((((( بعض ))))) المهندسين و الدكاترة

[جويرية]

السلام عليكم و رحمة الله و بركاته

أولا عايزة أتكلم عن موضوع مضايقني و اللي فكرني بيه الدكتور حسام في مشاركته دي

معلش يا دكتور حسام نقلتها بدون أستأذان ، بس بيقولوا الكلام اللي يكتبه الواحد علي العام خلاص ميبقاش ملكه يبقي ملك الشعب كله

إقتباس(حسام يوسف @ Sep 18 2008, 12:25 AM)

حاجة غريبة فعلا

التمسك بلقب ولو لم يكن من حقك

واعتبار أن عدم استعمال الغير لة حين يخاطبك

اهانة

أو

تجاوز

دكتور

تتقال للعاملين فى المجال الطبى من أطباء وصيادلة وحتى أطباء الاسنان والعلاج الطبيعى

مع أن كلمة دكتور تعنى أن هذا الشخص يحمل درجة الدكتوراة

وبالتالى كثير من المهن السالف ذكرها

لا تستحق اللقب

تقوم كمان تتمسك بية؟

وتعتبر ان اللى مش هيناديها يا دكتور ----

يبقى تجاوز؟

المهندسين مع احترامى الكامل ليهم

كتير منهم مش مهندسين

مش خريجى كليات الهندسة

وتلاقى الواحد زعلان أوى ان قلتلة اى لقب الا يا باشمهندس

اه

باشمهندس

الكلمة اللى بجد بتنرفزنى

شيلنا الألقاب رسميا

ومنها البية والباشا

ولسة فية باش فى باشمهندس

وباشتمرجى

وباشمحضر

وياشكاتب

كل الألفاظ السابقة اندثرت أو فى طريقها

الا باشمهندس

مش عارف لية؟

ولية باشمهندس؟

لية مش بية مهندس؟

دوشتكوا

انا اسف

المشكلة ان اللى دكتور بجد

وحاجة تشرف

مبيقولهاش

واللى مش مصدق يشوف اعلان مستشفى سرطان الأطفال اللى بيظهر فية فخر مصر

د.مجدى يعقوب

يتكلم ويقول رأية فى المستشفى

ويختم كلامة بتنوية عن شخصة عشان لو فية حد مايعرفوش

ويقول

(مجدى يعقوب

ويتبعها بـ

جراح قلب)

شفتوا التواضع؟

مستغرب من العرق التركى اللى فى المصريين دة

أولا الموضوع زي ما هوه واضح من العنوان عن بعض الأخوة المهندسين و الدكاترة ، يعني مش كل الناس ، ومع أحترامي الشديد لجميع الأخوة المهندسين و الأطباء اللي معانا في المنتدي

المهم الجرايد بتاعتنا بتحب توقع بين الناس و من أول التنسيق بقي يكتبوا كليات القمة ، مش عارفة أيه معني الكلمة دي ، ده معناه أن في كليات للقمة و كليات للقاع

و اللي تعب نفسه و سهر الليالي يذاكر ومدخلش طب و لا هندسة بقي من كليات القاع

المهم بعض المهندسين و الدكاترة بيجيلهم بارانويا شوية من الموضوع ده ، انا شخصيا مبحبش أتعامل معاهم في الحياة يعني برة المنتدي

المهم ان حظي بقي أن واحدة قريبتي مهندسة فمضطرة أتعامل معها

مش ححكي عن كم الكبر و الأنزحة اللي عندها ، مع أن مرتبي مساوي لمرتبها ، اذا كنت أنا مش بفهم في شغلها فأكيد هيا مش تفهم في شغلي

بجد و الله في منهم عايز علاج لداء الكبر اللي عندهم

و اللي سبب ليهم الكلام ده هوه الدولة اللي بتميزهم ، حتي في موضوع الألقاب ذي ما قال الدكتور حسام

عايزين كل الخريجين يبقي ليهم ألقاب ، يا أما بلاش ألقاب خالص ، يعني مثلا خريج العلوم أيه لقبه ، خريج سياسة و أقتصاد أيه لقبه

يعني تبقي ألقاب أنجليزي و فرنساوي شيك كدة

يتبع

تم تعديل 21 سبتمبر 2008 بواسطة جويرية

[Digital]

انا علي فكرة مبرمج قواعد بيانات و دلوقتي الحمد لله بقيت مستشار تطبيقات اوراكل Oracle Technical Consultant و لا بحب حد يقولي بشمهندس و لا مستني حد يقولي يا سيادة المستشار :blink:

وعاجبني اوي لقب مبرمج و هوا اللي مكتوبلي في بطاقة العمل مبرمج حاسب الي لان مش سهل ابدا تكون مبرمج و تشتغل في شركات محترمة عاوزة شغل من نار

انا يا جماعة برضه مش Computer science و مؤهلي الاساسي بكالريوس تجارة 2005 و رغم ذلك معايا شهادات محترمة جامعية و دولية منها مثلا OCP بس عادي يعني ما فيه ناس كتير زيي، انا اللي عملته عمله مليون غيري مش قصة هيا، توماس اديسون كان معاه ابتدائية بس قدم للعالم ايه؟

بيل جيتس مكملش الجامعة قدم للعالم ايه

العقاد ابتدائية قدم للعالم ايه؟

من السهل انك تكمل تعليمك و تختار مجالك في الدول المتقدمة، لكن في الدول المتخلفة (اللي احنا منها) و الجامعات المتخلفة اللي احنا برضه متخرجين منها الموضوع مبيفرقش كتير و جرب كده تروح ببكالريوسك و تجرب تشتغل في دول زي كندا او استراليا، عشان كده خلينا نكون شوية واقعيين، و نحاول نكون زي الاعلام اللي رفعوا راس مصر بس لان همهم كان العلم مش استني الفراش يجري ياخد مني الشنطة و يقولي نورت يا بشمهندس

والله العظيم الناس اللي تحت مني في الشغل كانوا بينادوني sir و انا طلبت منهم ينادوني احمد، حتي الفراش لقيته كبير في السن حوالي 40 سنة و انا 25 سنة فمهضمتهاش انه يقولي sir قولتله احمد only و متتصورش حاجة زي دي ممكن تخليه يحبك اد ايه :blink:

و تذكر انك لن تخرق الارض و لن تبلغ الجبال طولا

و .........

شكرا و رمضان كريم

[أحمد سيف]

أنا متفق معاكي 100% في الكلام ده

بس نعمل ايه في موروثنا الثقافي ... الإنسان في بلدنا لو ما عرفش يضيف لإسمه لقب مش هايعامل باحترام ... أو على رأي فهمي هويدي هايبقى مواطن إلا حته

با ريت كل واحد يبدأ بنفسه ويصر على إن الناس تناديه بإسمه الأول ... ومن تواضع لله رفعه

[حسام يوسف]

وضع الزميل الفاضل أحمد يدة على المشكلة

(لومعرفش يضيف لنفسة لقب مش هيعامل باحترام)

النص الأول يا أخت جويرية فى الموضوع قلتية

عن فوضى الألقاب والتمسك الشديد بها

والنص التانى

أو الحلقة المفقودة أهى

نحترم الانسان أيا كان لقبة

أو وضعة الاجتماعى

أو العائلى

يعنى لو احترمنا أى انسان لمجرد انة انسان

اية اللى هيخلية يتمسك باللقب أو السعى وراة

ما هوة بالفعل الناس بتحترمة

ياترى نقدر؟

نقدر نحترم اى انسان سواء مانعرفوش؟

أو عرفنا انة انسان بسيط؟

تلك هى المسألة

مع خالص الاحترام لشكسبير

[ELSHAMY]

طيب ايه رأيك يا أختى جويرية فى الشخص اللى يدخل مكتبى فى المستشفى و مكتوب على الباب دكتور الشامى و انا لابس بالطو ابيض و يقول لى :

الله يخليك تطمنا على الحالة يا باشمهندس......

و ان بمنتهى التواضع باطمنه ان الحالة تمام......... شوفتى بقى انك ظلمتينا

[galaxy]

ازيك يا جويريه وكل سنه وانتي طيبه............... wst::

.

انا صيدلانيه والحمدلله....................ومش بحب لقب دكتورة دا اصلا ......وخصوصا بقي لو ماما او بابا اللي بيقوله ............بصراحه بتكسف من نفسي جدا وبزعل كمان والله...............او لو حد من قرايبي بطريقه تفخيم كدا قالهولي ...........ازيك يا دكتورة.......؟؟بتحرج جدا................. .

وفي مره واحده قريبتي مربياني وكبيره في سنها ............بركه يعني................بتقولي يا دكتورة من بابا التفخيم.................قولتلها .............يا طنط قوليلي كذا.............وممكن تقوليلي يا بت كمان ........... :lol:

حتي في الشغل اللي طبعا بيقولولنا فيه يا دكتور ويا دكتوره...............رغم الالقاب لكن والله لا بتقدم ولا بتاخر لان المحترم محترم في كل مكان بغض النظر عن رتبته او لقبه................واللي بيعاملوكي عارفين كدا .................المهم بقي يا جويريه وكلنا عارفين ان الاحترام بينبع من الداخل ومن التعامل.............يعني تلاقي ناس بتقول يا دكتورة ومن وراكي تشتم وتقول اسوء كلام لانك ........مش انتي طبعا.........انسانه لا تستحقي احترامهم او معزتهم..............

وناس تقولها اعتزازا بيكي من قدامك ووراكي عشان فعلا بيحترموكي...........الاحترام يا جويريه سلوك وعمره ما كان لقب

يعني المهم تبني جسور محبه واحترام بينك وبين اللي حواليكي وبعد كدا والله ما هتفرق..................كلنا بني ادميين والحمدلله ............

وربنا يشهد علينا بنعامل الكل باحترام وسواسيه بدون نظر لاي رتبه او بلقب او غيره...............لاننا فعلا سواسيه ................ولان كليتنا والحمد لله بتخرج الاف سنويا يعني مش امله..................

علي فكره لما بابا بينادي بصوت عالي ويقولي يا دكتورة بدل ما يناديني باسمي او يدلعني مثلا :lol:

.بيني وبينك.............بعرف اني عملت مصيبه وبيتريق عليا ...وهيبدا يوبخني.... :lol: :blink: ...........تحياتي جويريه :lol:

[حسام يوسف]

اية العمل دلوقتى يا جويرية؟

ما المهندسين والدكاترة ردوا عليكى ان مايهمهمش ولا حاجة اللقب

انا لو منك أخلص تارى من قريبتى دى

متزعليش منى انا جاى أهدى النفوس

[qenawy]

يمكن لما كتبت عدة مداخلات في المنتدي

ناس كتير بعتتلي رسايل قائلين يا استاد بالزال معلش الكي بورد مش مظبوط

وانا عادي جدا

ولا حتي عقبت ولا قلت يا ما هنا ياما هناك ابدا عادي

ثم انه للاسف في الحياة لما يعرفوا ان الواحد طبيب الصراحة تلاقي المعاملة تحسنت وتغيرت ونشكر للمجتمع هدا فبعضهم يشعر بمعاناتنا وخدماتنا المجانية هنا في مصر للناس

وبرضه بيقول مادام دكتور يبقي متعلم ومجتهد ومش بتاع مشاكل

المهم

كلنا الي التراب يا شباب

[msheikh]

السلام عليكم

اقبلوا تحياتى لكم جميعا

اود ان اشارك معكم فى هذا الموضوع اذا اذنتم لى

اولا ان الله سبحانه وتعالى خلق الناس درجات مختلفة فمنهم العالم ومنهم الجاهل ومنهم مابين الاثنين، فمثلا اذا تقابلت مع شخص له دوره فى المجتمع من غير اللائق ان اناديه باسمه بدون القاب وهذا ليس للمهندس او الدكتور او رجل الدين او الوزير او رئيس الدولة فقط .

فمثلا لو شخص ما بذل مجهود فى العلم 17 سنة او اكثر هل مثلا البواب الغير متعلم او الخادم او الطالب عنده بالجامعة او المدرسة يقول له ازيك يافلان بدون القاب!! (هل يستوى اللذين يعلمون واللذين لايعلمون....الآية). وهذه ليست عنصرية ولكن إعط كل ذى حق حقه.

وايضا لابد ان الصغير يحترم الكبير فمثلا الشاب غير لائق انه ينادى على شخص كبير بدون القاب ابسط شيىء اذا كانوا غير متعلمين يقوله ياعم فلان.

انا آسف طولت عليكم ويارب ماكونش خرجت برة الموضوع

كل عام وانتم بخير

محمد الشيح

[عمرعمرعمر]

معلش

اولا انا طبيب

باحب مووووووت لقب دكتووووووووووووور ايه المشكله

باعتبار ان دكتور تعني طبيب

لاني فرحان اني دكتووور و بحب اكون دكتووووووووووووور

و المتعارف عليه في مصر و العالم العربي عموما ان معني كلمة دكتور اصطلاحا مش لغة هي طبيب او طبيب اسنان او صيدلي او حاصل علي دكتوراة في اي علم بشرط ان يكون عضو هيئة تدريس و الا فلا

و عن نفسي لما اكلم زميلي الاصغر مني بقوله يا دكتوووور

و ده ما يزعلش حد في المجرة

و مفيهوش اي مرض و لا تخلف و لا تعصب و لا كبرياء و لا شربات و لا فلنات

طب عايزين مثلا العامل (مع احترامي لكل العمال) يقولي يا عمورة

و عن نفسي مثلا في مصر لو فيه حد من الجيران بدأ يستهبل و يندهلي بأسمي

باخده علي جنب و اقوله بهدوء لو كلمة دكتور تقيله علي لسانك قولي يا ابو عبد الله او لو امكن ما تكلمنيش خالص

ده عبارة عن احترام متبادل لان انا عن نفسي حتي لو واحد ما اعرفش مهنته باقوله يا استاذ فلان

و د مجدي يعقوب لو المصور اللي بيصوره قاله يا مجدي هيزعل

و انا شايف ان ده اقل حق من حقوقنا و اللي مش عايز يقوللي دكتور يقوللي يا ابو عبدالله

[عمرعمرعمر]

يعني لو فيه دكاترة هيتنازلوا عن اللقب

انا عمري ما ابدا هاتنازل

[HDarwish]

و عن نفسي مثلا في مصر لو فيه حد من الجيران بدأ يستهبل و يندهلي بأسمي

باخده علي جنب و اقوله بهدوء لو كلمة دكتور تقيله علي لسانك قولي يا ابو عبد الله او لو امكن ما تكلمنيش خالص

لو أنا جارك؟ ... هختار الإختيار الأخير

[مشمش]

و عن نفسي مثلا في مصر لو فيه حد من الجيران بدأ يستهبل و يندهلي بأسمي

باخده علي جنب و اقوله بهدوء لو كلمة دكتور تقيله علي لسانك قولي يا ابو عبد الله او لو امكن ما تكلمنيش خالص

و الله يا دكتور, انا كنت متفهم وجهة نظر حضرتك - و ان كنت لا اوافق عليها - الي ان وصلت الي هذة الجملة!

الالقاب يا دكتور مقبولة في اماكن العمل و بين الاشخاص الذين لا يعرفون بعضهم البعض اي الذين توجد بينهم كلفة!

اما ان يصر الشخص علي عدم رفع الكلفة حتي مع جيرانه!!! و يعتبر هذا نوع من الاستهبال!!!!!!!!!!!

هذا السلوك بالضبط هو سبب الشكوي في هذا الموضوع, لانه و اعذرني - لا اقصدك حضرتك و لكن اصف السلوك - يوحي بالكٍبر او "العنجهية"!

[عمرعمرعمر]

ما هي دي المشكلة و اللي كنت عايز اوصله (ومش هيفهمها غير واحد دكتور)

مين يندهلي باسمي و ابقي فرحان لما باسمعه

و مين يندهلي باسمي و اقول انه بيستهبل

عايز حد يشهد

اذا كان انت متضايق و متحامل و متكلف انك تقول للدكتور يا دكتور

يبقي مين سبب المشكلة

هو فيه دكتور اشتكي ان الناس ما بيقولوش ليه دكتور

و لا انت اللي اشتكيت انك تقول دكتور

عايزة حبة تفكير

و بلاش حد يرد رد شخصي

[HDarwish]

في البداية ردي ده مش رد شخصي

لكن أنا غير مطالب أن أقول للدكتور يا دكتور أو للمهندس يا باشمهندس

إلا إن ده من باب الإحترام وإن هي دي طباعي وسلوكي وتعاملي مع غيري .. لإني ما بحبش أشيل الألقاب إلا لما الشخص اللي قدامي يشيل الألقاب بعدها أبدأ أنا كمان أشيلها

لكن لو غلط في مرة وندهت لواحد بإسمه من غير لقب ولقيته خادني من إيدي على جنب وقاللي لو اللقب ده تقيل على لسانك يبقى تندهلي با أبو فلان يا إما ما تندهليش خالص ... والله مهما يكون عزيز عليا هيكون ردي لأ أفضل إني ما اندهلكشي خالص وما تزعلشي مني يا أبو عبدالله

لكن ممكن بطريقة ظريفة اللي بندهله ده يحرجني ويخليني ما عدتش أندهله غير بلقبه أو نشيل الألقاب خالص .. إزاي؟؟؟

يعني مثلا أنا غلط وندهت للأستاذ عمر باسمه .. أو إني ما غلطش لكني كنت عايز أقرب المسافات بنا شويه

المفروض إنه يا إما يحب إنه يقرب هوه كمان وزي ما انا حذفت اللقب هو كمان يحذف اللقب والعملية أصبحت فريندلي

أو

إنه يتمسك باللقب ويرد عليا بلقبي ساعتها هاخد بالي واعرف إنه مش عايز يقرب المسافات وإنه متمسك باللقب وهتبقى العلاقة بنا سطحية ... صباح الخير دكتور .. صباح النور باشمهندس .. وسلامو عليكم

لكن فيه حاجه في الحل الثاني ... اللي هيتمسك بالألقاب هيعاني فعلا في حياته الاجتماعية .. لإن علاقاته كلها هتبقى سطحية تحت لقب الدكتور راح والدكتور جيه وبالتالي الشخص اللي متمسك باللقب ده هيبقى مش اجتماعي بالمرة

للحديث بقية

تحياتي للجميع

[أحمد سيف]

يعني لو فيه دكاترة هيتنازلوا عن اللقب

انا عمري ما ابدا هاتنازل

على فكره في بريطانيا كبار الجراحين لا يضعون قبل أسمائهم Dr ولكن Mr، ويعتبرونها تمييزا لهم عن الأطباء المتدربين والجدد

كلمة Doctor في الأساس لها معني "معلّم" في اللغة اللاتينية، لذلك فإن استخدامها الأساسي هو لأساتذة الجامعة ... ولكن درج العرف على استخدامها أيضا للأطباء، وبدرجة أقل للصيادلة والمعالجين الطبيعيين، وقد قرأت مرة أن تمييز الأطباء بلقب Dr عن غير الأطباء الذين يستخدمون Mr كان لأسباب كهنوتية واجتماعية في القرون الوسطى، لأن الأطباء وحدهم لهم حق لمس الجسد البشري والعبث به ... بينما لغيرهم كان يعتبر ذلك جريمة تدنيس ... لذا لزم تمييزهم بهذا اللقب

عموما فإن هذه الألقاب في الدول المتقدمة لا تستخدم سوى في التعريفات والمخاطبات الرسمية، أما بين الأصدقاء والزملاء والمعارف والأقارب فإن الجميع سيشعر باستغراب إذا ناديت شخصا تعرفه جيدا بمثل هذه الألقاب، ويمكنكم معرفة ذلك ممن يدرسون بالدول الأجنبية حيث العلاقة بين الأساتذة والطلاب (لا سيما طلاب الدراسات العليا) تكون في معظم الأحيان خالية من هذه الرسميات

أما الألقاب الأخرى مثل مهندس وباشمهندس ومحاسب وكيميائي وزراعي ... الخ فهي اختراع مصري صميم ... ولا محل لها من الإعراب في البروتوكولات المعروفة عالميا ... الألقاب للطبقات العامة (غير الملكية أو الدينية) هي ثلاثة فقط Mr و Dr و Prof

[أحمـ باشا ـد]

قانونا فأن عضو نقابة المهندسين ( و ليس خريج كلية الهندسة) يسبق أسمه لقب مهندس

و هناك ألقاب أخرى مثل طبيب .صيدلي.محامي.محاسب

و كلها تعني أن صاحب اللقب منضم لنقابة تمنح هذا اللقب لأعضائها و يحذر على الغير قانونا أنتحال هذه الصفة

الهدف هو تنظيم المهن المختلفة قانونا ضمانا أن يقوم المهني المناسب للعمل المناسب

فلا يصح مثلا أن يصمم أو ينفذ أي شخص بناء عقار مثلا فهذا تخصص المهندس

و لا يمكن أن يقوم شخص ما بالكشف على المرضى أو وصف الدواء ألا أذا كان طبيبا

و لا يتصور أن يتقدم خريج تجارة للدفاع عن متهم في قضية

يعني موضوع الألقاب هو تنظيم للمهن و ليس للوجاهة الأجتماعية أو الفخر

و مهنيا أو في مجال العمل لا يصح ألا المناداة و تأكيد الألقاب و ألا فأن الأمور ستنقلب رأسا على عقب

أما مثلا ما بين الأصدقاء أو الأهل ....فلا يصح أن يتمسك صاحب اللقب بذلك..... يبقى محدث ...ههههه

يعني أنت مهندس في موقعك أو مصنعك طبيب في عيادتك أو مستشفاك صيدلي في مستشفاك محامي في النيابة أو المحكمة

و لكن هل ترى أنه يجب أن تنادي الزوجة زوجها الطبيب بهذا اللقب

أو بين الأخوة و الأصدقاء و الأهل .....لو حدث فأنا أفسرها بتفسيرات لا أحب أن أذكرها

[أحمد سيف]

قانونا فأن عضو نقابة المهندسين ( و ليس خريج كلية الهندسة) يسبق أسمه لقب مهندس

و هناك ألقاب أخرى مثل طبيب .صيدلي.محامي.محاسب

و كلها تعني أن صاحب اللقب منضم لنقابة تمنح هذا اللقب لأعضائها و يحذر على الغير قانونا أنتحال هذه الصفة

الهدف هو تنظيم المهن المختلفة قانونا ضمانا أن يقوم المهني المناسب للعمل المناسب

فلا يصح مثلا أن يصمم أو ينفذ أي شخص بناء عقار مثلا فهذا تخصص المهندس

و لا يمكن أن يقوم شخص ما بالكشف على المرضى أو وصف الدواء ألا أذا كان طبيبا

و لا يتصور أن يتقدم خريج تجارة للدفاع عن متهم في قضية

يعني موضوع الألقاب هو تنظيم للمهن و ليس للوجاهة الأجتماعية أو الفخر

و مهنيا أو في مجال العمل لا يصح ألا المناداة و تأكيد الألقاب و ألا فأن الأمور ستنقلب رأسا على عقب

أما مثلا ما بين الأصدقاء أو الأهل ....فلا يصح أن يتمسك صاحب اللقب بذلك..... يبقى محدث ...ههههه

يعني أنت مهندس في موقعك أو مصنعك طبيب في عيادتك أو مستشفاك صيدلي في مستشفاك محامي في النيابة أو المحكمة

و لكن هل ترى أنه يجب أن تنادي الزوجة زوجها الطبيب بهذا اللقب

أو بين الأخوة و الأصدقاء و الأهل .....لو حدث فأنا أفسرها بتفسيرات لا أحب أن أذكرها

كلامك صحيح أخي الكريم ... ولكني اسمح لي أن أفرق بين حقك في أن تستخدم المسمى المهني (مهندس مثلا) والإصرار على أن تتم مناداتك به في مكان العمل

سأضرب لك مثال بنفسي ... أنا حاليا أقوم بدراسة شهادة اسمها CFA، يعني محلل مالي معتمد، وهي شهادة رزلة بتاخذ على الأقل 3 سنوات، وبعد الحصول عليها واستيفاء بعض الشروط الأخرى سصبح من حقي قانونا أن أضع في كارتي المهني Business Card وسيرتي الذاتية وحتى نماذج مراسلاتي وأختامي كلمة "محلل مالي معتمد" بعد إسمي، ولكن هل سأطلب ممن يعملون معي أن ينادوني "المحلل المالي المعتمد أحمد"، أعتقد أنك تتفق معي على سخافة الفكرة، وأنا بدوري سوف يكون لي الرأي نفسه حين يطلب منى أحدهم أن أناديه الكيميائي فلان أو المهندس الزراعي علان

تحياتي لك

[جويرية]

أولا بشكر جميع الأخوة و الأخوات علي ردودكم

ثانيا

الرسول صلي الله عليه و سلم بيقول في الحديث فيما معناه ( أنزلوا الناس منازلهم )

يعني زي ما قال الدكتور الشامي مش معقول حنقول للدكتور يا باشمهندس

بس هل يعقل أن جميع المهن اللي في الدنيا ملهاش ألقاب غير الدكتور و المهندس

طيب لو قلنا حنطالب بمساوة و المؤهلات العليا تبقي ليهم ألقاب تناسبهم ، و ألقاب مستساغة عشان مش حينفع نقول لخريج العلوم نقوله يا كميائي و لا خريج الأقتصاد نقوله يا اقتصادي

لو فرضنا جدلا ان الدولة بقي سوت بين الناس أخيرا ، طيب و بقية المهن و الحرف مش من حقهم يبقي ليهم اللقاب برده ، يعني كدة مفروض مثلا نشوف 10000 لقب لجميع المهن

وده اللي بيخلي بعض الناس تسعي أن هيا تشتري شهادة الدكتوراة من بعض الدول في أوربا الشرقية ، يعني يدفع كام ألف عشان بس ياخد حرف الدال

أما عن الألقاب في الأسلام ، فمكانش في ألقاب متعلقة بالمهنة

، اي لقب كان بيديه الرسول صلي الله عليه و سلم ، كان للأكثر تقوي زي الفاروق عمر رضي الله عنه ، الصديق سيدنا ابو بكر ، أو أي حد بيعمل عمل بطولي زي سيف الله المسلول سيدنا خالد رضي الله عنه أو سيدنا الزبير كان اسمه حواري الرسول صلي الله عليه و سلم

و كمان فيه لقب شيخ ده للكبير في السن عشان مفروض الصغير يوقر الكبير

أم المؤمنين السيدة جويرية رضي الله عنها كان أسمها برة و الرسول صلي الله عليه و سلم قال فيما معناه ( لا تزكي نفسك ) و غير اسمها الي جويرية

تم تعديل 22 سبتمبر 2008 بواسطة جويرية

[Alshiekh]

أسمحوا لى أعرض وجهة نظرى

أرى اننا كمجتمع له عاداته وتقاليده قد خلطنا بين عدة أمور

هناك القاب مهنية ، والقاب اجتماعية والالقاب الاجتماعية تختلف من مكان لمكان حسب البيئة الاجتماعية.

استخدام الالقاب المهنية داخل لابأس به بل هو واجب كعملية ادارية وتنظيمية. اما العيب فهو فى استخدامها خارج نطاق العمل ، حيث يجب ان يتساوى الجميع فى لقب واحد وهو " السيد او الاستاذ ، والسيدة او الست او الآنسة " كما درج الناس ، أما رفع التكليف واستخدام الاسم مجردا من اى القاب ، فاعتقد ان هذا لايتم الا بين الاصدقاء والاهل.

حتى بين الاهل فى المناطق الشعبية والمتوسطة ، فالاسم الحقيقى للشخص يكاد يختفى ويصبح غير معلوما بمجرد ان يرزقا بأول مولود خاصة لو كان المولود ذكرا ، فنجد ان اسم الرجل تحول الى ابو فلان ، والمرأة الى أم فلان.

اذن فالموضوع مجرد عادة ومفهوم اجتماعى.

وارى انه لابأس من استخدام الالقاب طالما ان هذه اللقب سيجعل من تتحدث اليه سعيدا ، ولندعوا الناس باحب الاسماء اليهم ، وفى المقابل فانا ادعو من يفضلون ان يناديهم الناس بالقاب تسبق اسمائهم ان يترفعوا عن ذلك وليتواضعوا لله ، فمن تواضع لله رفعه .