هل اتقدم بشكوي الى مكتب العمل في السعودية ام لا

[مهندس سما]

السلام عليكم ورحمة الله وبركاته

انا اعمل في المملكة واعطاني كفيلي فرصة نقل كفالة المهم دورت على فرص ولقيت فرصة فى مكتب ةاشتغلت معهم لحد دلوقتى ليا شهرين ونصف معاهم بس انا مش مرتاح معاهم وجتلي فرصة احسن وبراتب كويس وانا ناوي اسيبهم المهم انا ليا عندهم مبلغ من المال في حدود 6000 ريال طبعا انتوا عارفيين السعوديين اذا سبتهم كلهم عندهم نفس الرد راح يقول ليا خسرتنى وخربت بيتى وحالة اتوقف والمكتب هيقفل ومكانش عامل حسابه يجيب مهندس مكانه واحتمال كمان هيقولك ان البقالة اللى تحت المكتب هتقفل كمان عشان طبعا حضرتي سايب الشغل وكان الشغل واقف عليا

المهم هما ادوني خطاب نقل كفاله في اول الامر بس انا ما ادتهوش لكفيلي

الان هل اروح لمكتب العمل واديهم خطاب نقل الكفالة وواطالب بفلوسي

ام استعوض ربنا بدل لو رحت مكتب العمل يقولوا ليا انت مخالف مخالف مخالف مخالف

مخالف النظام ومخالف قوانين العمل ومخالف الامر الملكي ويخرجوني وما اقدر اخد فلوسي

دلونى بالله عليكم

[مهندس سما]

حد رد عليا ارجوكم 73 واحد شافوا الموضع ولا جد رد اللى عندو تجربة مماثلة يقول بالله عليكم

[sherif mohammed]

قلبي معاك ياباشا انا واقع في نفس المشكة بس عايز تخريج نهائي لأن الكفيل مش موافق على نقل الكفالة وحتى مش راضي يديني التخريج وعدم الممانعة انتى محتاج رأي سي السيد حاول تراسله وربنا يوفقك

[مهندس سما]

شكر لك اخ شريف وفي انتظار سي السيد

[aimen]

كل عام وانت بخير اولا

مش فاهم يعنى اخدت نقل كفالة من الكفيل الأول ؟ طيب حلو جدا ( لك مبلغ عنده ..استعوض ربنا عليه لأنه ممكن يقل الأصل ويخرع لك اى حاجه أو يخرج لك نهائى او يبلغ عنك هروب او يعمل لك مشكلة انت فى غنى عنها ...هو خسر فيزته وانت خسرت مبلغ مالى لكن مازلت فى المملكة ووجدت عمل تانى ....يعنى تقريبا تعادل )

اما الشغل الثانى فمش عارف قصدك لك عندهم مبلغ 6000 وعاوز تطالب علشان فيه شغل ثالث ...مش عارف انت مش على الكفالة حاليا و بيعملوا حركة زى دى امال لما تبقى على كفالتهم ايه اللى حيحصل

رأيى تنتظر شوية وتدور على مكان انظف ...

وفقنا الله واياك الى ما يحب ويرضى

ويسر لنا امورنا كلنا يارب

وهون علينا الغربة

[مهندس سما]

شكرا لك احي ايمن

لا يوجد مشاكل مع كفيلي الاول

مشكلتى في التاني لسه ما نقلتش عليه كفاله

لو هو اكل الفلوس عليا ايه اللي ممكن اعمله هل ممكن اطالب بحقي في مكتب العمل خصوصا اني مش على كفالتى

وهل لو عملت شكوي في مكتب العمل ممكن يعتبلاوني مخالف علي اساس كنت قعدت نمت في البيت لحد ما يخلص اجراءات ورقي

[se_ Elsyed]

شكرا لك احي ايمن

لا يوجد مشاكل مع كفيلي الاول

مشكلتى في التاني لسه ما نقلتش عليه كفاله

لو هو اكل الفلوس عليا ايه اللي ممكن اعمله هل ممكن اطالب بحقي في مكتب العمل خصوصا اني مش على كفالروهل لو عملت شكوي في مكتب العمل ممكن يعتبلاوني مخالف600 علي اساس كنت قعدت نمت في البيت لحد ما يخلص اجراءات ورقي

عندما يفصل مكتب العمل في اى شكوى فإن موضوع الكفالة ليس ذو اهمية ولا دخل له في الحقوق المادية التي يُمكن ان تثبتها اما بعرض عمل او بايصال استلام الراتب او تحويل بنكي او حتى بشهادة الشهود

وموقفك كده قوي جداً لإن انت مش على كفالتهم وممكن تشتغلهم في الازرق واول ما بتشتكيهم فمكتب العمل فبيوقف ملفهم الى ان يتم البت في الدعوى وبالتالي ماحدش بيحب الدوشة ووجع الدماغ وكلها 6000 ريال لا طلعوا ولا نزلوا وهايدفعوا غصب عنهم

[مهندس سما]

الحمد لله رب العالمين

يا رب لك الحمد

شكرا لك اخي سي السيد ربنا يبشرك بالخير في اي مكان وزمان

[aimen]

لا يفتى ومالك بالمدينة ...

[Tameraz]

السلام عليكم

اعتقد انه فيه حل ظريف

انقل كفاله على المكتب الجديد الذي تقول عنه انه احسن

وبعد ما ترستق امورك ويكون وضعك قانوني

اشتكي لمكتب العمل انه لك مستحقات عند المكتب الحالي وانك كنت في فتره تجربة

كده نكون في الامان

وربنا معاك

[alnaqeeb]

استاذي

انا مستشار قانوني وهاقولك رأيي استعوض ربنا افضل

لان مكتب العمل على ما ينهى شكواك هاياخد وقت طويل

بالاضافة لانك في غنى عن معاداة الكفيل السابق