ناوي تعمل أيه لما تستقر فى مصر ؟

[se_ Elsyed]

هذا التوبيك قصدت منه أن نستفيد من أفكار وخبرات بعضنا البعض ، فلو فرضنا أن خلاص حصل اللى حصل ونزلت أستقرت فى مصر .. هاتعمل أيه يا جميل ؟

- هاتدور على وظيفة تاني وتستنى الكام ملطوش بتوع أخر كل شهر ؟

- أو تطلع القرشين اللى محوشهم نتيجة الغربة وتفتح بهم مشروع بتفكر فيه من زمان ؟

[se_ Elsyed]

أنا أول واحد هاجاوب لأن الموضوع ده شغلني جداً وخصة أن مستحيل أقعد فى الخليج على طول ، وناوي أنزل مصر وأنا سني صغير وأخوض معترك الحياه هناك .

- علشان كده أنا حسمت الموضوع ومستحيل أرجع أدور على شغل تاني وأبدأ السلم من أوله خاصة بعد المنصب اللى وصلتله هنا .

- يبقى الحل هو أني أعمل مشروع صغير بغض النظر أنه بعيد عن مجال تخصصي ودراستي ، فأنا مؤمن تماماً بحديث الرسول ( ص ) بإن التجارة تسعة أعشار الرزق ، وعلشان كده أول حاجة هاعمل الآتي لما أنزل مصر :

1- هأوسع صالون الحلاقة بتاعي اللى مشارك فيه أخويا .

2- هاحط القرشين بتوعي على القرشين اللى هاتدهملي " ست أمينة ... كشريكة أساسية كما وعدتها ( أمونة كده عداني العيب ) " فى مشروع أدرسة كويس وهو هايكون من بين تلك المشاريع :-

أ- حيث أني عندي خبرة أكتر من 10 سنوات فى موضوع المطاعم والكافتريات فممكن ده يكون على جدول الأعمال .

ب- ناوي أعمل دراسة لفتح محل لتوزيع وبيع المواد الغذائية بالجملة .

ج- ناوي أدرس موضوع توزيع مستلزمات التجميل والصالونات والكوافيرات .. وده مجال ممتاز أيضاً أنا جربته قبل كده وكان ماشي حلو.

د- ناوي أقعد مع جماعة شباب صغير من سني كده أشتغلوا فى مجال بيع الأدوية للصيدليات وماشاء الله ماشي معاهم حلاوه ، فناوي أخد فكره عن الموضوع ده يمكن ينفع معانا أحنا كمان .

- وأهم عامل لإنجاح هذه الأفكار أنها هاتكون تحت إدارتي الشخصية ، يعني مش هاكتفى بالفرجة أو تكبير الدماغ .. ده انا ممكن أشتغل بأيدي فى اى مجال من دول .. مش عيب .

يالله صلوا عالنبي كده وكل واحد يقدح زناد فكره ويقول الأفكار اللى فى دماغه ... وعلى فكره انا معجب بالفكرة بتاعت الفرن اللى قالت عليها أختنا جولد ، وحتى والله موضوع الجاموسة بتاع حشيش اللى قصد منه التهريج لكن مشروع تسمين العجول ده ممتاز للي بيفهم فيه وياحبذا لو كان فلاح أساساً

[بنت شعنونة]

مع معرفتي لناس كتير نزلوا معانا ف احسن حااجا تعملها فعلا انك تحط كل فلوسك في البنك لمدة سنة وليس اقل

في خلال السنة دي ها تعرف يعني ايه مصر وايه حالها وايه نظامها وها تعرف انت ممكن تعمل ايه وما تعملش ايه

انما لو دخلت سخن سخن كدا ورميت فلوسك في اول كام شهر في مشروع

لالالالالالازم يخسر مهما كااان

خدها حكمة مني يا سي السيد

لازم تفهم البلد ماشيا ازاي

وحكمة كمان

اوعى تصدق كل كلمة حد يقولها الالالا اذا كنت واثق فيه

لآنه ما حدش ها يديلك سره المهني اللي بيكسبة عشان تشاركة في رزقه؟؟؟!!! ( دا تفكير الكل هنا في مصر)

لازم ها يديك معلومة صح والف غلط

الا اذا كان ها يستفيد من وراك بحاجا "وش قرفان من البلد واللي فيها"

[White heart]

انا لا افكر بالعودة نهائيا، فقد أخترت طريقى، و لكن اذا حدث او اذا طلب منى رأى من أحد المقربين، فأن أول فكرة سوف تقفذ الى ذهنى ستكون "مركز لأعادة تصنيع المخلفات" انا أغوى الأفكار التى تأتى بفائدة على الجميع و أعتقد هذة هى احداها، فلها فائدة على الطبيعة و التلوث و هذا نحن فى أمس الحاجة الية فى بلدنا و ما يتبعة هذا النظام فى زرع هذة الخاصية خاصة فى الجيل الجديد من أهمية هذة النقطة فسوف يكون على الأباء الذهاب الى مثل تلك المراكز للتخلص من مخلفاتهم و بالطبع تصنيفها و فصلها من قبل الذهاب، فائدة مادية حيث المادة الخام لمثل هذا المشروع هو "مخلفات" الأخرين، أى "حاجة ببلاش كدة!!" اللهم الا المكان و بعض الألات و الحاويات الهيدروليكية، و بعض الأيدى العاملة (و يمكن الأستفادة من المئات الموجودين فى منطقة "الزرايب" بالمقطم و هم فعلا فى أمس الحاجة، فى مدينة مثل القاهرة تأن و تعانى من هذة المشكلة، أعتقد ان بجانب ما تقوم بة المحافظة من تعاقدات مع شركات خاصة لحل تلك المشكلة، فلا يمنع من وجود مثل تلك المراكز هنا و هناك حيث يستطيع من يريد ان يتخلص من مخلفاتة الذهاب عندما يريد و فى أى يوم، تعتمد هذة الفكرة على السلوك الفردى و الأيمان بأهمية الطبيعة من حولنا، و أعتقد ان هذا حتى و لو كان منعدم لدينا لربما ساهمت مثل تلك المراكز فى بث هذة الروح فى داخل الكثيرين...لمن يريد الأستزادة عن هذة الفكرة يمكن الضغط على هذة الشاشة لمتابعة فيلم تسجيلى لتبسيط وشرح الفكرة تفصيليا، لا أعلم اذا كان قد حاول البعض سابقا القيام بعمل تلك المراكز فى بلدنا و أى نوع من المشاكل قد و اجهها؟

[optimistic]

مجال العمل الدارج الان هو

لو كان راس المال صغيرا افتح مكتب كمبيوتر صغير او صيانة اجهزة كهربائية او سمسرة

لو كان راس المال متوسطا فافتح وكالة لماركة اجنبية او معرض سيارات

لو راس المال كبير

بلاش ترجع احسن

[se_ Elsyed]

متشكرين يا رجاله ... مانجلكمش فى حاجة وحشة

( وش عايز يخنق أول 3 ردوا عليه )

- يا شنشن أنا عارف ظروف مصر كويس ، ومعظم الشغلانات اللى أنا ذكرتها دي أنا اتمرمطت فيها .. يعني عندي خبره وعارفها ، وبعدين فلوس أيه اللى أحطها فى البنك وأقعد أول كل شهر أستنى ربحها زي ست أبوها ... ماينفعش ياماما أنا لسه صغير وبعدين القعدان فاضي ده ممكن يخليني أنحرف ( وش واحد شرير )

- يا عم يا أبو قلب أبيض .. والله أنت عسل ... مخلفات مين اللى أنت عايز تعيد تدورها ، ياعم خلينا واقعيين أنا بأتكلم عن مصر مش أمارة موناكو .

- شكراً يا حاج متفائل عالنصيحة بس بتهيألي السمسرة والحاجات دي متليقش على اى واحد .

ياخوانا أنا عايز أفكار واقعية يسهل تنفيذها ، أنا مابتكلمش على مصنع تجميع سيارات أو مفاعل نووي .

[optimistic]

طيب لتسهيل الامر علينا

معاك كام و اهم خبراتك ايه

[arabawy]

هذا التوبيك قصدت منه أن نستفيد من أفكار وخبرات بعضنا البعض ، فلو فرضنا أن خلاص حصل اللى حصل ونزلت أستقرت فى مصر .. هاتعمل أيه يا جميل ؟ 

- هاتدور على وظيفة تاني وتستنى الكام ملطوش بتوع أخر كل شهر ؟

- أو تطلع القرشين اللى محوشهم نتيجة الغربة وتفتح بهم مشروع بتفكر فيه من زمان ؟

تستقر فين ياسي السيد البلد كلها موحولة في الطين نتيجة لعشواءـية جميع السياسات فتجد كل شيء لايعمل وكل شيء مهلهل واي عمل جدي يفشل

[ابو حلاوه]

يوما ما سأعود بالتأكيد و لكن عندما اعود اتمني ان يكون نشاطي الوحيد هو صيد السمك و ان لا اضطر للعمل لكسب القوت في مصر

[ابويحيى]

بسم الله والصلاة والسلام على رسول الله

انا فعلا في خطوات النزول هذا الصيف سأرجع زوجتي واولادي إلى مصر ثم سأبدأ بجانب عملي استكمال دراسة الزراعة الحيويه تعرفونها هي الزراعة بدون مبيدات كيماويه او سماد صناعي Eko .

سمعتم عن مزارع sekem في مصر هي نفس الشيئ فهذا هو المستقبل لان الزراعات الاخرى اثبتت انها لا تنفع على المدى الطويل لانها تقوم على اغتصاب التربة لعدة سنوات بكل ما اوتوا من مواد كيماويه ومبيدات حشريه ضارة على الانسان والحيوان والتربه ثم ينتقلون إلى تربة اخري ليتم اغتصابها .

اما الزراعة الحيوية تقوم على الاعتناء بالتربة بأقصى درجة عن طريق تنويع المحاصيل في الموسم الواحد (7على الاقل) كما انها اكثر فننا من الزراعة العاديه لإنك تراقب نباتك طول الوقت وتفكر كيف تريحه من كل الجوانب بدلا من ان تجري وتشتري جركن كيماوي تحطه في تنك التقطير وتحمد ربنا انك تدخلت في الوقت المناسب وتسيب الناس تموت من الفشل الكلوي ويصبح الرجال عندهم عقم وتكثر الامراض في بلادنا.

انا اشتريت ارض في الفيوم لهذا الغرض وافكر في المستقبل ان افتح محل خضار مخصوص لهذه المنتجات الحيويه كما فعلت sekem في المناطق الغنيه مثل المعادي ومصر الجديده .

الاخت شعنونه حرام عليكي تنصحي الناس بالربا فهي من اكبر الذنوب التي وقعنا فيها وهي سبب مشاكلنا كلها لاننا في حرب مع الله بسسب الربا والعياذ بالله.

اما اخي السيد فأنا معك في موضوع التجارة عليك بها واعرف اصدقاء في تجارة الادويه ويربحون ربحا طيبا.

ولست معك في التوسع في صالون الحلاقه ففيه مخالفات شرعية من حلق اللحية وقص الشعر مشابها للكفار .

فأنظر للربح الحلال فهو الربح الذى تأتيه البركة اما الربح الحرام فلا بركة فيه.

[بنت شعنونة]

سي السيد

لو انت بتعرف تتعامل مع طبقات الشعب المتشردة

اشتري ميكروباص وشغله على الخط

يجيبلك 3000ج كل شهر بعد خصم الأصلاحات ومرتب السواق

بس لازم تكون لبط عشان تعرف تتعامل مع السواقين عشان ما حدش يسرقك

ومريحة جدا ولا ها تتعب في اي حاجا

[kokowawa1979]

الزراعة إن كان صاحبها على رأس عمله فهي مجزية للغاية وإليكم هذه المعلومات السريعة :

إن كانت الأرض والمياه صالحة لزراعة المانجو أي ان الأرض صفراء خفيفة خالية من الأملاح وكذلك نسبة الأملاح في المياه لاتتجاوز 400 جزء في المليون ففي السنة السادسة من الزراعة تكون الأرباح تعادل نسبة 100% من رأس المال أي كأنك وضعت مالك في بنك ربوي ( مع الفارق هنا) وحصلت على نسبة ربح 100 % سنويا .

وفي حالة العنب في السنة الخامسة تكون نسبة الربح تعادل 25% تقريبا .

أما الاستثمار في زراعة المجنونة الشهيرة بالطماطم فهي قد ترفعك في خلال 4 شهور ونصف إلى صافي ربح حوالي 15000 إلى 30000 جنيه للفدان الواحد الذي تكون تكلفته حوالي 5000 إلى 6000 جنيه حتى جمع المحصول أي أن نسبة الربح في حالة الطماطم تكون 200 إلى 400% تقريبا

وقد تنزل بك المجنونة إلى سابع أرض وتعرضك للخسارة والخسارة هنا هو حصولك على رأس المال الذي دفعته في الزراعة علاوة على حصولك على نسبة ربح بسيطة جدا لاتفي بالغرض !!!

لهذا يجب زراعة المجنونة على 3 فترات متتالية لأنه بإذن الله سوف تكون إحداها ذات الريع العالي

الزراعة ياخوانا هي أفضل استثمار لكن يجب أن يكون صاحبها بجوارها ولايتركها لأحد آخر لأنه حينما يعود سيفاجأ بمن يزرعها يقول له :

انت مين وعاوز إيه !!! ده طبعا بعد مايكون حط إيده على الأرض

ولاتنسوا زكاة الزروع

[moody00x]

لو انت بتعرف تتعامل مع طبقات الشعب المتشردة 

اشتري ميكروباص وشغله على الخط 

يجيبلك 3000ج كل شهر بعد خصم الأصلاحات ومرتب السواق 

بس لازم تكون لبط عشان تعرف تتعامل مع السواقين عشان ما حدش يسرقك 

ومريحة جدا ولا ها تتعب في اي حاجا

ده أحلى مشروع يا شانا بجد عاجبنى بس المشكلة إنى مش لبط

[se_ Elsyed]

من اول واحد عارف يا جماعة أن البلد أحوالة منيلة ، لكن أنا أفترضت لو الظروف حكمت ونزلنا مصر .. هأنقعد نولول ونقول الظروف والجوابات ، يعني لو تلاحظوا أنا قولت نماذج أقرب إلى الواقعية ، لم اتكلم عن أشياء خيالية .

وبعدين يا عم متفائل أنا زيي زي أى واحد فيكم لا أنا مليونير ولا معدم ... يعني تقدر تقول وسط ... ( راجع الموضوع بتاع حشيش .. معاك كام ؟ وأتعذب شوية لحد ماتلاقيه فى المناقشات العامة )

وصدقني القلوس ليست مهمة مقارنة بالعقلية التى سوف تدير هذا المشروع .

أعرف أحد الشباب سافر إلى أيطاليا فترة ورجع مصر حط فلوسه فى مطعم فى منطقة كويسة وسابه للصنيعية يشغلوه وهو بقى ينام ويصحى بعد الظهر وعايش حياته وكل وظيفته يروح يأخد أيراد المحل فقط ... فى أول فترة المحل أشتغل شغل نار ... وعلشان صاحبنا اللى نايم ده أتقفل بعد عدة شهور .

شعنونة : بالتأكيد هاتكون هناك خطوط فاصلة للعمل الذى سيتجه إليه الواحد يعني معليش مش معقول بعد ده كله أرجع أشتري تاكسي أو ميكروباص وأشتغل عليه أو أجيب حد يشتغل عليه هو ، هي مش عيب أبداً لكن فيه مجالات مستحيل الواحد يفكر فيها .

والظاهر هي هاترسي على شراء كرسي " موفابل " ونقعد انا وأبو حلاوة على شط ترعة الدكر بتاعت حشيش ونقعد نصطاد سمك ( ونبيعه )

[Scorpion]

أبو حلاوة كتب :

يوما ما سأعود بالتأكيد و لكن عندما اعود اتمني ان يكون نشاطي الوحيد هو صيد السمك و ان لا اضطر للعمل لكسب القوت في مصر

جديآ هذا هو القرار الذي أتخذته فيما يخص عودتي لمصر.... و لتعلم يا عزيزي أن المكان جاهز علي شط الأسماعيلية ... فأهلآ و سهلآ أذا أردت أن تشاركنى في مشروع المحالين على المعاش... و طبعآ يا سي السيد مكان الكرسي (الموفابل) بتاعك محجوز تحت الشجرة.. و أبعد يا عمنا عن شط ترعة الدكر بتاعت حشيش.. السمك هناك يا أما عنده بلهارسيا يا أما مسطول من الريحة.....

[Scorpion]

أبو يحيي كتب :

ولست معك في التوسع في صالون الحلاقه ففيه مخالفات شرعية من حلق اللحية وقص الشعر مشابها للكفار .

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

معلهش... مش فاهم ... وضحهالي وحياة يحيي أحسن أكون كفرت و أنا مش واخد بالي.....

[صعيدي]

اللي عايز يشتغل ...يشتغل في حاجتين فقط العملات و خاصة الريال السعودي و الدولار  أو في السيارات المستعملة .

.

ازاى

(وش واحد متلهف و مخبى الفلوس وراء ظهره)

[se_ Elsyed]

تجربتي الشخصية.....

نصيحة لكل واحد مغترب أوعي تشارك حد في مشروع ولو حتي يبقي مين...................

اللي عايز يشتغل ...يشتغل في حاجتين فقط العملات و خاصة الريال السعودي و الدولار  أو في السيارات المستعملة .

أنا نجحت فيهم في مصر بطريقة فوق الممتازة بالنسبة للدولار و الريال لو اشتغلت صح و بطريقة منظمة دخلك موش هيقل عن 800 جنيه في اليوم  و بالنسبة للسيارات لو أشتغلت في اربع سيارات شهريا ممكن تعمل في الشهر حوالي 12000 جنيه.

أقفش يا جدع تجارة عملة ، حرام عليكوا يا ناس خربتوا الأقتصاد ...

أنت بتتكلم جد ؟!!!! طيب ولو الواحد أتمسك ياخويا هاتبقى تنفعني لما أتهبد 5 او 6 سنين فى وادي النطرون ؟

قولتلي بأه الأخضر بكام النهاردة ياباشا ( وش واحد مخبي ورا ضهرة شنطة سامسونيت مستفه دولارات )

[الطفشان]

خلوهم ثلاث كراسي

و يا أما مية مالحة، يا أما مش لاعب

(بلاش ترعة الدكر)

سمك المية الحلوة مليان طفيليات

و سمك المية المالحة طعمه احلى

(فين الدنيس و المياس و القاروص و البوري!)

على فكرة

عارفين ان في شركة انجليزي بتجيب الخواجات سافاري يصطادوا سمك ضخم جدا اسمه Nile Perch في بحيرة ناصر؟

و انواع تانية كمان زي سمك النمر و انواع من القرموط

ببس الدنيا هناك حر موت ...

خلينا في وجه بحري

[moody00x]

كنت بافكر فى ورشة أو مصنع صغير للملابس خصوصآ ملابس ألأطفال...

يا ترى ممكن يمشى ولا برضه زى غيره؟