الشركة بتمضي العقد بعد نقل الكفالـه ـــــــــــــــــــــــــــ

[kingsabry]

السلام عليكم ...

ازيكم يا جماعه معاكم أخوكم / محمد صبري .

أنا جيت السعودية بفيزا حره .. وبعدين اشتغلت في شركة كبيره بمهنة محاسب .. بعد المقابلة خلوني أمضي على الالتزامات اللي عليا .. ومنها (ورقه مكتوب فيها دفع شرط جزائي قيمته 5000 ريال لو مشيت في خلال مده سنتين من تاريخ العمل ) .. وورقه تانية مكتوب فيها ( نقل الكفاله وتغيير المهنة أنا اللي بأتحملهم ) ..

بس لحد دلوقتي (وأنا شغال معاهم من شهر وشوية ) لسه ما نقلتش كفاله .. وسمعت من الناس القديمة والجديده في الشركة انهم كانوا ناقلين عليها برده نفس وضعي بس في وقت ما نقلوا الكفاله عليها .. لقيوا شئون الموظفين بتديلهم ورقه مكتوب فيه العقد (وده بعد ما نقلوا كفالتهم ) وكان العقد مخالف خالص للشروط اللي اتفقوا عليها (زي الراتب مثلا كانوا متفقين على راتب 2250 لقيوا الراتب في العقد 1800 والباقي حوافز ) وبرده ( زياده سنوية 10 % وما حدش زاد الا لما المدير المالي يوافق وطبعا هو لا بيوافق ولا حاجه الا لناس معينة . معنى كده ان فيه ناس مش بتزيد الزياده السنويه دي )

وفيه ناس برده جت تنقل كفاله بعد سنتين .. المدير المالي قال له يا نهائي يا تشتغل .. ما عندناش نقل كفاله ..

ايه رأيكم يا جماعه بعد اللي قرأتوه ده .. ايه الحل ؟ هل أمشي وأسيبهم ؟ ولو طلبت منهم الورق بتاعي وأنا حاليا لسه ما نقلتش هل هيرضوا أخدهم منهم ؟

وشكرا ليكم وأسف جدا ع الاطاله ........

[khatabmohammed]

الأخ العزيز المحترم أولا لك 3 شهور اختبار قبل نقل الكفالة ولك الحق فى القبول من عدمه.

ثانيا المفروض قبل نقل الكفالة تمضى عقد عمل وتضع فيها انت ايضا شروطك .

اهم شرط تضعه فى العقد ولا تتنازل عنه لو ها تترك هذه الشركه وتمشى وهو انه فى حالة حدوث خلاف بينك وبين الشركة يكون لك حق نقل الكفالة ويختم العقد بختم الشركة ويوقع من مدير عام الشركة هذه نصيحة وغير ذلك لا يحق لك نقل الكفالة مستقبلا وهذا بناء على تجربة امامى.

اخوك خطاب

[se_ Elsyed]

لا يتم التوقيع على العقد الرسمي اللي بيسموه هنا ( على الورق المروس ) يعني الليتر هيد إلا بعد نقل الكفالة الفعلية ... لإن فرضاً شركة عندها أكثر من شركة تحتها بسجلات تجارية وانشطة مختلفة ... فما بتبقاش عارفه هي ممكن تنقلك على اي شركة على اساس تكون مستوفاه لشروط نقل الكفالة ... وكمان قانوناً ممنوع التعاقد الرسمي مع من ليسوا على الكفالة ...

وبالتالي لما تنقل كفالة فعلاً بيتم توقيع العقد

مع العلم ... إن مافيش حاجه زيادة هاتتكب في العقد تخرج عما تم الإتفاق عليه في عرض العمل المختصر اللي المفروض حضرتك وقعته معاهم قبل ما تنضم لهم ... اللهم إلا إن العقد بيكون واخد شكل الدباجة القانونية ويُفرغ فيه محتويات عرض العمل وممكن تكون فيه شروط عبيطة زي الشروط الجزائية أو ما شابه ...

لكن

أي حد ينقل كفالة على شركة ويكون معاه عرض عمل ويكون ما طلبش من الشركة إنه يشوف العقود الإستاندرد بتاعتهم اللي الفمروض يوقع عليها بعد كده ... يبقى لا يلومن إلا نفسه ... كذلك يا أخي إنت قلت

وبعدين اشتغلت في شركة كبيره بمهنة محاسب

وورقه تانية مكتوب فيها ( نقل الكفاله وتغيير المهنة أنا اللي بأتحملهم ) ..

حضرتك بالمنظر ده .. دي شركة كبيرة في السن مش كبيرة في الحجم لإن مافيش حاجة إسمها الموظف يتحمل مصاريف نقل الكفالة والورقة دي حتى لو إنت وقعت عليها فممكن توديهم في داهية لإنها مخالفة لقانون العمل اللي بيُجبر صاحب العمل إنه يتحمل جميع المصاريف المترتبة على تعيين الموظف مهما كانت ...

ومن اللي حيكته بعد ذلك يتضح إنها شركة مازالت تُدار بمفهوم البقالات ويا نهائي يا تشتغل عندي إلى ما لا نهاية أو على رأي المثل الفلاحي اللي بنقوله " يا تحلبي يا أكسر قرنك " يبقى سيبهم من دلوقت لإن البداية لا تُبشر بخير وخصوصاً إنك بتقول إن لك حرية في أن تنقل على أي شركة ..

وبالمناسبة ليس من حق الشكرة أن لا ترجع لك اوراقك وإلا تشتكيهم وتبهدلهم ... وكما ذكرت من قبل .. اللي لسه ما نقلش كفالة على شركة وكان عنده حق من الحقوق ضايعة عليه من هذه الشركة ممكن يشتغل لهم في الأزرق بمنتهى السهولة وما يخليهمش يناموا الليل وكل الشركات مهما كان حجمها بتحاول تبعد عن اللي العيار اللي ما يصيبش عشان ما يدوشهاش .

[kingsabry]

أنا عاجز عن الشكر يا أستاذ خطاب وحضرتك يا سي السيد

طمنتوني ..

وبجد ان شاء الله ناوي أسيب الشركه دي من بداية الشهر الجاي ..

وربنا يسهل أمور المسلمين جميعا ..

[Tameraz]

نصيحة لله

سيبك من الشركةدي

ببساطةدول ناس تعبانة

1- لابدمن كتابه العقد قبل الكفاله و او انهم مستنين لما يمسكوك بعدين يجبروك على توقيع العقد

2- لو الراتب ذي ما قلت كده ده ضعيف جدا الايام دي ولا يوكل عيش الا اذا كنت ناوي تخليق عزوبي

3- جميع الرسوم من تجديد اقامة وغيرها حسب قانون العمل على الكفيل

تم تعديل 16 أكتوبر 2008 بواسطة Tameraz