أكلشيهات نسمعها كثيراً

[المعتصم]

بسم الله الرحمن الرحيم

السلام عليكم ورحمة الله وبركاته

وجدت أن هناك الكثير من الكلمات والجمل في عاميتنا تكرر في الكثير من المواقف فطرأ علي ذهني سرد ما أذكر منها لعلي أجد سببا مقنعا لقولها من السادة الأعضاء :lol:

وكذلك وودت أن يدرج كل منا ما يخطر بباله من هرطقات لتوسيع أفقنا بمزيد منها :lol:

***************************************************

في البداية أذكر القول المشهور

البلد دي أحسن من غيرها

عادة تستخدم لاثناء أحد الاشخاص عن الانتقال لخطوة ايجابية وعادة من يقوله بيكون حاله ضنك وطالع عينه ومغلوب علي أمره

************

إحنا شركة لسه بتبدأ ، ولما الدنيا تكبر كونك معانا في الفريق من الأول ده هيكون ليه تأثير كبير جدا علي مستقبلك معنا

ده مدير أحدي الشركات الصغري (عادة من اللي تحت السلم بس مش شرط) بيقنع واحد انه يسيب شركته ويروح يشتغل معاه

************

وأنا جدي قالي إنت مجنون هتروح تسكن في الصحراه وطردتني من البيت ساعتها الله يرحمك يا جدي

طبعا كلنا عارفين ان اللي بيتكلم ساكن في مساكن شيراتون والجوار

************

كانت اودامي المتر باتناشر جنيه وقلت لأبويا ومرضيش يشتري

ده بقي الراجل اللي مرضيش يروح يسكن في مساكن شيراتون

************

كل سنة وأنت طيب

واحد من الجيران مشفتوش من شهر لازم لما يشوفك هيقولك الجملة دي ، بس نفسي أعرف العيد أو المناسبة السنوية ايه !!!

************

يابني احنا بنشتري راجل

ابدأ قلق

************

هو قالك جنب ايه ؟؟؟

عادة ده واحد قرر انه يتوهك لما سألته عن عنوان

************

المزيد تباعا

[Click]

لا أعلم هرطقات وصف مناسب لتلك الجمل الشائعة! فمعرفتي بتلك الكلمة هي إنها تغيير عقيدة أو منظومة معتقدات.

المهم... الجمل التي ذكرتها جمل منتشرة جداً والكثير منها يُذكَر بسبب أو بدون.. مجرد عادة بالية.

[المعتصم]

معك حق بخصوص الكلمة

لربما كانت ارهاصات اكثر ملائمة

تم تعديل 10 أكتوبر 2008 بواسطة المعتصم

[جويرية]

في جملة دايما بسمعها من المذيعين

و السؤال الذي يطرح نفسه

و بعدين ألاقي المذيع هوه اللي قال السؤال ، يعني السؤال مطرحش نفسه

[مسافر]

تصرفات غير مسؤلة

هل تعني أن الفاعل لها مجنون؟

أم لا يستطيع أحد سؤاله لجبروته؟

[المعتصم]

بسم الله الرحمن الرحيم

شكرا يا اخوة علي المشاركات

تذكرت أيضا المزيد من الجمل

وقام بهذا العمل قلة مندسة

تعريف القلة المندسة في مصر هي جماعة لا تقل عن تسعين بالمائة من الشعب ولا تزيد عن التسعة والتسعين

وعلي الفور داهم السيد اللواء فلان الفلاني مكان الحادث

طبعا دي في صفحة الحوادث دليلا علي يقظة الجهاز الأمني

صرح مصدر مسؤول رفض ذكر اسمه

أتمني أن أجد مسؤول يصرح يود أن يفصح لنا عن اسمه

[وليد أهلاوى مصراوى]

هو قالك جنب ايه ؟؟؟

عادة ده واحد قرر انه يتوهك لما سألته عن عنوان

موضوع لذيذ أوى .... والجمله دى بتخوفنى فعلا

[المعتصم]

بسم الله الرحمن الرحيم

شكرا يا أهلاوي والحمد لله إن الموضوع عجبك

تذكرت أيضا المزيد من الجمل

وإنت بقي مش تشد حيلك كده عاوزين نفرح فيك

جمله عادة ما يكون ردها : إنت الاول

قدام علي اليمين

لما تروح تسأل محل عن محل تاني بيبيع حاجة مش عنده

لاحظها خصيصا في منطقة باب اللوق وادعيلي ساعتها وانت بتضحك من ردهم عليك كده

[وليد أهلاوى مصراوى]

في جملة دايما بسمعها من المذيعين

و السؤال الذي يطرح نفسه

و بعدين ألاقي المذيع هوه اللي قال السؤال ، يعني السؤال مطرحش نفسه

المذيع فى معظم الأحيان بيسأل ويجاوب كمان :lol:

[الباشمهندس ياسر]

معك حق بخصوص الكلمة

لربما كانت ارهاصات اكثر ملائمة

اخى الفاضل

لا هرطقات تنفع ولا ارهاصات تنفع

ارهاصات معنى بشائر

او دلالات تنبؤ بحدوث امر ما

لذلك اختر كلمة مناسبة واطلب من الادارة تغييرها فى العنوان

لأن العنوان لا يمت للموضوع بصلة

و تقبل تحياااااااااااااتى

[المعتصم]

بسم الله الرحمن الرحيم

شكرا يشمهندس ياسر

تم ابلاغ الادارة

معذرة علي الخطأ :lol:

[المعتصم]

بسم الله الرحمن الرحيم

أشكر للإدارة المساعدة علي ايجاد الكلمة المفقودة ألا وهي أكلشيهات :lol: :roseop:

بالفعل هي دي الكلمة اللي كانت علي طرف لساني ومش عارف اقولها :)

واشكر مرة أخري الاخوة للتصحيح

[مسافر]

باحث عن الحقيقة

لما تزنق واحد في أي منتدى

بيطعن في السنة يقول أنا

باحث عن الحقيقة

ونقول له أوصل للحقيقة ثم

أعلن عن نفسك ثم اطعن بعدها