اللي بيفكر يرجع مصر

[eTiger]

الحياه في مصر تزداد صعوبة يوما بعد يوم. ولا نعلم إلى أين ستصل بنا عجلة الفساد والانحراف وسوء الأخلاق التي أصبحت مسيطرة على الكثير منا. أنا في الغربة منذ 12 عاما وعندما أفكر بالعودة لمصر أجد أن مصر لم تعد مصر التي أعرفها. لا في ناسها ولا في جوها ولا في خروجاتها وفسحها.

الناس تغيرت بسبب سوء الأحوال الاقتصادية. وأصبح الشغل الشاغل لكثير من الناس هو كيف أخطف وأجري!

هنا أتذكر واقعة حدثت معي في أول يوم لي في أجازتي السنوية في مصر في شهر يونيو الماضي. فقد جاء والدي ليستقبلني في المطار. وفي طريقنا لمنزلي دخلنا لمحطة البنزين لتموين السيارة.

وأثناء قيام العامل بملء البنزين ، أخبرنا أن العجلة الأمامية نايمة وأنه يوجد في المحطة ورشة صغيرة للكشف على الكاوتش.

المهم ذهبنا للورشة وظللنا جالسين في السيارة بينما يقوم العامل بفحص الكاوتش. وأثناء فحصه كنا نسمع أصوات دق خفيف ولكننا لم نعر ذلك اهتماما واعتقدنا أنه صوت ألات النفخ.

وبعد لحظات من الكشف الدقيق على الكاوتش طلب منا العامل النزول لنشاهد الكاوتش.

وقام بوضع ماء لونه أخضر على الكاوتش فنلاحظ ظهور فقاقيع في عدة أماكن.

وأفتانا العامل بأنه يوجد 12 خرم في العجلة الأمامية فقط!!!

طبعا استغربنا فالكاوتش تيوبليس وجديد لسه مابقالهوش أسبوعين. طبعا ماأخدناش خوانه وخليناه يصلحه. وقام بدق 12 خابور في الكاوتش الجديد!!!

وقام بحساب الخابور الواحد ب 15 جنيه!! طبعا احنا شاطرين وفاصلنا معاه وخليناه 10 جنيه بس للخابور. يعني دفعنا 120 جنيه بالتمام والكمال!

وطبعا كنا فاكرين نفسنا ناصحين.

المهم بعد أسبوعين من هذه الحادثة وجدت أحد الأشخاص يعرض علي مشاركته في فتح محل إصلاح كاوتشات وقال لي العملية بسيطة جدا والكسب مضمون ، العامل بيلبس خاتم في إيده به مسمار مخفي يقوم بالدق في كاوتشات الزباين ونكسب دهب. وبلا غربة بلا قرف!!!

طبعا فهمتو اللي بيحصل!!

خلوا بالكم بقى ويا خسارة الكاوتش الجديد :ninja:

[ELSHAMY]

نفس السيناريو حصل معى من سنوات فى محطة بنزين عند معسكر للجيش فى الماظة بيشتغل فيها عساكر....حاميها....؟؟

[eTiger]

نفس السيناريو حصل معى من سنوات فى محطة بنزين عند معسكر للجيش فى الماظة بيشتغل فيها عساكر....حاميها....؟؟

طب يا عم شامي مش كنت تنبهني. أنا خسرت أبويا بسب الموضوع ده :ninja:

[الباشمهندس ياسر]

السلام عليكم

يعنى يا اخى الصورة فى مصر وقفت على النوذج السىء اللى انت شفته ده

طب ينفع الكلام ده

لا حول ولا قوة الا بالله

[أسد]

هل من الضروري عندما أفكر في أن آخذ قرار مصيري في حياتي ..

أن أنظر إلى حثالة المجتمع واللصوص .. والمجرمين ..

وأقرر بناء على أحوالهم ..

؟؟؟؟؟

ماذكرته أخي الكريم هو عمل من أعمال اللصوص . وبالتالي لا يمكن أن يعار بالإهتمام عند محاولتك اتخاذ قرارك بالعودة إلى مصر ..

[eTiger]

السلام عليكم

يعنى يا اخى الصورة فى مصر وقفت على النوذج السىء اللى انت شفته ده

طب ينفع الكلام ده

لا حول ولا قوة الا بالله

اللي أنا ذكرته ده مثال بسيط وحادثة بسيطة جدا بالنسبة لأشياء كتيرة حصلتلي وحصلت لناس كتير أعرفهم. ومش لازم أذكر كل البلاوي التانية اللي شفتها علشان أبررلكم قراري بعدم العودة لمصر في ظل الأوضاع الحالية.

كفاية اللي بنسمعه هنا من الخليجيين عن انطباعاتهم عن مصر لما يزوروها.

يا أخي الحل ليس في دفن رؤوسنا في الرمال وعدم الاعتراف بمساوئنا ومحاولة تصحيحها. وبلاش الرد العصبي بتاعك ده علطول.

[eTiger]

ماذكرته أخي الكريم هو عمل من أعمال اللصوص . وبالتالي لا يمكن أن يعار بالإهتمام عند محاولتك اتخاذ قرارك بالعودة إلى مصر ..

والله أنا نفسي أرجع مصر ونفسي بلدي تبقى أحسن بلد في الدنيا. بس مش عارف ايه اللي حصل للناس.

يعني وأنا في الغربة الاقي المصريين أسوأ جالية مع بعض. وكمان لما أنزل مصر ألاقي كل الكم ده من الفساد وقلة الضمير.

وطبعا أنا لم أعمم. بس اللي شفته من ناس كتير اتعاملت معاهم من صنايعية لدكاترة جامعة إنهم مابيفكروش غير انهم ياخدوا وبس وبأي طريقة.

يا أخي ده لما أكون تايه وبسأل حد على عنوان ألاقيه بيشوح بإيده. مش دول الناس اللي اتعودت أشوفهم وأتعامل معاهم قبل ماأسافر من 12 سنة.

ومع ذلك كل العذر ليهم.

الواحد لما تكون ظروفه المالية صعبه بيكون تفكيره وأعصابه وشخصيته مش طبيبعة.

ربنا يعيننا كلنا

[redwany]

تجربتى

فى اول يوم انزل مصر فى يونيه الماضى وكان بعد 3 سنين غربه اول مانزلت من الطياره دموعى نزلت لما شفت ارض بلدنا ولكن لما خرجت بره المطار وماكنشى حد من اهلى منتظرنى اتلموا عليه بتوع التاكسيات وبهدلونى وفى الاخر كنت هاخد علقة فقلت عظيمة يامصر

ولكن انا اعشق بلدنا رغم النماذج السيئة وباعد اليوم اللى ارجع فيه اجازة ومش هاقدر اكرر تجربة انى اقعد 3 سنين بعيد عن بلدى وده مش شعارات والله بس مهما كان فيه فساد ومهما كنا هنا محترمين والناس بتحترمنا وعايشين كويس بس بلدنا حاجه تانى

[Ghooost]

طب لو سمحت سؤال صغير . هو ايه لزمة الموضوع ده ؟ اللى يشوف عنوان الموضوع يحس بكارثه . ولما تدخل تقرا الموضوع تلاقيه حاجه عبيطه . أقوللك ليه حاجه عبيطه بفرض ان ده حصل فعلآ . عمرك مارحت لميكانيكى هنا بره مصر وظبطك وضحك عليك ؟ انت منضحكش عليك انا انضحك عليا ياسيدى . امشى اقول البلد كلها نصابه .

ياجماعه مش معقوله كل واحد عنده قناعته الخاصه ان يخليه بره مصر يقعد يكتب فى مواضيع عشان يسمع كام كلمة تأييد عشان يستريح انه بره مصر .

الصراحه الواحد بدأ يتخنق من مواضيع من نوعية ارجع مصر ولا خلينى ؟ كلنا عارفين اللى فى بلدنا وكلنا عارفين الغربه وكل واحد بيقدر يقرر ايه اللى فى مصلحته لأن هوا الوحيد اللى يعرف ظروفه مش حد غيره .

انا عن نفسى شغال بره مصر ومعنديش مشكله انى ارجع مصر بس وضعى هنا افضل ماديا ووظيفيا ولأسباب تانيه بس مش من ضمنها ( احس بالأدميه - التلوث -الحقوق المهدره- 00000) والكلام الكبير ده .

كلامى ده مش حجر على اى شخص عايز يفتح موضوع من النوع ده بس الموضوع ايسط من كده اللى عايز يسافر يسافر واللى عايز يرجع مصر يرجع مش محتاج ياخد رأى حد او يبرر قراره فى حاجه زى كده لأن محدش يعرف ظروفه اكتر من نفسه وحدش هيضره أو ينفعه فى حاجه زر كده .

حاجه اخيره - برده رجعنا تانى لقصة المصريين اسوأ ناس واسوأ جاليه - مش هؤلك كلام انشاء كتير واحكيلك عن اصحابى المصريين . هؤللك حاجه بسيطه المنتدى ده اللى 90 % منه مغتربين ياترى مابيسعدوش بعض دا الواحد بيسأل سؤال بعدها ب 5 دقايق الف واحد بيرد عليه ويجاوبه ويساعده تفتكر ده تسميه ايه .

بس هقوللك حاجه قصة المصريين وحشين حاجه احنا اللى قولناها بنفسنا وقعدنا نكبر فيها لغاية مابقت من ضمن تراثنا . دا لنا ليا واحد قريبى عمره مسافر بره ولما قابلته فى اجازه لقيته بيقولى اهم حاجه انك تبعد عن المصريين وبيتكلم بثقه وبطريقه كأنه عاش 20 سنه بره . تفتكر هوا جاب الكلام ده منين !!!. انا مابقلوش ان مفيش مصريين وحشين . بس ياريت نصنف نفسنا على اننا بنى ادميين فينا الحلو وفينا الوحش زى خلق ربنا يعنى.

وربنا يوفقك .

تحياتى

[aimen]

بس ياريت نصنف نفسنا على اننا بنى ادميين فينا الحلو وفينا الوحش زى خلق ربنا يعنى.

[se_ Elsyed]

اذا اردت ان ترى ما حدث من تغيير لمصر .. فقف امام المرآة وانظر لنفسك .. فإذا كنت تغيرت للأحسن إذاً فمصر قد تحسنت ,,,, والعكس صحيح

اخواني الكرام ... يوجد في مصر ما يزيد عن الـ 70 مليون مصري ... فهل يا ترى جميعهم اصبحوا مثل عامل الكاوتش الموجود في كل بلد حتى امام الكعبة نفسها ... هلى تعلمون ان اشهر عصابات الدعارة وصناعة الخمور توجد في مكه المكرمة ... فهل يا ترى كل السعودية كذلك وكل اهل مكه كذلك ؟

التعميم والنظر للنصف الفارغ من الكوب غير مطلوب وغير عادل بالمر

اريد ان اسأل صاحب الموضوع .. الم تتعرض في مرة للسرقة من احد الصنايعية حيث تعيش سواء في الخليج او غيره ؟

سؤال اخر ... طيلة اجازتك في مصر .. هل لم تجد اي مثال محترم امامك ... حتى من اهلك والمحيطين بك ؟

اقسم بآيات الله .. ان نفس عامل الكاوتش ده لسه مقابلة من شهر تقريبا ً لكنه نموذج محترم وفي غاية الامانة مثل الكثيرين الذين نقابلهم

فأخي كان قد اشترى سيارة جديدة منذ شهرين ولما بأنزل بيسيبها لي .. المهم كان عنده فرده كاوتش كل يوم تيجي تلاقيها نايمه .. نزودها بروضوا ما فيش فايدة .. لحد ما روحنا لمحل كاوتش ظل اكثر من نصف ساعة يفحص الفردة بشتى الطُرق ويقدم لنا نصائح بالنسبة للتيوبليس اللي لما بيحصل فيه حاجه الناس بتستسهل وتركب فتيل ومره في مره الفردة بتتعوج وتبوظ اما الصنايعية المحترمين فبيلحموا الفردة من الداخل بطريقة معينة بدون تحويلة الى تيوب طبعاً

المهم بعد كل ده تصور يطلب كام ؟

3 جنيهات مصرية فقط لا غير

فهل هذا انسان عملناه عموله وطلع قريبنا وبيجاملنا ولا نموذج موجود ؟

وليه لما نيجي نحلل غربتنا ونبررها لازم نعمل بروباجندا لبلدنا ونصور لأنفسنا ان مصر اصبحت غابة يأكل الكبير فيها الصغير وان الناس تتضور وتموت بالطرقات واننا قربنا نبقى زي الصومال

نعم هناك نماذج سيئة بالمجتمع يساهم في تواجدها سلبيتنا وردود افعالنا وترحيبنا بها ... فمنتهى البساطة ,.... ايه اللي يمنعك تبلغ عن عامل حقير مثل هذا ؟

طبعاً مش عايز شرطة ووجع دماغ .... خلاص يبقى ما تشتكيش لما يسرقك كل يوم

ايه المانع اني الاقي اي مخالفة مرورية او شخص مستهتر يضع ستيكر آبيح على سيارته ولا اتصل على 136 وهم المختصين بالملاحظات المرورية

كام واحد فينا اتصل بشرطة النجدة عشان يصلح شيء خطأ يراه .. حتى ولو محاولة ؟

كام واحد كان ايجابي وحاول مرة واتنين وتلاتة واربعة انه يصلح في بلده ؟

تفتكروا لو قدوتنا ورسولنا والصحابة ومن قبلهم جميع الرسل كانوا يأسوا من قومهم ... تفتكروا كنا احنا بقينا بني ادميي وعرفنا الصح من الغلط ؟

تعرفوا ان سيدنا نوح لوحده قعد يصلح في قومه 950 سنة ..... الف سنة الا خمسين كل يوم اللي يقوله يعيده وبعد ده كله لم يؤمن له ولم يستمع له الا اشخاص يتعدوا على الصوابع وكان من اول من خالفوا كلامه هم اولاده

فيا اخوتي المصريين الاعزاء ... ويازميلنا العزيز يا من سألت هذا السؤال

والله أنا نفسي أرجع مصر ونفسي بلدي تبقى أحسن بلد في الدنيا.

تفتكر مصر هاترجع زي زمان او ينصلح حالها ازاي وكلنا منفضين ايدينا واصبح لا هم لنا الا الشكوى وانتظار المهدي المنتظر اللي هاينضف البلد

يا أخي ده لما أكون تايه وبسأل حد على عنوان ألاقيه بيشوح بإيده

لأ في دي بالذات هاسيب اي حد يقرأ الموضوع يرد عليك لإن مصر يمكن الدولة الوحيدة اللى لو وقفت فيها في الشارع وتسأل فيها على عنوان فممكن اللي سألته يحلف بالطلاق انه ييجي يوصلك لحد الباب

[ايهاب سالم]

كام واحد فينا اتصل بشرطة النجدة عشان يصلح شيء خطأ يراه .. حتى ولو محاولة ؟

لو بيقتلوك ما تتصلش بالنجدة

أطلب ماكدونالدز أسرع دليفري في مصر

أنا عارف إني نشرت الموضوع ده قبل كده من مدة

بس قلت أنشره تاني بمناسبة الناس اللي علقت على فيديو التقطيع بالمطاوي

وقالوا ليه الناس ما إتصلتش بالشرطة

والإجابة ها تسمعوها في الفيديو ده

مكالمة تليفونية من شخص يريد التبليغ عن خناقة كبيرة في الشارع في عين الصيرة بالقاهرة

شرطة النجدة مش بترد على الناس

وقال ايه

بتشغلهم مزيكا !!!

مزيكا أي والله يا مؤمنين مزيكا !!!

يمكنكم سماع صوت الخناقة والطحن والتكسير في خلفية المكالمة

دقيقتين واربعتاشر ثانية محدش بيرد غير أنسر ماشين ومزيكا !!!

يعني لو واحد بيتقتل واتصل احسنله يطلب دليفري كنتاكي

على الاقل يتغذى بسندوتشين ولا وركين فرخة قبل ما يروح الآخرة

دقيقتين وأربعتاشر ثانية

يعني يكون القتيل إندبح وإتشفى وإتعلب كمان في كراتين

ولو واحد بيغتصبوها على ما الشرطة ترد عليها تكون حامل في الشهر التالت

إسمعوا بنفسكم حرقة الدم

ولما البهوات ردوا قالوله شكرا وقفلوا في وشه السكة !!!

إضغط هنا لتسمع المكالمة

http://www.youtube.com/watch?v=oG-gf3-M_ns

[قاهرى]

والله يا ايهاب انت عسل بتجيب حجات مشكلة

عجبنى اوى الراجل لما بيقولو (هو اية الى شكرا)

وبسببك يا عم فضلت اتفرج على حجات كتيرررررر عن مصر بس بصراحة فى فضايح على ال youtube مش عن مصر بس دى فضايح عن كل بلاد فى الدنيا ولا يجننك الى حاطط الحاجة دى تلقية مصرى ولو حد شتم فى مصر فى التعليقات الى الناس بتشوف الكليب تلقية بيشتمه وخصوصا لو اى جنسية تانية

على اساس ان الى حططها مش عايز حد يشوف الكلام دة غير لو مصرى زيوا .. مفرقتش كتيررررر

بس انت بردوا مشكلة يا ايهاب والصورة الى حططها ليك بتحسسنى انك ساخر من اوضاع كتيرررررررررر بتحصل فى مصر

بس والله يا جماعة زى مناس كتير قالت الاوضاع دى مش فى مصر بس كل بلد وفيها الكويس وفيها الوحش

اخوكم قاهرى

[redwany]

To Ghooost

احييك على موضوعيتك وانا معك مش كل واحد حصلت معاه مشكله بسيطة يقول ان بلدنا وحشة

اللى مقتنع بشئ يطبقه على نفسه ومايحاولشى يقنع الالخرين بيه

عايز تقعد فالغربه اقعد عايز ترجع ارجع ديه حريه شخصيه وكل واحد له حسابات بس ياريت ماحدش يعيب لا فى مصر ولا فى بلاد الغربه لان كل مكان فيه الحلو والوحش ومن الظلم التعميم

شكرا

[عبير يونس]

الحقيقة يا إخواني

إن كل الأجناس بتشتكي من بعضها في الغربة

و اللي فاجئني انهم بيقولوا على نفسهم نفس اللي احنا بنقوله

بس طبعا ما بيفضحوش الدنيا كده زي ما احنا بنعمل

همة بيقدروا يدارو قدام الناس و يبينوا صورة من الترابط

و احنا ماعرفش اذا كنا ما بنقدرش نخبي

و الا ما بنعرفش نخبي

و الا مش عايزين نخبي

المسألة في كل حتة ان كل واحد بيجامل بلدياته

و له تحفظات على بلديات أخرى

و لكن الصورة للغريب اننا مصريين زي بعض

و همة مبيفهموش ميل الواحد مننا لبلدياته و ابن قريته او ابن حتته و اخلاصه ليه و ايثاره حتى على نفسه

و هي دي اخلاق ابن البلد

و اللي بيفهمهما ابناء الشعب الواحد و بيبقى صعب على غيرنا انه يدركها

زي علاقتنا بالمسيحين مثلا

فدولة زي السعودية على سبيل المثال لا الحصر

و مع احترامي لكل اخواننا السعوديين و حيث اني اتربيت في السعودية بلدي التاني

مبيقدروش يحسوا بعلاقة المسلمين بالمسيحيين في مصر

و اذكر مرة زمان لما كنت باناقش معلمتي السعودية- الله يذكرها بالخير- لما سألتها عن الجزية

قالت لي على غير المسلم ان يدفع جزية في بلاد المسلمين

و لما قلتلها بس المسيحي ده مصري زي زيه

حيدفع جزية في بلده؟؟؟!!!

عقدت حاجبيها و لم تنبس ببنت شفا

زي ما احنا بنعتبر الخليجيين كلهم زي بعض

و الشوام زي بعض و المغاربة زي بعض

و الأفارقة زي بعض

و طبعا همة بيعتبروها اهانة كبرى انك متعرفش الفرق بينهم و بتعتبرهم حاجة واحدة

مشكلتنا ان احنا ملناش زي

فعلا ملناش زي

لا في اللهجة و لا في الطبيعة

يعني التقسيمات اللي ذكرتها

المصريين فيها اسمهم مصريين

لا هم شوام

و لا هم أفارقة و لا مغاربة و لا خليجيين طبعا

حاجة كده منفردة

ده حتى الأنهار كلها في العالم بتصب في البحر من الشمال للجنوب

إلا نهر النيل

بيصب في البحر المتوسط من الجنوب للشمال

اللهجة المصرية فريدة و ملهاش شبيه

و كل التقسيمات السابقة تتشابه لهجاتهم

كان والدي الله يرحمه بيقول ان مصر دي عاملة زي المعدة بتهضم

مصر هضمت كل الحضارات و الشعوب اللي مرت فيها او حواليها

و حولتها لمزيج

هو روح التركيبة المصرية

التي تطغى على أي محاولة لتغيير طبيعتها

مصر هي مصر

الجو المعندل في العالم كله

لا حر نار و لا برد ينخر في العضم

لا تشدد مقيت و لا تسيب بغيض

مصر هي نموذج الوسطية الحقة في كل شيء

و عشان كده طول عمرها مطمع للاستعمار

و أحب أقول حاجة مهمة جدا

الشر دايما بيكون بارز و واضح لأنه حاجة مش طبيعية

و لو كان طبيعي ما كانش حد أبرزه و لا ناقشه

و الخير دابما موجود

و حيفضل موجود حتى يرث الله الأرض ومن عليها

المشاكل موجودة في كل مكان في الدنيا

و في كل زمان

و مع كل الأجناس

و اذا كان حد ضايقك في الغربة

ففي قصاده كتير بيساعدوك و يقفوا جنبك

و مفيش حد و لا حاجة الناس بتجتمع عليها

حتى الخالق عز و جل

مش كل الناس متفقة على عبادته

و حتى لو عبدوه بتختلف اديانهم

و لو كانوا على نفس الدين تختلف مذاهبهم

مفيش حاجة في الكون كله واضحة 100%

كل حاجة نسبية

ممكن تبقى واقف قدام منظر طبيعي جميل جدا في نظرك

و واحد واقف جنبك شايفه أقل من عادي

و واحد تالت شايفه وحش اوي

و واحد رابع مش شايفه من اصله

ما تشغلوش نفسكو بآراء الناس في بلدنا

فيه ملايين بتحبها

و في ملايين بتكرهها

و في ملايين ميعرفوش ايه مصر دي من أصله

و حكاية المصريين مبيساعدوش بعض

دي كمان حاجة نسبية

في ناس تفضل تاخد اسافين من القريب و الغريب

و في ناس دايما بتلاقي اللي يقف جنبها في وقت الزنقة

و بصراحة حكاية المساعدة دي بالتحديد حاجة من عند ربنا

و بتكون بس للي امه داعية له يوقف له ولاد الحلال

تحياتي

مصرية متغربة

[se_ Elsyed]

انا لسه را جع من مصر واتصلت بشرطة النجدة في مشكلتين واستجابوا في دقائق

مع العلم ان لا بابا لواء سابق ولا خالو محافظ كفر الشيخ