أفيدونى عن شقة بزهراء مدينة نصر

[ranoosh]

السلام عليكم ورحمة الله

يا جماعة انا معروض عليا دلوقتي شقة في زهراء م نصر

انا معرفش العنوان بالظبط علشان دى شركة وعايزيني اروح مع المندوب

بس كل اللى اعرفه انها خلف مساكن القوات المسلحه قبل السلاب

ومواصفات الشقه :-

130م وصافي 90م

متشطبة سوبر لوكس سيراميك ودهان بلاستيك واستلام بعد 3 شهور

2 نوم و R وحمام ومطبخ

كاش 75000

او 25000 مقدم وبتسهيلات على 4 سنين قسط شهري 1200ج

انا عايزه اسمع رأيكوا بليز فى العرض ده

سواء عن مواصفات الشقه او المنطقة نفسها

وياريت تقولولي ايه اخبار المنطقة دى تمام ولا مش تمام "دى اهم حاجه عندي"

مستنية رأيكواااااا وياريت بسرعه عشان حقيقي محتاجه شقه بأقصى سرعه

وجزاكم الله كل خير :lol:

تم تعديل 15 أكتوبر 2008 بواسطة ranoosh

[فيصل رافت]

مساء الخير

والله انا معلوماتى ضيقه جدا عن الموضوع ده ولكن حاحاول اساعدك على قد ما اقدر وملخصها فى بعض النقاط

1- المنطقه كويسه وسمعت عنها كتير وعموما انتى ده هاتشوفيه بالمعاينه وده امر ضرورى

2- السعر كويس جدا جدا على المساحه سواء الصاافيه او اللى بالمنافع

3- الضمانات القانونيه ده امر ضرورى علشان النصب بقى على ودنه فى مصر ربنا يكفيكى شرهم طبعا هاتقوللى ازاى ضمانات هاقولك والله المستعان اولا اتاكدى من خلال الاوراق الموثقه والرسميه ان من يتعاقد معكى صاحب العماره او له ىالحق فى بيع وحداتها ولو كان بنظام مثلا مقاول بانى والنص والنص مع المالك يبقى تشوفى العقد المحرر بينه وبين المالك وتاخدى صور من كل الاوراق ديه

وحاجه تانيه ممكن يكون ده بالفعل صاحب العقار بس كمان ممكن يبعلك الشقه ويروح يبعها لواحد تانى عشان تامنى نفسك من الوقوع فى الحته ديه او ما تكتبى العقد عالطول تاخدى جواب من المالك وتروحى شركه الكهرباء وتدخلى العداد باسمك وضرورى بعد ماتخلصى اقساطها تسجلى وكمان امر ضرورى لازم تاخدى صحه توقيع من المحكمة على العقد

ومبروك

[شاب مصري]

تم حذف المداخلة وتوجية إنذار للعضو الفاضل مع وضع مداخلاته تحت الرقابة لمدة إسبوعين وذلك لإستخدام أسلوب متدني في الحوار والتعليق .

ونرجو عدم تكرار ذلك مستقبلاً

سي السيد

الإدارة

[se_ Elsyed]

السعر مضروب بالنار ويخوف ..

المنطقة أنا عارفها وطلع فيها عشوائيات اليومين دول وممكن تقع تحت طائلة القانون وتتهد ..

يعني 130 م ومتشطبة كمان وسعر المتر واقف بـ 570 ج .. طب تيججي إزاي ؟ دي لو مبنيه بالطين ومتشطبة ميه بسكر بدل الزيت والبلاستيك والسيراميك .. كانت إتكلفت أكتر من كده !!!!!!!! ده حتى مساكن الظباط اللي هناك واللي تعتبر قديمة بقى لها 15 سنة واكتر وبتتباع نفس المساحة وتشطيب قديم لإنها ساكنة .. نفس المساحة دي لو لقتيها بـ 150 ألف يبقى نعمة ورضا ..

انا شاكك في الموضوع ولازم تأمني نفسك وتشوفي ترخيص المبنى وتشوفي وصلات النور والمياة داخلة ... ولو كل ده موجود يبقى تخلصي على طول وكاش كمان وبعدين تضحي بخمسة آلاف جنيه وتطلعي تعملي عُمره تحمدي ربنا وتسجدي له شكراً على السعر ده .. انا باتكلم جد .. لإن شقة بالمواصفات دي سعرها لا يقل عن 200 ألف تحت أي ظروف وإن شالله يكون صاحبها سارق المواد اللي باني ومشطب بها فبرضوا السرقة هاتكلفه اكثر من 75 ألف ..

[محمد محي الدين جانو]

يا جماعة كل عشرة اصدقاء أو زملاء أو أقارب يجمعوا مبلغ مع بعض ويشتروا أرض ويبنوها أضمن وأوفر كتير

[محمد محي الدين جانو]

التنسيق والترتيب للموضوع متعب شوية وهياخد مجهود ووقت لكن العائد أكبر بكتير ولو على المشاكل الي ممكن تقابلهم في الاختيارات والموقع والتصميم الخ بشوية صبر وتفاهم تتحل والمشاكل موجودة موجودة في أي شئ

[بنت الشاطئ1]

على فكرة انا الحاجة الوحيدة اللى بعانى منها فى الغربة انى مش عارفة ابنى حاجة لأنى مش ممكن اترك عملى لأتابع البناء

وللأسف لا اثق بأحد لمتابعة البناء كل شخص يريد ان يخدمنا لابد ان يفكر فى العائد الذى يعود عليه من هذه الخدمة حتى ولو كانت هذه الخدمة مجرد متابعة من بعيد لبعيد او مكالمة تليفون او اكلفهم لشراء غرض لى ..لدرجة اننى فى مرة من المرات وصيت احدى صديقاتى لشراء ملبس معين ماركة معينة وتركت معها النقود.. اخذت النقود واعطتنى ملبسها الذى كانت قد اشترته لنفسها ولكنها وجدت موضة جدت فأعطتنى القديم واشترت بنقودى ما هو جديد ..وده فى الهايفة ..وقيس على ذلك

[Ahmed Unknown]

السعر مضروب بالنار ويخوف ..

المنطقة أنا عارفها وطلع فيها عشوائيات اليومين دول وممكن تقع تحت طائلة القانون وتتهد ..

يعني 130 م ومتشطبة كمان وسعر المتر واقف بـ 570 ج .. طب تيججي إزاي ؟ دي لو مبنيه بالطين ومتشطبة ميه بسكر بدل الزيت والبلاستيك والسيراميك .. كانت إتكلفت أكتر من كده !!!!!!!! ده حتى مساكن الظباط اللي هناك واللي تعتبر قديمة بقى لها 15 سنة واكتر وبتتباع نفس المساحة وتشطيب قديم لإنها ساكنة .. نفس المساحة دي لو لقتيها بـ 150 ألف يبقى نعمة ورضا ..

انا شاكك في الموضوع ولازم تأمني نفسك وتشوفي ترخيص المبنى وتشوفي وصلات النور والمياة داخلة ... ولو كل ده موجود يبقى تخلصي على طول وكاش كمان وبعدين تضحي بخمسة آلاف جنيه وتطلعي تعملي عُمره تحمدي ربنا وتسجدي له شكراً على السعر ده .. انا باتكلم جد .. لإن شقة بالمواصفات دي سعرها لا يقل عن 200 ألف تحت أي ظروف وإن شالله يكون صاحبها سارق المواد اللي باني ومشطب بها فبرضوا السرقة هاتكلفه اكثر من 75 ألف ..

اتفق مع الاخ سى السيد ان المطقة دى مش اوى , انا شفتها من سنتين تقريبا و مكانتش اد كده بس ممكن بردوا تروحى تتفرجى مش هتخسرى حاجه

بس نصيحه منى لو ممكن تاخدى حاجه مش متشطبه يكون احسن عشان غالبا التشطيب هيبقى مش تمام

[ranoosh]

ميرسي يا جماعة على الافادة والنصايح دي وجزاكم الله كل خير :happy:

انا برده مش مرتاحه للموضوع ده وشاكه ان الشقق دي تبع عزبة الهجانه :ninja:

دي لو مبنيه بالطين ومتشطبة ميه بسكر بدل الزيت والبلاستيك والسيراميك .. كانت إتكلفت أكتر من كده !!!!!!!!

عندك حق يا سي السيد :D

تم تعديل 18 أكتوبر 2008 بواسطة ranoosh