ايهما افضل هندسة القاهرة ام جامعة الملك فهد للبترول

[اليوم السابع]

لو اتيح لاحد ان يلتحق بهندسة القاهرة مثلا او جامعة الملك فهد للبترول والمعادن نفس التخصص او غيره ايهما تفضل من حيث الناحية الاكاديمية والعمل فى مصر او السعودية.. هل يلاقى خريج البترول الترحيب فى شركات المصرية لما يلاقيه فى السعودية ام ان خريج البترول مجال عمله افضل فى الخليج فقط

شاركونا

[Diab]

من رأي ان هندسة القاهرة أقوي طبعا لان الدكاترة اللي فيها احسن بكتير وكوادر

بس لو انت عاوز تشغل في البترول عليك وعلي هندسة البترول اللي جامعة قناة السويس لانها متخصصة

[أحمد سيف]

بصراحة الجامعتين أحسن من بعض ... انت بتقارن بين أعرق جامعة في مصر وأحسن جامعة في السعودية

لو عاوز تشتغل في الخليج عموما والسعودية خصوصا فعليك بجامعة البترول والمعادن في الظهران ... لإن اسمها هناك زي الجنيه الذهب ... خصوصا في الهندسة وإدارة الأعمال

برضه نقطة الإمكانيات تصب في مصلحة جامعة الملك فهد لأسباب المستوى الاقتصادي والأعداد المحدودة

الميزة اللي هاتلاقيها في جامعة القاهرة هي التنافسية العالية بين الطلبة والأساتذة ... الأمر الذي يرفع مستوى الدراسة، وفرصتك في أن تشتغل في الجامعة كمعيد بعد التخرج (لو هوا ده طموحك)

خلي بالك من نقطة مهمة وهي إن جامعة البترول والمعادن هي جامعة للطلاب فقط (بدون طالبات)، ودي بعض الناس بيعتبروها ميزة علشان موضوع الاختلاط

تم تعديل 9 أكتوبر 2008 بواسطة ansaif

[الطائر الحر]

جامعة الملك فهد ممتازة بكل معنى الكلمة. خصوصا على مستوى الدراسات العليا. لو اتيحت لك الفرصة اذهب ولا تتردد. بالاضافة الى الامكانيات الكبيرة للجامعة سوف تكتسب لغة انجليزية قوية و تعليم ممتاز. و لو حصلت على تقديرات جيدة سوف يكون من السهل عليك استكمال دراستك في جامعات الغرب.

القبول بها سهل للوافدين من طلبة الدراسات العليا و ايضا يعطوهم منح دراسية. و لا اعرف امكانية قبول الوافدين في مستوى البكالوريوس.

ربنا يوفقك.

[eritrea]

انا من وجهة نظرى الشخصية جامعة الملك فهد للبترول مع إنى خريج هندسة القاهرة بسبب فارق الإمكانيات و هو طبعا لصالح جامعة الملك فهد و قلة عددالطلبة و دى ميزة كبيرة

[iloveegypt]

التنافسية بين الطلاب يبقى اكيد جامعة القاهرة

لو هتشتغل فمصر يبقى جامعةالقاهرة

لو هتفضل فى السعود يبقى البترول والمعادن بس مستوى الطلبة غالبيتهم اقل بكتير من جامعة القاهرة وكذلك الدكاترة

[blbl]

و لو حصلت على تقديرات جيدة سوف يكون من السهل عليك استكمال دراستك في جامعات الغرب.

في النقطة ديه تحديدا سمعة القاهرة ويليها عين شمس ثم بعض جامعات سوريا والجامعة الامريكية في بيروت اعلي كثيرا من بقية جامعات المنطقة العربية في معظم المجالات.

سمعة خريجي القاهرة ورغم التدهور في جودتهم الا انها جيدة جدا. ويكفي ان من وقت للتاني يطلب بعض الزملاء في لخارج مني ان ارسل لهم طلاب مصريين ممزين.

[abdulmuttaleb]

إذا كان الطالب/ة بالمواصفات التالية:

1)مصري الجنسية

2)عاش عمره من الابتدائي حتى الثانوي في السعودية وكان ينزل مصر في الإجازات فقط

3)الأب لا ينوي الحصول على الجنسية السعودية

4)حسن السيرة والسلوك

فأنصح بشدة أن يختار جامعة القاهرة، لأن النقطة التي قد تغيب عن البعض ليست في جزئية التحصيل العلمي، وإنما في جزئية هامة أخرى وهي الاحتكاك بالشعب المصري وبطبيعة الحياة في مصر

مشكلة الكثير من أبناء المصريين المغتربين أنهم لا يعرفون شيئا عن وطنهم ليس من حيث المعلومات وإنما من حيث الحياة والتجربة

وأعتقد أن هذا أمر يفيد جدا في بناء الشخصية والتعرف على مجريات الحياة، لأن الحياة النمطية في السعودية تختلف عن دول العالم قاطبة

تحياتي،

[almasry]

رأي الشخصي ووفقا لما سمعته من أقارب درسوا بجامعة الملك فهد للبترول فهي رائعة وتعتبر من افضل الجامعات في هذا المجال ان لم تكن افضلهم على الاطلاق ، ولكن اعتقد انه ليس من السهل الالتحاق بها . وربنا يوفقك لما فيه الخير لك

[اليوم السابع]

شكرا يا جماعة لردودكم التى تدل علي فكر عالى

اعتقد ان القبول لغير السعوديين بيكون فى الترم التانى خلالها يلتحق بالقاهرة ويجربها الفترة دى والاستخارة هى الفيصل لو اتقبل فى جامعة فهد

[abdulmuttaleb]

أود إضافة نقطة لردي السابق تتعلق بالشاب أو الطالب نفسه:

مدى علاقته بوالديه، هل هو من النوع القادر على العيش منفردا والاعتماد جزئيا على نفسه في تسيير أموره في مصر بعيدا عن أسرته وفي جو قد يكون غير مألوف له إذا كان عاش طوال عمره بالسعودية أم لا.

تم تعديل 24 أكتوبر 2008 بواسطة abdulmuttaleb

[ahmedkamal]

الملك فهد طبعا زميلي هناك دراسات عليا الوضع مختلف خالص جامعتنا بقت مع نفسها من ساعة الدروس الخصوصيه ما انتشرت والكوادر اللي بتقول عليهم لو واخد الدكتوراه من مصر مش بيدرس ف اي جامعه خليجيه لو تخصصه علمي بياخدوهم ف الكويت ف المعاهد التطبيقيه لازم تكون واخدها من بره لان طبعا لايخفى ع احد الفساد اللي اصبح منتشر ، جامعه المللك فهد امكانيات ممتازة ودكاتره شغل بتاع بره مش دكاتره بتجري ورا المذكرات والطلبه شغاله ملخصات وكورسات

شوف مستوى الخريج عندنا ف مصر ف اللغه عامل ازاي بيبان بقى لما تيجي تعمل امتحان للغه زي IELTS

لو عندك فرصه توكل ع الله وبالتوفيق هتحتك بطلبه من كل الجنسيات ناس عاوزة تتعلم مش زي الاجيال الحاليه كافتيريات ودلع

وع فكره زهقنا بقى من حشو المعلومات اللي كنا بنتحشيه والله 5 سنين هندسه دول حشو وخلاص وانا كنت اتصالات ها ، طلعت لقيت نفسي محتاج اعرف حاجات تانيه عشان شغلي والحمد لله بس يعني مفيش داعي نبالغ ف الامور لا بقى فيه قدره عند الطالب حاليا للوصول للمعلومه ولا البحث عنها

معلش انا طولت ف الموضوع بس من زهقي ع العمر والتعليم اللي مش ماشي صح الحمد لله ان ربنا عوضنا خير