تكاليف المعيشة فى السعودية ؟

[webmaster]

السلام عليكم و رحمة الله و بركاته

سوف انقل لكم اليوم بعض من خبرتى فى اسعار و تكاليف المعيشة فى المملكة العربية السعودية

ايجار الشقق العائلى او العوايل يكون باسلوب المقدم بمعنى انه يكون اما سنوى او كل 6 شهور

و يكون المقدم هذا بايجار هذه الفترة كلها

مثلا سوف ادفع مقدم الشقة 12 الف ريال فى السنة او عشر الاف فى السنة معنى هذا اننى لن ادفع الا بعد سنة

اسعار ايجار الرياض اغلى من جدة

متوسط ايجار الشقق المناسبة لنا بداية من عشر الاف حتى 30 الف فى السنة

تكاليف استقدام الزوجة 2000 ريال اما الطفل فهو مجانى على الزوجة

سعر مرتبة اسفنج جديدة 200 ريال

مكيف جديد 900 ريال و لكن انصحك بالمستعمل ولكن يفضل تشترية من المستهلك نفسة فى حدود 200 الى 600 ريال

بوتجاز مصطح 200 ريال

ثلاجة جديدة فوق 1000 ريال المستعملة 600 ريال

غسالة نصف اتوماتيك 200 ريال

الاتوماتيك 600 ريال

انبوبة 120 ريال

ملىء انبوبة الغاز 15 ريال

اشتراك فى خط هاتف ارضى جديد 100 ريال

تستطيع ان تشترى سيارة جديدة ابتداء من 5 الاف ريال و لكن حالتها سوف تكون تعبانة شوية و لكن لو مثلا فى حدود 7 او 10 باذن الله سوف تكون جيدة

التاكسى قد يكون مشوار فى حدود 20 ريال لو افترضنا انك فى جدة او الرياض

لكن لو افترضنا انك فى الطائف يكون فى حدود 10 ريال

رخصة القيادة فى حدود 400 ريال

تجديد الاقامة فى حدود 900 ريال

تستطيع السفر عبر شركات طيران سما او الناس و هى تسافر من الاسكندرية و اسعارها ارخص بكثير من شركات الطيران الاخرى

و لكن ينقصها بعض الخدمات مثل الوجبة

طيران سما www.flysama.com

طيران الناس www.flynas.com

الادوية صراحتا غالية جدا و تستطيع ان تاتى ببعض الادوية من مصر مثلا اشترى من الصيدلية ادوية فى حدود 200 جنية و شيلهم من العلبة بتاعتهم علشان يبانوا فى المطار انهم مستعملين و وزعهم على الشنط

الادوية تكون انت بتستعملها او ادوية عامة مثلا كريم دواء للمغص للاسهال للامساك للتقلصات مسكن و هكذا

اتمنى ان اكون قد وضحت بعض الامور و باذن الله تعالى سوف اضيف فى المستقبل المزيد من الاسعار ليكون دليل شامل للاسعار و التكاليف فى السعودية

[ozoozo]

انا مش عارف اشكرك ازاي الف الف شكر علي المعلومات الجميله دي

[ozoozo]

معلش ليا كام استفسار

1-لو تقدر تقولي السكن في ابها عاءلي غرفه او غرفتين وصاله ومطبخ وحمام يتكلف كام وفي مشكله صغيره ان في الشركه باخد السكن كل ست شهور فهل الاغلبيه هي اللي بتطلب ايجار سنوى ولا الاغلبيه نصف سنوي

2-انا سمعت ان في مشكله مياه في ابها خصوصا وفي المملكه عموما فهل ده نقص في مياه الشرب وده مش مشكله لاني هاشتري مياه معدنيه ولا دي مشكله في الميه العاديه بتاعه الحموم يعني استحمي قبل ماجي من مصر ولا احوش عشان استحمه بمياه معدنيه

[webmaster]

:lol:عفوا اخى الكريم

و لكن حقيقا انا لا اعرف اسعار ابها

انا كنت اعيش فى الرياض

و ليى اخ فى جدة و اخر فى عرعر و لكنى لا اعلم اسعار ابها

اعتقد ان الاغلبية الاسعار نصف السنوية

موضوع المية فى السعودية انك متشتربش من مية الحنفية خالص مجرد غسيل و استحمام , لكنها بتكون مية تقريبا محلاه من مية البحر او مية معالجة ,

و فيه ناس شربوا منها لا قدر الله بعد الشر عليك جالهم كبد وبائى فى خلال فترة قصيرة

انت لازم تشترى المية

احسن اسلوب شركات البتوزع المية

انا كنت فى الدوادمى جنب الرياض الشركات بتقول لو جيت تاخد المية من عندنا تاخدها ببلاش , املىء جراكن زى ما انت عايز , لكن لو عايز توصيل منازل المية تبقى بفلوس

و توصيل المنازل بيكون بكميات يعنى مثلا يكون عندك عشر جراكن مية كبيرة تكفين و تيجى العربية تغيرهم مره واحده , زى ما بقى بيحصل فى مصر اليومين دول

و حتى الطبخ بلاش تستخدم مية الحنفية استخدم مية الجراكن

الطرائف الفى السعودية

ان المية وقت الظهر بتكون سخنة اوى لدرجة انك تشعر انها من السخان , بجد مولعة اوى , اوعى تدخل الحمام وقتها ابدا و تشغل الشطاف

الشىء التانى ان بعض المناطق فى السعودية معندهمش صرف صحى , تحت كل بيت بيكون فيه حاجة اسمها البيارة ده بيتجمع فيها الصرف الصحى للبيت كله لمدة اسبوع او عدة ايام , و بعدين تيجى عربية تشيل الصرف الصحى ده لما البيارة تتملى و بتحصل اشتراكات على كده

اتمنى لك التوفيق

السلام عليكم

[iloveegypt]

معلش ليا كام استفسار

1-لو تقدر تقولي السكن في ابها عاءلي غرفه او غرفتين وصاله ومطبخ وحمام يتكلف كام وفي مشكله صغيره ان في الشركه باخد السكن كل ست شهور فهل الاغلبيه هي اللي بتطلب ايجار سنوى ولا الاغلبيه نصف سنوي

2-انا سمعت ان في مشكله مياه في ابها خصوصا وفي المملكه عموما فهل ده نقص في مياه الشرب وده مش مشكله لاني هاشتري مياه معدنيه ولا دي مشكله في الميه العاديه بتاعه الحموم يعني استحمي قبل ماجي من مصر ولا احوش عشان استحمه بمياه معدنيه

شوف بصراحة فى موضوع المياه بجد عمار يا مصر

المياه الموجودة فى البيوت غير صالحة للشرب

وكمان الشعر كده كده هتصلع من المياه :lol: :lol:

[احمد حمدى]

السلام عليكم ورحمه الله

اهل الخير

ارجو المساعده انا جايلى عقد عمل فى عرعر

بــ 1500 ريال والسكن والانتقالات على الشركه

كنت عاوز اعرف معلومات عن المدينه وعن اهلها وعن تكاليف المعيشه هناك

يعنى من الاخر اصرف اد ايه واحوش كام

يعنى العيشه هناك غاليه ولا ايه واقدر احوش ولا لاء

واهل البلد عاملين ايه وبيتعاملوا مع المصريين ازاى

ارجوا منكم التوضيح

[احمد حمدى]

فيه ايه يا جماعه محدش عاوز يساعدنى ويدلنى على الطريق الصح

سبحان الله العظيم

يا جماعه بقولكم انا فى حيره من امرى واول مره اتغرب

يعنى مفيش مصرى واحد عاوز يدلنى ؟

[doha]

فيه ايه يا جماعه محدش عاوز يساعدنى ويدلنى على الطريق الصح

سبحان الله العظيم

يا جماعه بقولكم انا فى حيره من امرى واول مره اتغرب

يعنى مفيش مصرى واحد عاوز يدلنى ؟

انا معرفش العيشه في عرعر شكلها ايه بس اتوقع من خبرتي مع الرياض ان الوضع هيكون كالتالي ..

بالنسبة للسكن اكيد ارخص لانها تعتبر ( اقاليم ) نسبة للعاصمة .. بس طالما ان السكن على حساب الشغل يبقى مش فارقة معاك النقطه دي ..

بالنسبة للاكل والشرب الاسعار واحدة في كل مكان طالما مش ناوي تاكل في مطاعم مشهورة فالاكل زيه زي مصر

بالنسبة للعمل الخاص بجوار شغلك فاعتقد هيكون صعب شويه في ( مدينة اقاليم ) زي عرعر يعني مظنش ينفع تعمل حسابك عليه يعني من دلوقت دبر نفسك على الالف ونص بس مفيش غيرهم .. وبالمناسبة ففكرة العمل الثاني او الاوفرتايم في السعوديه اجمالا تقريبا ملهاش وجود الا عند المدرسين وبعض المحاسبين ببساطة لان العمل هنا دائما فترتين في الغالب وبنقتل وتنطحن فيهم بمالايدع لك مجال لمجرد التفكير في عمل ثاني.. طبعا في فئات بتقدر تشتغل اكتر من شغله في وقت واحد لكن دول الاستثناء الذي لاينفي القاعده .. اذا وان لم يكن لك حرفة يدوية تمتهنها بجوار مهنتك الاساسية فكما قلت لك انسى انك تاخذ اكتر من الراتب الي هتطلع عليه ..

نيجي بقى لسؤالك هل تسافر او متسافرش ..

والله انت ادري بنفسك وبالهدف من سفرك .. فلو كان سفرك هدفه الاساسي الادخار فمنصحكش تعول الكثير على العقد ده في انه يحقق هدفك لان صعب اوي توفر من المبلغ ده في الاحوال العاديه .. واكون اكثر صراحة معاك في بيان الحالة الوحيده الي ممكن توفر فيها ..

اجمالا فالشخص الي جاي من بيئة مستواها المادي شديد الانخفاض وملوش تطلعات لتغيير المستوى ده على المدى القريب احتمال ممكن يحوش ويوفر من الف وخمسمية ريال يعني لو عملت حسابك ان السنتين تلاته الي هتقضيهم هنا مش هتجيب ولا قصقوصه هدوم جديده ومش هتتكلم موبايلات غير من السنة للسنه ومش هتاكل غير الوجبات الاساسية وغالبا مفيهاش لحوم وكلها نواشف ويمكن كمان تتعهد انك مش هتستحم لغايه ماترجع بلدكم .. في الحاله دي اقولك احتمال ايوه توفر مبلغ بسيط وطالما انك من بيئة كما ذكرنا فالمبلغ الي هتحوشه ده قد يعني في البيئة دي شيء وساعتها نقدر نقول انك حوشت من راتبك ..

اما لو كنت من الطبقة الوسطى ولو من اذيالها وجاي من بيئة يعني الى حد ما مرتاحه شويه فانسى مجرد الحلم ان الالف ونص تكفيك ده ان لم تقترض عليها .. ولو فرضنا جدلا انك قدرت تحوش لك الف او الفين فللاسف المبلغ ده لا يعني شيء نهائيا في ظل الغلاء الي بنعيشه في مصر ولا يقدم ولا يؤخر شيء من وضعك كابن من ابناء الوسطى المهمشة ولن يحركك قيد انملة على درجات السلم الاجتماعي ..

مش هتكلم بقى عن مافوق ذلك يعني لو لك اسرة واطفال عاوز تدخلهم المدرسة او تعالجهم او حتى تفسحهم برا البيت مرة كل شهر .. اساسا مش متوقع انك تحلم بالزواج في ظل راتب الف وخمسمية ريال الي سبق وقلنا انه راتب سائق خاص بياكل ويشرب وينام ويتنقل على حساب صاحب البيت يعني يفترض بيه يحوش المبلغ ده صافي ومع ذلك بيدوله الراتب ده لان هو ده اقل شيء ممكن يعطى في هذه البلد .. راتب واحد معندوش شهادات اساسا ويادوب كل مؤهلاته يسوق عربيه .. بس مش دي قضيتنا دلوقت .

طيب هل معنى كده انك لو مش وش مرمطه يبقى ترفض العرض ده ؟ مقلتش كده لان احنا لسه مبحثناش الموضوع من جوانبه الثانيه بخلاف الادخار ..

فعلى الجانب العملي والاكاديمي لو انت مقدامكش خطة بديله للسنتين القادمتين .. بمعنى .. مش في دماغك انك تكمل دراسات عليا مثلا او تاخذ دورات في اي شيء في الدنيا او تشتغل ولو بواب في عماره يبقى في الحاله دي العقد ده مش هيعطلك عن خططك وفي نفس الوقت اهو في الاول والآخر خبرة كويسه اوي ممكن تساعدك قدام في انك تلاقي شغل افضل سواء في الخليج او لما ترجع مصر .. وطبعا لا يجب اغفال حقيقة ان الي له سابق اعمال في الخليج بيكون مفضل لدى اصحاب الاعمال عن الي لسه جاي من مصر ( فرش ) وبرضه راتبه اكيد بيكون افضل .. بس خلي بالك ان الخليج مش شرط يبقى خليج العمر كله يعني متبنيش عليه خطط طويله الامد لان ممكن في يوم وليله كل الي انت شايفهم هنا دول يرجعوا وبدون سابق انذار فالوظائف هنا ووضع الخليج نفسه كسوق طارد للعماله على المدى الطويل لايغري باكثر من خطة قصيرة المدى ..

اذا لو بصيت للوظيفة دي على انها ( ابرك من قعدة البيت ) فممكن يكون معاك حق الى حد ما خاصه وانت هتكتسب فيها اكيد خبرة كويسه سواء في مجال عملك ودراستك او في مجال الحياه فاكيد الي سافر بتتغير شخصيته كتير عن الي فضل في مكانه ..

اما على الجانب الاجتماعي فخلي بالك انك لو قبلت عرض زي ده في مدينة متطرفة زي عرعر يبقى اكيد تنسى فكرة الزواج ( لو مكنتش متجوز ) طوال فترة العقد .. اما بقى لو كنت متزوج فساعتها لي حق الومك موضحتش الحكايه دي من الاول ليه كنت وفرت علي الكلام وكنت قلتهالك من ساعتها ان الوظيفة دي متنفعكش ..

في عامل السن برضه وده احد العوامل الهامة جدا في حسم قرارك ده ..

يعني لو انت لسه متخرج جديد وسنك صغيره فممكن تضحي وتقبل العرض ده خاصه لو زي ماقلت لك قبل كده معندكش حل تاني .. اما لو كنت قد تخطيت الثلاثين فنصيحه تروى شويه قبل ماتوافق لان معادش في وقت نضيعه في فرصة قد تصيب او لاقدر الله العكس ..

اذا الخلاصه .. في عرض زي ده وبالمعلومات القليلة الي قلتها عن نفسك هو ده (رايي الشخصي ) في قبولك او رفضك ليه وزي ماقلت لك قبل كده انت وحدك الي تقدر تقرر لانك ادرى الناس بنفسك وبظروفك واديني وضحت لك الى حد ما الوضع هنا شكله ايه وانت بقى تقدر تحكم .. وبالتاكيد ومش هزهق ابدا من التكرار والاعاده فيها فالاستخاره ثم الاستخاره هي الفيصل في قرارك وربنا معاك يعينك على اتخاذ القرار الصح ..

[متشوقة للمدينة]

:lol:

طيب يا جماعه لو حد عنده خلفية بالمعيشة فى المدينة من ناحية السكن وكل شئ ياريت يذكر ليه مرتب زوجى 2500 ينفع اروح له انا وطفلين الكبير عنده سنه ونص

[أسد]

السلام عليكم ورحمه الله

اهل الخير

ارجو المساعده انا جايلى عقد عمل فى عرعر

بــ 1500 ريال والسكن والانتقالات على الشركه

كنت عاوز اعرف معلومات عن المدينه وعن اهلها وعن تكاليف المعيشه هناك

يعنى من الاخر اصرف اد ايه واحوش كام

يعنى العيشه هناك غاليه ولا ايه واقدر احوش ولا لاء

واهل البلد عاملين ايه وبيتعاملوا مع المصريين ازاى

ارجوا منكم التوضيح

عرعر مدينة في أقصى شمال السعودية ..

وهي تعتبر أحد المناطق النائية ..

في مثل تلك المناطق .. الحياة أبسط وأرخص من المدن الكبرى

ولكن الناس هناك أقرب لأهل الأردن ولاعراق منهم للسعودية .. فيهم بعض الجفاء أكثر .. والحياة هناك لا تصلح لم جاء من مدينة كبرى في مصر .. كالقاهرة أو الإسكندرية ..

ولكن بخصوص عقد العمل الخاص بك

هذا يتوقف على مؤهلك وخبرتك .. ومدى إحتياجك للعمل .. والفرص الأخرى المتاحة أمامك .. ومدى قدرتك على إنتظار فرصة أخرى ..

هذا يتوقف عليك أنت ..

ولكن هذا الراتب ليس بجيد على كل الأحوال ..

أتمنى لك التوفيق

[Alrefaey]

اولا الاخ احمد حمدى

كلام حضرتك عن العرض كلام عام لا عرفتنا مؤهلاتك ولا مهنتك ولا طبيعة عملك وهجوبك بوجه عام برده ال 1500 ريال دول يادوب هيكفوك اتصالات ومعيشه ولا اعتقد انك تقدر تحوش منهم شىء لافى عرعر ولا فى غير عرعر

انا لست مقيم فيها ولكن معلوماتى عنها انها مدينة فى الشمال يغلب عليها الطابع البدوى واكيد هتكون ارخص بالمقارنه بالرياض وجده

ثانيا الاخت متشوقة للمدينة

راتب زوجك قليل والفيصل فى الموضوع من الاخر هو السكن بمعنى ان مصاريف المعيشة بالنسبة لفرد قريبة من فردين ده لو مفيش اطفال

لكن الفيصل فى الموضوع هو السكن بمعنى انه ممكن دلوقتى يكون ساكن ب 3000 ريال او 4000 ريال فى السنة لانه سكن عازب بينما لو انتى معها هيزيد مصاريف السكن 10000 ريال سنويا فوق سكنه الحالى وبالتالى لو هو الان راتبه 2500 بيصرف مثلا 1200 بعد ما تيجى المدينة هتكون مصاريفه 2000 مثلا او اكثر شهريا يعنى مش هيعرف يحوش شىء

[احمد حمدى]

اخوانى الافاضل

doha و أسد و Alrefaey

الف شكر على المعلومات القيمه

وانا هوضح بعض الامور

انا متزوج ولدى طفل صغير

والوظيفه هى أخصائى شئون عاملين مع العلم اننى حاصل على بكالوريوس علوم حاسب الى دفعه 2003

والفيزا اللى هطلع بيها عامل

وطبعا زى ما قلت العقد بــ 1500 ريال سعودى وفيه شرط عدم النزول الا بعد سنتين

والسكن والانتقالات على حساب الشركه

بس الوضع هنا فى مصر يخلى الواحد يتعلق بأى شئ خاصه بعد الوضع الاقتصادى الصعب اللى احنا فيه

وشكرا على التعليقات

[أسد]

اخوانى الافاضل

doha و أسد و Alrefaey

الف شكر على المعلومات القيمه

وانا هوضح بعض الامور

انا متزوج ولدى طفل صغير

والوظيفه هى أخصائى شئون عاملين مع العلم اننى حاصل على بكالوريوس علوم حاسب الى دفعه 2003

والفيزا اللى هطلع بيها عامل

وطبعا زى ما قلت العقد بــ 1500 ريال سعودى وفيه شرط عدم النزول الا بعد سنتين

والسكن والانتقالات على حساب الشركه

بس الوضع هنا فى مصر يخلى الواحد يتعلق بأى شئ خاصه بعد الوضع الاقتصادى الصعب اللى احنا فيه

وشكرا على التعليقات

أخ أحمد

معلش سامحني

لكن العقد ده وبشروطه وحش .. مش كويس ...

لا يتوافق مع مؤهلك أو سنك

مش حتستفيد منه بأي حاجة وحتبعد عن أسرتك

ياريت تتأنى شوية وتحاول تدور على حاجة أفضل من كده

ربنا يوفقك ويهديك للقرار الصائب

[Alrefaey]

بكالوريوس حاسب الى وادارى شئون موظفين هتظلم نفسك كتير لو سافرت بهذا الراتب

خد دورة فى اوراكل او شىء من هذا القبيل وسافر فى مجالك هتجد فرص احسن بكتير واصبر حتى تجد عرض يلائم الحد الادنى لمتطلباتك

[adrianocrespo]

السلام عليكم

اي معلومات عن مستشفي المانع في الدمام او مستشفي الزهراء في قطيف

من حيث السمعه و معامله الموظفين

شكرا

[أسد]

السلام عليكم

اي معلومات عن مستشفي المانع في الدمام او مستشفي الزهراء في قطيف

من حيث السمعه و معامله الموظفين

شكرا

مستشفى المانع من المستشفيات المحترمة

مستشفى الزهراء .. مش متأكد من معلوماتي عنها

سأحاول التأكد وأرد عليك إن شاء الله

[ابو حودة]

بكالوريوس حاسب الى وادارى شئون موظفين هتظلم نفسك كتير لو سافرت بهذا الراتب

خد دورة فى اوراكل او شىء من هذا القبيل وسافر فى مجالك هتجد فرص احسن بكتير واصبر حتى تجد عرض يلائم الحد الادنى لمتطلباتك

يا جماعة كاننا بندن في مالطة يعني فعلا اللي بيقول ان الاوضاع في مصر هي اللي بتخليه ياخد القرار بالسفر اي كان الوضع

يجي هنا على اوضاع اسوأ يزيد عليها بعده عن الاهل ( هنا لا اقصد الزوجة فقط الاهل بشكل عام )

موضوع انه ياخد دورات انا شايف ان مسألة التعليم دي مش محتاجة تكاليف يعني ممكن من على النت ينزل المعلومات اللي هو عاوزها ويشتغل عليها بس شوية مجهود

والارقام دي اكيد هتتغير

لو جينا للاوراكل الارقام بتاعته على الاقل انت ببتكلم في ارقام اضعاف العروض المتواضعة جدا دي

[ahmedsharaki]

السلام عليكم ورحمه الله اخواني المتغربين هكون معاكو قريبا ان شاء الله في السعوديه وقبل مسأل سؤالي , عايز اقول ان لو انت تعبان من العيشه في السعوديه الناس في مصر تعبانه الف مره الموضوع هنا شاق جدا انا بروح بيتي كل يوم مش قبل الساعه 11 بليل وكنت فاكر اني الوحيد اللي بيشتغل12 او 13 ساعه في اليوم لاكن سبحان الله بلاقي المواصلات زحمه جدا لان ناس كتير جدا بتروح في نفس الوقت و على فكره انا مهندس مدني وبشتغل شغلنتين وفي بعض الاوقات 3 . ده طبعا غير الزحمه والتلوث والناس اللي مش طايقه بعضيها ربنا يكون في عون الجميع.

لي استفسار انا رايح على المدينه ان شاء الله خلال 15 يوم ايجارات الشقق (غرفتين وصاله ومطبخ وحمام )في مكان كويس يكون في حدود كام في السنه ولو انا هكون لوحدي خلال السنه الاولى السكن العزابي هيكون بكام واسعار السيارات المستعمله بكام ومصاريف المعيشه في المدينه في حدود كام ,ارجو افادتي ولكم جزيل الشكر

[ابو حودة]

لو كانوا ولادك مش هيجوا دلوقت حاول تسكن في سكن عزابي احسن علشان الفرق مالوش لوزم انك تصرفه

وقبل ولادك ما يسافروا دور على سكن عائلي كويس وده هيكون عندك فرصة كويسة بعد ما تكون عرفت البلد بدل ما تاخد حاجة على طول وما تكونش مناسبة لك ولهم

وده طبعا هيعتمد على مستوى دخلك ومكان شغلك

[mokhtarelmalahy]

لي استفسار انا رايح على المدينه ان شاء الله خلال 15 يوم ايجارات الشقق (غرفتين وصاله ومطبخ وحمام )في مكان كويس يكون في حدود كام في السنه ولو انا هكون لوحدي خلال السنه الاولى السكن العزابي هيكون بكام واسعار السيارات المستعمله بكام ومصاريف المعيشه في المدينه في حدود كام ,ارجو افادتي ولكم جزيل الشكر

انا هافيدك بس فى الحاجه اللى بعرف فيها اللى هى اسعار السيارات ممكن تجيب بدأأ من 5000 ريال الى 15000 ريال الى ماشاء الله بس 15000 الى 20000 يجيبولك عربيه محترمه نضيفه موديلها حديث شويه بس قولى ميزانيتك هاتبقى كام للعربيه وانا اقولك على العربيات اللى فى الرينج بتاعك