محتاج حد يفهمني أعمل ايه التأشيره عامل ؟؟؟؟ >>>>>>

[shabara]

السلام عليكم ورحمة الله وبركاته

اخوكم محمد من دمياط اللي هو انا يعني ، جايلي تأشيره من واحد سعودي معرفة الراجل ده بيفتح محل كمبيوتر صيانة ومبيعات وحاجات زي كده في الرياض وكان محتاج واحد يمسكله المحل طلع تأشيره (( عامل )) على اساس انه يبعتهالي وبالفعل بعتها وهتوصل الاوراق بالبريد على يوم السبت الجاي ان شاء الله بس المشكلة دلوقتي ان جواز السفر بتاعي والبطاقة مكتوب فيهم حاصل على بكالوريوس نظم المعلومات الإدارية .... ؟؟!!

عندي بقا شوية اسأله بسيطه :

1. أغير البطاقة والجواز ازاي ؟؟ والإجراءات دي بتاخد وقت قد ايه.؟؟

2. وبعد اما اغير البطاقة والجواز أروح فين وأعمل ايه بالضبط؟؟

3. والراجل السعودي باعت التأشيرة عليا انا مش على مكتب سفريات وبيقول انه عامل وكالة في المحكمة ليا ... هل الكلام ده صحيح ؟؟ وهل ينفع ان انا اللي اخلص التأشيرة بدون مكتب سفريات؟؟

انا عارف ان اسألتي كتير بس انا متأكد ان الناس اللي هنا كلها اخواتي وهيساعدوني ... وشكراً

[shabara]

ايه يا جدعااااااااااااااااااااااان محدش هنا ولا ايه؟؟؟؟؟؟؟؟؟؟؟؟؟؟؟

[DIA ELDIN]

1 - هتجيب استمارة بطاقة وتكتب فيها عامل وتروح نقابة العمال وتختمها من هناك هتطلع البطاقة عادي مفيش اي مشاكل وعن طريقها تقدرة تطلع جواز السفر

بس انت موضحتش هيا عامل عادي ولا اية بالظبط - في عامل زراعي - عامل منزلي اتأكد الاول

2 - المفروض انك هتروح تعمل تحليل الفيروس والفيش الجنائي والكشف الطبي

3- لا طبعا الوكالة لازم تكون على مكتب سفريات - مكتب هنا بيوكل مكتب هناك - لان السفارة السعودية لا تتعامل مع افراد

والله اعلم

[shabara]

شكراً على الاهتمام والرد .. بالنسبة للتأشيرة هيا عامل بس ... اما بالنسبة للوكالة الراجل بيقول انه عاملها بإسمي عنده في المحكمة ... هل الكلام ده صحيح ؟؟؟

[DIA ELDIN]

اما بالنسبة للوكالة الراجل بيقول انه عاملها بإسمي عنده في المحكمة ... هل الكلام ده صحيح ؟؟؟

اعتقد ان الكلام دا غير صحيح او انت اللي فهمت غلط والله اعلم

للرفع لاستاذنا سي السيد هوا اللي يقدر يفيدك

[shabara]

بس على فكره انا شفت واحد قبل كده في الجوازات كان برضو بيخلص الورق في القنصليه بدون مكتب سفريات وواحد صديقي برضو قالي نفس الكلام اصل ايه المشكله في كده؟؟؟

[شاب مصري]

حاول تطلع على مسمى تاني غير عامل والله اعلم هيكون افضل ان شاء الله ووريه العين الحمرا من الأول وانك لا تتنازل ومش اي شئ تقبل بيه.

[hosiny]

شوف يا سيدي ممكن يعملك توكيل زي ما بيقولك انت تخلصه بنفسك لو هيا تأشيرة فردية يعني مفيش فيها حد غيرك لان غالبا بيلاقي التأشيرات اللي بتطلع من مكتب العمل في السعودية طالعة علي هيئة قائمة فيها كل الفيز التي تم منحها للسعودي من كل البلادي

[عصام أبوالفتح]

دور يا أستاذ على شغل لمؤهلك العملى .. مش تنزل لمستوى العمال البسطاء وتنافسهم ..

ابحث جيداً لأنك لم تفعل

[Mohamed Zahran]

حرام يا جماعه اللي بيحصل ده

يا أخ محمد انت هاين عليك كده انك ببساطه تلغي مؤهلك العلمي وتتعامل كعامل بسيط وكل المشكله إنك عايز تعرف تعمل كده إزاي

أنصحك بإعادة التفكير في الموضوع كله

[shabara]

السلام عليكم ورحمة الله

يا جماعة التأشيرة طلعت عامل منزلي ومش عارف اغير البطاقة عامل منزلي لأن المهنة دي مش موجودة عند الحكومة الرشيدة بتاعتنا ينفع اعمل البطاقة والجواز عامل بس وهل هتنفع في القنصلية ولا لأ ........ وشكراً

[se_ Elsyed]

السلام عليكم ورحمة الله

يا جماعة التأشيرة طلعت عامل منزلي ومش عارف اغير البطاقة عامل منزلي لأن المهنة دي مش موجودة عند الحكومة الرشيدة بتاعتنا ينفع اعمل البطاقة والجواز عامل بس وهل هتنفع في القنصلية ولا لأ ........ وشكراً

عامل منزلي = خدام

ولا تعليق أكثر من ذلك ..

وأستعجبت من قول حضرتك

مش عارف اغير البطاقة عامل منزلي لأن المهنة دي مش موجودة عند الحكومة الرشيدة بتاعتنا

وهل تتمنى إن حكومتنا الرشيدة كما وصفتها تطلع ناس بمهنة خادم للرجال وخادمة للنساء يا أخي الكريم ؟

حتى لو كنت هاتشتغل هناك طبيب أنف وأُذن ... فهل ترضى إن مهنة زي دي تبقى في جميع أوراقك الرسمية طول عمرك في الغربة وتُعامل من الجهات الرسمية على إنك خادم ؟

فإذا كنت ترضى على نفسك كده يبقى إبدء من دلوقت مخاطبة رئيس الوزراء ووزيرة القوى العاملة بضرورة إدراج تلك المهن في حسابتهم

بالمناسبة مهنة عامل منزلي ، سائق خاص ، عامل زراعي أو حارس .. كلها لما تمسك الكهربا بإيدك ما تعرفش تغيرها ولا تُصدر رخصة قيادة ولا تعمل زيارة عائلية ولا أستقدام ولا تعرف تتحرك بين دول التعاون الخليجي لو حبيت تروح الإمارات مثلاً او البحرين .. إلخ

بس على فكره انا شفت واحد قبل كده في الجوازات كان برضو بيخلص الورق في القنصليه بدون مكتب سفريات وواحد صديقي برضو قالي نفس الكلام اصل ايه المشكله في كده؟؟؟

مستحيل ودي فتاوى غير شرعية ومافيش دليل على الكلام ده

[kingsabry]

أنا هقولك كلمتين و بس :::

ما تفرحش ان انت جاي السعودية وخلاص .. فيه كتير زيك عملوا نفس موقفك ده .. ومكملوش سنه هنا حرام عليك .............. ده أولا

ثانيا .. الفيز الحره كتير اصبر شويه وهتلاقي فيزا كويسه . تيجي بيها تشتغل اللي انت عاوزه . ومهنه ممكن تتغير مش زي المهنة دي .. أنا استغربت لما قرأت المهنة دي .. للدرجة دي احنا رخاص بيجيبوا من مصر عامل منزلي ..

سبحان الله

تم تعديل 25 أكتوبر 2008 بواسطة kingsabry

[ozoozo]

ياجماعه مادوسوش علي الواد جامد كده انتو ماتعرفوش الظروف عامله ايه في مصر انا كنت بقبض قبل ماجي 2000 جنيه وكانو مكفيني انا ومراتي وابني علي حد الكفاف

تم تعديل 26 أكتوبر 2008 بواسطة ozoozo

[shabara]

طب والحل ؟؟؟ اعمل في التأشيرة دي معايا ارميها يعني ؟؟؟ مع العلم اني مش دافع فيها مليم .... وهل فعلاً مبتتغيرش مع العلم اني هوثق الشهادة ،، وهل في حد سافر كده ومعرفش يغيرها هناك ؟؟ وبعدين الراجل اللي باعت التأشيرة دي معندوش مؤسسة يجيب عليها تأشيرة زي الناس ولسه مفتحش المحل الخاص بصيانة الحاسب مستني أما انا اروحلة علشان افهمه يفتح ايه بالضبط وبعد مده انقل المهنة على اساس المحل .... علشان يبعتلي التأشيرة عملها على البيت بتاعه .... يعمل ايه ؟؟؟؟

[se_ Elsyed]

طب والحل ؟؟؟ اعمل في التأشيرة دي معايا ارميها يعني ؟؟؟ مع العلم اني مش دافع فيها مليم .... وهل فعلاً مبتتغيرش مع العلم اني هوثق الشهادة ،، وهل في حد سافر كده ومعرفش يغيرها هناك ؟؟ وبعدين الراجل اللي باعت التأشيرة دي معندوش مؤسسة يجيب عليها تأشيرة زي الناس ولسه مفتحش المحل الخاص بصيانة الحاسب مستني أما انا اروحلة علشان افهمه يفتح ايه بالضبط وبعد مده انقل المهنة على اساس المحل .... علشان يبعتلي التأشيرة عملها على البيت بتاعه .... يعمل ايه ؟؟؟؟

يا أخي الكريم لا نريد تكرار الكلام ..

المهنة لا يُمكن تغييرها ..

ولو إشتغلت في محل لأجزة الكمبيوتر .. معنى كده إن إنت بتبقى في ملطش وشرطة الجوازات كل شويه هاتنط عندكم وأول حاجه بتشوفها هي مهنتك .. فول إنت مهنتك " عامل منزلي " يبقى هاترد تقول لهم بتعمل غيه في المحل ؟

عامةً القرار لك في النهاية وإنت حر

[عصام أبوالفتح]

قوله مينفعش أزور ورق عشان اسافر .. وخليه يبعتلك زيارة شخصية لمدة ثلاث شهور .. مش هاتكلفه ولا تكلفك حاجة .. توضب معاه الوضع ويفتح المحل وبعد ما يطلع سجل وفيزا ادارى للمحل تاخدها على مصر وترجع تشتغل معاه بمهنتك .. وبكرامتك

[se_ Elsyed]

قوله مينفعش أزور ورق عشان اسافر .. وخليه يبعتلك زيارة شخصية لمدة ثلاث شهور .. مش هاتكلفه ولا تكلفك حاجة .. توضب معاه الوضع ويفتح المحل وبعد ما يطلع سجل وفيزا ادارى للمحل تاخدها على مصر وترجع تشتغل معاه بمهنتك .. وبكرامتك

لو فرد او مؤسسة صغيرة .. لن يُعطى موافقة على زيارة تجارية يا عصام ..

فمن أساسيات قبول الزيارة التجارية من قِبل وزارة الخارجية هو ذِكر سبب مقنع للزيارة ..

فبالتالي ده فرد عادي .. هايعمل زيارة تجارية لشخص من خارج المملكة ليه ؟

أو حتى لو عنده مؤسسة صغيرة عبارة عن محل لبيع إكسسوارات الكمبيوتر ... برضوا هايحتاج زيارة تجارية ليه ؟

وعشان كده هو ما عرفش يطلع تأشيرة غير بتاعت الخدام دي .. وله الحق في نوع اخر من التأشيرات وهو من نوعية " سائق خاص "

بس بيني وبينك يا أخ شبارة .. لو الراجل ده ثقة قوي قوي قوي - شوفت أنا قلتها 3 مرات إزاي ؟ - يبقى تعالى وجرب حظك ... ولو الأمور مشيت يبقى الراجل ده يشوفلك تأشيرة بمهنة كويسة .. أو إنت تدور في السوق وبعدين تنزل بها وترجع تاني ...

وإوعى يكون معشمك بشراكة بينكم أو نسبة بالأرباح بوئيئي - شفوي يعني وكلام فض مجالس - .. لإن لو الأمور مشيت معاكو والبليه لعبت .. فهايظهر وجهه الحقيقي وهايقول لك بالفُم المليان ساعة الجد " إنت مجرد خدام عندي " وبالتالي غوعى تفتح بؤك وتقول نسبة من الأرباح أو مش عارف إيه ، و أنا بأقولها لك يا ريس في وشك من دلوقت أحسن ما تيجي هنا وتشتكي لنا وتقول شوفوا لي حل وأنا عايزة اتطلق ;) .. أنا وشفت نماذج هنا بعدد شعر راسي ... وأنا شعري تقيل أساساً وبيعمل لي مشاكل مع الحلاقين ... فتلاقي صيدلي من دول يتفق مع صاحب الصيدلية إن العمل يكون مقابل نسبة من الأرباح وتلاقيه يموت نفسه في الشغل .. وساعة الجد بيلاقي مكافآته عبارة عن تأشيرة نهائي وشلوت طائر حائر مع ون واي تيكيت وتعيش إنت يا حج .. وكذلك رأيته مع شركاء في شركات تجارية أفنوا فيها عمرهم وساعة الفلوس بتعمى النفوس وتطلع الفئوس لتهوي على الرؤوس - أنا بقيت أقول شعر مُقفى يا رجالة ..

يعني لو كانت ظروفك اللي إنت ادرى بها تجعلك تقبل مثل هذه المهنة .. يبقى كل شاردة وواردة لازم تكون مكتوبة في ورق رسمي يا معلم ... لإن ساعة الجد برضوا لن ينفعك أي شيء ..

[DIA ELDIN]

اخي العزيز اعتقد ان مهنة عامل بس اللي انت تقدر تطلعها من نقابة العمال هتقضي المصلحة ولكن اسأل المكتب الاول اللي جيالك علية التأشيرة وقبل اي حاجة صلي استخارة

ربنا يوفقك

[عصام أبوالفتح]

استاذنا س س انا قولت زيارة شخصية مش تجارية ومش عمل .. ده رابط لانواع الزيارات من موقع الخارجية

https://visa.mofa.gov.sa/

انا رأيى انه هيندم ندم عمره لو راح بتاشيرة خدام .. ولو كان خدام فى مصر .. أكرمله .. بدل مايتبروز بيها فى المطار ومن بعدها .