كل هذا الصفار والحقد

[ابو محمود]

sisi_ahly.jpg

دائما وكعادته يقف الإسماعيلى ضد كل ما هو اهلاوى ، وبغض النظر عن أهمية المباراة أو تمثيل الأهلى لإسم مصر ، أو تمثيل الأهلى لمصر كلها فى بطولة مهمة يدافع فيها بمفرده على سمعة الكرة المصرية فى المحافل الدولية .

وقد أصدر مجلس إدارة النادى الإسماعيلى برئاسة نصر أبو الحسن بيانا رسميا أكد فيه اعتراضه على تأجيل مباراة الفريق أمام الأهلى والتى كانت من المقرر أن تقام يوم الأثنين المقبل فى الاسبوع الرابع من الدورى المصرى ، وأصدر مجلس الإسماعيلى بيان رسمى جاء فيه " ما حدث اليوم من قيام إتحاد كرة القدم بتأجيل لقاء الإسماعيلى والأهلى والذى كان مقرر لها يوم الأثنين مثل صدمة كبيرة لجميع أعضاء مجلس الإدارة لأن الإتحاد المصرى لم يتبع أى إجراءات قانونية قبل صدور هذا القرار ولم يتم إخطار النادى الإسماعيلى رسميا حتى الآن .

وأعلن الإتحاد المصرى لكرة القدم أن الدافع لتأجيل هذه المباراة هو أن الأهلى فى مهمة قومية الآن نتسائل هل لم يكن الإسماعيلى فى مهمة قومية عام 2003 عندما كان الإسماعيلى تنتظره مباراة مرتقبة أمام أنيمبا فى النهائى يوم 1 ديسمبر 2003 وعلى الرغم من ذلك رفض الإتحاد المصرى تأجيل مباراة الزمالك فى الدورى العام يوم 25 نوفمبر 2003 وليس ذلك فقط بل قام الإتحاد المصرى بحرمان آثنين من أفضل لاعبى الفريق وهم حسنى عبدربه وأحمد فتحى من المشاركة مع الإسماعيلى لإرتباطهم بالمشاركة مع منتخب الشباب فى بطولة علم الجميع أننا لم نحصد لقبها وفشل إتحاد الكرة فى إحضار اللاعب أحمد حسام ميدو الى هذه البطولة وفى النهاية سقط الإسماعيلى وخسر اللقب الأفريقى .

ولم يقف أحد مع النادى الإسماعيلى ولم يعلن أحد بأن الإسماعيلى فى مهمة قومية وبالفعل الإتحاد المصرى يتبع سياسة الكيل بمكيالين وهو الشىء الذى لم يرضى به أى فرد .

ونحن نتسائل هل الإتحاد المصرى يحدد المهمة القومية تبعا للون الفانلة وليس تبعا لأى فريق داخل مصر "

الى هنا انتهى بيان النادى الأسماعيلى

هكذا يتم زرع التعصب وبذورة بين الشعب المصرى فمن يريد بعد اليوم ان يتهم ايآ منا بالتعصب فليقرأ ما يتفوة بة مسؤلى الأسماعيلى انهم يصدقون انفسهم بأنهم نادى بطولات ونسو وتناسو انهم نادى مشاكل مثل باقى اندية ليس لها اى خبرات أدارية وتقوم فيها المشاكل بسبب تعصبهم وعدم فهمهم للرياضة وما تتضمنة من روح سمحة انهم علامة من الجهل والهواية والغطرسة فلن نقول

شفاكم اللة من داء التعصب يا اسماعلاوية

[حسام يوسف]

لأة

مش صحيح

لو هيتأجل للاهلى زى ما يتم التأجيل للزمالك والاسماعيلى

اوكية

لكن همة ليهم حق يزعلوا

اشمعنى همة متأجلهمش؟

والواقعة دى صحيحة اللى بيستشهدوا بيها

فبدل حضرتك ما تتهم محافظة كاملة ومشجعى فريق بالتعصب

خليك فير

وقول الأهلى لية حق فى التأجيل

ولكنة الوحيد اللى خد حقة بعكس الاسماعيلى لما اتظلم

هوة الواحد مايشتكيش الظلم والكيل بمكيالين؟

يا اما يتهم بالتعصب والصفار ؟

[أبو محمد]

رغم أنى ممتنع منذ فترة طويلة عن الدخول أو المشاركة فى أى موضوع يخص كرة القدم .. إلا أنى أرى تصرفا يفتقد إلى أبسط قواعد الاحترافية .. أنا هنا أتكلم عن أسلوب إدارة ولا أناقش أى شأن كروى

أسلوب إذارةالنادى الاسماعيلى يفتقر إلى الاحترافية للأسباب الآتية :

1) هو أسلوب ديماجوجى تهييجى لا طائل من ورائه سوى محاولة جذب تعاطف جماهير النادى باللعب على وتر التعصب وتغذية عقدة الاضطهاد

2) كان لابد أن يستند بيان الرفض على أسباب حالية وليس على أسباب تاريخية (ثقافة مصرية عربية)

3) لم يذكر البيان ضررا واحدا (حاليا) يقع على النادى من جراء التأجيل

4) ذكر النادى اعتراضه على تأجيل مباراة لفريق واحد ولم يأت ذكر تأجيل مباراة لفريق آخر مشترك فى نفس المسابقة المحلية (متسببا بذلك فى غياب الموضوعية - عكس الشخصنة - عن البيان )

5) لم يذكر البيان أى القرارين كان خطأ .. قرار عدم التأجيل الذى اتخذه الاتحاد السابق .. أم قرار التأجيل الذى اتخذه الاتحاد الحالى ... فإذا كان قرار الاتحاد السابق هو الخطأ ، فإن المنطق يقول إن قرار الاتحاد الحالى هو الصحيح مما ينسف الاعتراض .. وإذا كان قرار الاتحاد السابق هو الصحيح فهذا يثير التساؤل : لماذا الاعتراض على قرار خطأ يضر بنادى غير النادى الاسماعيلى ؟

وهناك المزيد من النقاط التى تبين عدم الاحترافية كنموذج لمجالس إدارات مؤسسات كثيرة تتسبب فى كوارث تلو الكوارث لتلك المؤسسات ... وهذه صورة من صور الفساد المنتشر فى مصر (عدم الكفاءة .. عدم الاحترافية .. أستخدام أساليب سياسية من القرن العشرين لمعالجة أمور إدارية فى القرن الواحد والعشرين)

أنا آسف أنى لا أتكلم فى الكرة .. أنا أتكلم فيما نفتقر إليه فى مواقع القيادات الإدارية .. مع احترامى للزاوية التى تناول منها كل من الزميلين الفاضلين هذا الموضوع

[ايهاب سالم]

أنا اهلاوي .. لكن أنا شايف إن الإسماعيلي معاه حق في التذكير بهذه الواقعه

و كمان انا شايف إن التأجيل لا مبرر له لوجود عدد أيام مناسب بين المباراتين خصوصا مع الوضع في الإعتبار سفر الاهلي بطائره خاصه مما ينفي حجة الإرهاق في السفر

و طبعا إتحاد الكره الحالي غير نزيه و يكيل بعشر مكاييل و لكن ليس لصالح الأهلي على طول الخط و لكن حسب مصالحه هو الشخصيه

و هو كان مع الإسماعيلي على سبيل المثال في قضية حسني عبد ربه ضد الأهلي و مع الزمالك في قضية هاني سعيد ضد رغبة اللاعب

و الأن هو مع الأهلي في قضية تأجيل مباراة الإسماعيلي مقابل سكوت الاهلي عن قضية البث الفضائي الحصري

يعني فساد في فساد زي كل حاجه في البلد .. لكن مش محاباه للأهلي على طول الخط

بس برضه في النهايه الأهلي ليس له الحق في تأجيل هذه المباراه و الإسماعيلي من حقه الشكوى و التذكير بواقعته المشابهه

الواحد ممكن يكون أهلاوي .... مش عيب خالص .. بس يحاول يكون حقاني شويه .. التعصب مش كويس أبدا

و دمتم

تم تعديل 27 سبتمبر 2008 بواسطة ايهاب سالم

[أبو محمد]

للتوضيح :

أنا أتكلم عن "البيان" ولا أتكلم عن "القرار" .. فالقرار من ضمن موضوعات كرة القدم التى قررت الامتناع عن المشاركة فى مناقشتها

[حسام يوسف]

الفاضل ابومحمد

الموضوع مش تاريخى

الموضوع كان من سنتين قدام نفس النادى

بالعكس

الاسماعيلى كان بيلاعبة فى النهائى

وخسر لما فقد جهود أهم لاعبية

مخسرش ماتش

خسر بطولة

الفاضل ايهاب سالم

لما شفت اسمك اتكتب فى الموضوع وعارف انك أهلاوى

قلت عمنا ايهاب هيناصر الاهلاوى صديقى محمود مصطفى

لقيتك فير بجد

وكل يوم احترامى بيزيد ليك حتى لو اتكلمت فى الكورة

بجد نفسى اتعرف عليك فى الحقيقة

يعنى فى كندا ان شاءالله

تم تعديل 27 سبتمبر 2008 بواسطة حسام يوسف

[Modest]

حنانيك شوية يا عم محمود في عناوينك الصاروخية دي :lol:

سيبك من الكيل بمكيالين و سيبك من التاريخ و الجغرافيا و كل أصول العدل و العدالة التي لابد أن يراعيها الأب عند تعامله مع أبنائه لإننا هنا مع حالة أب يا إما بلطجي يا إما خايف من أكبر أبناؤه أحسن يجيب صحابُه يكسروا الدنيا (أصحابه تشمل جماهير لا ترى إلا لون واحد و إعلام و مطبلاتيه طبعاً) ... بس يعني على الأقل كانوا بلّغوهم في الاسماعيلية إن الماتش هايتأجّل .. يعني يعملوا ايه الناس في الفراشة و الزينة و الكهربا اللي أجّروها و مين هايشيل حق الليلة اللي باظت من غير علمهم .. و الناس دلوقتي يعني يرجّعوا العربون و لا يستنّوا لإن مفيش ورقة رسمية راحت لهم تقول إن الماتش إتأجل ... و الأدهى إن ناديك العريك اللي داخل تهاجم أعداؤه الصفر الحكودين لم يطلب تأجيل المباراة و إنما من طلبها هو مانويل جوزيه .. فقط طلع حسام البدري يشكر إتحاد الكرة على التأجيل الذي تم بلا طلب .... هو ينفع كده برضه و لا دي الأصول و المباديء اللي عايزينا نبلعها بالعافية؟

يعني ينفع يا عمنا لو فيه بينا ميعاد أنا و إنت نفطر سوى عندك النهاردة و الميعاد ده متحدد من فترة يقوم جاي عمي الغالي (اللي واحشني جداً ) أبو محمد لاغي الميعاد ده؟ من غير طلب لا منك و لا مني بس هو كتر خيره و من خوفه عليا حس إني عندي مشوار بعد بكرة و خايف عليا من التعب قام لاغي الميعاد من غير طلب مني و من غير ما يبلغك :lol: .. (طبعاً أبو محمد لا يمكن يعمل كده لإنه أستاذنا في الذوق).

أنا بس عايزك تفكر بشوية تجرد هاتلاقي نفسك بتكره البلطجة اللي بيعاملوا بيها باقي الأندية و صدقني لو فكرت في السبب وراء هذه البلطجة هاتلاقيه الأهلي في كرة القدم و صدقني مش هاتلاقي فرق بينه و بين الحزب الوطني.

الشيء اللي مش قادر أفهمه هو مع إن جميع القرارات من النوع ده دايماً جاهزة و لصالح نادي المباديء المضروبة و مع ذلك بتفتحوا مواضيع على شاكلة هذا الموضوع لمهاجمة ناس تشعر بالظلم و التفرقة في المعاملة .. لازمتها إيه مش عارف :lol:

أما بقى لو حبيت أجاريك في عنوان الموضوع الملون بالصفار و السواد (ماهو السواد هو لون الحقد بعيد عنك) هأقول إن حركة التأجيل بالطريقة دي "مفيش (أحمر) من كده" :lol:

و كل سنة و انت طيب.

تم تعديل 27 سبتمبر 2008 بواسطة Modest

[Modest]

و الأن هو مع الأهلي في قضية تأجيل مباراة الإسماعيلي مقابل سكوت الاهلي عن قضية البث الفضائي الحصري

:lol:

[se_ Elsyed]

دي ديماجوجية ممجوجة

إلا يعني إيه ديماجوجية ؟ :)

يعني اللي ما حدش إتكلم عن تأجيل مباراة حرس الحدود اللي هايلاعب الصفاقسي في كأس الكونفدرالية لنفس الأسباب اللي إتأجلت عشانها مباراة الأهلي ؟

وبعدين ما هو هو نفس مجلس إدارة الإسماعيلي اللي عوم العملية في الأول وقال إن قرار التأجيل ليس في يده ولكنه في يد إتحاد الكورة ... يبقى لما إتحاد الكرة ياخد القرار يبقى نرجع نعيط

الشيء الأخر والأهم والأخطر وهو للأسف يشترك فيه الزملكاوية والإسماعلاوية ...

هما ليه شاغلين نفسهم بالأشكيف وعمل وسوا ومش ملتفتين لمصايبهم الداخلية ... الإسماعيلي يا سادة لسه متظبط الإسبوع الماضي من المقاولين 3-2 وعنده مشاكل لا حدود لها ...

فما تجيش تحل مشاكلك على حساب الأهلي وتعمل فيها الضحية والشهيد

[حسام يوسف]

هوة عشان الاسماعيلى اتغلب م المقاولين

بقى عندة مشاكل؟

طيب ما الزمالك مشاكلة برة وجوة يا سين سين

والمبادئجية كان عندهم مشكلة فى عنوان صندوق بريد 2-صفر بورسعيد

هوة عشان الاسماعيلى اتغلب

خلاص

مايفتحش بقة؟

ونقولة صوص أدب سيس خرسيس

فلاه مصرى كلم مع أسيادة الحمر

بص يا سين سين

المفروض يبقى فية موقف موحد

اى نادى هيبعب فى افريقيا ياخد كل الامتيازات من مساعدة فى تأجيل مباريات وخلافة

لأننا لما بنساعدة

يبقى بنساعد نفسنا

ولما أى نادى مصرى يكسب بطولة

دى لصالح كل الأندية المصرية

انما ساعد الأحمر

وعذب الأصفر حتى يعود عن دينة الجديد :)

ماينفعش

انا مع تأجيل المباراة على فكرة لو دة فى صالح الأهلى

لكن مع اننا نساعد كل الاندية اللى هتلعب فى افريقيا باسم مصر

الاسماعيلى خسر بطولة افريقيا لما تعنت قصادة اتحاد الكورة

ومن نفس الفريق اللى هيلاعبة الأهلى

أنيمبا النيجيرى

لازم نقدر زعلهم

مع أطيب امنياتى بفوز الأهلى ان شاءالله

[se_ Elsyed]

يا عم حسام دي مبارة قبل النهائي ولازم تتأجل ... وبعدين ماذا أضر الإسماعيلي في التأجيل ؟

[حسام يوسف]

يا س س اقرا بس انا كاتب اية فوق

أنا مع التاجيل لو الأهلى طلبة

لكن لازم يكون التأجيل للكل لو محتاجة

شفت انت متضايق ازاى وبتقول يا عم حسام دى مباراة قبل النهائى

ماتش الاسماعيلى اللى اتظلم فية مش بسبب عيسى حياتو ولا الاتحاد الافريقى

دة اتظلم من اتحاد بلدة

وفى المباراة النهائية كمان

مش قبل النهائى وبس

انا مش ضد التأجيل

لكن اعطاء الأهلى هذا الحق وأرى انة حقة

وحرمان الاسماعيى منة

ظلم

ظلم

ظلم

[حسام يوسف]

المباراة بين الأهلى والاسماعيلى كانت المفروض يوم 29-9

وماتش انيمبا يوم 5-10

شفتوا الفارق كام يوم؟

وادى الخبر

الخبر

بجد دة مش عدل

معاملة الاهلى غير الاسماعيلى تماما

يسقط الأهلى والحزب الوطنى وأمريكا ونوكيا

المفترى علية ربنا

تم تعديل 27 سبتمبر 2008 بواسطة حسام يوسف

[ايهاب سالم]

مش قلنا الإسماعيلي عنده حق

[ابو محمود]

مشكلتنا هى عدم النظام دة شيء طبيعى ومشكلتنا اكثر فى تدخل بعضنا فى امور بعض

ياسادة النادى الاهلى ارسل خطاب رسمى يحث فية اتحاد الكرة تأجيل المباراة لانة يعلم جيدآ ان فريق انيمبا كما فعل العام قبل الماضى مع الاهلى انة يعرقل ويضع الصعاب امام بعثتة وهذا ليس رجمآ بالغيب ةلكنها الحقيقة فى افريقيا اما بخصوص الطائرة الخاصة فدة من باب تقصير الرحلة وياريت بلاش كلام كبير اكبر من كرة القدم الموضوع ليس خيانة ولا يحزنون واتحدى اى فرد فى مصر ان يدخل موقع الاسماعيلى ويقرأ ما يكتبة الحقد والغيرة وليس بنى ادميين اسوياء من شتم وسب للأهلوية ولو كان هذا الشخص عاقل اى غير متعصب سوف يشعر بالقرف من شكل ورائحة المنتدى الذى يغذى روح التعصب والحقد وكتبت هذا الموضوع لأوضح من اين يأتى خراب العقول للمتعصبين نحن نتمتع بلعب الكورة رياضيآ وانا كنت اعشقها واقعدنى عنها المرض واشعر بلهفة وحب من يلامسها لانها لعبة جميلة وبها فكر وحركة متساوين فى الجمال ان كنت ممن يجيدها وهنا يجب ان نحترم عقول بعضنا البعض عند سرد ناقصة من نواقص الادارات كما فعل الأخ ابو محمد فرغم أنى اهلاوى منذ الصغر ومن محبى النادى الأحمر وكنت على صلة بجيل من سنى بة الا اننى لا أخفى اعجابى بلاعبين فى اندية اخرى واندية ايضآ فأتمنى من كل أخ هنا الا ينظر الى عنوان الموضوع بروح التعصب قبل ان يفكر فى ما ذا يفعل قرار مجلس الأدارات فى الجماهير وكفانا تقهقر وخراب فلم تعد الكرة او الأنتماء الا للمشجعين اما اللاعبين فهم يتاجرون لأن بضاعتهم هى الرائجة وكفانا بعثرة بالمشاعر ولابد ان نعى ان السوق المفتوح سرقت الأنتماء من الكل وأصبح من يملك يكسب ومن يعمل يربح اما الكسالى وارباب الكراسى والوظائف فهم الى زوال وعندها سنجد كرة قدم عالية الكفائة واندية محترفة وهذا ما نصبو الية جميعآ فدعونا لا نحكم على قرار هو من اختصاص جهتة الا بعد ما يتم لعب المباراة ونرى جميعآ كيف يلعب الافارقة فى معاملاتهم مع الأندية المصرية والزمالك ديناموز ليس ببعيد ارجو من الجميع ان يتركو الالوان ويختارو علم مصر فالأهلى يمثل مصر وليس النادى ان كنتم تعلمون

[حسام يوسف]

ربنا يوفق الأهلى

[ابو محمود]

ربنا يوفق الأهلى

مش بقولك يا صاحبى دكتور

على طول تحط ايدك الجرح يلم صيدلى صحيح الا قولى يا صديقى

اية اخبار الشبكة الجديدة

واللة نيتى سليمة ويشهد عليا عبد المنصف

على فكرة كل سنة وانت طيب ودة بمناسبة العيد ويارب يحققلك كل امنياتك ربنا وتكون السنة الجاية فى

كندا

بس هتلاقى الأهلى هناك وعلى فكرة بنت حسام البدرى بتدرس هناك

[حسام يوسف]

من حقك تعاير اى زملكاوى طالما في الزمالك واحد زى اللى مايتسماش

وبعدين والله انت عندك حارس شوربة

وياريتها شوربة لحمة ولا شوربة كوارع محترمة

دى شوربة خضار من بتاعة العيانين

بس لسة ربنا ساترها معاة

سي أمير تعبان

تعبان

تعبان

وانتوا الاهلوية بتقولوا علية سد أشد

ودى اهانة لأى سد فى الدنيا لا أقبلها بوصفى واحد من بلد السد

ادعى بس ان الفضيحة لو حصلت

وهية لازم تحصل

ماتبقاش فى ماتش مؤثر زى افريقيا

مش مشكلة تبقى فى أى ماتش محلى

أحسن ما تضيع ع الأهلى ومصر بطولة كبيرة

كل سنة وانت طيب

ويارب الاهلى يا خد البطولة

[se_ Elsyed]

يا س س اقرا بس انا كاتب اية فوق

أنا مع التاجيل لو الأهلى طلبة

لكن لازم يكون التأجيل للكل لو محتاجة

شفت انت متضايق ازاى وبتقول يا عم حسام دى مباراة قبل النهائى

ماتش الاسماعيلى اللى اتظلم فية مش بسبب عيسى حياتو ولا الاتحاد الافريقى

دة اتظلم من اتحاد بلدة

وفى المباراة النهائية كمان

مش قبل النهائى وبس

انا مش ضد التأجيل

لكن اعطاء الأهلى هذا الحق وأرى انة حقة

وحرمان الاسماعيى منة

ظلم

ظلم

ظلم

يا عم حسام الله يكرمك لا تنساق وراء الدعاية الاسمعلاوية بتاعت " صميده هو اللي جتل ابوك يا عوضين "

اتحاد الكورة الحالي مالوش دعوة باللي مارضيوش يأجلوا ماتش الاسماعيلي لانه ماكانش موجود وقتها

الشيء الاخر ...الاهلي بعت طلب تأجيل ومستعد اجيب لك مسئول اهلاوي يحلف عالمصحف والاسماعيلي قال انا ماليش دعوى وقرار التأجيل في يد اتحاد الكرة

زي ما الاسماعيلي لم يرسل اي اعتراض حتى الان مع ان المباراة كانت المفروض بكرة

بس هي نعرات وهتافات كذابة لكسب التعاطف وزرع الاحقاد

يا ريس انا متأكد مليون المي ان نص لعيبة الاهلي كانوا هايطلعوا من الماتش ده على نقالة .. ولنا في عماد النحاس عبرة اللي ما بقاش نافع من المباراة الماضية امام الاسماعيلي ومن قبله احمد السيد وكلها اصابات متعمده من لعيبة مشحونة بالغل ضد الاهلي

[tarek hassan]

إدارة كرة القدم في مصر كإدراة السياسة سواء بسواء

الحزب الحاكم وأراه الأهلي با متيازاته

الأحزاب الديكور ( الفرق الأخرى )

الكيل بمكاييل مختلفة

لا سياسة واضحة على طول الخط

كوارث بين الحين والآخر

الفساد

المطلوب النزاهة علشان يبقى عندنا كورة محترمة وإدارة عادلة

تم تعديل 28 سبتمبر 2008 بواسطة tarek hassan