كل سنه والامه الاسلاميه بخير

[masriat]

السلام عليكم ورحمة الله وبركاته

انا عاوز اعرف من حضرتكم انا عاوز اسافر الكويت بس مفيش فيز بتستخرج الايام دى بس موجود كروت زيارة تجاريه

هل لو انا جيت كارت تجارى هقدر احول مع العلم ان انا مؤهل فوق متوسط(معهد) وايه اخر الاخبار عندكم ووالله مش عارف اكتب اقول ايه علشان بأمانه انا مستنى السفر دا من شهر 1/1/2008 ومش عارف اعمل ايه

تحياتى للجميع وكل سنه وانتوا طيببن

[mtawfeek]

انا و الله يا أخى كنت مقيم فى الكويت من حوالى سنة و لما كنت مسافر كنت مسافر على تأشيرة زيارة تجاريه و قمت بتحويلها هناك الى اقامة هو التحويل عادى بس مكلف بعنى لو عملت تحويل من زيارة تجاريه الى اقامة عمل لمدة سنتين كتكلفك مش أقل من 450 دينار كويتى الكلام ده من سنه كمان دى حاجة

الحاجة التانية برضه ان اللى اعرفة لما كنت هناك ان الزيارة التجاريه مش بتطلع الا للمؤهلات العليا و الاغراض التجاريه لرجال الاعمال غير كده مينفعش .... بس برضة ارجع و اقولك ان الكلام ده من سنة مش عارف دلوقتى الاوضاع ايه

و ربنا معاك و يعملك اللى فيه الخير ليك ان شاء الله

[masriat]

شكرا على الرد

ايه ياجماعه 36 واحد شوفوا الموضوع ومفيش غير واحد بس هو اللى رد

يجماعه عاوز ردود

وبعدين فى موجود دلوقتى فيزا حره بس المهنه فيها عامل على مزرعه الراجل بيقولى خدها وتشتغل بيها عادى لمدة سنتين وبعده تقدر تحول اقامه بعد سنه علشان انت مؤهل فوق متوسط فاناا عاوز اعرف هل فعلا ينفع اغير الاقامه على كفيل تانى بعد سنه مع العلم ان المهنه عامل على مزرعه يعنى مثلا هقدر احولها من عامل الى مندوب او مراقب وبتتكلف كام وايه رأيكم

[mtawfeek]

يعنى ايه فيزا حرة لمدة سنتيين و المهنة عامل يعنى فى عقد و لا لأ انت مسافر تدور على شغل هناك و لا ايه

و هتدفع كام بقى فى الفيزا دى اللى هى فيزا عامل اللى هتاخد منك كتير من حقوقك فى الكويت منها انك لا يمكن تتطلع رخصة قيادة لا يمكن تجيب حد من عائلتك و هيكون الحد الاقصى لمرتبك كام ...

يأخى العزيز فكر تانى بجد انا و انا هناك شفت مهازل فيه ناس كانت بايعة محلاتها و بيوتها فى مصر و شاريين فيزا عامل ب 25000 و 30000 جنيه و عاطليين حتى مش معاهم ثمن تذكرة الرجوع لمصر و مرميين قدام سفارة مصر فى الكويت

يا أخى الكويت بلد غاليه جدا و اهل البلد صعب اوى فى تعاملهم مع فئة العمال من الوافدين من اى بلد انا كنت هناك مهندس معمارى مدفعتش و لا مليم فى التأشيرة و كان مرتبى الشهرى 300 دينار كويتى كنت اسكن فى سقة فى منطقة الشعب البحرى مع 5 أفراد و كنت بدفع 60 دينار شهريا ايجار و ماكنتش بقدر احوش اكتر من 100 دينار بالعافيه او 80 كمان و خالى بالك المهنة فى الفيزا كانت مهندس معمارى يعنى كان لى مميزات كتير و رغم كدة انا سبت كل دة و رجعت مصر رغم انى كان معايا اقامة سنتين مقعدش منهم غير 6 شهور بس ..... البلد التعامل فيها لفئة العمال مهيين بالذات للى بيدوروا على شغل منهم ---- يعنى مثلا هتسافر تشتغل عامل نظافة ب 80 دينار على احسن الاحوال فكر كويس و متتسرعش الله اما بلغت اللهم فاشهد فلقد نصحتك لله و القرار لك

[masriat]

شكرا على اهتمام حضرتك

هى فيزا حره بس انا رايح على شغل مع واحد قريبى فى شغله بس هو مش عارف يدخلنى الكويت علشان الظروف اللى فيها دلوقتى انا بس محتاج ادخل الكويت على اى مهنه وانا هناك فى الشغل مع ابن عمى دا

انا عاوز اعرف هل بعد السنتين اللى فى الفيزا دى هقدر اغير الكفاله او زى ما بيقولوا هجدد ولا ايه بس صاحب الفيزا قالى هتقدر تجدد الفيزا وملفه مفتوح يعنى تقدر تنقل اقامه بعد سنه علشان انت مؤهل متوسط وتقدر تغير كمان المهنه تبع الكفاله الجديده ايه رأيكوا فى الكلام دا بس حطوا الاعتبار ان الشغل هناك مضمون علشان ابن عمى اساسا هو اللى هيدفع الفلوس وانا لم اروح انا هردها ليه من الشغل معها بس انا عاوز اخد رأيكم فى الكلام دا وانا والله اتكلمت بصراحه اوى وياريت تردوا عليا بصراحه

وشكرا جزيلا لكم

[mtawfeek]

بص يا سيدى بالنسبة لنقل الكفالة ممكن تتم بعد سنة و لكن بشرط موافقة الكفيل -------- يعنى لو قبل سنة مينفعش اما لو بعد سنة فممكن بس تفضل على نفس المهنة اما لو حبيت تغير المهنة فلازم تخرج من الكويت و تخرج بفيزا جديدة فيها مهنتك الجديدة فالناس بتعمل ايه بقى شوف يا سيدى .....

انت تروح على فيزا عامل دى مادام انت بتقولى ابن عمك و ضامنه و لازم تفضل مع الكفيل اللى مدخلك البلاد سنة كاملة قبل ما تحاول تعمل اى حاجة بس متنساش تأخد معاك شهادتك موثقة من وزارة الخارجية و من السفارة الكويتية المهم اثناء السنة تحاول تدور على شغل بشهادتك لو لقيت و دة لازم يبقى بعد سنة بتخرج من الكويت تروح أى بلد مجاور عادة بيكون البحرين و تدخل تانى بالفيزا الجديدة بعد 24 ساعة بس و تمشى فى اجراءات اقامتك مع مهنتك الجديدة بس لازم بعد مرور سنة لانك لو عملت كدة قبل سنة الكفيل ممكن يمنعك من دخول الكويت لمدة 6 شهور او للمدة الباقية من الاقامة اللى هيبقى هو عاملهالك ايهما أطول فانت تسافر و توكل على الله و اهم حاجة السنة الاولى اما موضوع نقل الكفالة مع تغير العمل فى نفس الفيزا دة صعب جدا جدا خاصة فى دولة زى الكويت بس للعلم لو فى واسطة جامدة اوى تمشيلك كل حاجة لان فى الكويت زى مصر شويه فى موضوع الوسايط دة فانا حاولت افيدك يارب اكون ساعدتك و ماتنساناش بالدعاء ان شاء الله