموبايل

المحلات كلها موبيلات

التيك اواى على قفا مايشيل

سوبر ماركت هيييجى ايه جنب ابو ذكرى واولاد رجب والمحمل و...

الحضانات من 2 -3 فى كل شارع

فى الحى السابع بمدينة نصر 15 كوفى شوب فى نفس الشارع

فكروا فى هوجه جديده

[toty2003]

على فكره الصيدليات بتكسب قوى

مره اشتريت مضاد حيوى ب49 جنيه ثم حاولت ارجعة بعدها بـ 2 ساعة بدون ما افتحة \

رد عليا البيه الدكتور انه لازم يأخذه بسعر الشركة 33 جنية

المكسب فى الادوية كتير 33%

وكمان بياخذوا الادوية على النوتة

[بنت شعنونة]

نص محجبات البلد  

هممممم

مش عارفا اقولها ازاي

بس ماشي

معفنين

استغفر الله العظيم

بس قصدي بالكلمة دي

ان الواحدة تشتريلها عباية او 2 وتفضل بيها السنة كلها

وعلى فكرة انا متاكدة من اللي بقوله

:angry:

أعتقدد لازم تفكري مرة تانية في هذا الكلام !!!  

:sneaky2:  :sneaky2:  :sneaky2:

Edited By متسائل on Aug. 27 2002 6:13pm

[mnman]

عليكي وعلي الكفيتريات او كوفي شوب والله جنان.. وياريت تعينيني مدير ركن الشيشة.. علي الغم أني مابشربهاش ولابدخن من اصلة.. إية رأيك... واهو الناس حتيجي تضيع وقتها كالعادة .. وفي الصيف حتلمي لم.. وخمسة وخميسة من الحسد..

بخصوص موضوع الافارقة والفلوس انا اعتقد ان اسمي علي mail list في نيجيريا.. هي طبعا نصبة في الاخر وبعد ما يعشمك بالملاين المتلتلة إلي حتنقلك من فئة الفقراء الي مصاف الغنياء يجي يقولك بس وحياتك علشان التحويل يتم ابعت لي  5000 دولار للتحويل وطبعا

المبلغ دة هايف بالمقارنة بنسبتك من الملايين... وتقوم انت باعت الفلوس لحسابة.. وصباح الخير... في مرة سئلت واحد منهم لية متحولش الفلوس سويسرا قام قال................. مردش عليا..

:(  :(  :angry:  :inlove: