انا بدافع عن الحكومه

[eslam elmasre]

الحمد لله اني عشت لغايه ماشوفتك يامصر بتعملي ارقام قياسيه عالميه

الحمد لله ان مصر الاولي علي العالم في مرض السرطان

الحمد لله ان مصر الاولي علي العالم في البلهاريسيا

الحمد لله ان مصر الاولي علي العالم في التلوث

الحمد لله ان مصر دوله من 6 دول علي العالم مازال فيها مرض شلل الاطفال

طب ايه المطلوب من الحكومه اكتر من كده يابشر ماتعرفش لا حمد ولا شكرانيه

انا عايزكو تسمعو كلام الحكومه و تصبروا شويه علي الحكومه وهاتعملكوا ارقام قياسيه ماحصلتش في تاريخ الامم

يعني انا شايف الحكومه مقصره في حكايه الفقر واضح ان النسبه شويه يعني 35% من الشعب تحت خط الفقر دي نسبه لا تتناسب مع ما تبذله الحكومه من مجهود بس انا اوعدكوا بالنيابه عن الحكومه انه في خلال 10 سنوات يعني يادوب خطتين من اياهم بتوع الخمسيه اوعدكوا ان 99% من الشعب هايبقي علي البلاطه ونشوف بعنينا رقم قياسي جديد لحكومتنا المبجله

وماتفتكروش اني باتكلم كلام في الهوا انا عندي دليل علي كلامي انتو طبعا شايفين الناس بدأت تموت بعضها علي العيش وشوفو طوابير العيش اللي تشرح القلب وتخلي الواحد جسمه يأشعر من الفخر بحكومته العظيمه

وكمان انتو حاسيين بزياده الاسعار اللي وصلت لاكتر من 80% ولو انتو مش حاسين يبقي لازم نطالب الحكومه بالمزيد عشان تحسو يابشر فقد الاحساس

وكمان حكايه البطاله انا شايف ان الحكومه ماحققتش النسبه المطلوبه في تلك الفتره يعني الحكومه شغاله بقالها سنين وخطط محكمه اشي خمسيه واشي ثلاثيه وبعد كل ده تقولنا ان نسبه البطاله 29% فقط

وارجع واوعدكو بالنيابه عن الحكومه انه في خلال خطه خمسيه واحده فقط ستصل النسبه الي 95%

وماتفتكروش انه كلام في الهوا لا انا عندي الدليل شوفو الحكومه شغاله من نار في خصخصه الشركات وتسريح العماله وعماله تبيع في الشركات وعملت زي عواد الي باع ارضه ياولاد شوفو طوله وعرضه ياولاد

ومش كده وبس الحكومه بتطلع (****) المستثمر اللي يفكر يستثمر فلوسه في مصر وطفشه هو وعيلته واللي يعرفهم

وبكده الحكومه سرحت العمال وسرحت المستثمر اللي كان يمكن يشغلهم

يعني الحكومه احكمت قبضتها علي مجالات العمل وبكده ان شاء الله في خلال خمس سنين مش هاتلاقي واحد شغال

وماتفتكروش ان الحكومه هاتنساكو ياشعب الحكومه هاتفتح لكم المقاهي عشان تلاقو مكان تترزعو فيه وتأضو اليومين اللي فاضلنلكو في الدنيا وكمان عشان تنفذ خطتها بتاعت الفقر اياها وتخلص علي القرشين اللي ساترنكم في الدنيا وتبقو علي الحديده

وكمان بتحاسبو الحكومه علي الانفاق بتاعها يعني فيها ايه لما يبقي الانفاق الحكومي 10 دولار للفرد وبحسبه بسيطه لو ضربنا 10 دولار في 80 مليون جسه (شده علي السين ) يطلع الناتج 800 مليون دولار ولو حولنا الدولارات الي جنيهات يطلع الناتج 4200000000 ولو قسمنا الناتج علي عدد ايام السنه يطلع نصيب اليوم حوالي 11.5 مليون يوميا الحكومه بتصرفها عشان تريح اعصابها منكم ومن مشاكلكم اللي مابتخلصش وفيها ايه ان الحكومه بتصرف يوميا 11 مليون جنيه في الفسح واللجان والتهليب واستقبال الوفود

اه يا شعب مابيحمدش ربنا

وبعدين عماليين تقولوا ان كل حاجه عماله تغلا بصراحه انتو ناس ماعندكمش ضمير ومش حقانيين امال الجنيه اللي عمال يرخص ده تسموه ايه

يعني سنه 81 كان ممكن تشتري بالدولار الواحد 0.85 جنيه الان وفي سنه 2008 تشتري بالدولار الواحد 6 جنيه يبقي ده تسموه ايه

اه يا شعب مابيحمدش ربنا

وبعدين انتو زعلانيين ان الحكومه اداينت ب614 مليون دولار طما الحكومه اخدت منهم 300 مليون دولار وهربتهم بره يعني كده الحكومه اداينت ب314 مليون دولار بس مش زي ماانتو بتقولو 614 مليون يعني الحكومه ماسرقتكمش ولا حاجه الحكومه سرقت اللي سلفها وبعد كده كمان 10 سنين الدول اللي مدينانا مش هاتلاقي حاجه تاخدها يقوم يحتلوكو زي الانجليز ماعملو فيكو سنه 1882 وبعد كل ده تقولو ان الحكومه سرقتكم

اه يا شعب مابيحمدش ربنا

وكمان عماليين تتكلمو علي حوادث الطرق وتقولو 6000 جسه بتقابل وجه رب كريم كل سنه وانتو مش واخدين بالكو ان الحكومه بتخدم الناس دول عشان مايشوفوش الايام السوده اللي جايا علينا وتريحهم من اللي كانو هايشوفوه اليومين الجايين يعني الحكومه هاتعمل ايه اكتر من كده يعني لما الحكومه تدغدغ الشوارع الموجوده في مصر المحروسه كلها وبعد كده تلاقي النتيجه ان ست الاف واحد بس هما اللي يموتو مش ده يبقي حاجه نحس علي الحكومه اللي بصراحه ماقصرتش في تدمير الطرق والكباري

اه يا شعب مابيحمدش ربنا

وبعدين تعالو مين اللي زعلان ان نسبه الاميه في مصر وصلت26% من الشعب يعني انتو عايزين الناس تتعلم ويعرفو الصح من الغلط عشان يعملولنا مظاهرات ووجع دماغ ويعرفو اننا بننهبهم ونسرق فلوسهم بالذمه ده اسمه كلام طما احنا لازم نخلي الناس جهله وجاعنين ومتخلفين عشان نعرف نشتغل بمزاج وماحدش يوجع دماغنا بالهتافات والشعارات وكمان عشان نعرف ننفذ الخطه الخمسيه او العشريه اللي جايه اللي احنا يا حكومه بنسميها مش الخطه الخمسيه بنسميها الخطه النهائيه للقضاء علي الشعب

اه يا شعب مابيحمدش ربنا

وكمان بتتكلمو عن اطفال الشوارع اللي بلغو 100 الف بس يعني بحسبه بسيطه لو وزعناهم علي 26 محافظه يطلع نصيب كل محافظه حوالي 4000 طفل صايع في الشوارع مش لاقي حد يربيه ولا يأكلو ولا يعالجو

انا سامع وحد خبيث بيقول ان احنا لو خفضنا الانفاق الحكومي 5 مليون يوميا ووزعناهم علي العيال الغلابه دول يطلع نصيب كل واحد فيهم حوال 50 جنيه يوميا يعني لو صرفنا الخمسين جنيه دول علي الطفل ده يوميا الطفل ده هايبقي مش متعلم وبس ده هايبقي متفوق كمان

وانا اقول لهذا الخبيث اتلهي علي عينك وروح ربي عيالك وامشي جنب الحيط واهو ده اللي اخدينو من المتعلمين يعني الحكومه كان معاها حق انها تخلي نسبه الاميه مش 26% تخليها 99% زي ماوعددتكو

اه يا شعب مابيحمدش ربنا

وكمان انتو مش حاسيين بمجهود الحكومه

الحكومه عشان تنفذ خطتها بتجويع الشعب ونهب ثرواته وسرقه القرشين اللي ساترينو الحكومه قامت بتسهيل تجاره المخدرات واصبح الناس بيصرفو 6 ملياردولار علي المخدرات وهذا انجاز بكل المقاييس يحسب للحكومه العظيمه

يعني الحكومه عملت زي الطبيب بتبنج الناس عشان تعملهم عمليه بتر ومايحسوش باللي حصلهم الا لما يقومو من العمليه شوفو اد ايه الحكومه خايفه علي مشاعركم وبتحس بالامكم وانتو اللي فيكو فيكو

اه ياشعب مابيحمدش ربنا

ومعلش يا حكومه اسمحيلي انتقضك شويه عشان مايقولوش عليا منافق ومبخراتي

يعني يا حكومتنا المبجله انتي دخلتي في مشروعات بيقولو عليها المتعلمين انها مشروعات قوميه بس انتي ياحكومه جيتي في ربع الطريق ونهجتي من التعب يعني بلغه الكوره البنزين خلص ووقفتي وعملتي زي اللي رقص علي السلم وبعدين انا عارف انك مش هاتقدري تكملي ولا المطلوب منك انك تاخدي الفلوس اللي بيقولو عليها الانفاق الحكومه وتصرفيها علي المشاريع العبيطه اللي بيقولو عليها المشروعات القوميه

انا عندي حل للحكايه دي

ماتبيعي الربع اللي انتي عملتيه حتي لو بيعتيه روبابيكيا اهو بردو هايجيب قرشين كويسيين تبرو بيهم نفسكو وتهربلكوم كام مليون يروحو مع اخواتهم ال300 مليون اللي انتو هربتوهم قبل كده

وماتقلقوش من الشعب ده شعب غلبان ومسالم مافيش حد هايتكلم واذا حد اتكلم ابقو الزقوها في اللي قبليكم وقولو هما اللي كانو غلطانين وبعدين انتو مش هاتغلبو في الرد ماهو انتو لما بعتو بنك الاسكندريه قلتو انكم هاتبيعوه عشان بنك كسبان ولما هاتبيعو بنك القاهره قلتم انه بنك خسران يعني بكده اثبتم للشعب انكم ماعندكمش تحيز وناس محايده يعني بعتم الكسبان والخسران

وحسبنا الله ونعم الوكيل

[Ghooost]

يأخ اسلام . كلامك كلام مرسل و 90 % من الشعب المصرى بيقولوا الكلام ده على القهاوى . خلينا نمسك الموضوع واحده واحده ومش كله عشان الوقت بس .

أول حاجه ممكن نتأكد من الكلام ده ازاى . يعنى فين التقرير اللى بيقول الكلام ده . انا مش بكدبك انا بحب اتأكد من المعلومه من مكانها الصح ووارد يكون عندك حق . فياريت تقول مصدر المعلومه دى .

الحمد لله اني عشت لغايه ماشوفتك يامصر بتعملي ارقام قياسيه عالميه

الحمد لله ان مصر الاولي علي العالم في مرض السرطان

الحمد لله ان مصر الاولي علي العالم في البلهاريسيا

الحمد لله ان مصر الاولي علي العالم في التلوث

الحمد لله ان مصر دوله من 6 دول علي العالم مازال فيها مرض شلل الاطفال

بالنسبه للجمله دى

يعني انا شايف الحكومه مقصره في حكايه الفقر واضح ان النسبه شويه يعني 35% من الشعب تحت خط الفقر دي نسبه لا تتناسب مع ما تبذله الحكومه

ايه هو تعريفك لخط الفقر وازاى يتم قياسه فى كل بلد . وياريت متاخدش اسئلتى كنوع من عدم التصديق . بش عشان الواحد يكون على ثقه من المعلومه مش مجرد كلام .

طبعا الدليل اللى انت كتبته دليل مهم جدا

وماتفتكروش اني باتكلم كلام في الهوا انا عندي دليل علي كلامي انتو طبعا شايفين الناس بدأت تموت بعضها علي العيش وشوفو طوابير العيش اللي تشرح القلب وتخلي الواحد جسمه يأشعر من الفخر بحكومته العظيمه

انا عايزك بس تقرا الكلام اللى انت كتبه ده بالراحه وتحاول تفهم انت كتبت ايه وبعد ماتقرا ليا كام استفسار .

وماتفتكروش انه كلام في الهوا لا انا عندي الدليل شوفو الحكومه شغاله من نار في خصخصه الشركات وتسريح العماله وعماله تبيع في الشركات وعملت زي عواد الي باع ارضه ياولاد شوفو طوله وعرضه ياولاد

ومش كده وبس الحكومه بتطلع (****) المستثمر اللي يفكر يستثمر فلوسه في مصر وطفشه هو وعيلته واللي يعرفهم

وبكده الحكومه سرحت العمال وسرحت المستثمر اللي كان يمكن يشغلهم

يعني الحكومه احكمت قبضتها علي مجالات العمل وبكده ان شاء الله في خلال خمس سنين مش هاتلاقي واحد شغال

1- ازاى الحكومه شغاله فى خصخة الشركات وفى نفس الوقت احكمت قبضتها على مجالات العمل ؟!!!!!!

2-هى الحكومه بتبيع لمين مش لمستثمرين برده طب ازاى سرحت المستثمر؟!!!!

وطبعا لو احنا قعدنا نمشى سطر سطر هنلاقى موضوعك كله من النوع ده كلام مرسل . انا مش مع الحكومه بالعكس فى سلبيات كتير بس مبحبش الكلام المرسل اللى ملوش اى اساس (كلام القهاوى ) حتى لو انت عندك حق فى كذا نقطه للموضوع طريقة عرضك للأ دله اللى انت كتبها تخلى اللى يقرا يحس انه كلام قهاوى . وبالمناسبه زى ماقلت قبل كده 90 % مننا بيقول الكلام ده كنوع من الفضفضه . بس ياريت الفضفضه تكون من غير ارقام عشان الموضوع ميوسعش منك .

وكمان انت مش كاتب الموضوع ده فى منتدى تانى من 6 شهور تقريبا ودا العنوان

https://secure.ushaaqallah.com/forum/viewto...ca805eb0d7f4fd2

طب بتكرره تانى ليه ولا هوا مجرد ملى ورق .

تحياتى

[Mohammad Abouzied]

وكمان انت مش كاتب الموضوع ده فى منتدى تانى من 6 شهور تقريبا ودا العنوان

https://secure.ushaaqallah.com/forum/viewto...ca805eb0d7f4fd2

طب بتكرره تانى ليه ولا هوا مجرد ملى ورق .

تحياتى

ما احنا لينا حق احنا كمان نقرأه ولا لازم يعني ندور على الموضوع في منتديات تانية B)

[sherifhfm]

يارب يكون ده كفاية شوف يا اخى

http://www.alarabnews.com/alshaab/2005/18-03-2005/n5.htm

[eslam elmasre]

بصراحه لو كان احمد نظيف مكانك ما كنش ها يقدر يدافع عن الحكومه زي ما انت دافعت

انا اهنيك علي البلاغه دي وقوه المنطق والحجه

ياراجل سيبك من الارقام شويه واسمعني

يعني البطاله اللي في البلد انت ماحستهاش لغايه دلوقتي يعني ممكن تقو لنا امتي هاتحسها اقولك شوف القهاوي وانت تعرف كام واحد عطلان في مصر

وبعدين ما فيش حد قريب منك او من عيلتك او من جيرانك جالو مرض السرطان يعني مقصود الكلام ان احنا دلوقتي نتعايش مع مرض السرطان كأنو برد او زكام والخلاصه انو المرض ده اصبح منتشر اكتر بكتير من زمان

ولا البلهاريسيا ممكن تقولي مين في مصر ماعندوش بلهاريسيا وسيبك من الناس اللي عايشه في المدن روح القري والنجوع وانت تعرف كام واحد في مصر عندو بلهاريسيا

وكمان شلل الاطفال اللي كل شويه يعملو حمله تطعيم وبردو لسه المرض ده موجود في مصر تقدر تنكر

واطفال الشوارع مليانين البلد ودول عيال غلابه كانو ضحيه المجتمع وكان المفروض الحكومه ترعاهم مش تسيبهم في الشوارع يعملو جرائم من كل نوع ولا دول كمان سيادتك ما بتشفهمش

وبعدين الكلام كله يدخل في اطار فضفضه مصري قرفان من اللي شايفو و حاسو عشان كده انا كتبت المقال ده باللغه العاميه

وكمان مش عاجبك اني نشرته في مكان تاني قبل كده طب ودي فيها ايه اني اقوله هنا وهناك وفي كل مكان

هو انت هاتحجر علي رأيي يا اخي انت انسان غريب اوي

[Ghooost]

ومين قاللك انا بدافع عن الحكومه . انا بحاول اتأكد من المعلومه واتكلم كلام منطقى . انا بقول ان فى حاجات زفت فى البلد . بس انت كتبت حاجه وانا طلبت منك استفسار عشان اتأكد اكتر لمعلوماتى مش دفاعا على الحكومه .

وبشكرك فعلا على صراحتك .

ياراجل سيبك من الارقام شويه واسمعني

وبعدين الكلام كله يدخل في اطار فضفضه مصري قرفان من اللي شايفو و حاسو عشان كده انا كتبت المقال ده باللغه العاميه

ردك ده يوحى انك مش مكابر لذلك انت تستحق التحيه والأحترم .

طيب انا ليه زعلان انك بتنشر الموضوع فى اكتر من مكان . لأنك بتعمم حاجه مش صح ومعلومات مغلوطه ودى لوكانت صح انا أول واحد كنت هانشرها.

انا لا أمللك انى احجر على راى أحد بس كل الحكايه انك توضح للناس ان الموضوع ده فى اطار الفضفضه والأرقام اللى فيه مش صحيحه . عشان غيرك هياخد المعلومه ويزود كمان 2% من عنده !!

اما بالنسبه للأخ شريف والرابط اللى كاتبه . الرابط فيه جريدة الشعب بتاريخ قديم . صدقنى حاول تاخد المعلومه من طرف محايد يعنى ماتاخدش معلومه من الحكومه على الأخوان على انها معلومه صحيحه وبرده العكس ومع ذلك فى الرابط اللى انت بعته الجمله دى موجوده (ويوضح التقرير أنه بإمكان مصر أن تحقق الأهداف التنموية فى مجال تخفيض الفقر إذا استمرت الاتجاهات السائدة فى الأداء الاقتصادى ) يعنى حتى هما عندهم امل . كمان فى حاجه تانيه لازم اللى يقول حاجه يكون مؤمن بيها قلبا وقالبا يعنى مثلا الأخوان بيأيدوا ان الستات متشتغلش ( ودى حاجه مش عيب انا عن نفسى طلبت من مراتى انها متشتغلش ودا مايأذيش حد . بس لما تيجى تسمع منى انا شخصيا بقوللك ان فى بطاله فى الستات ودا ماينفعش ... ساعتها هتقول عليا ايه . انما لو سمعت الكلام دا من واحد تانى عايز مراته تشتغل يبقى دا حقه فعلآ طب ايه علاقة دا بالرابط اللى انت باعته السطر ده (أما بالنسبة لانتشار البطالة بين الإناث فقد أكد التقرير أن نسبة البطالة تبلغ حدا مرتفعا بين النساء أكثر مما هى بين الرجال وكان معدل زيادتها أسرع حيث ارتفعت ) ياترى من وجهة نظر جريدة الشعب دى حاجه وحشه ولا كويسه . عشان كده بقوللك خد الكلام من جهه محايده .

انا ياجماعه مش مع الحكومه ولا حاجه بس احنا دايما بنجلد ذاتنا . احنا وحكومتنا مش وحشين قوى كده للدرجه اللى تخلينا نكره البلد واللى فيها .

تحياتى

[sherifhfm]

يا اخى الحكومة مش موضوع انها وحشه بس الحكومة مش فى دماغها مصر خالص خاااااااااااالص كأنها حكومة بلد تانى

[الجنيدى]

انا ارى ان هذة الحكومة هى اجرأ حكومة فى اظهار فسادها وعينها القوية؟؟؟؟؟؟؟؟؟؟؟؟؟؟؟؟؟؟

[eslam elmasre]

ياه

كنت كاتب الكلام ده في 2008 وكان نظيف مش عاجبني

ايام نظيف كنا بنعيب عليها وبنقول كلها فساد لان كنا ما شفناش الاسوأ

كنا شايفين السيء بس

ولا يوم من ايامك يا نظيف

حتى البنزين مش لاقينه

ربنا يولع في اللي وصلنا لده

انا عايش اسود ايام حياتي

مش انا وبس

المصريين كلهم بدون استثناء