إستفسار عن تسجيل السيارة بالقنصلية المصرية بالسعودية

[عمرعمرعمر]

السلام عليكم و كل عام و انتم بخير

اناشد الاخوة المشرفين و الاعضاء الموقرين انهم يشوفولي حلي في مصيبتي اللي خلتني عايش انا و اسرتي في هم و غم

انا رحت من اسبوع لشركة تويوتا اسال عن نظام ايجار تمليك وهل ممكن اسجل السيارة في السفارة و انزلها معايا مصر و انا نازل نهائي ودققت و سالت كويس جدا و كان رد الموظفين و هما مصريين انه عادي ممكن تاخد سيارة ايجار تمليك و هتتسجل باسمك في السفارة و ان في مصريين كتيير عملوا كده و انا اكدت علي الموظف ان اهم حاجة اعرف انزل بيها مصر و قالي ايوة هتنزل عادي ما فيش مشكلة

المهم أخدت رأي اصحابي في العمل و استخرت ربنا و قررت اني اشتري سيارة و رحت الشركه و دفعت الفلوس و خلصت الورق و العربية وصلت الشركة و بعدين عشان اعرف الاوراق المطلوبة لتسجيل السيارة جبت رقم السفارة و كلمتهم قالي كلم الملحق التجاري و كلمته و لسه باقله ايجار تمليك قالي ما ينفعش تتسجل قلتله اصل الشركة قالول.....قطع كلامي و قالي ما ينفعش انت بتفهم و لا ما بتفهمش قلتله طب فهمني قالي اصطبحنا عالصبح ....المهم هو اولا صدمني و ثانيا حرق دمي و كلمني باسلوب غير لائق و مادانيش عقاد نافع و كأنه شمتان فيا و قفلت معاه و رحت الوكالة قلتلهم علي اللي حصل قالو لا الكلام ده غلط و السيارة بتتسجل عادي و احنا هنديك ورقة مش عارف ايه عشان السفارة

المهم انا مصدوم جدا و مش عارف اعمل ايه و السيارة ركنتها و عايش في نكد لان الخسارة كده هتكون كبيرة اوي عليا خصوصا اني عملت حساباتي كلها بما فيها سعر جماركها و نزولها و ظبط اموري علي كده

فارجوكم اللي عنده اي حل او يعرف حد عنده نفس المشكلة او يعرف وسيلة يسأل بيها و يستفسر عن الاوراق المطلوبة و امكانية تسجيل السيارة بالسفارة بطريقه او باخري

و نداء خاص للاستاذ الفاضل سي السيد و شكرا للجميع

[عمرعمرعمر]

يعني انا مش عارف لحد دلوقتي مين الصح و مين الغلط

و مش عارف استفسر كويس من الاخ اللي بيرد علي التليفون في الملحق

يعني هو لو قاللي علي الاوراق المطلوبة و اشوف لو الشركة هيدوهالي او يدوني ورقة بديله تمشي مكانها

لكن المشكلة انه اصلا رافض مبدأ ايجار تمليك من اساسه

[عمرعمرعمر]

مع العلم انني اسكن في محافظة صغيرة اسمها القنفده في طريق جيزان

و من الصعب ان احضر لجدة الا لانهاء مصلحة

[Alshiekh]

سؤال للتوضيح أكثر

ماذا تعنى ايجار تمليك؟

وهل انت مالك فعلى للسيارة؟ ام انها لاتزال تحت ملكية الشركة المؤجرة لك؟

وحيث انك " نازل نهائى " فهل معنى ذلك انك تريد ان تستأجر السيارة ثم تنزل بها مصر وتتهرب من دفع باقى الاقساط؟ ومن ثم فالملحق التجارى بالسفارة يعلم بتلك التصرفات ولذلك ابلغك بالرفض؟

[se_ Elsyed]

للأسف إنت اللي غلطان .. لإنك رايح تسأل البياع اللي عايز يبيع وبس وبالتالي ممكن يعطيك أي معلومة مضللة .. في حين يجب أن تسأل المعنيين بالموضوع وهم السفارة المصرية ...

الإيجار المنتهي بالتمليك بتبقى العربية متسجلة بإسم الشركة إلى أن يتم دفع الأقساط بالكامل وبعد كده بتتنقل بإسم المستأجر يبقى أنت كده مالك ثاني ولست اول ... أما إذا تأخر المستأجر في الدفع شهرين تلاته بالكتير فبمنتهى الهدوء بيبعتوا حد من الشركة بمفتاح إحتياطي طبعاً ويقوم واخد العربية ويا دار ما دخلك شر أو يبلغوا الشرطة عن المستأجر ..

بالمناسبة حتى لو كانت العربية دي بـ 100 ألف وقمت أنت بسداد 99 ألف وأتاخرت في الألف الأخيرة .. برضوا بيسحبوها منك وكل فلوسك بتروح عليك .

وبالتالي طوال تلك الفترة أنت لست مالكاً للسيارة وهي مش من حقك .. لكن الحاجة الوحيدة اللي ممكن تستفيد بها هي إنهم ممكن يفوضوك عشان تسافر بها وترجع تاني تريبتك ..

بالمختصر المفيد ...... المخرج الوحيد من هذه الورطة هو إنك تسدد قيمة السيارة الأن بالكامل ... قبل شهر أكتوبر ... وتحصل على خطأب من وكيل تويوتا يفيد فيه بإنك مالك أول ... وهايعطيك معاه شهادة منشأ للسيارة كمان ... وتاخد ده كله تختمه من الغرفة التجارية ومن وزارة الخارجية وتطلع على السفارة قبل شهر 10 تسجلها هناك عشان تستفيد من خصم الـ 10 % اللي بينتهي في شهر 10 كل عام ....

[عمرعمرعمر]

السلام عليكم اولا باشكركم جدا علي الاهتمام و الله انا لو كنت طلبت الخدمة من اخويا ما كنش رد بالسرعة دي

بالنسبة للاستاذ محمد طبعا انا مش ناوي اتهرب من الاقساط انا مش حرامي و ما فيش حركات و لا حاجة و ايجار تمليك مفروض بديل كلمة تقسيط بس الفرق اللي انا لسه عارفه النهارده من الوكاله انهم كاتبين اسمي مستخدم و اسمهم هما المالك في الاستمارة وشكرا لحضرتك علي الاهتمام و الرد السريع

بالنسبة لاستاذي العزيز سي السيد انا فهمت كلامك كله و اقتنعت بيه بس المشكلة اني معيش ادفع المبلغ كامل و انا فعلا غلطان جدا و استاهل و ندمان لدرجة ان انا مش عارف اركز و لا انام و لا اكل و الله بجد بس ارجو من سيادتك تشوف لي اي حل تاني حتي لو فيه خسارة مادية معقولة بس خسارة احسن من خسارة لانني عقدي هيخلص بعد سنة لان ناوي اجي علي عقد احسن شوية و في منطقة احسن و لو استلمت السيارة و بعتها بعد سنة هاخسر فيها كتير و انا واثق في افكار حضرتك الحكيمة و لك مني الف تحية و سلام يا احسن و اطيب و انفع سي السيد في الدنيا و الله بحبك حتي لو المشكلة ما تحلتش

[se_ Elsyed]

طب لما أنت عارف إنك ماشي كمان سنة ... يبقى أشتريت عربية بالتقسيط ليه وأقل تقسيط هاتلاقيه 3 سنين مثلاً ؟

عوضك على الله يابوكمال ؟

لكن إطمئن التويوتات ما بتخسرش كتير وأعمل حسابك على 25 % كحد أقصى خسارة . واهو درس إتعلمته

[عمرعمرعمر]

ربنا يخليك يا اخي الفاضل يعني انت رايك اني استعملها و لما اجي نازل ابيعها و اتوكل علي الله و احتسب

هي فكرة بس انت كنت عايز حد يواسيني و يصبرني و الف شكر

و برضه ايه رايك اني لو نزلت نهائي انقل ملكيتها باسم واحد صاحبي و لنل ارجع اخدها تاني

يعني استعملها و ما ابعهاش كده يبقي احسن ولا ايه رأيك

و مشكر جدا

[أسد]

علشان تنزل سيارة لمصر ..

إنت محتاج فاتورة من الوكيل بشراء السيارة . وتكون باسمك .. بشرط أن يكون تاريخ الفاتورة لك كمالك أول في نفس سنة الموديل ..

الفاتورة يجب أن تكون موقعة من مدير الشركة وكيل السيارة اللي توقيعه معتمد في الغرفةالتجارية ..

تاخد الفاتورة وتصدقها من الغرفة التجارية ..

إذا حتنزل السيارة مصر في نفس السنة .. حتاخد الفاتورة المصدقة وتروح تصدقها من السفارة المصرية ..

بعد كده تقدر تنزلها مصر براحتك ..

لو حتنزل السيارة بعد فترة .. سنة أو أكثر ..

حتحتاج تجيب شهادة من المرور يثبت بأنك المالك الأول للسيارة .. ومن نفس تاريخ الفاتورة الصادرة من الوكيل ..

وتصدقها من السفارة المصرية ..

علشان لو فيه واحد صاحبك في الوكالة أو انت كنت بتشتغل في الوكالة .. وعملت فاتورة مضروبة بعد ما سددت الأقساط باسمك .. يعرفوا

لازم تصديق السفارة يكون جديد ..

لما تنزل السيارة مصر ..

بيحسبوا لك الجمارك كما هو متعارف عليه ..

وإذا نزليتها بعد مضي أكثر من سنة على موديل السيارة ..

بيتم خصم 10% من قيمة السيارة الأساسي كاستهلاك عن السنة الأولى

و 5% عن كل سنة تالية .. بحد أقصى35%

يعني لو السيارة مضى عليها أكثر من ستة سنوات حيخصموا برضه 35% فقط مش أكثر ..

في حالة شراء سيارة بالتقسيط ..

والحالة هنا مختلفة .. السيارة بالتقسيط بتكون باسمك من أول يوم .. وبتدفع قيمتها على أقساط ... وهذا مختلف عن التأجير المنتهي بالتملك ...

في الحالة دي تقدر تنزل السيارة في أي وقت ..

[se_ Elsyed]

تعديل بسيط يا ابو الاسود

برنت المرور مش مطلوب لإن ده اسهل حاجه بتنضرب

الحد الاقصى للخصم في الجمارك هو 50 % وده من موقع الجمارك المصرية نفسها يعني 8 سنين تقعد بالعربية وبعدها مش هاتاخد خصم ... لكن بشكل عام لا تستطيع ان تقعد بالعربية بره اكثر من 10 سنوات يعني لازم تنزلها وتجمركها قبل مُضي 10 سنوات

[عمرعمرعمر]

انا رحت سالت انهاردة في الوكالة و دخلت للمدير المسئول و جبت الشخص اللي قاللي ان ممكن تتسجل في السفارة و كلمته بعصبية امام المدير فالمدير قاللي علي فكرة احنا ممكن نديك فاتورة شراء مختومة من عندنا و معاها شهادة المنشأ و تروح توثقها و قاللي ما انت لو قلت انها ايجار تمليك هيقولو في السفارة ما ينفعش انت ما تقلش حاجة خد الفاتورة و شهادة المنشأ ووثقهم وبس

فقلتله يعني الفاتورة مش مكتوب فيها ايجار تمليك قاللي لا و فيه ناس عملوها

فانتم ايه رأيكم في كده

ومشكورين جميعا

[قديم]

عزيزي موضوعك فيه شوي من الــتحايل على النظام . والتحايل ممكن يكون لصالحك وممكن يكون ضدك .

انا لو منك ذهبت لسفاره وسالتهم . واكيد فيه الف واحد قبلك عملو نفس الطريقه . وسالهم عن الشراء المنتهي بالتمليك وكيفيه التحايل عليــه وهل يقبل ما قاله لك مدير الوكاله .؟؟

لان انتظار ثلاث سنوات وبعدها يقول لك الي عملته غلط .؟ صعبه شوي ..

تحياتي وتقديري ليك ولاراء الاخــوه

[عمرعمرعمر]

يا جماعه ايه رايكم في كلام المدير انه هيديني فاتورة شراء باسمي و شهادة المنشأ

مع العلم بان شكله فاهم

يعني قاللي انا هاحاول اعملهالك قبل اكتوبر عشان تلحق خصم ال 10 في المية

بس لو ما قدرتش يبقي اعذرني و تاخدها بعد العيد عشان هتاخد وقت

[se_ Elsyed]

يا جماعه ايه رايكم في كلام المدير انه هيديني فاتورة شراء باسمي و شهادة المنشأ

مع العلم بان شكله فاهم

يعني قاللي انا هاحاول اعملهالك قبل اكتوبر عشان تلحق خصم ال 10 في المية

بس لو ما قدرتش يبقي اعذرني و تاخدها بعد العيد عشان هتاخد وقت

ده حل كويس .. انما لو اجله لبعد العيد يبقى كده بيلعب بالوقت .. ده خطاب من سطرين مش هاياخد 10 دقايق ... الحق اعمله قبل اجازة العيد

[عمرعمرعمر]

خلاص يا استاذ سيد ان شاء الله بكرة هاكون في الوكالة و ادخل للمدير تاني و اطلبه منه

انا لاحظت ان طول ما بالح عليهم في حاجة بيحاولو يعملوها

و ان شاء الله لن يضيع حق وراءه مطالب و ناس محترمة تشجعه

[عمرعمرعمر]

و حبيت اسال حضرتك لو عمل لي الورق هاوثقه طبعا من الغرفة ثم من الخارجية ثم السفارة

طب هم فاتحين لحد امتي و هل فيه حد فيهم هيقفل بكرة او بعده

و هل لازم اروح بنفسي و لا ممكن حد غيري يروح

[عمرعمرعمر]

يا جماعه انا رحت انهارده الشركة و قلتلهم انا مش هاخد العربيه و اللي يحصل يحصل

و قالولي هنرد عليك بكرة لازم نلبغ الادارة الاول

قلتلهم في كل الاحوال مش هاخدها

و ربنا يسهل

[عمرعمرعمر]

امال فين ابويا

بابا سين سين فين

و النبي لو حد شافه يقوله ان ابنه بيعيط

[عمرعمرعمر]

يا جماعه انا رحت المرور انهارده و سألت و طقست ما انا اتعلمت

المهم فهمني واحد مسئول هناك و طبعا دخلتله بواسطة ان السيارة اصلا ما بتدخلش علي الحاسب باسمي

و المهم هو جرأني اكتر و قاللي ما تستلمش السيارة و سيبهالهم

و السيارة دلوقتي في الوكالة

و بتوع الوكاله زهقوا مني و الظاهر هما ما بيحبوش المشاكل و كشوا

و ان شاء الله هيدوني فلوسي بكرة او بعده

الفائدة :

اولا : قبل ما تتأخذ قرار مهم اسأل كويس و خد النصيحة من أهلها و اسأل و اسأل و اسأل

ثانيا : ما حدش يسيب حقه ابدا و ما فيش حد يهدك بكلمتين يخوفوك و خليك جريء و قاتل فاما النصر او الشهادة

ثالثا : لو كان فيه قلة من المصريين وحشين بس كل المصريين جدعان و بيقفو مع بعض وقت الزنقة (عن تجربه)

رابعا و أهم حاجة : ما حدش يفتي في اللي مالوش فيه

و هو فين ابويا بقي

[se_ Elsyed]

شاطر يا عمر ... ربنا يسهل والخساير تبقى بسيطة وخسارة قريبة ولا مكسب بعيد .. وإياك يكون درس إتعلمت منه وإتعلمنا إحنا كمان منه