ناوي تعمل أيه لما تستقر فى مصر ؟

[التونسى]

الله على الكلمات ..

يالله بقى عليك و على باب الأدب ..

على فكره اخى العزيز ابو زياد ما كتبته هنا عن تجربتى مع العوده لمصر كان مجرد ابيات(( ارتجاليه)) لم اهتم فيها بوزن او بناء شعرى .. كنت فقط احاول التعبير بكل تلقائيه وعفويه عما شعرت به وانا فى مصرنا ((الموروثه)) وليست ((المحروسه)) للأسف

ولكن انتظرنى بل وانتظرونى جميعا فى باب الأدب مع(( كلمتى للتاريخ وللمصريين )) وهى ردا على كلمة ((مبارك للمصريين والتاريخ)) وهى ابيات زجليه رباعيه منفصله متصله ....سمح بنشرها فى بعض المنتديات .. ومنعت فى البعض الاخر .. واتمنى الا تغضب قصيدتى المزعومه تلك أحد عند نشرها لما فيها من نقد ساخر جدا وجلد بشع للذات بلاهوادة او رحمه

[أبو حميد]

واتمنى الا تغضب قصيدتى المزعومه تلك أحد عند نشرها لما فيها من نقد ساخر جدا وجلد بشع للذات بلاهوادة او رحمه

لا والنبي الله يخليك خلي في هوادة ورحمة وبلاش حكاية الجلد البشع دي . أحنا اللي فينا مكفينا بالراحة وحبة حبة علينا.

على فكرة أهلا بيك في المنتدى وأبياتك رائعة فعلا وأنا كنت فاكر الأبيات منقولة من جمالها ومستنين مشاركاتك إنشاء الله.

[التونسى]

واتمنى الا تغضب قصيدتى المزعومه تلك أحد عند نشرها لما فيها من نقد ساخر جدا وجلد بشع للذات بلاهوادة او رحمه

لا والنبي الله يخليك خلي في هوادة ورحمة وبلاش حكاية الجلد البشع دي . أحنا اللي فينا مكفينا بالراحة وحبة حبة علينا.

على فكرة أهلا بيك في المنتدى وأبياتك رائعة فعلا وأنا كنت فاكر الأبيات منقولة من جمالها ومستنين مشاركاتك إنشاء الله.

متشكر جدا أخى الكريم ابو حميد على حفاوتك فى الترحيب بى .. وكذلك على اشادتك بأبياتى الارتجاليه والتى ما زلت احسبها متواضعه mfb: .. وعلى العموم قصيدتى الزجليه المزعومة ليس كلها جلد بشع .. بل بعض المواضع فيها .. ولو رأى مقص الرقيب ها هنا بالمنتدى أنه لا بد من حذفها فلن أمانع أو أعترض .. فهى خبرة قد الفتها من قبل .. وأتقبلها بصدر رحب :D

وبعدين يا بوحميد دانتا حاطط صورتك الرمزيه لرائد من رواد القصائد اللاذعة الساخرة السياسية الممنوعه .. يعنى كنت أتوقع منك ان تحثنى على مزيدا من الجلد والنقد بلاهوادة او رحمه :D

طب انا حاجى ايه جنب نجيب سرور :)

[نورت مصر!!!]

انا هعمل وهعمل وهعمل مين ضامن عمره لثانيه واحده بس الامل مطلوب ولما ننزل ونطحن شويه ونعرف الناس بتتعامل مع بعضها ازاي والكام بكام نفكر هنعمل ايه

[أبو حميد]

وبعدين يا بوحميد دانتا حاطط صورتك الرمزيه لرائد من رواد القصائد اللاذعة الساخرة السياسية الممنوعه .. يعنى كنت أتوقع منك ان تحثنى على مزيدا من الجلد والنقد بلاهوادة او رحمه :sad:

طب انا حاجى ايه جنب نجيب سرور :sad:

تخيل أن أقل أعمال نجيب سرور قربا لقلبي هي هذه القصائد الممنوعة رغم شهرتها العريضة وأعجاب الكثيرين بها فشعره الأخر ومسرحياته هي مثال لعبقرية نادرة من حيث الفكرة والأسلوب وهم سبب أعجابي به وأخترت صورته لملامحها الحادة القوية ولأني شايف أنه مخدش حظه من التقدير.

[بنت النيل]

شوف ياعمو س.س

انا عن نفسى مش ناويه ولا بفكر انى استقر فى مصر طوال ما الظروف سامحه بانى افضل مغتربه

عايشين كويس ومبسوطين وبنربى اولادنا احسن تربيه وبنشوف اهالينا فى اى وقت لو حبينا يعنى او وحشونا اوى

يبقى انزل مصر نضيع شقى العمر فى ايه وخصوصا بالظروف اللى بتمر بيها بلدنا الحبيبه

وتعمل مشروع تانى يوم تلاقى الضرائب بتقولك تعالى يا جميل وحسابنى :sad:

لكن بقى اذا ده اذا وربنا مايجيب اذا :sad: اضطرينا للرجوع الى مصر ولا مفر من ذلك فأكيد هيكون المشروع فى مجال عمل الزوج وهو " مبرمج كمبيوتر " انا عن نفسى بفكر افتح مكتب للاجهزة الكمبيوتر والانترنت

او ادورعلى عمو س.س واشاركه :unsure:

ايه اخبار مكتب العقارات اليومين دول :lol:

[Jesper]

ايه رايكم ياشباب فى مصنع بومب؟؟؟؟

[sherifhfm]

اول ما ارجع من ان شاء الله حقدم على هجرة الى الصومال حتى لانى لو قعدت فى مصر اكثر من شهر سوف اكرها وانا مش عاوز اكرها

[se_ Elsyed]

ايه رايكم ياشباب فى مصنع بومب؟؟؟؟

طب نعتبر ده فكرة حقيقية ولا تعليق ساخر ليس في محله ؟

[سهل جدا]

تعجبت من تاريخ كتابة الموضوع (2003) ولا يزال التعليق عليه حتى الآن (نهاية 2008)

بس هو الموضوع صراحية يستحق النقاش إلى ما لا نهاية ..

أعتقد أن العقارات هي أفضل استثمار للمغترب حال غربته , وبعد رجوعه , ووجه ذلك أن الاحتكاك فيها بالتجار أقل من أي تجارة أخرى ..

فكما تعلم أن التعامل مع التجار في مصر في أي مجال بيكون فيها معاناة كبيرة جدا (اسأل مجرّب) .. الفصال , والبخس .. والتغرير .. إلخ , طبعا أنا لا أجمع ولكن هذا غالب التجار , والله المستعان ..

نرجع لموضوع العقارات .. كنت أقول أن مميزاته كثيرة أولا : قلة الاحتكاك بالتجار ثانياً: إنها تجارة لا تخسر في الغالب , فإذا لم تربح فأنت لن تخسر .. ثالثاً: إذا تعزر البيع لسبب أو لآخر , فبإمكانك أن تأجرها ..

هذا رأيي والله أعلم

[fatfouta]

خايفة لارجع فى صندوق ومعرفش اعمل اى حاجة

من حبى فيكى يا مصر كل لما تيجى سيرتك اخااااااااااااااااااف

[الجدار]

للأسف ضيعت ساعتين في قراية الموضوع بجد الموضوع كانت فكرته ممتازه وقلت الواحد حيستفيد من خبرات الناس بجد انا أحبطت بجد

طيب ليه احنا تفكيرنا سطحي قوي كده؟؟

ولا واحد اتكلم بجد غير يمكن اتنين تلاته والباقي كعادتنا ضحك وتأليس وهزار

يمكن هي دي النقطه يمكن بسبب كده احنا مش نافعين ؟؟ اي حاجه نقلبها ضحك وهزار !!

عيب يا جماعة بجد

كله كره مصر خلاص !!

عيني عليكي يا مصر حتلاحقيها من اللي بره ولا من اللي جوه ؟؟

تم تعديل 27 ديسمبر 2008 بواسطة الجدار

[اليوم السابع]

مشروع مدرسة عربي أو لغات جميل جدا ومناسب للمناطق ذات الكثافة السكانية العالية

عايز طبعا فلوس كتير للارض والمبانى ممكن يشترك فبه مجموعة

اتنمى اعمله

[somayasaleh]

اعتقد ان المشروع المربح الان في مصر..... وبدون خسائر تذكر العقارات...

الواحد لو عنده اكتر من شقة او يشتري كام شقة في مدينة جديدة زي ٦ اكتوبر او التجمع الخامس (لوجود الجامعات الخاصة بها)

وياجرها للطلبه المغتربين ....بس علي شرط مش مفروش ايجار جديد ده مشروع مفيش فيه اي مخاطر

واعتقد ان المكسب ح يكون معقول ومفيش فيه احتكاك باي جهة حكوميه؟؟؟؟؟

[se_ Elsyed]

بأفكر برضوا في موضوع ورشة صيانة سيارات متكاملة .... وأنا عارف إن في مصر ميكانيكة كويسين ... لكن الواحد لو ضمن شغلانه .. بالذات هذه الفئة الغير مثقفة .. فكثير منهم بيآنتخ ويتجه لقلة الضمير ... فعشان كده ممكن أسأل عن سكة إستقدام عمالة ماهرة من الفلبين .. وده بالكتير قوي هاياخد 500 دولار شهري ... يعني بنتكلم في حوالي 3500 ج وهاوفره سكن ممكن في الموقع نفسه ...

ويا سلام عن إعلان صغير وأدرمغ به البلد إن الورشة دي فيها فنيين فلبينيين بجانب المصريين طبعاً ... ده هايعمل challange وغيرة بينهم ... بس خايف أحين الواد بيليه يحط للواد ريكاردو سِم في ساندوتشات الفول ويخلصوا من اللوبي الفلبيني ؟

خصوصاً إن العيال دي هاتلاقي نفسها في مصر لإن المجتمع مفتوح ... بس اللي هايقل عقله ويسكر او يتجه لسكة الحرام ... هاعلقه من رموشه على باب الورشة وأديه نهائية - ما انا هابقى كفيل وهاطلع عليهم كل القعد النفسية والعصبية -

العيال الفلبينيين دول في الشغل الحرفي .. دكاترة .. وبادخل هنا وورشة الهندي او الباكستاني .. بأحس إني داخل زريبة ..

أما الفلبينيين فنضاف قوي قوي قوي في شغلهم ... عايز حد من سكان الرياض يروح صناعية الأمير سلمان ويروح سلسلة وِرش " العضيب " أو أي ورش من اللي جنبها وفيها فلبينيين ... يحس بالظبط إنه داخل مستشفى من النضافة وما تلاقيش حتى نقطة زيت عالأرض ...

بس أهم تحدي هايواجهني هو قطعة الأرض ...

بس دي بإذن الله سهله ... فبالدراسة الجيدة ممكن الواحد يبدا مع شركاء محترمين ونعمل شكل قانوني للمشروع ولتكن شركة مساهمة ... وبالتأكيد ممكن نلاقي حد عنده حتة أرض مش عارف يستغلها ونبدأ عليها المشروع اللي تجهيزاته سهلة برضوا وممكن نشتري المكن بالتقسيط أو حتى مُستعمل من أوروبا ونجيبه عن طريق بورسعيد ... وطبعاً هياتشحنوا لي هدية أخويا سكوربيون .. كادو منه من إيطاليا

كمان هايبقى اساس مشروعي هو الامانة والصدق مع الزبون ... والله حتى لو هاخسر فلوس .. إنما لازم أكسب رضى ربنا ... يعني لا في إشتغالات للزباين ولا الزبون يدخل وعنده حاجه بسيطة في العربية نقوم نكركب له الدنيا ونشيله حاجات مالهاش لازمه ..

- إتعاملت مع ولد ميكانيكي من المنطقة اللي فيها بيت العيلة والله مش عايز أقول لكم إنه عنده يمكن 25 سنة .. وعرفت إنه فتح ورشة صغيرة للميكانيكا عند نادي الشمس ... وروحت له لقيته ما شاء الله مشغل ييجي 5 صنايعية معاه يمكن كلهم أكبر منه في السن .. ومستولي عالشارع كله اللي مرصوص عربيات وما بيقبلش الا الموديلات الحديثة وبيتعامل بامانة وضمير مع الزباين وربنا فتحها عليه وبقى معلم خلال فترة وجيزة ... بالتأكيد بعد ما أتمرمط شويه في الورش الخاصة وشرب الصنعة ...

- كمان كنت باتعامل مع واحد تركي هنا ... بصراحة أي حاجة بسيطة في العربية كان بيرفض ياخد فلوس وده اللي خلاني أتمسك بالتعامل معه ..

وإتأكدت من مبدأ في التعامل التجاري وهو إنك ما تبصش تحت رجليك وتفرج بقرش جايلك سريع النهاردة وبس .. في حين إنك لو نميته بالتعامل الجيد ممكن القرش ده يبقى قروش .. والزبون صاحب القرش اللي وجد معاملة وجودة عمل جيدة اليوم بالتأكيد وإنت مغمض هايجيب لك العديد من الزباين غداً ..

[ozoozo]

بأفكر برضوا في موضوع ورشة صيانة سيارات متكاملة .... وأنا عارف إن في مصر ميكانيكة كويسين ... لكن الواحد لو ضمن شغلانه .. بال

انا مش عارف انت بتهزر ولا بتكلم جد لكني كنت بفكر في نفس الموضوع لان فعلا في مصر بدوخ بين الكهراباءي والميكانيكي والسمكري واعرف ورشه عامله كده في كوبري القبه بيديرها مهندس ميكانيكا كنت بطلع اقعد في المكتب المكيف واشرب حاجه لغايه مالعربيه تخلص اكنك في التوكيل بالظبط غير نظام سيبهالي وعدي كمان اسبوع بتاع الميكانيكيه

[nizza la bella]

واللهى موضوع جميل .....

بس مش لما تستقر مصر الاول

وبعد كدةافكر استقر

فاقد الشىء لا يعطية

دة حتى لما بنزل اجازة يا راجل بشد فى شعر راسى من اللا موبلاة وعدم النظام

[se_ Elsyed]

هأهزر ليه يا عم ... هي المشروعات والأعمال الناجحة مش بتبدأ بفكرة برضوا ؟

[jamalpody]

علي فكرة مشروع ورشة الميكانيكا مشروع رائع جدا

ومربح كمان بس ربنا يكفيك شر الضرائب والمستنقعات

[se_ Elsyed]

علي فكرة مشروع ورشة الميكانيكا مشروع رائع جدا

ومربح كمان بس ربنا يكفيك شر الضرائب والمستنقعات

لو أنا ماشي صح وعندي دفاتر مظبوطة وبأفوتر الزبون .. يبقى هاحط صابعي في عين التخين ... وصاحب الحق صوته عالي .. والغلاسة موجودة في اي حته .. وفتح عينك تاكل ملبن