العمل فى عجمان ام دبى

[NOO]

اخوانى فى الله ... بجد الموقع اكثر من رائع فى كل المجالات وخصوصا قسم المغتربين المصرين

انا عضو جديد وليا استفسار ارجو من الجميع مساعدتى

انا مهندس بعمل فى الامارات وجالى عرضين ومحتار اروح مين فيهم

جالى عرض فى جهة حكومية فى عجمان ب 8600 درهم والعرض الثانى فى دبى فى قطاع خاص ب 14000 درهم

اروح مين فيهم ؟؟؟؟؟؟؟؟؟؟؟؟؟؟ محتار ومش عارف مين الافضل وخصوصا انى مش عندى خبرة كبيرة فى البلد لكن خبرتى كبيرة فى مصر حيث كونت اعمل مدير مشاريع

ومع العلم انى متزوج وعندى طفل

بس فى ناس كتير مخوافى من دبى مهما كان الراتب

فى انتظار الردود مع ذكر السبب لية اخترت المكان دة ؟؟؟؟

وشكرا جدا واسف على الاطالة

[NOO]

فين الردود يا جماعة دى اول مشاركة ليا وفى حيرة من امرى

[شريف حمدي]

لا تخاف وتوكل علي الله عليك وعلي دبي

طالما راتبها كبير وكبير

[NOO]

شكرا يا استاذ / شريف على ردك

بس بصراحة مخبيش عليك انا مش عارف لية مش عايز اروح دبى وخصوصا ان فى ناس كتير قالولى انت براتبك هتسكن فى عجمان او الشارقة ومن الصعب جدا تروح الصبح بدرى من الشارقة لدبى لانها زحمة موووووووووت

دة غير انها قطاع خاص ودة الى مخوفنى ... حاسس ان الحكومة فيها امان اكثر ولا اية ؟؟؟؟

مش عارف لية برغم ان راتب الحكومة اقل لكن حاسس انها احسن وكمان شغلعا مش هيبقى طويل وطحن زى الخاص ..

ارجو الرد من باقى الاعضاء لكل من يملك الخبرة فى احوال المعيشة فى دبى وعجمان

وشكرا استاذ شريف وفى انتظار باقى الاعضاء

[seeem]

بعض التفاصيل عن كل عرض ... من حيث السكن والمواصلات وخلافه ... قد تساعد على إبداء النصيحة

[Digital]

اخي الكريم

انا اعيش في دبي منذ حوالي السنة و اعمل بثاني اكبر شركة عقارات بالشرق الاوسط لست مهندس معماري و لكن تخصصي في تكنولوجيا المعلومات Orcale Technical Consultant وهو تخصص نادري فيه الخبرات و تصل رواتبه لاكتر من 30 الف درهم شهريا (طبعا لم اصل لهذه المرحلة بعد لانني في اول الطريق) لكن نصيحتي ليك انفد بجلدك من دبي، يا راجل حرام عليك و جايلك شغل في الحكومة كمان و عاوز ترفضه اللي متعرفوش ان عجمان مدينة هادية و مفيهاش الزحمة القاتلة بتاعة دبي و بعدين راتبك 15000 درهم في دبي يعتبر راتب عادي جدا جدا جدا لمدير مشاريع، اللي متعرفوش ان ايجار شقة ستوديو (اوضة بحمام بس) بحوالي 7000 درهم في المناطق اللي مش شعبية، ده غير ان دبي مليانة هنود و بقوا هما المديرين و المتحكمين في النشاط التجاري و ما ادراك ما الهنود ربنا ما يكتبها عليك يا رب.

في حاجة تانية مش بس الشقة بفلوس ده حتي الباركينج بفلوس الهوا بفلوس انا عازب بصرف شهريا اكل و شرب و الذي منه 3000 درهم من غير ايجار السكن ما بالك انت يا ابو العيال و مش مدلع نفسي اوي كمان يعني مقضيها يوم حلو و يوم مر.

انا بدور حاليا علي شغل حكومي اتعرض عليا شغل ب 12000 درهم و رفضت لان شفت الناس بتتذل ازاي بعقد ال 3 سنين ( يا ريت تقري عن نظام الكفالة و الكنسلة و الحرمان) انا جالي عرض ب 15000 و كفيلي رفض يسيبني و في نفس الوقت رفض يزود الراتب، يعني ممكن بعد 6 شهور يجيلك عرض ب 30 الف و كفيلك يطلعلك لسانه و فيه ناس بترفض انك تنقل من عندها لمجرد الغلاسة ليس الا او بيكون السيستم بتاعهم كده.

بس علي اي حال اللي انت شايفه صح اعمله و صلي استخارة

اخوك ... احمد

[madzoro]

السلام عليكم و رحمة الله و بركاته

شوف اخي الكريم

اذا حسبتها ماديا في الوقت الحالي دبي تكسب ليه؟

لو انت تقدر على المعاناة في الانتقال من دبي الى الشارقة او عجمان من ساعة ونص الى ساعتين ذهابا و مثلهم عودة هتسكن في حدود 3500الى4000درهم شهريا هتطرحهم من الراتب في الحالتين باعتبار ان المرتبين اللي ذكرتهم شاملين كل شيء

لو حسبتها اجتماعيا و اسريا عجمان تكسب عشان هتلاقي وقت اطول للاسرة و ممكن شغل جانبي بس لو عندك اطفال في سن مدارس هيكون صعب عليك حيث ان مصاريف المدارس عالية

انا برجح كافة دبي ............ و نصيحتي ليك هي صلاة الاستخارة

لي بعض الاستفسارات

1-انت معاك اسرتك هنا ؟ مع اني اعتقد لا

في هذه الحالة اذا اخترت دبي .......... يفضل انك تستخرج الرخصة قبل مجيئهم

2- العمل في القطاع الخاص غالبا بيكون خبرته اكتر من الحكومي انت بتفضل الخبرة و لا اكتفيت لان الخبرة في دبي مقابل رحلة العذاب بين العمل و المنزل

احسبها و توكل على الله

بالتوفيق ان شاء الله

[NOO]

بصراحة ومن غير مخبى عليكم انا مش عارف لية مستريح اكتر لشغل الحكومة حاسس انو مريح غير القطاع الخاص وخصوصا ان شغل الخاص فى مجال المقاولات وطبعا ما اداراك ما المقاولات

اما الحكومة هيكون اشراف وبس .. الله اعلم اذا كان هيكون شغل طحن ولا لا بس بيتهيالى كدة مش هيكون زى الخاص

ومن ناحية العيلة هيا العيلة معايا هنا والحمدالله بس انا حاليا بشتغل من الصبح لحد 9 بليل ومفيش بريك غير ساعتين بنام فيهم يعنى يدوب بشوف اهل البيت بالعافية بعد 9 بليل علشان كدة تعبان اوى ومش حابب اشتغل شغل متعب تانى

وفى نفس الوقت مش عارف ازاى كان راتب عجمان يكفى لحياة كويسة مع زوجتى وابنى ولا مش يكفى وخصوصا انى مش عندى خبرة فى عجمان وكمان معنديش خبرة باسعار السكن فى عجمان

اية رايكم يا جماعة

وشكرا جدااااااااا يا ديجيتال و madzoro

[NOO]

اةةةةةةةةة احب انوه عن حاجة كمان ان الراتب بتاع عجمان 7300 +1300 بدل سيارة علشان اروح بيها الموقع يعنى انا لازم اجيب سيارة بالقسط او ما شابه علشان استخدمها للشغل