هل تغير أحداث الدويقة لعبة الانتخابات في مصر؟

[Sherief AbdelWahab]

عارف إنه لسة بدري على الكلام في الانتخابات.. لكني شايف إن من الممكن إن اللي حصل في الدويقة يغير بعض الشيء من قواعد لعبة الانتخابات في مصر..

فاكرين اللي كنا اتناقشنا فيه عن الدور غير النظيف للخدمات في العملية الانتخابية؟ النائب من دول يضحك بكام خدمة عديمة القيمة على الناس فيصوتوله ولما تحصل الكارثة يقول يا فكيك أو يسمعنا كلمتين فارغين.. زي اللي حصل في الدويقة وعرضة إنه يحصل في مناطق تانية..

بناء على اللي الناس حتعمله هناك.. أو اللي نتوقع إنهم حيعملوه.. تفتكروا ممكن اللعبة تبقى أفضل وأنظف؟

خلص الكلام

[أسد]

مفيش ولا خدمة عبيطة ولا كلمتين فارغين ..

كل الحكاية ان النواب دول بينجحوا بأنهم بيحشدوا عدد من الناخبين ..

كل واحد من هؤلاء الناخبين قبض مبلغ أو حصل على هدية .. أو كرتونة أكل ..

وخلاص ..

الإنتخابات في تلك المناطق تحدث بهذا الشكل ..

واللجان تتقفل .. ومحدش يقدر يدخل غير اللي قبض وجاهز انه يدي صوته للنائب اللي دفع ..

اللي حصل ده ..

ممكن يرفع تسعيرة الصوت للناخب ..

أو يرفع أجرة البلطجية اللي حيقفوا يمنعوا وصول الناخبين من الأطراف الأخرى للجان

[Sherief AbdelWahab]

أختلف..

ما أعتقدش إن الناس في الدويقة صوتت في وقت سابق لـ"الوزير السابق" و لـ"حيدر بغدادي" بناء على كراتين أو حاجات زي دي ..

كومة الخدمات اللي تم توزيعها على المنطقة دي من أجل جعلها "أمر واقع" ..

ومهما اتقال عن "الواجب" والمجاملات والأفراح والعزاء تبقى الخدمات هي العامل الأكبر في عملية النصب التي يقع الناخبون ضحيتها في النهاية..

خلص الكلام